Mateo 23

I Jesús kukoj kimak i aj fariseo, xaq i ajtijonelab' re i atb'al tzij

1Te'uri i Jesús xok chub'ixkil i tziji chke i winaq, xaq chke utijoxelab': 2—I tijonelab' re ujer atb'al tzij, xaq i aj fariseo, o chkiqul kkisaqij chiwe wach usuk' i atb'al tzij chi utz'ib'am kan i mam Moisés. 3Rumali chixkojon ni che, lik chikojo retalil che wach i kkib'ij; xwiri, mi'an yix pacha kki'an ike. Mi'an na, man ike kki'an taj pacha taq i kkib'ij. 4Ike, lik nim i eqan kkiya chkij i winaq, chi lik k'ax uch'ijawik; xwiri ike kkaj ti rok'axik ile, mitene jub'i'. 5Ronojel wach i kki'ano, kki'an na man xa kkaj ike ke'iltaj kumal i winaq. Qus kkil uk'amik b'i jupaj utzij upixab' i Dios chwach jun ral tz'um chwach kipalaj. Xaq qus kkil ub'atz'katixik tz'um rij taq ki'ab'. I tz'um le, tz'ib'tal jutaq paj tzij chi o chupam uwuj i Dios chwach; qus kkil ike we nim uwach; xaq kkikoj chuchi' i ki'u' chi lik ktzuyuwik. Keje kki'an ike ile, re kkilb'ej taq re i winaq chi lik je re i Dios. 6Are ke'e pa taq nima'ij, lik kkitzukuj i nab'e taq k'ijib'al. Are ke'e pa ja re molb'al ib' ke i judío, xaq kkitzukuj i kub'ib'al chi o u'ij. 7Are ke'e pa k'eb'al, lik qus kkita are ketioxix kumal i winaq, oksab'al re ki'ij. Xaq qus kkita are kb'ix “nim laj tijonel”; chke.

8Mi'an yix pacha kki'an ike le; miya chke i winaq chi kkib'ij “nimaq taq tijonel”; chiwe. Man iwonojel yix, ix keje pacha iwachalal chwach i Cristo; xaq cha jun Itijonel, are i Cristo. 9Xaq mib'ij i qajaw che jun winaq waral chwach i jyub' ta'aj, kojb'al re u'ij, man xa jun Iqajaw olik, are i Ta chikaj. 10Xaq miya chke i winaq kkib'ij “qaj-atzil” chiwe, man xwi i Cristo are Iwaj-atzil. 11Pachin ku'an mokom che rib' chkij i jub'an, are mer nim uri chixol. 12Man pachin ku'an nim che rib', xa kqajsax u'ij uri; xaq pachin ku'an ch'utin che rib', ire knimarsax ni uri u'ij.

13“¡To' iwach yix!” —Ix tijonelab' re ujer atb'al tzij, xaq yix chi ix aj fariseo. ¡Xa keb' ipalaj! Kik'ut ti saq laj tzij chke i winaq; xa kitz'apij i uchija re U'atb'al tzij i Dios aj Chikaj, man kiwaj taj ke'ok b'i jub'an chik. Xaq mitene yix kiwaj ti kixok b'ik, xaq kiya ti chke ke'ok b'i kkaj okik. 14#23.14 Chupam i nab'e taq uwuj i Dios kriqtaj ti i versículo ri: “¡To' iwach yix!” —Ix tijonelab' re ujer atb'al tzij, xaq yix chi ix aj fariseo. ¡Xa keb' ipalaj! Xa kimaj i kachoch ixoqib' malkanib', te'uri ki'an nimaq taq i tz'onb'al che i Dios, xa sachsab'al re chkiwach i winaq wach i'anom. Keje ile i nimarsam ni tojpen chi kpe ni piwi.

15¡To' iwach yix! Ix tijonelab' re ujer atb'al tzij, yix chi ix aj fariseo. ¡Xa keb' ipalaj! Lik kix-e jela, kix-e jewa, che i k'utunik ki'ano, ch'akb'al ni re jun i tijoxel. Xwiri, are ix tikinaq chik che, ki'an ni che i winaq le chi lik k-e ni pa a' chi lik ktoqow ronojel ij saq rumal i k'utunik chi xiya che.

16¡To' iwach yix chi ix ajk'amb'eyal chi ix mawach! Man kib'ij chi “jun winaq kukuxtaj ub'i i rachoch i Dios puwi i utzij, chuqul ti o wi uri u'ankil pacha ub'im”; “Xwiri we kukuxtaj ub'i i an-o'oj re i rachoch i Dios, o chuqul uri k-on na pacha i ub'im”; keje kib'ij yix ile. 17¡Lik ix sachnaq na; lik ix mawach! ¿Pachike mas o i u'ij? ¿Xatab'a are i an-o'oj? Are i rachoch i Dios chi mas o u'ij, xaq ku'an che i an-o'oj chi xaq o u'ij. 18Xaq kib'ij yix chi “We jun winaq kukuxtaj ub'i i sujb'al sipon puwi i utzij, chuqul ti o wi uri i u'ankil pacha ub'im”; kib'ij yix. “Xwiri we kukuxtaj ub'i i sipon chi o puwi i sujb'al sipon, o chuqul uri ku'an na pacha i ub'im.” 19¡Lik ix sachnaq na; lik ix mawach! ¿Pachike mas o i u'ij? ¿Xatab'a are i sipon? Are i sujb'al sipon chi mas o u'ij, xaq ku'an che i sipon chi o u'ij. 20We o jun kukuxtaj ub'i i sujb'al sipon, xe'el uri xaq xukuxtaj ub'i wach taq i o puwi i sujb'al sipon. 21Xaq we jun kukuxtaj ub'i i rachoch i Dios, xe'el uri xaq xukuxtaj ub'i i Dios chi o chila. 22Xaq we jun kukuxtaj ub'i i kaj, xe'el uri xukuxtaj i ukub'ib'al i Dios chi o u'ij, pa ku'at wi tzij, xaq xukuxtaj i Dios chi kul chila.

23¡To' iwach yix, ix tijonelab' re ujer atb'al tzij, xaq yix chi ix aj fariseo! ¡Xa keb' ipalaj! Ni'pa i o iwu' chi nti qas uchak, pacha i ral taq arawen, anix, i komin, ile lik ki'an pen i relsaxik jun julajuj tant, re kiya ni che i Dios. Xwiri, kixkojon ti che i tzij re ujer atb'al tzij chi lik o uchak ki'an na. Ki'an ti pen u'anik i suk'ulik ku' i winaq; ki'an ti pen rilik tob'al kiwach; qas ti kixterej chrij i Dios. Are i ni'pa iri are o uchak ki'an na; junam ru' uya'ik i nab'e tant che i Dios che i kich'ako. 24¡Yix ix ajk'amb'eyal, lik ix mawach! Kilatz'uj iya' re kiwesaj i xan chupam. Xwiri we o jun kamey chupam kiwil teneri, kitu' b'ik!

25¡To' iwach yix, ix tijonelab' re ujer atb'al tzij, xaq yix chi ix aj fariseo! ¡Xa keb' ipalaj! Lik ki'an pen uch'ajik i b'as xaq i laq, xwiri kich'aj ti pik'ux yix. I ub'itaq iwe, to' iwel-am, xa kixtijin chumolik uchi', lik xwi ile kich'ob'o. Ke'eloq pacha xwi i rij i b'as, xaq pacha xwi i rij i laq ich'ajom, xwiri i upam lik tz'il. 26¡Ix mawach laj taq fariseo, nab'e chich'aja upam i b'as, xaq upam i laq, man keje ile ke'eloq chom ni ronojel!

27¡To' iwach yix, ix tijonelab' re ujer atb'al tzij, xaq yix chi ix aj fariseo! ¡Xa keb' ipalaj! Ix keje pacha jun muqb'al kamnaq, lik chom saq rij, xwiri i upam ch'am taj, xa o ub'aqil kamnaq chupam, xa o k-ay chupam. 28Yix ix keje ile; lik utz kix-anaw chkiwach i winaq xwiri i pik'ux lik ch'am taj, xa ix nojnaq che i utz taj; xa keb' ipalaj i'anom che iwib'.

29¡To' iwach yix, ix tijonelab' re ujer atb'al tzij, xaq yix chi ix aj fariseo! ¡Xa keb' ipalaj! Chi kiyijb'a taq kimuqb'al i profeta, xa kojb'al re ki'ij. Xaq kikoch'ij taq iwach chuwiqik i kimuqb'al i je utz laj taq winaq chi je re i Dios ujer. 30Te'uri kib'ij ni yix, “Wetene yoj oj o che i ij le ke i qatit qamam, yoj lik kqaya ti qawach ku' chkikamsaxik i je profeta” 31Xwiri, ru' i utz taj chi ki'ano, i aljinsam chi lik ix xaqjun ku' ike. Lik ix kimuq kixikin kan ike chi xekikamsaj i profeta; 32Chik'isa u'anik uri wach i xkijeq u'anik iwatit i mam ujer.

33¡Yix ix kumatz! ¡Xa ix rak'al kumatz! ¿Wach anmajik ki'an chwach i a' chi ktoqow ronojel ij saq? 34Keintaq nu b'i i profeta iwu', keintaq b'i o kino'oj, xaq i tijonelab' keintaq b'i iwu'. Yix kikamsaj ni jujun chke, xaq o jujun keikamsaj chwach i krus, xaq o jujun chik ki'an ni k'ax chke pa taq ja re molb'al ib' ke i judío, xaq o jujun chik keiwoqtaj, kixuxlan ti chi koqtaxik pa taq tinimit. 35I utz ti laj taq anik chi xki'an iwatit i mam ujer, xaq are kixtijin yix chu'anik wo'or, xaq kpe ni tojpen piwi yix rumal le. Lik ix xaqjun ku' ike chi xekikamsaj i winaq chi je utz. Are ujeqanik, are ukamsaxik i a Abel chi nti umak, xaq keje ile petnaq k'a are o wi chi xikamsaj i ma Zacarías chi uk'ojol mam Berequías, chi yix xikamsaj chuxol i lo'laj k'ijib'al re i Dios xaq i sujb'al sipon. 36Qatzij i kinb'ij chiwe, ni'pa i tojpen re iri ktzaq ni pkiwi i winaq aj wo'or.

I Jesús ko' che i tinimit Jerusalén

37¡To' iwach yix, ix aj Jerusalén! ¡Yix chi keikamsaj i profeta; yix chi kikoj ab'aj chke i je utaqon i Dios! ¡K'iyalmul lik inrayim kixinmol wu', pacha ku'an jun ati ak' ku' i rak'al, keuya chuxe' uxik'! ¡Keje ile xwaj te Yin, xwiri yix xiwaj taj! 38Chata pe tinimit#23.38 Iri xaq kmajaw rachoch i Dios., yix kixo'tax ni kan rumal i Dios. 39Kinb'ij chiwe chi keje ile ke'el na; kiwil ti chik inwach k'a kuriq ni ij chi kinik'ulaj ni iwu'. Kib'ij na: “¡Chuya ni utz i Ajwal Dios puwi i jun chi utaqom loq!” Kixcha. Keje xub'ij i Jesús ile chke.

Currently Selected:

Mateo 23: ACHICUB

Highlight

Copy