Mateo 22

Tijojb'al tzij chrij i nima'ij re i k'ulankil

1I Jesús xujeq chik ub'ixkil i tijojb'al tzij chke. Xub'ij:

2—U'atb'al tzij i Dios aj Chikaj, lik keje pacha jun ajawinel chi xuyijb'a i nima'ij re uk'ulankil i uk'ojol. 3Are xuriq i ij, xeutaq b'i umokom ku' i je sik'im chik, ke'e kib'ij chke chi ya yij chik i wa'im. Xwiri, ike xkaj ti xek'unik. 4Te'uri xeutaq chub'i jub'an chik umokom chkisik'ixik. Xub'ij chke: “Chib'ij chke ni'pa i je insik'im na, chi yij chik i wa'im. Chib'ij chke chi je inkamsam chik i chikop chi je in ti'ojersam. Ronojel is yij chik; ike chepetoq, chixchoq chke.” 5Xwiri, i je sik'im le, xekojon ti chke i taqon. O jun chke x-e prulew, xaq i jun chik x-e pa k'ayinik. 6Xaq je o jujun xekichap i taqon re i ajawinel xaq xki'an k'ax chke k'a xekikamsaj na. 7Rumali, i ajawinel lik xpe roywal che; xeutaq b'i uwinaq chi je yij che i ch'oj chkikamsaxik ni'pa i xe'anaw i kamik le, xaq chuporoxik i kitinimit. 8Te'uri xub'ij chke umokom: “Ronojel is yij chik re i nima'ij, xwiri ike chi je insik'im na, xmajaw ti chke chi kepetik. 9Rumali, jix yix pa nimaq taq b'e, xaq cheisik'ij che i nima'ij ni'pa i ke'iriq chila”; xub'ij chke umokom. 10Ike is xe'el pa taq b'e, xaq xekimol ni'pa i xekik'ulaj. Xekimol i je utz laj taq winaq, xaq i ne te utz. Keje ile xkinojsaj i upaja.

11Te'uri xok i ajawinel ipa je moltajnaq wi i je usik'im ru'. Are uri xril jun achi ku' chi ukojom ti u'u' re i nima'ij. 12Xub'ij che: “Yet, ¿wach awokik chi, chi akojom ti a'u' re i nima'ij?” Xcha. I jun xuriq taj wach xub'ij che. 13Te'uri i ajawinel xeusik'ij i umokom, xub'ij chke:

—“Chixima i u'ab' i raqan, xaq chiwesaj b'i rija pa equm. Chila ko' na, xaq kuqach'ach'ej ni uware rumal ub'is”; xub'ij chke. 14Keje ile ke'eloq man tupu je k'i i je sik'talik, ne te k'i je chatalik. Keje i tijojb'al tzij ile xub'ij i Jesús.

Tz'onb'enik puwi utojik alkawal

15Are uri i aj fariseo xe'ek xaq xe'ok chuch'ob'ik chkiwach wach jun tzij kkitz'onoj che i Jesús tzaqsab'al re. 16Te'uri xekicha jujun je o ku', xaq jub'an chik chi je teren chrij i ma Herodes, xaq xekitaq b'i ru' i Jesús.

—Nim laj winaq —xkib'ij che are xeupon ru'—, qeta'am chi yet xwi i saq laj tzij kab'ij. Qeta'am chi yet qatzij kak'ut i utz laj b'e re i Dios, lik kakoj ti retalil che wach kkib'ij i winaq chawij. Yet kakoj ti retalil che, tupu je nimaq taq winaq. 17Chab'ij uri chqe, wach i kab'ij yet, ¿Utz nawi, kqatoj alkawal che i ma César chi aj Roma#22.17 I tzij César ri b'iyaj taj, iri are ub'i upatan chi lik mas nim u'ij, chila kki'at wi tzij aj Roma o utz taj? —Xkib'ij che.

18I Jesús xretamaj chi utz ti kkich'ob'o are xkib'ij ile. Xub'ij chke:

—Yix, ¡xa keb' ipalaj! ¿B'uchak xa tzaqsab'al we ki'ano? 19Chik'utu jun saqpwaq chwe, chi tojb'al re i alkawal —xub'ij.

Are uri xkik'am li jun saqpwaq che. 20Are uri i Jesús xutz'onoj chke:

—¿Pachin uk'exwach iri o chwach? ¿Pachin ub'i iri tz'ib'tal chwach? —Xub'ij chke.

21Ike xkila' uwach che:

—Ma César —xecha.

—B'ay, chiya uri che i ma César ni'pa i re ire, xaq chiya che i Dios ni'pa i re Ire che —xub'ij i Jesús chke.

22Ike, are xkita ile, lik xkib'isoj. Are uri xkikanaj kanoq i xe'ek.

Tz'onb'enik puwi i walijik che i kamik chkixol i kamnaq

23Xaq are i ij le, je o jujun aj Saduceo xeupon ru'. I aj Saduceo#22.23 Cf. Hch 4.1-2; 23.8. Saduceos: Je are i jutzob'aj aj Judío chi kkikoj u'ij ki-dios. kkib'ij chi i je kamnaq kewalij ti chik. Are uri xkib'ij che:

24—Tijonel, i mam Moisés ub'im kanoq chi jun achi, we xkamik, we nti rak'al ru' kan i rixoqil, o uchak uri kk'uli i ucha' i achi ru' ixoq malkan, puk'exel i kamnaq. Keje ile o ni uri rak'al i achi chi kamnaq chwach ixoq le. Keje ile ub'im kanoq. 25B'ay, u'onom loq, chqaxol yoj je o wuqub' achiyab' chi katz kicha' kib'. I nab'e chke xk'uli'ik, xaq x-on panoq xkamik, nti rak'al. I ixoq malkan xkanaj kan ru' ukab' cha'xel. 26Te'uri i achi le xkam chik, i ixoq xk'uli chik ru' urox cha'xel. I achi le xaq xkamik. Keje xki'an i wuqub' achiyab' le. 27Xaq x-on panoq, te'uri xkam i ixoq. 28B'ay, we kewalij chik i kamnaq, ¿pachike chke i je wuqub' le chi lik saqil rachijil ke'eloq? Man is xk'uli ku' i je wuqub' achiyab' le —xecha.

29I Jesús xula' uwach chke:

—Yix xa ix sachnaq na; man kita ti ub'e wach kub'ij utzij i Dios chi tz'ib'tal kanoq; xaq iweta'am taj wach i nim laj ucho'ab' i Dios. 30Are kewalij ni kamnaq ke'eloq pacha i u-ángel i Dios; kek'uli taj. I achiyab', i ixoqib' kek'uli ti chik. 31I kiwalijb'al i kamnaq, qatzij olik. ¿Xatab'a iwilom ti yix wach ub'im kan i Dios chiwe? Ub'im kan ire: 32“K'a in u-Dios i mam Abraham, xaq i mam Isaac, xaq i mam Jacob”; xub'ij.#22.32 I oxib' le je kamnaq chik are xub'ij i Dios ile. B'ay, chwach i Dios, k'a je k'as na. I Dios are ti ki-Dios i je kamnaq, are i ki-Dios i je k'aslik; xub'ij i Jesús chke. Keje ile xusaqij chke chi o ni kiwalijb'al i kamnaq.

33I winaq, are xkita ile, lik xkib'isoj che i k'utunik xu'an i Jesús.

I tzij pixab' chi lik o u'ij

34I aj fariseo, are xkita utzijol chi Jesús xtiki chula'ik uwach i kitzij i aj Saduceo, xkimol la kib'. 35O jun chke chi tijonel re ujer atb'al tzij. Xuk'am upam i Jesús, tzaqsab'al re. 36Xutz'onoj che:

—Tijonel, ¿pachike i tzij pixab' chi lik mas o u'ij chi kqakojo? —Xcha.

37I Jesús xub'ij che:

—“K'ax chana Awajwal Dios ru' ronojel ak'ux, ru' ronojel awanima, ru' ronojel anojb'al.” 38Are i jun le chi mas o uchak kojkojon che; are mas o u'ij ile chkiwach i jub'an chik. 39Te'uri i ukab' tzij chi o uchak kojkojon che, laj kumaj i jun le. Kub'ij: “K'ax cheana alok'anij pacha k'ax una'ik awib' yet ka'ano”. 40I keb' tzij pixab' le are saqil uxeb'al ronojel taq i atb'al tzij, xaq are uxeb'al ronojel taq i k'utunik kikanam kan i profeta. Keje xub'ij i Jesús ile chke.

¿Pachin chke winaqirnaq wa li i Cristo?

41Tz'aqat k'a kimolom kib' i je aj fariseo, 42i Jesús xutz'onoj chke:

—¿Wach kich'ob' yix chrij i Cristo, chi Cristo iwoy-em? ¿Pachin i ratit umam? —Xub'ij chke.

Ike xkib'ij:

—Ire are ni umuq uxikin kan i mam David —xecha.

43Are uri i Jesús xub'ij chke:

—¿B'uchak uri i mam David xub'ij “Wajwal” chrij i Cristo are xulapo? Lik rumal ni Lo'laj Utewal i Dios xub'ij ile. I mam David xub'ij i tziji:

44Xub'ij i Ajwal Dios che i Wajwal Cristo:

“Chatkul ni pinwiqab'im,

k'a kuriq ni ij keinya ni pawaqan

ni'pa i je ajch'oj chawij”; —xub'ij.

Keje ile utz'ib'am kan i mam David ujer.

45¿Wach u'ankil uri chi Cristo umuq uxikin i mam David? ¿Wach u'ankil ile man lik are i mam David xub'ij “Wajwal” che i Cristo?#22.45 Keje xub'ij i Jesús ile chke aj fariseo, kusaqijb'ej re chke chi Cristo to' ti winaq, lik Dios.

46Mijun chke xuriq chik ula'ik uwach che, mijupaj chik tzij. Are xu'an ile, te'uri mijun xukowij chik uk'ux chutz'onoxik mas tzij che i Jesús.

Currently Selected:

Mateo 22: ACHICUB

Highlight

Copy