Marcos 13

I Jesús kub'ij chi rachoch i Dios kwulijsax na

1I Jesús are xel li prachoch i Dios, jun chke utijoxelab' xub'ij che:

—¡Tijonel, chawila pe i ja ri re i rachoch i Dios, lik chom! ¡Chawila i ab'aj o che, lik chomiq!

2Are uri i Jesús xula' uwach che:

—I nimaq taq ja chi kawilo le, mijun ab'aj re ile kkanaj kan puwi jun chik ab'aj, lik ronojel ketzaq na loq man lik kwulij na —xcha.

Jalajuj taq k'utb'al re uk'unik i k'isb'al ij

3Te'uri juntir xe'e chwi jyub' Olivos chi o chwach i rachoch i Dios. Are xkub'i i Jesús, are uri ma Pedro, ma Jacobo, ma Wan xaq ma Andrés, xetejeb' pan ru' xkitz'onoj che, ani'al: 4¿Junpa kuk'ulmaj ile chi xab'ij le? Xaq ¿Wach i retalil kya' chqe we ya kqil ronojel ile? Xecha.

5I Jesús xula' uwach chke: Chi'ana kwent iwib' man keje ile kixt'ortaj taj. 6Man je k'i kek'un ni pinb'i yin, kkib'ij na chi je are i Cristo. Rumali chi lik k'i i winaq ket'ortaj ni kumal.

7Yix, are kita utzijol chi o nimaq taq ch'oj jewa xaq jela, mixij iwib' rumal man lik kuk'ulmaj ni ile, xwiri are ti k'isb'al re uwach i jyub' ta'aj. 8Man jun tinimit ku'an ni ch'oj chrij jun chik tinimit; xaq kwalij ni jun ajawinel chu'anik ch'oj chrij jun chik ajawinel. Xaq kpe ni nimaq taq ukab'raqan pa jalajuj taq tinimit xaq kpe ni wa'jal. Xwiri ronojel ni'pa ile xa are ujeqanik i k'ax chi kpe ni chwach i jyub' ta'aj.

9Chi'ana kwent iwib' yix man kixkijach ni pu'ab' i atb'al tzij; xaq kki'an ni k'ax chiwe pa jalajuj taq ja re molb'al ib' ke i judío. Kixsik'ix ni chkiwach i atol tzij xaq chkiwach i ajawinelab', xa wumal yin. Keje ile yix kixtiki ni chusaqixik chkiwach ike, ronojel ni'pa wach iwilom xaq wach iweta'am chwij yin. 10Xwiri chuxe'el uk'unik i k'isb'al ij, lik rajwaxik kpaxsax ni uwach i utz laj tzij k'ak' re i Dios chke konojel i winaq chwach i jyub' ta'aj. 11Lik mixok il che wach taq kib'ij are kixjach pki'ab' i atol tzij, lik xwi chib'ij wach kuya i Dios chiwe chi kib'ij na, man ix are ti yix kixch'awik, are ni Lo'laj Utewal i Dios kyaw i tzij pichi' wach kib'ij. 12O winaq chi katz kicha' kib' kekijach ni katz kicha' pki'ab' i je ajch'oj chkij, kamsab'al ke; xaq o qajawxelab' chi keje kki'an ile chke i kak'al, xaq o ak'alab' kki'an che kib' je ajch'oj chkij i kiqajaw i kichuch, kekijach na chke ike kamsawik. 13Konojel i winaq re uwach i jyub' ta'aj tzel ni kixkilo wumal yin; xwiri, pachin jun kuch'ij ronojel ni'pa i k'ax le k'a pa k'isb'al ij re uk'aslemal, lik ktotaj ni uri.

14I profeta, mam Daniel, utz'ib'am kanoq wach uk'unik: Xub'ij ire chi koksax ni jun tzel laj qajsab'al re u'ij i rachoch i Dios che i k'ijib'al chi kmajaw ti che. Are kiwil yix ile tak'al chila, ni'pa i je o pa jyub' Judea, che'anmaj uri chwa taq jyub'. Ni'pa i kkajlaj i tziji, chkita usuk'. 15Xaq ni'pa je o puwi i kachoch meqaj chaloq xaq me'ok chik chupam kachoch chuk'amik taq jun b'iroxik. 16Xaq pachin o pa taq es mitzalij chaloq xaq mitene k-e chik chuk'amik u'u'. 17Xwiri ¡Lik to' kiwach ixoqib' che taq i ij le chi je raxwinaq, xaq ixoqib' chi k'a o kak'al ketz'umanik! 18Chitz'onoj che i Dios chi muk'ulmaj ile pa alaj. 19Man che taq i ij le lik nim ni uyej kpetik, chi lik u'anom ti ile ni'pa uyijb'axik i jyub' ta'aj rumal i Dios; xaq kpe ti chik ile k-on panoq. 20I Ajwal we ku'an ti che chi xa attal ij kuch'ij i uyej le, lik kekam ni uri konojel i winaq. Xwiri ku'atij ni rumal i k'axnab'al uk'ux chke i je re ire, chi je ucha'om.

21Rumali, che taq i ij le we o taq jun kub'ij chiwe: “Chiwila pe', i Cristo riy oliki”, xaq we kkib'ij: “Ley olik le”, lik mikojo. 22Man kek'un ni jalajuj taq t'oronel chi kki'an che kib' pacha taq je Cristo, xaq kek'un jub'an chik chi kki'an che kib' pacha profeta; xaq kki'an ni jalajuj taq nimaq taq il, man kkaj kit'orik ni'pa je re i Dios, chi lik je u'ulum ire. 23Rumali lik ¡Chiwila iwib'! Man ronojel ni'pa ile lik inb'im chik chiwe chuxe'el.

Uk'unik chik i pacha Winaq chi Xolalaxoq chwach Ulew

24Xwiri che taq i ij le are kik'aw ronojel ni'pa i uyej, i ij k-equmar na, xaq i ik' ktzun ti chik, 25i ch'umil ketzaq na li chikaj xaq ronojel ni'pa yawnaq ucho'ab' i kaj ksiksax ni rumal ucho'ab' i Dios. 26Are uri k-iltaj ni i pacha Winaq chi Xolalaxoq chwach Ulew chi kk'un pa sutz' ru' i nim laj u'ij uchomal. 27Te'uri keutaq u-ángel chkik'amik ni'pa i je o chila puqajb'al ij, ni'pa i je o chila prelb'al ij, ni'pa i je o chila pa moxab', xaq ni'pa i je o chila pa wiqab'. Konojel is kmol ni kichi' man ike le je are i ucha'om i Dios chi je re ire. I winaq le chi kmol kichi' nti k-ono we lik naj xaq we naqaj je o wi che uwach i jyub' ta'aj xaq che i kaj.

28Chixnaw che uche'lal higo, chi are k-on ch'u' u'ab' xaq are kujeq li relik utux, are kiwilb'ej re uri ile chi ya knaqajab' i sa'ij. 29Xaq keje ile, are kiwil ronojel ni'pa xinb'ij chiwe chi kuk'ulmaj na, are ilb'al re uri chi naqaj chik o wi uk'unik i pacha Winaq chi Xolalaxoq chwach Ulew. 30Lik saq laj tzij kinb'ij chiwe, chi ronojel ni'pa inb'im le; kuk'ulmaj na chuxe'el kikamik i winaq re wo'or. 31I kaj xaq i ulew ksach ni kiwach; xwiri, intzij Yin ksach taj ronojel ij saq.

32Xwiri, mijun reta'am pachike ij xaq pachike or kuk'ulmaj ile. Mitene i ángel xaq mitene yin chi in Uk'ojol i Dios, lik xwi i Ta chikaj reta'am.

33Rumali chixk'ask'atoq xaq chi'ana kwent iwib' man iweta'am taj junpa kuk'ulmaj ile. 34Ile ke'eloq pacha jun achi chi enam re k'a naj, kuya kan rachoch pki'ab' i rajchak. Xaq kuya kan kichak chkijujunal chi kki'ano. Xaq kub'ij kan che i chajal chi chk'ask'at che i chajinik. 35Xaq keje chi'ana yix ile, chixk'ask'atoq man iweta'am taj wach onom or kk'un i rajaw ja, are kok a'ab', tik'il a'ab', kch'aw i teren, xaq we ksaqirik. 36We xaqte'et kk'un loq, moqxa kixuriqo chi kixwarik. 37Xwi ti chiwe yix kinb'ij wi i tziji xaq chke konojel: ¡Lik chixk'ask'atoq! Keje ile xub'ij i Jesús chke konojel.

Currently Selected:

Marcos 13: ACHICUB

Highlight

Copy