Mateo 26

I ajch'oj chrij i Jesús xkich'ob' uchapik

1I Jesús, are xutzin chub'ixkil ile, te'uri xub'ij chke utijoxelab':

2—Yix iweta'am, xa keb' ij chik kraj kk'un i nima'ij Pascua. Are uri Yin, chi Xinalaxoq chwach Ulew pacha Winaq, kinjachtaj ni pki'ab' i je ajch'oj chwij man kinkikamsaj chwach i krus —xub'ij chke.

3Xaq che taq i ij le, xkimol kib' i atz laj rajpatan i Dios, xaq i tijonelab' re ujer atb'al tzij, xaq i nimaq taq winaq ke i aj Judío. Xkimol kib' chwaja re i nim laj ja pa o wi i mam Caifás chi atz laj rajpatan i Dios. 4Chila xkiyijb'a wi wach uchapik i Jesús kki'ano ru' jun t'oronik, xaq wach i ukamsaxik kki'ano. 5Xwiri, xkib'ij chkiwach:

—Utz taj kqa'an ile pa nima'ij man k'i winaq je olik, moqxa ke'ok che i ch'oqowik chqij —xecha.

Jun ixoq xutix kunb'al muy puwi i Jesús

6I Jesús o pa komon Betania chi rachoch ma Simón, chi “leproso”, kb'ix che. 7Are uri xtejeb' jun ixoq ru', rok'am jun chom laj b'axo chi yijb'am che ab'aj alabastro, nojnaq che aceite lik muy, chi lik paqal rajil. I Jesús ktijin chwa'im, are uri i ixoq xujam b'i i kunb'al puwi i Jesús. 8I utijoxelab', are xkil ile, xpe koywal.

—¿B'uchak i ixoq le to' xu'an k'ax che i kunb'al muy? —Xecha chkiwach—. 9Wetene xk'ayix ile, lik k'i neri i rajil, tob'al ke i nib'a'ib' —xecha.

10Xuta i Jesús wach kkib'ij xaq xub'ij chke:

—¿B'uchak keje kib'ij ile chrij i ixoq le? I xu'an ire le chwe, lik utz. 11I nib'a'ib', lik arewi je o ni iwu'; xwiri Yin arewi taj in-o iwu'. 12I ixoqi, are xujam i kunb'al muy che inch'akul, utz i xu'ano, man xukunaj b'i inch'akul re muqb'al we. 13Qatzij i kinb'ij chiwe, xaipa kpaxsax wi i utz laj tzij k'ak' elsab'al re i kimak i winaq xaq ktataj ni utzijol wach u'anom i ixoqi chwe. Keje ku'an ile ronojel uwach i jyub' ta'aj, k'unsab'al re i ixoqi chkik'ux i winaq —xub'ij i Jesús chke.

Ma Judas xuch'ob' uk'ayixik i Jesús

14Te'uri, jun chke i kab'lajuj utijoxelab', chi are ma Judas Iscariote ub'i, xelapan ku' i kaj-atzil i rajpatan i Dios. 15Xub'ij chke:

—¿Ni'pa kiya chwe we kinjach i Jesús pi'ab'? —Xcha chke.

Ike xkiya lajuj juwinaq (30) saqpwaq che. 16Are uri i ma Judas xujeq utzukuxik wach i jachb'al re i Jesús ku'an pki'ab'.

I uwa'im i Ajwal

17Xk'un i nab'e ij re i nima'ij chi ktijaw i wa re trigo chi nti kunb'al che. I utijoxelab' i Jesús xetejeb' ru' xaq xkitz'onoj che:

—¿Ipa kawaj wi yet ke'e qayijb'a wi i awa'im re i nima'ij Pascua#26.17 I Pascua le are jun ij chi ktijaw i wa re trigo chi nti kunb'al ru'.? —Xecha che.

18Ire xub'ij chke:

—Jix pa tinimit. Jix chi rachoch jun achi chi o chila xaq keje iri chib'ij che: “Xub'ij li i Tijonel: Ya kuriq i or chwij re inkamik, kub'ij. Chi awachoch yet kqa'an wi qawa'im re i nima'ij Pascua, yin ku' intijoxelab'.” —Xcha chke.

19I utijoxelab' xki'ano pacha i xb'ix chke. Xe'e chuyijb'axik i wa'im re i nima'ij.

20Are xok a'ab', i Jesús o ku' i kab'lajuj utijoxelab' chi mexa. 21Tz'aqat are ketijin chwa'im, xub'ij chke:

—Qatzij i kinb'ij chiwe, o jun chiwe yix kinujach ni pki'ab' i je ajch'oj chwij —xcha.

22Ike, are xkita, lik xeb'isonik. Chkijujunal xe'ok chutz'onoxik che:

—Ajwal, ¿Moqxa yin? —Xkib'ij che.

23Ire xub'ij:

—I jun chi kumu uwa pa laq wu' Yin, are ire uri kinjachaw na. 24Qatzij, Yin chi Xinalaxoq chwach Ulew pacha Winaq, kinkamsax na, pacha tz'ib'tal kan chupam uwuj i Dios, xwiri ¡To' uwach i achi chi kinjachaw ni pki'ab' i ajch'oj chwij! Mas utz ke'el che achi le matiji xalaxik —xcha chke.

25Te'uri xch'aw i ma Judas, chi kjachaw ni Jesús:

—Tijonel, ¿Xatab'a yin kin-anaw ile? —Xcha.

I Jesús xub'ij che:

—Ru' achi' xab'ij.

26Are ketijin chwa'im, i Jesús xuchap jun wa re trigo, xutioxij che i Dios, te'uri xupiro. Xuya chke utijoxelab', xaq xub'ij chke:

—Chitija, iri are inch'akul.

27Te'uri xuchap jun tu'b'al nojnaq che i uwa'al uva muqb'am, xutioxij che i Dios, xaq xuya chke.

—Chitu'u yix iri, iwonojel —xub'ij chke. 28Man iri are inkik'el chi kyijb'aw ni trat k'ak' ru' i Dios, kturuw na kuyb'al kimak i winaq. 29Qatzij kinb'ij chiwe, kintu' ti chik uwa'al uva muqb'am ri, k'a kuriq ni ij kintu' julaj chik uwa'al uva k'ak' junam iwu' yix, pa ajawinik re Inqajaw —xub'ij chke.

I Jesús kutzijoj chi k-uwax ni uwach rumal ma Pedro

30Te'uri xkib'ixaj jun b'ix kojb'al re u'ij i Dios; are xeutzinik, xe'e chwi jyub' Olivos.

31I Jesús xub'ij chke:

—Wo'or cha'ab', iwonojel yix kiwo'taj ni ukub'ib'al ik'ux chwe. Weta'am keje ile ke'eloq, man keje iri kub'ij uwuj i Dios chi tz'ib'tal kanoq: “Kkamsax ni ajyu'ul chij”; “te'uri i chij kekicher nu b'ik.” Keje ile tz'ib'tal kanoq. 32Xwiri, are in walijnaq chik che i kamik, kinnab'ej ni chiwach pa Galilea —xcha chke.

33Are uri xub'ij i ma Pedro:

—We konojel is katko'taj kanoq, yin lik katwo'taj taj —xcha.

34I Jesús xub'ij che:

—Qatzij i kinb'ij chawe, che i a'ab'i, are k'amaja kch'aw i ak' re usaqirb'al, oxmul kab'ij na, chi aweta'am ti inwach —xcha.

35—Yin lik kwuwaj ti awach —xub'ij i ma Pedro—, nti k-ono we junam awu' kojkamsaxik.

Xaq keje ile xkib'ij konojel i utijoxelab'.

I Jesús klapan ru' i Dios pa Getsemaní

36Te'uri xe'e chik i Jesús junam ku' utijoxelab' che i k'ijib'al, chi Getsemaní ub'i. Are uri xub'ij chke utijoxelab':

—Chixkul ni kan chi, tz'aqat kin-e ni Yin jela chutz'onoxik che i Dios —xcha.

37Te'uri xeuk'am b'i i ma Pedro, i keb' uk'ojol i mam Zebedeo ru', xaq xpe jun nim laj b'is, i jun nim laj k'ax puk'ux. 38Xub'ij chke:

—I b'is chi o pwanima, kinkam ni rumal kinna Yin. Chixkanaj yix waral xaq chixk'ask'at wu' —xcha chke.

39I Jesús x-e chupan jub'i', xxuki'ik xaq xuqajsaj upalaj k'a chwach ulew chutz'onoxik che i Dios: “Ta, kwaj Yin, wetene kawesaj i nim laj k'ax chi o chinwach. Xwiri, maya chwe pacha i to' kwaj Yin; are cha'ana pacha i kawaj Yet”; xub'ij.

40Te'uri xtzalij chik ku' i utijoxelab'; xeuriqa kewarik. Rumali xub'ij che ma Pedro:

—¿Xich'ij ti b'ari xixk'ask'at jun or wu'? 41Chixk'ask'at na, xaq chitz'onoj che i Dios man keje ile kixtzaq ti chupam i mak. Qatzij, yix piwanima kiwaj kixk'ask'atik, xwiri i ch'akul nti ucho'ab' —xcha.

42Are uri xtzalij chik ukamul chutz'onoxik che i Dios. Xub'ij: —Ta, we utz taj chi kelsax ni k'ax chi o chinwach, we lik o ni uchak kinch'ijo, utz uri k-an ni chwe pacha i kawaj yet —xcha

43Are xtzalij chaloq, xeuriqa chik utijoxelab' kewar tan chik; man i kib'a'wach lik waram kkaj. 44Are uri xeukanaj kanoq, x-e tan chik churoxmul chutz'onoxik che i Dios, xaqjun tan chik i tz'onb'enik xu'an che Dios. 45Te'uri x-e chik chila ku' utijoxelab'.

—B'ay, chixwaroq; chixuxlanoq —xub'ij chke—. Ya xuriq i or chi Yin, chi Xinalaxoq chwach Ulew pacha Winaq, kinjachtaj ni pki'ab' i ajmakib'. 46Chixwalijoq. Jo'. Ya kk'un ire chi kinjachaw ni pki'ab' i ajch'oj chwij —xub'ij chke.

Uchapik i Jesús kumal i ajch'oj chrij

47Lik k'a tijin i Jesús chitzij are xupon i ma Judas, chi jun chke i kab'lajuj utijoxelab'. Ire je rok'am b'i uk'iyal winaq; o i kuk'am ch'ich', xaq o i kuk'am che'. Ike je taqtal b'i kumal i kaj-atzil i rajpatan i Dios, xaq kumal i nimaq taq winaq re i tinimit. 48I ma Judas, chi ajjachanel re i Jesús, ub'im kan chke wach i ilb'al re ku'an chke, k'utb'al re i Jesús: “Are i jun chi kintz'ub'aj, are ile.” “Chichapa uri”, ub'im chke. 49Are uri i ma Judas, juntir, xtejeb' la pan ru' i Jesús.

—¡Na'ab', Intijonel! —Xcha che. Xaq xutz'ub'aj. 50I Jesús xub'ij che:

—Achi, ¿Cha'na wach at k'unnaq chu'anik? —Xcha.

Are uri i jub'an xetejeb' pan ru' i Jesús i xkichapo.

51Are uri, jun chke i rachi'il i Jesús xresaj li uch'ich' xaq xuk'atzij uxikin i ajtaqon, re i atz laj rajpatan i Dios. 52I Jesús xub'ij che:

—Chak'olo ach'ich' prachoch, man ni'pa i ke'anaw ch'oj ru' ch'ich', xaq ru' ch'ich' kekamsax wi. 53¿Aweta'am ti b'ari, chi wetene kwaj Yin, kintz'onoj che Inqajaw xaq kutaq li uk'iyal ángel chinto'ik? ¡Mas neri k'i chwach i kab'lajuj tzob'aj ángel keutaq na li ri wu'! 54Xwiri, wetene kin-an Yin ile, ke'el ti uri pacha tz'ib'tal kan chupam uwuj i Dios. Lik o ni uchak ke'el na pacha i tz'ib'tal kanoq —xcha.

55Te'uri xub'ij chke i winaq:

—¿B'uchak xixk'un yix ru' ch'ich' xaq ru' che', kik'amb'ej b'i we, pacha ki'an che jun ili'om? Yin ij ij inkul chixol yix prachoch i Dios, kintijin chuk'utik chke i winaq, i xinichap taj. 56Xwiri, o uchak k-an iri chwe, pacha kitz'ib'am kan i profeta chupam uwuj i Dios ujer —xcha chke.

Te'uri, ni'pa i utijoxelab' i Jesús xkikanaj kanoq xaq xe'anmajik.

Jesús o chkiwach i jutzob'aj aj-atol tzij

57Ni'pa i kichapom i Jesús, xkik'am b'i chi rachoch i mam Caifás, chi atz laj rajpatan i Dios. Chila kimolom wi kib' i tijonelab' re ujer atb'al tzij xaq i nimaq taq winaq. 58I ma Pedro, to' chinaj xterej b'i chkij, k'a xupon chwaja re i rachoch i atz laj rajpatan i Dios. Xok b'i chwaja, chila xkub'i wi ku' i ajchajinelab', re kutaqej wach k-an ni che i Jesús.

59I kaj-atzil i rajpatan i Dios, xaq i nimaq taq winaq, xaq konojel i jutz'ob'aj unimaqil chi kki'at tzij pkitinimit aj Judío, is xkitzukuj umak i Jesús. Kkaj ike kkikoj umak chwach i atb'al tzij, tupu qatzij taj, xa kamsab'al re kkaj ike. 60Lik nti jun umak xkiriq chrij, tupu je k'i xek'unik xaq xkib'ij t'oronik chrij. Pa k'isb'al re, xeupon chik keb' ilawinel chi xa t'oronik kkib'ij. 61Chi xkib'ij:

—I achi ri xub'ij: “Yin kintiki chuwulijsaxik i rachoch i Dios, te'uri che oxib' ij kinwalijsaj wi chik.” —Xecha.

62Are uri i atz laj rajpatan i Dios xtak'i anoq, i xub'ij che i Jesús:

—Yet, ¿Lik kala' ti uwach chke? ¿Wach usuk' ile kkib'ij chawij? —Xcha.

63I Jesús lik xch'aw taj. Are uri i atz laj rajpatan i Dios xub'ij:

—Yin, chwach i Dios k'aslik, kinya chaqul: Chab'ij i saq laj tzij chqe; chab'ij uri we Yet at Cristo, chi Uk'ojol i Dios —xub'ij che.

64I Jesús xub'ij:

—Qatzij i xab'ij. Xaq kiniwil ni Yin, chi Xinalaxoq chwach Ulew pacha Winaq, inkul ni puwiqab'im i Dios chi Ronojel Ktiki Che; xaq kiniwil na kink'un chali pa sutz' chikaj —xcha chke.

65Are uri i atz laj rajpatan i Dios xuraqch'ij u'u', k'utb'al re i roywal i xub'ij:

—¡Ni'pa taq tzij chi xub'ij i achi ri lik kuqajsaj u'ij i Dios! ¡Ya nti chik uchak we o jub'an chik kolkib'ij umak! Ya xita yix waral wach itzel tzij xub'ij. 66¿Wach kich'ob' yix che ile?

—Xub'ij chke i rachi'il.

I jub'an chi je o ru' xkib'ij:

—Ire lik o umak; kmajaw che chi kkamsaxik —xecha.

67Are uri xkichub'aj kik'axaj chupalaj xaq xkich'ayo. O jub'an chik xkich'ay chupalaj 68xaq xkib'ij che:

—Yet chi at Cristo, “chab'ij ut chqe pachin xatch'ayawik” xecha che.

I ma Pedro kruwaj uwach i Jesús

69Tz'aqat are xki'an ile, i ma Pedro kul chwaja. Are uri, xupon jun ali, ajchak prachoch#26.69 Kch'ob'ik chi ali le are ajchak prachoch i kaj-atzil ajsujul sipon. i kaj-atzil i ajsujul sipon; xub'ij che:

—Xaq yet at rachi'il i Jesús aj Galilea —xub'ij.

70Xwiri, i ma Pedro xruwaj uwach chkiwach konojel:

—Weta'am ti yin wach i kab'ij —xcha che i ali.

71I ma Pedro ya k-ek, o chik chi b'e. Are uri x-iltaj chik rumal jun chik. Xub'ij uri chke i je o chila:

—I achi le, rachi'il i Jesús chi aj Nazaret —Xcha.

72I ma Pedro xub'ij chik chi reta'am ti uwach. Xukuxtaj ub'i i Dios puwi utzij:

—Lik weta'am ti uwach i achi le —xcha.

73X-on chupan jub'i', ni'pa i je o chila xetejeb' ru' xaq xkib'ij:

—Qatzij, xaq yet at kachi'il ike. K-aljin che ach'awb'al —xkib'ij che.

74Te'uri i ma Pedro xub'ij chke:

—Chuya ni tojpen i Dios pinwi, we qatzij ti kinb'ij. Lik weta'am ti uwach i achi le —xcha.

Are uri xch'aw jun teren. 75Juntir xk'un chuk'ux wach i b'ital che rumal i Jesús, man b'ital che: “Are k'amaja kch'aw i teren re usaqirb'al, kinawuwaj ni oxmul”; ub'im i Jesús che. Te'uri i ma Pedro xel chila, lik k'ax xuna uk'ux, rumali xo'ik.

Currently Selected:

Mateo 26: ACHICUB

Highlight

Copy