Marcos 14

I je ajch'oj chrij i Jesús xkich'ob' uchapik

1Keb' ij chuxe'el i nima'ij Pascua, are ktijaw i wa re trigo chi nti kunb'al ru' re kuwalijsaj upam. Are uri i kaj-atzil i rajpatan i Dios xaq i tijonelab' re i atb'al tzij kkitzukuj wach uchapik i Jesús kki'ano ru' jun t'oronik kamsab'al re. 2Xwiri, xkib'ij chkiwach:

—Mqachap pa nima'ij, moqxa kech'oqow i uk'iyal winaq rumal —xecha.

Jun ixoq xukoj kunb'al muy puwi i Jesús

3I Jesús x-e pa komon Betania chi rachoch ma Simón, chi o te'eq yob'il che utz'umalil kecha che. Are je kul chi mexa xok b'i jun ixoq ku' rok'am b'i jun b'axo antal che ab'aj pacha saqcho', nojnaq che i kunb'al chi lik muy xaq lik paqal rajil. I kunb'al muy le che i kotz'ij nardo elsam wi. Xu'upij uqul i b'axo te'uri xujam i kunb'al muy che ujolom i Jesús. 4Je o jujun chke i je o chila xpe koywal, xkib'ij chkiwach:

—¿B'uchak xu'an k'ax che i kunb'al muy le? 5Utz teneri ile wetene xuk'ayij kolo ktoj neri pacha ktoj jun junab' chak tob'al ke i nib'a'ib' —xecha.

Lik xkich'ach'a ixoq le. 6Xwiri i Jesús xub'ij chke:

—Sta ile, ¿B'uchak kich'ich'a? Man i xu'an ixoq chwe le, lik utz. 7Man i nib'a'ib' lik arewi je o ni iwu', are kiwaj u'anik i utz chke chi'ana uri, xwiri yin ronojel ti ij in o iwu'. 8I ixoqi xu'ano wach i xtiki chu'anik, xukoj kunb'al muy chwij, ke'eloq chi xuyijb'a inch'akul chuxe'el inmuqik. 9Lik saq laj tzij kinb'ij chiwe, wach xu'an ixoqi lik kkuxtax ni chila xaipa kb'ix wi utz laj tzij k'ak' re i Dios chwach ronojel i jyub' ta'aj —keje ile xub'ij i Jesús.

Ma Judas xuk'ayij i Jesús

10I ma Judas Iscariote chi jun chke i kab'lajuj utijoxelab' i Jesús, x-e chusujuxik i Jesús chke i kaj-atzil i rajpatan i Dios jachb'al re pki'ab'. 11I kaj-atzil ajsujul sipon are xkita wach xub'ij ma Judas, lik xekikotik xaq xkib'ij che chi kkiya pwaq che. Are uri ma Judas xok chutzukuxik wach ujachik i Jesús ku'an chke.

Uwa'im i Jesús ku' utijoxelab'

12I nab'e ij re i nima'ij chi ktijaw i wa re trigo chi nti kunb'al ru' chi xaq are ij ile chi kkamsax i chij re i nima'ij Pascua. Are uri utijoxelab' i Jesús xkitz'onoj che:

—¿Ipa kawaj wi yet chi kqayijb'a wi i awa'im re i nima'ij Pascua? —Xecha.

13Are uri i Jesús xeutaq b'i keb' chke utijoxelab' pa tinimit xaq xub'ij chke:

—Jix pa tinimit, chila kik'ulaj wi jun achi reqam jun eqb'ala ya. Chiterb'ej b'ik. 14Xaq chixok che i ja ipa kok wi achi le, chib'ij iri che i rajaw ja: I Tijonel kraj kretamaj: Ipa o wi i k'ijib'al chi kintij wi i ral chij re Pascua ku' intijoxelab'; keje ile xub'ij loq. 15I rajaw ja le kuk'ut ni jun nim laj k'ijib'al chiwe, chi o che ukab' le, i k'ijib'al le lik chom uyijb'axik antal che, chila uri chiyijb'a wi ral qachij —xcha i Jesús chke.

16Are uri i tijoxelab' xe'e pa tinimit; are xeupon chila xkiriqa ronojel pacha ub'im i Jesús chke. Te'uri ike xkiyijb'a i wa re i nima'ij Pascua.

17Are xok a'ab' xupon i Jesús junam ku' i kab'lajuj utijoxelab'. 18Tz'aqat are ketijin chwa'im chwi mexa are uri i Jesús xub'ij chke:

—Lik saq laj tzij kinb'ij chiwe, chi jun chiwe yix chi kixtijin chwa'im wu' kinujach ni pki'ab' i je ajch'oj chwij —xcha i Jesús chke.

19I tijoxelab' are xkita ile, lik xe'ok che i b'is xaq chkijujunal xe'ok chutz'onoxik che:

—¿Moqxa yin? —Xecha.

20I Jesús xula' uwach chke:

—Jun chiwe yix, chi ix kab'lajuj, are i jun chi kumu uwa wu' pa laq. 21I pacha Winaq chi Xolalaxoq chwach Ulew kik'aw ni chupam ronojel ni'pa tz'ib'tal kan chupam uwuj i Dios. Xwiri ¡To' uwach i jun chi kujach pki'ab' i ajch'oj chrij! Lik utz te'eq che i achi le matiji xalaxik —xcha i Jesús chke.

22Tz'aqat are ketijin chwa'im, i Jesús xuk'am pan jun wa re trigo, xutioxij che i Dios, te'uri xupiro xaq xuya chke utijoxelab', xub'ij:

—Chichapa i wa re trigo ri; iri are inch'akul.

23Te'uri xuk'am pan i tu'b'al uwa'al uva muqb'am, xutioxij che i Dios, te'uri xuya chke, are uri konojel xkitu'u. 24—Iri are inkik'el chi kyijb'aw i k'ak' trat ru' i Dios, chi xaq kturuw na re tob'al kiwach konojel i winaq. 25Lik saq laj tzij kinb'ij chiwe, chi kintu' ti chik uwa'al uva, k'a kuriqa ni ij chi kintu' tan chik i k'ak' uwa'al uva muqb'am chila pa ajawinik re i Dios —xcha i Jesús chke.

I Jesús xusaqij chi k-uwax ni uwach rumal i ma Pedro

26Are xeutzin chub'ixaxik i b'ix Salmos, xe'e chwi jyub' Olivos. 27I Jesús xub'ij chke:

—Iwonojel yix ksach ni ukub'ib'al ik'ux chwe man keje ile kub'ij uwuj i Dios: Kinkamsaj ni ajyu'ul chij, are uri konojel i chij kekicher nu b'ik. 28Xwiri, are kinwalij che i kamik, nab'e kin-e yin pa Galilea chiwach yix —xcha i Jesús chke.

29Are uri ma Pedro xub'ij che i Jesús:

—Tupu konojel kkisach ukub'ib'al kik'ux chawe, xwiri yin kinsach taj —xcha.

30Are uri i Jesús xula' uwach che ma Pedro:

—Lik saq laj tzij kinb'ij chawe, che i a'ab'i, are k'amaja kch'aw ukamul i teren oxmul kawuwaj ni inwach.

31Xwiri i ma Pedro lik xub'ij chik:

—Tupu kinkam ni awu', yin lik kwuwaj ti awach —xcha.

Xaq keje ile xkib'ij konojel.

I Jesús klapan ru' i Dios chila Getsemaní

32I Jesús junam ku' utijoxelab' xe'e che jun k'ijib'al chi Getsemaní ub'i. Are je o chik chila i Jesús xub'ij chke:

—Chixkul kan chi, tz'aqat kin-e yin chutz'onoxik che i Dios —xcha.

33Te'uri xuk'am b'i ma Pedro, ma Santiago, xaq i ma Wan, are uri i Jesús xuna jun nim laj b'is xaq jun nim laj k'ax puk'ux. 34Rumali xub'ij chke:

—Kinna jun b'is pwanima chi laj kinkam rumal. Chixkanaj kan chi, xaq chixk'ask'atoq —xcha i Jesús chke.

35Are uri i Jesús x-e pan naj jub'i', xxuki'ik, xuqajsaj upalaj k'a chwach ulew, te'uri xok chutz'onoxik che i Dios chi matiji kuriqa i or re i k'ax. 36Xub'ij: “Ta, yet ronojel is kattiki che, chinawesaj chupam i k'ax chi nab'e chinwach, xwiri are ti to' pacha kwaj yin; are cha'ana pacha i kawaj yet”. Keje ile xub'ij i Jesús che uqajaw.

37Te'uri xtzalij chik chila ipa je o wi kan utijoxelab', are uri xeuriqa kewarik. Xub'ij che ma Pedro:

—A Simón, katwar chik, mitene jun or xach'ijo chi katk'ask'atik. 38Lik chixk'ask'atoq xaq chitz'onoj itob'al che i Dios man keje ile kixtzaq ti chupam i tzaqsab'al. Saq laj tzij, yix lik kiwaj utz'onoxik che i Dios, xwiri ich'akul lik nti ucho'ab'.

39Te'uri x-e chik chutz'onoxik che i Dios, xaq xukamulij chik ub'ixkil i tzij chi xub'ij nab'e. 40Are xtzalij chaloq, xeuriq tan chik utijoxelab' kewarik; man i kib'a'wach lik kumutz' rib' rumal i waram; rumali chi lik kkiriq taj wach kkib'ij che i Jesús. 41Are xtzalij chali uroxmul, xub'ij chke:

—K'a kixtijin yix che i waram xaq k'a ix uxlannaq, sta ile, chixwalijoq man xuriq i or chi i pacha Winaq chi Xolalaxoq chwach Ulew kjach ni pki'ab' i ajmakib'. 42Chixwalijoq, jo'; man ya knaqajab' i jun chi kinjachaw pki'ab' ajch'oj chwij —keje ile xub'ij i Jesús chke.

Uchapik i Jesús kumal i ajch'oj chrij

43K'a ktijin ne i Jesús chitzij are xupon pan ma Judas, chi jun chke i kab'lajuj utijoxelab'; je rok'am b'i uk'iyal winaq chi kok'am ch'ich', xaq o kok'am che'. Ike le je taqtal b'i kumal kaj-atzil i rajpatan i Dios, kumal i tijonelab' re i atb'al tzij, xaq kumal unimaqil i tinimit. 44I ma Judas, chi ajjachanel re i Jesús, ub'im chik i tziji chke i ajchapol re i Jesús: “Are i jun chi kintz'ub'aj, are ire le; chichapa, chik'ama b'ik xaq lik miwo'taj chik”. 45Are uri xtejeb' pan ru' i Jesús xaq xub'ij che:

—¡Tijonel!

—Te'uri xutz'ub'aj. 46Are uri xkichap i Jesús xaq xkiyut'u.

47Xwiri, jun chke i utijoxelab' xresaj la li uch'ich', xuselij b'i uxikin utaqon i atz laj rajpatan i Dios. 48Are uri i Jesús xutz'onoj chke i winaq:

—¿B'uchak chi xixk'un yix ru' ch'ich' xaq ru' che' chinchapik pacha taq jun ili'om? 49Ij ij xink'iji chixol prachoch i Dios chuk'utik utzij i Dios chke i winaq, xwiri xinichap taj, man keje ile k-antaj na pacha tz'ib'tal kan chupam uwuj i Dios —xcha i Jesús chke.

50Konojel i tijoxelab' xe'anmajik, xkiya kan i Jesús utukel. 51Xwiri o jun ala chi xwi jun sawan ulik'om chrij, xuterb'ej b'i Jesús; xwiri i ala le xkichapo. 52I ala le xujuruj b'i rib' chupam i sawan, lik keje ile ch'analik x-anmajik.

I Jesús o chwach i atb'al tzij re kki'at tzij unimaqil puwi

53Are uri xkik'am b'i Jesús chwach i atz laj rajpatan i Dios. Chila xkimol wi kib' konojel i kaj-atzil i rajpatan i Dios, konojel unimaqil i tinimit, xaq konojel i tijonelab' re i atb'al tzij. 54I ma Pedro xterej b'i chrij i Jesús chinaj, xok b'i k'a chwaja re i rachoch i atz laj rajpatan i Dios. Xkub'i chila ku' i chajinelab' re i rachoch i Dios, chi ketijin chumi'saxik kib' chi a'.

55I kaj-atzil i rajpatan i Dios le, xaq konojel i jutz'ob'aj unimaqil chi kki'at tzij pkitinimit aj Judío kkitzukuj wach ukojik umak i Jesús ki'ano re kamsab'al re, xwiri xkiriq taj. 56Tupu lik je k'i xkitzukuj umak i Jesús, xwiri xa kuch'ojij rib' kitzij chkiwach. 57Je o jujun xewalijik i xkinojij tzij chrij i Jesús:

58—Yoj xqata chi xub'ij, yin kinwulijsaj ni rachoch i Dios chi ki'anom i winaq; xwiri churox ij kinyak jun chik chi winaq taj ke'anawik.

59Xwiri ru' ti ile lik xjunamtaj ti kitzij.

60Are uri i atz laj rajpatan i Dios xwalij an chkixol konojel i winaq; xutz'onoj che i Jesús:

—¿B'uchak kala' ti uwach? ¿Wach ile chi ketijin chub'ixkil chawij?

61Xwiri i Jesús xaq xula' ti uwach che. Are uri i atz laj rajpatan i Dios xutz'onoj chik che:

—¿Yet at Cristo, chi uk'ojol i lo'laj Dios?

62I Jesús xub'ij: —Yin, yin ile chi xab'ij. Yix kiwil ni i pacha Winaq chi Xolalaxoq chwach Ulew kul puwiqab'im i nim laj Dios chi Ronojel Ktiki Che, xaq kk'un ni chikaj pa sutz' —xcha i Jesús chke.

63Are uri i atz laj rajpatan i Dios xuraqch'ij u'u', k'utb'al re chi lik o roywal; xub'ij:

—Nti chik uchak we kek'un jub'an chik winaq chukojik umak. 64Man yix lik xita wach i tzij xub'ij, i tzij le utz ti laj taq tzij chrij i Dios. ¿Wach kib'ij yix che ile? —Xcha.

Are uri konojel xkib'ij chi lik ajmak, rumali rajwaxik chi kkamsaxik.

65Je o jujun xkijeq uchub'axik upalaj, xaq xkich'uq upalaj che te'uri xkich'ayo. Are uri xkitz'onoj che:

—Chab'ij pe ¿pachin taq xatch'ayawik? —Xecha.

Xaq keje xki'an i chajinelab' re i rachoch i Dios xkich'ay i Jesús che upalaj ru' mo'lem ab'.

I ma Pedro kub'ij chi reta'am ti uwach i Jesús

66I ma Pedro o qaj chwaja ikem, are uri xpon pan jun ixoq chi ajchak prachoch i atz laj rajpatan i Dios. 67I ixoq le are xrilo chi ma Pedro ktijin chumi'saxik rib' chi a', lik xuk'am utaqexik, are uri xub'ij che:

—Yet xaq at rachi'il i Jesús chi aj Nazaret —xcha.

68Xwiri i ma Pedro xruwaj uwach, xub'ij:

—Yin lik weta'am ti uwach achi le; xaq weta'am teneri wach taq i kab'ij chwe le. Te'uri x-e pan chisaq che i elb'al b'ik, are uri xch'aw jun teren. 69Te'uri ixoq le xril chik uwach i ma Pedro ukamul, are uri xujeq ub'ixkil chke i winaq chi je o chila:

—I achi le lik kachi'il i jub'an —xcha.

70Xwiri i ma Pedro xaq xub'ij chik chi reta'am ti uwach i Jesús. X-on chupan jub'i', i winaq chi je o chila xkib'ij chik che:

—Qatzij, yet lik at kachi'il ike le; man at aj Galilea —xecha che.

71Are uri ma Pedro xukuxtaj ub'i i Dios i xub'ij chke:

—Minijek'ja ru' i achi le chi kib'ij, man lik saq laj tzij kinb'ij chi lik weta'am tene uwach —xcha.

72Are uri xch'aw an i teren ukamul; i ma Pedro xk'un chuk'ux wach b'ital che rumal i Jesús: Chuxe'el uch'awik ukamul teren oxmul kawuwaj ni inwach; xb'ix che. Are uri ma Pedro lik xok che o'ej.

Currently Selected:

Marcos 14: ACHICUB

Highlight

Copy