Mateo 25

I tijojb'al tzij chkij i lajuj altom

1 # 25.1 I Jesús xub'ij chik jun tijojb'al tzij chke. U'atb'al tzij i Dios aj Chikaj keje pacha: Lajuj altom chi xe'e che jun k'ulankil. Xkik'am b'i kikantil re aceite xe'e chuk'ulaxik i achi chi kek'uli ru'. 2Jo'ob' chke altom le nti qas kino'oj; xwiri i jo'ob' chik mas o kino'oj. 3I jo'ob' chi nti qas kino'oj, xkik'am tu b'i aceite re i kikantil are xk'is upam. 4I jo'ob' chi o kino'oj xkik'am b'i jujun lamet ki-aceite, xkik'am b'ik to' uwi b'i i o chupam i kikantil. 5I achi chi kk'uli'ik xb'aytajik. Ike xpe kiwaram, xaq lik xewarik. 6Are tik'il a'ab', o i xesik'in chub'ixkil: “¡Ya xk'un i achi chi kixk'uli ru'; jix chuk'ulaxik!” Xecha. 7I lajuj altom xewalijik, xe'ok chuyijb'axik kikantil. 8Are uri i jo'ob' altom chi nti kino'oj xkib'ij chke i je jo'ob' kachi'il chi o kino'oj: “Chisipaj pich' qa-aceite re i qakantil, man ya kchupik.” Xecha chke. 9I altom chi o kino'oj xkib'ij: “Kqaya taj.” Xecha. “Man we kqaya'o, k-on ti qe yoj, xaq mitene iwe yix.” Xecha. “Jix chila ipa kk'ayix wi; chilo'o ni iwe yix.” Xecha. 10Te'uri ike xe'e chulo'ik; are je enaq chulo'ik, xk'un i achi chi kek'uli ru'. Ni'pa i altom chi je yijilik, xe'ok ru' ire pa k'ulankil, are uri xtz'apix i uchija. 11Te'uri xeupon chik i jo'ob' altom chi nti kino'oj, i xkib'ij: “Nim laj winaq! ¡Nim laj winaq! ¡Chajaqa i uchija chqe!” Xecha. 12Ire xula' uwach chke: “Kinjaq taj; man weta'am ti iwach.” Xcha.

13Te'uri i Jesús xub'ij chke utijoxelab': Yix, chixk'ask'atoq, man iweta'am taj pachike ij, pachike or kink'un chik Yin.

Tijojb'al tzij chrij i pwaq

14K-antaj ni uri chi: U'atb'al tzij i Dios aj Chikaj keje pacha iri: Jun achi k-e che jun tinimit k'a naj; xeusik'ij umokom xaq xroqxanij kan upwaq ku'. 15Jun chke xuya lajujwinaq kab'lajujmo' (5,000) saqpwaq che. Xaq i jun chik, xuya chik kan jo'mo' (2,000) saqpwaq che; xaq keje ile che i jun chik, xuya kan lajujwinaq kamo' (1,000) che. Keje uya'ik ile xu'on chke, pacha i kmajaw chke chkijujunal. Te'uri xumaj b'i ub'e. 16I mokom chi xya' kan lajujwinaq kab'lajujmo' (5,000) saqpwaq che, ire xok chi chak ru' i pwaq. Keje ile xuch'ak lajujwinaq kab'lajujmo' (5,000) chrij. 17Xaq keje xu'an i jun chi xya' kan jo'mo' (2,000) che: Xaq xuch'ak chik jo'mo' (2,000) chrij. 18I jun chi yatal jun lajujwinaq kamo' (1,000) che, xa xruwaj upwaq i rajaw uchak; xu'an jun jul i xumuq pulew.

19I rajaw chak xnajtinik; te'uri xk'un chik, xaq xok chi rajlaxik upwaq ku' umokom. 20Nab'e xupon i jun chi uya'om kan lajujwinaq kab'lajujmo' (5,000) che. Ire xujach i lajujwinaq kab'lajujmo' (5,000) chi yatal kan che, xaq xujach i lajujwinaq kab'lajujmo' (5,000) chi uch'akom chik chrij. Xub'ij: “Nim laj winaq, lajujwinaq kab'lajujmo' (5,000) xaya kan chwe, xaq lajujwinaq kab'lajujmo' (5,000) chik xinch'ak chrij.” Xub'ij che. 21I rajaw uchak xub'ij: “Lik utz a'anom. Yet at utz laj mokom; lik aya'om ak'ux chu'ankil pacha i kwaj yin. Lik utz achak xa'an ru' i jub'i' le, rumali, kinya ni mas pa'ab' puwi ile. Chatok loq, xaq chatkikot wu'.” Xub'ij che. 22Te'uri xupon i jun chi yatal kan jo'mo' (2,000) che. Xub'ij: “Nim laj winaq, jo'mo' (2,000) aya'om kan chwe, xaq riy i jo'mo' (2,000) chi xinch'ak chik chrij.” Xub'ij che. 23I rajaw uchak xub'ij: “Lik utz a'anom. Yet at utz laj mokom; lik aya'om ak'ux chu'ankil pacha i kwaj yin. Lik utz achak xa'an ru' i jub'i' le, rumali, kinya ni mas pa'ab' puwi ile. Chatok loq, xaq chatkikot wu'.” Xub'ij che.

24Xaq xupon chik i jun chi yatal lajujwinaq kamo' (1,000) che. Xub'ij che i rajaw uchak: “Nim laj winaq, weta'am chi yet lik at k'an; kamol i tikon chi atikom taj, xaq kamol uwach i tikon chi yet ti amulim. 25Rumali xinxij wib'; xewuwaj apwaq pulew. Chawila riy apwaqi chi aya'om kan chwe.” Xub'ij che. 26“Yet at utz ti laj mokom; lik kak'ayo.” Xub'ij i rajaw uchak che. “We yet aweta'am chi in k'an che inchak, chi kab'ij chi kinmolonik ipa kintikan ti wi, xaq kinmol uwach i tikon chi yin ti inmulim. 27¿B'uchak uri xaya ti inpwaq pa k'olb'al pwaq#25.27 K'ijib'al ipa kkik'ol wi kimer i winaq. man kuch'akb'ej ni mas puwi? Wetene keje ile xa'ano, kinch'ak neri yin ni'pa i xuch'ako junam ru' ile chi inya'om chawe.” Xub'ij che. 28Te'uri xub'ij chke i jub'an chi je o chila: “Chik'ama i lajujwinaq kamo' (1,000) le che; chiya ni che i jun chi o jo'mo' juchiy (10,000) ru'. 29Man jun, we o mas ru', kya' ni mas che; we jun nti qas o ru', ni'pa i o ru' lik kk'am ni che. 30I utz ti laj mokom le, chiwesaj b'i rija; pa equm. Chila ko' wi, xaq kuqach'ach'ej ni uware.” Xub'ij i rajaw kichak chke.

U'atik tzij pkiwi i nimaq taq tinimit

31Are kk'un li Uk'ojol i Winaq chwach Ulew, chi lik sutim rij rumal lo'laj uchomal xaq kumal u-ángel, kkub'i ni uri pukub'ib'al chi o u'ij. 32I winaq re ronojel taq tinimit chwach i jyub' ta'aj kkimol ni kib' chwach. Te'uri kok chujachik kipam, pacha jun ajyu'ul chij keresaj uchij chkixol i chab'at. 33Keuya i chij puwiqab'im; i chab'at keuya pumoxim. 34Te'uri i Ajawinel kub'ij ni chke i je o puwiqab'im: “Utz iwe yix; uya'om ni utzil chomal Inqajaw piwi. Chixpetoq, chixok che i k'ijib'al chi uyijb'am Ire chiwe k'a chuxeb'al li ij saq. 35Man yix, are xintij numik, xiya ni chwe wach i kintijo; are xink'atik, xiya ni inya'; are xintzukuj inposar, xinik'ulaj iwu'. 36Are nti chik in-u', xiya in-u' yix; are in iwab', xinisolij; are in tz'apil prexil, xinisolij.” Keje ile kub'ij i Ajawinel chke. 37Te'uri, i je utz le kkib'ij na: “Nim laj winaq. ¿Junpa xak'ulmaj ile? ¿Chi katnumik, i yoj xqaya chawe wach katijo? ¿Xaq junpa xak'ulmaj ile chi katk'atik, xaq xqaya aya'? 38¿Junpa xak'ulmaj ile chi katzukuj aposar i yoj xqaya chawe? ¿Junpa xak'ulmaj ile chi nti a'u', xaq xqaya ch'uqb'al awij? 39¿Xaq junpa xak'ulmaj ile chi at iwab', xaq at o prexil, i yoj xatqasolij?” Keje ile kkib'ij ni che i Ajawinel. 40Te'uri i Ajawinel kula' uwach chke: “Qatzij kinb'ij chiwe, ni'pa i utzil chomal i'anom che jun i wachalal chwach i Cristo, chi tupu nti qas u'ij, xe'el uri lik chwe yin xi'an wi.” Xcha.

41Te'uri i Ajawinel kub'ij ni chke i je o pumoxim: “Chixel chi chinwach, yix chi ix k'oqtal rumal i Dios. Jix pa a' chi ktoqow ronojel ij saq, chi yijtalik re Itzel junam ku' u-ángel. 42Yin, are xintij numik, yix xiya ti chwe wach i kintijo; are xintij k'atik, xiya ti inya'. 43Are xintzukuj inposar, xiya ti inposar. Are nti chik in-u', xaq nti in-u' xiya'o. Are in iwab', xaq are in o prexil, yix xinisolij taj.” Keje kub'ij ni i Ajawinel ile chke i je o pumoxim. 44Te'uri ike kkib'ij na: “Nim laj winaq. ¿Junpa xatqilo katnumik, o katk'atik, o are katzukuj aposar, o xaq are nti a'u', o are at iwab', o xaq are at o prexil? ¿Junpa xak'ulmaj ile chi xatqato taj?” Kkib'ij ni che. 45I Ajawinel kub'ij ni uri chke: “Qatzij i kinb'ij chiwe: Yix are xiwil jun chi o rajwaxik che, xaq xito taj, tupu nti qas u'ij, xe'el uri chi lik are yin xinito taj.” Kub'ij ni chke. 46Rumali ike ke'e pa tojpen chi nti uk'isik; i je utz ke'ok ni che i kik'aslemal chi nti uk'isik. Keje ile xub'ij i Jesús chke utijoxelab'.

Currently Selected:

Mateo 25: ACHICUB

Highlight

Copy