Romanos 12

K'aslemal k'ak' chwach i Dios

1Ix, wachalal chwach i Cristo, lik kintz'onoj chiwe ru' rutzil uk'ux i Dios chi lik chijacha iwib' ru' ronojel ik'ux che i Dios. Chisujuj iwib' che Ire pacha jun sipon k'aslik. Chijacha ik'aslemal che, lik ch'am, lik chom chwach Ire. Ile are saqil laj kojb'al u'ij i Dios. 2Mi'an che ik'aslemal pacha to' ix re uwach i jyub' ta'aj. Are chiya ni che i Dios kujalwachij ik'aslemal, man keje ile kiwetamaj uri wach kraj i Dios pik'aslemal; kiwetamaj wach i utz, wach i chom, wach i suk'ulik kril Ire.

3Kinb'ij ni chiwe wo'or, i Dios, rumal i rutzil uk'ux, uya'om chinqul ub'ixkil iri: Mich'ob' yix we utz taq kixch'ob'on mas chrij i yatal chiwe kich'ob'o. Wach taq i yatal chiwe rumal i Dios chijujunal, china uri ub'e we i Dios uya'om ukowil ik'ux chu'anik. 4Keje pacha u'anom i qach'akul chi xa jun xwiri k'iyal taq chapawnaq. O qajolom, o qab'a'wach, o qa'ab', o qaqan; ile lik xaqjun i kichak chkijujunal. 5Xaq keje uri yoj le; oj k'i, xwiri xa oj jun ch'akulaj antal chqe qonojel ru' i Cristo; man lik qonojel is kqariq qachak che i ch'akulaj.

6I Dios, rumal i rutzil uk'ux chqe, jalajuj taq i anik uya'om chqe kojtiki che; we uya'om chqe chi kojtiki chub'ixkil chke i winaq wach utzijom Ire chqe, chqa'ana uri ru' ronojel ukub'ib'al qak'ux che i Jesucristo. 7We i Dios uya'om chqe chi kojtiki chkito'ik i winaq, chqa'ana uri ru' ronojel qak'ux. We uya'om chqe oj ajk'utunel, utz u'anik uri chqa'ana. 8We uya'om chqe chi kojtiki chuya'ik ukowil qak'ux chqawach, lik chqa'ana uri. We uya'om chqe chi kojtiki chkito'ik i nib'a'ib', lik ru' ronojel qak'ux cheqato. Jun, we aj-atzil, chu'ana pacha i usuk', o we i Dios uya'om che chi aj-anol utz chke i kkitij uyej, chkikot uri chu'ankil ile.

I rajwaxik re i k'aslemal k'ak' chwach i Dios

9Lik k'ax china iwib' chiwach lik ru' i saq laj tzij, are tzel chiwila ni'pa i utz taj, lik mijek' iwib' che i utz. 10K'ax china iwib' chiwach pacha iwatz icha' iwib'. Chiya ik'ux chuya'ik i'ij chiwach.

11Lik chikoch'ij ik'ux chu'ankil uchak i Ajwal; lik mik'ayo, chi'ana ru' rutzil uk'ux.

12Chixkikotoq, man iweta'am chi kiriq ni utz chi uch'ob'om i Dios chiwe. We o k'ax kpe piwi, chich'ija ru' ukowil ik'ux. Mixuxlan che i lapanik ru' i Dios.

13Ni'pa i o iwu', chiya jutaq b'i' ke i o rajwaxik chke, cheito; xaq chiya kiposar ike chi keupon iwu' chi iwachoch.

14We o ketzukuw i k'ax piwi, yix chitz'onoj i utz pkiwi ike. Mitz'onoj i tojpen.

15We jun kikotik, chixkikot ru'; we jun ko'ik, xaq chixo' yix ru'.

16Xaqjun uk'axnab'al ik'ux china chiwach. Mi'an to' nim che iwib'; chi'ana xaqjun che iwib' ku' nti ki'ij. Mich'ob' yix we lik o ino'oj.

17We o jun ku'an jun utz taj chiwe, yix mi'an jun utz taj che ire. Are chib'isoj u'ankil i utz chkiwach konojel i winaq. 18Chikoch'ij iwib' chujek'ik iwib' che i ch'oj, man keje ile, chom kixk'iji chkiwach konojel. 19Ix, wachalal chwach i Cristo, we o jun ku'an umak chiwe, mitzalij uwach che. Chiya pu'ab' i Dios, are Ire kyaw utojb'alil. Man chupam uwuj i Dios, keje iri tz'ib'talik: “Xwi pin-ab' yin o wi utzalijb'al che, we o jun u'anom umak; xwi yin kmajawik kinya i tojb'al che, xcha i Ajwal.” 20Xaq kub'ij: “We o jun tzel katrilo, we knumik, chatzuqu; we kk'atik, chaya uya'; man keje ile ka'an ni che chi ku'an kaqchinchoj upalaj rumal uk'ix”#12.20 Keje ile tz'ib'talik: Proverbios 25.21-22. 21Miya che i utz taj kixuch'ako; lik are chi'ana i utz, sachb'al re i utz taj.

Currently Selected:

Romanos 12: ACHICUB

Highlight

Copy