Mateo 24

I Jesús kutzijoj chi i rachoch i Dios kwulijsax na

1I Jesús xel prachoch i Dios; are ya kumaj b'i ub'e. Are uri xetejeb' i utijoxelab' ru', xaq xe'ok chuk'utik ni'pa i ja re i rachoch i Dios che. 2I Jesús xub'ij chke:

—¿Kiwil yix ronojel iri? Qatzij kinb'ij chiwe: Ronojel iri lik kwulijsax na. Mijun ab'aj kkanaj chik puwi i rachi'il —xub'ij chke.

Jalajuj taq k'utb'al re i k'isb'al ij

3Te'uri xe'e chwi jyub' Olivos i Jesús xkub'i chila. Are uri i utijoxelab' xetejeb' pan ru'. Xe'ok chutz'onoxik che, are utukel:

—Kqaj kqetamaj junpa k-an ni ile chi xab'ij. ¿Wach kqilo are ya katk'unik xaq wach kqilo are ya kk'un i k'isb'al ij re uwach i jyub' ta'aj? —Xecha.

4I Jesús xub'ij:

—Chi'ana kwent iwib', lik miya iwib' chi kixt'orik.

5Man je k'i kek'un na, xaq kki'an che kib' pacha Yin. “Yin in Cristo”; kecha; kumal ike le, je k'i ket'ortaj na. 6Yix xaq kita ni utzijol chi o nimaq taq ch'oj jela, xaq nimaq taq ch'oj jewa. Mixk'achir rumal ile, man o ni uchak chi keje ile k-antaj na; xwiri, are kita i tzij le, k'amaja kk'un ni k'isb'al taq ij. 7Jun nim laj tinimit ku'on ni ch'oj ru' jun chik nim laj tinimit. I winaq re jun ajawinel kki'an ch'oj ku' uwinaq jun chik ajawinel. Kpe wa'jal, kpe yob'il, kpe i kab'raqan pa taq tinimit. 8Xwiri ronojel ile xa are ujeqb'al ronojel i k'ax.

9Yix kixchaptaj na, kixya' ni pa k'ax, xaq kixkamsax na. Konojel i winaq tzel ni kixkilo xa wumal Yin. 10Che i ij le, lik je k'i na kkisach ukub'ib'al kik'ux che i Dios; xaq je k'i tzel ni kkil kib'; xaq o ni kkijach i kachi'il pki'ab' i tzel keilawik. 11Xaq je k'i ni ajt'oronelab' kek'un na, chi kkib'ij i profeta; je k'i ni winaq kekit'or na. 12Lik kwinaqir ni k'iyal taq i utz taj chi lik je k'i ni uri i winaq kkisach i k'axnab'al kik'ux chkiwach. 13Xwiri, pachin i kkich'ijo k'a pa k'isb'al re, ketotaj na. 14Xaq i utz laj tziji re i ajawinik re i Dios kpaxsax na, chwach ronojel uwach i jyub' ta'aj, man kketamaj ni konojel i tinimit; te'uri kpe i k'isb'al re uwach i jyub' ta'aj.

15-16I profeta, ma Daniel, utz'ib'am kanoq wach kk'unik; ire xub'ij chi koksax ni jun tzel laj qajsab'al re u'ij i rachoch i Dios. Are kiwil yix ile chi ktijin uk'ulmaxik che i lo'laj k'ijib'al re i Dios, ni'pa i je o pa jyub' Judea, che'anmaj uri chwa taq jyub'. Pachin krajlaj i tziji, chuta usuk'. 17Ni'pa je o an puwi i kachoch, meqaj chali chuk'amik ub'itaq ke. 18Xaq ni'pa i je o pa taq tikon metzalij chali chuk'amik i ki'u'. 19Chupam i ij le, to' kiwach ixoqib' chi je raxwinaq, xaq ike chi o kak'al ketz'umanik, ike k'ax i ki'anmajik. 20Chitz'onoj che i Dios chi are joron ti tew xaq nti jab' are kix-anmaj chwach ile, xaq pa taq sábado. 21Man i uyej che taq i ij le, lik k'ax. K'a chuxeb'al ij saq, nti jun k'ax petnaq mas k'ax chwach ile; xaq nti chik jun chik kpetik mas k'ax chwach ile. 22Xaq we i Dios ku'an ti che chi xa atal ij o ni k'ax le, is kekam ni konojel. Xwiri, Ire ku'atij na; keje ku'an Ire ile rumal i k'axnab'al uk'ux chke i je re Ire.

23Rumali, che taq i ij le, we o i keb'in chiwe: “Chiwila pe', chi o wi i Cristo”; kecha, o we kkib'ij: “Ley olik le, lik mikojo”. 24Man kek'un ni ajt'oronelab' chi kki'an che kib' pacha je Cristo, xaq kek'un jujun chi kki'an che kib' pacha profeta. Kki'an ni nimaq taq anik, xaq nimaq taq il, ilb'al re we ketiki chkit'orik ni'pa i je re i Dios. 25Ya inb'im chik chiwe wach i kik'ulmaj k-on panoq. 26Rumali, we kb'ix chiwe: “Chiwila pe' chila o wi i Cristo pa taq tz'inilik jyub' chaqij, mix-e chila”; xaq we kb'ix chiwe: “¡Chiwila pe' chi ruwam wi rib', lik mikojo”. 27Man i pacha Winaq chi Xolalaxoq chwach Ulew, ani'al taj kk'unik. I uk'unik ire keje pacha jun ray krepkanik, ku'an li saq che prelb'al ij, k'a k-e utzunb'al puqajb'al ij. 28Pa o wi jun ch'akulaj re kamnaq, chila kemoltaj wi i k'uch.

Utzalijik li pacha Winaq chi Xolalaxoq chwach Ulew

29Are kik'aw ni'pa i k'ax re i ij le, are uri i ij k-equmarik; i ik' ktzun ti chik; i ch'umil ketzaq na li chikaj; xaq ni'pa i o chikaj lik kesiksat na. 30Are uri k-iltaj jun ilb'al chikaj, re ink'unb'al Yin chi Xinalaxoq chwach Ulew pacha Winaq. Xaq konojel i tinimit chwach i jyub' ta'aj ke'o' na. Xaq kinkil na chi kink'un pa sutz', nim ni incho'ab', inchomal. 31Ktataj uch'awb'al jun nim laj trompeta, xaq keintaq b'i in-ángel k'a pa ke'el wi li i kajib' tew k'ulala; keintaq li jewa, xaq keintaq b'i jela, kkimolb'ej ke ni'pa i je incha'om, che ronojel uwach i jyub' ta'aj.

32Yix iweta'am wach k'utb'al re kiwil che uche'lal higo; chixnaw che i che' le. Ile, are kiwilo chi kpe tan chik utux, xaq ku'an rax, iweta'am uri chi lik ya kk'un tan chik i sa'ij. 33Xaq keje ile, are kiwil ronojel ile chiwetamaj uri chi ya kk'un i k'isb'al taq ij, lik knaqajab' ink'unik. 34Qatzij kinb'ij chiwe, ya knaqajab' ronojel ni'pa inb'im le; i winaq je re wo'or kkil na. 35I kaj, i ulew ksachik, xwiri intzij Yin ksach taj, k-antaj ni ronojel ni'pa inb'im chiwe.

36Mijun reta'am pachike ij, pachike or, k-antaj ile. Mitene i ángel aj chikaj, xaq mitene Uk'ojol i Dios reta'am taj; xwi i Ta chikaj reta'am. 37I winaq kkiyijb'a ti kib' che i ij le are kk'un i jun chi Xolalaxoq chwach Ulew pacha Winaq. Xa kki'an na pacha xki'an i winaq re taq i ij re i mam Noé ujer. 38Ike ujer, are k'amaja kpe i nim laj jab' chi xunojsaj uwach i jyub' ta'aj che i ya, xkiyijb'a ti kib'. To' xkitzuq kib', to' xetu'unik, to' xkib'isoj i kik'ulanik; keje xki'an ile tz'aqat xk'un i ij chi xok i mam Noé pa nim laj barco. 39To' keje ile xki'ano, i xkina taj k'a are xpe i nim laj ya chi is xeuk'am b'ik. Xaq keje kki'an ni ile are kink'un Yin chi Xinalaxoq chwach Ulew pacha Winaq. 40Che taq i ij le, je o ni keb' achiyab' kechakun junam pkitikon; jun chke kk'am nu b'ik; i jun kkanax kanoq. 41Xaq je o ni keb' ixoqib' ketijin che i ke'em. Jun chke kk'am nu b'ik; i jun kkanax kanoq.

42Rumali, chixk'ask'at na, man iweta'am taj wach u'anom or kk'un Iwajwal. 43Chk'un chik'ux wach ku'an jun rajaw ja. Ire wetene reta'am chicha'ab' kk'un jun ili'om ru', wetene reta'am wach u'anom or kk'unik, ire lik kk'ask'at ni uri. Lik kuya ti uri che kok pa ja krel-aj b'i ub'itaq re. 44Xaq keje chi'ana yix, lik chiyijb'a iwib', man are lik nti kich'ob' che, are uri kink'un Yin chi Xinalaxoq chwach Ulew pacha Winaq.

I ajchak chi kchakunik xaq i ajchak chi kchakun taj

45Xub'ij#24.45 I Jesús xub'ij chik jun tijojb'al tzij chke.: Iweta'am wach k-an ni che jun mokom lik utz, lik o uno'oj. Ire kya' ni kan pkiwi i jub'an mokom rumal rajaw uchak. Chuqul ire o wi uya'ik i kiwa are kuriq i or. 46Utz re i achi le, we ktijin chu'ankil wach i rajwaxik chke i mokom are kk'un chali i rajaw uchak. 47Qatzij i kinb'ij chiwe, chi rajaw i chak kuya ni kan uri puwi ronojel ni'pa i ub'itaq re. 48Xwiri, we utz ti laj mokom, xa kuch'ob' na: “I rajaw inchak, we' taj ktzalij chaloq”. 49Are uri kujeq kich'ayik i rach ajchakib', xaq k-e ku' i ab'arelab' laj taq winaq, ku' ike kwa wi, xaq ktu'un wi. 50Ire reta'am taj b'i chi oril kk'un i rajaw uchak. Are nti kuch'ob' che, xaqte'et kk'un chaloq. 51I Rajaw uchak kuya ni uri pa nim laj tojpen. Xaqjun i tojpen kya' che pacha kya' chke i keb' kipalaj. Chila ko' wi uri, xaq kuqach'ach'ej ni uware.

Currently Selected:

Mateo 24: ACHICUB

Highlight

Copy