Romanos 13

1O uchak kiya iwib' chukojik i atb'al tzij chi o chwach i jyub' ta'aj, man are i Dios kojownaq i atb'al tzij piwi. 2Rumali chi pachin kukoj ti atb'al tzij, ke'eloq kuqelo wach taq uyijb'am i Dios. Pachin kkojon ti che ile; kya' ni uri utojb'alil che. 3Man i atb'al tzij keroksaj ti il ni'pa i kki'an i utz, xwiri ni'pa i kki'an i utz taj are i kkixij kib' che i atb'al tzij. We kawaj kaxij ti awib' che i atb'al tzij, cha'ana uri i utz. We keje ile ka'ano, chom uri alapik k-anik. 4Man i atb'al tzij chi uya'om i Dios pawi, ile re anb'al utz chawe. Xwiri we utz ti ka'ano, lik chaxija awib'; man Ire to' ti yatal upatan. Ire lik yatal pu'ab' chi k-on uchak chrij i Dios, xaq yatal pu'ab' uya'ik utojb'alil chke i je utz ti laj taq winaq. 5Rumali, o uchak chikojo wach kub'ij i atb'al tzij. Keje ile kpe ti tojb'al mak piwi; xwi ta la ile, xaq lik qeta'am chi lik o chqaqul u'anik i suk'ulik. 6Are rumali chi yix kitoj i alkawal che i atb'al tzij; man ike kki'an kichak chrij i Dios, lik xwi kki'an i je taqtal che rumal i Dios.

7Chi'ana i usuk' pacha i kmajawik ku' i winaq. We tojonik ru' i atb'al tzij, chitojo; we kmajawik kitoj i k'ijib'al re ik'ay, chitojo; we kmajawik kiya u'ij i jun winaq, chiya uri u'ij; we kmajik chi kisipaj jun b'iroxik che jun, chisipaj.

8We o ak'as ru' jun winaq, chatojo. Xaq keje ile, pacha o jun qak'as chqawach are iri: Are i k'ax chqana qib' chqawach. Man jun, we k'ax kuna ulok'anij, ktijin uri chu'anik wach usuk' i atb'al tzij tz'ib'tal kan rumal i mam Moisés. 9Man keje iri kub'ij i tzij pixab': We at k'ulinaq chik, mamin awib' ru' jun chik; matkamsanik, ma'an ela', marayij uwach ub'itaq re jun chik. Iri ke'eloq chi we jun lik k'ax kuna ulok'anij pacha k'ax una'ik rib' ire ku'ano, ktijin uri chu'ankil wach kub'ij i tzij pixab'. 10Pachin o k'axnab'al uk'ux, nti xaqmanal uri ku'an che ulok'anij; we lik o k'axnab'al k'uxij, kkojon uri che ronojel utzij upixab' i Dios.

11Chikojo retalil che taq i ij chi oj o wi wo'or; kmajawik kk'un saq chqawach. Chqila ub'e chi i qelb'al chisaq naqaj chik o wi chqe; mas naqaj chik o wi chwach are xqakoj utzij i Dios. 12Are i ij oj o wi ri, pacha jun a'ab' ya kik'awik, ya kpe usaqirik. Rumali, o uchak kqo'taj kan u'ankil wach taq i kki'an i winaq pa equmal. Chqato qib' ru' u'ankil i utz pacha ku'an jun achi chi yij che i ch'oj, kuto rib' ru' uch'ich'. 13Oj o chik pa saq, chom chqa'ana uri, mqa'an chik i utz taj. Mqaya qib' chi lik arewi o kojk'achir taq chuyijb'axik nimaq taq wa'im tzukb'al re i kikotemal, mqaya qib' che ab'arik, mqaqajsaj qa'ij ku' i winaq chi oj k'ulinaq ti ku' xaq keje ixoqib', mkiya kib' chu'anik i utz taj; mqatzukuj ch'oj, mqa'an ktitat qapam che wach taq o ru' i qalok'anij. 14Xwiri chikowij iwib' che i Ajwal Jesucristo, xaq mich'ob' chik ujachik iwib' chu'ankil i utz ti laj taq urayijb'al ich'akul.

Currently Selected:

Romanos 13: ACHICUB

Highlight

Copy