Mateo 12
12
I utijoxelab' i Jesús xkich'up uwach i trigo che i ij sábado
1X-on chupan jub'i', che i ij sábado, i Jesús kb'in ku' utijoxelab' pa tikon re i trigo. I utijoxelab' xpe numik chke; rumali xe'ok chuch'upik uwach i trigo; xe'ok chupoch'ik, xaq xkitijo. 2I aj fariseo winaq, are xkil ile xkib'ij che i Jesús:
—Chawila pe i atijoxelab' utz taj kechakun wo'or man sábado. I atb'al tzij tz'ib'tal kan rumal i mam Moisés kuya ti chke kkimol uwach i tikon wo'or; xecha.
3Xwiri i Jesús xub'ij chke—. ¿Xatab'a ni iwajlam ti yix chupam uwuj i Dios wach xu'an i mam David ujer? Are xpe unumik junam ku' i rachi'il. 4Ire, ku' i rachi'il are xpe numik chke, xe'ok prachoch i Dios xaq xkitij i jachom wa re trigo, chi yatal chwach i Dios. I wa re trigo le, xwi yatal chke i ajsujul sipon kkitijo; yatal ti chke i to' winaq kkitijo —xub'ij i Jesús chke. 5¿Xatab'a xaq itom ti yix wach i tz'ib'tal kan chupam i atb'al tzij re i mam Moisés? Kub'ij chi o uchak kechakun i rajpatan i Dios prachoch i Dios che i ij sábado. Man ile makunik taj, tupu ke'uxlan taj. 6Xwiri kinb'ij chiwe, chi o wi i Jun chiwach, chi mas nim ni u'ij chwach i rachoch i Dios. 7Yix itom ti ub'e wach ub'im i Dios chupam uwuj. Xub'ij iri: “Kwaj Yin o ni rutzil ik'ux; are ti to' usujuxik chikop chinwach.” Keje ile tz'ib'tal kanoq. Wetene itom ub'e ile, kikoj ti uri kimak i winaq we nti kimak. 8Xwiri, Yin, chi Xinalaxoq chwach Ulew pacha Winaq xaq in o puwi i ij sábado —xcha i Jesús chke.
I Jesús xrutzirsaj u'ab' jun achi chi sikirnaq
9Te'uri i Jesús xel pa tikon, x-e pa ja re molb'al ib' ke i judío. 10Are o chila, xril jun achi lik chaqijnaq u'ab'. Chila xaq je o jub'an achiyab', kkitzukuj umak i Jesús; rumali xe'ok chuk'amik upam.
—¿Utz nawi kutzirsax jun iwab' che i ij sábado? —Xecha che.
11I Jesús xub'ij chke:
—Pachin jun chi we yix, we ktzaq b'i jun uchij pa siwan che i ij sábado, ¿Xatab'a kresaj ta loq? Lik kresaj uri. 12¿Xatab'a jun achi nti u'ij chwach jun chij? Jun achi lik mas o u'ij. Rumali, yatal uri chqe kqa'an i utz che jun winaq che i ij sábado —xcha i Jesús.
13Te'uri xub'ij che i achi:
—Chasuk'b'a i a'ab'.
Are uri i achi xuji u'ab', xaq lik xutzirik; xkanajik pacha u'anom i jun chik u'ab' chi utz. 14Xwiri are xe'el li aj fariseo winaq; xe'ok uri chuch'ob'ik chkiwach wach ukamsaxik i Jesús kki'ano.
Utz'aqatsaxik i tzijonik re i Dios
15I Jesús, are xuta wach kkaj kki'an che, xel chila; xwiri je k'i i winaq xeterej b'i chrij. I Jesús, xaq lik je k'i iwab'ib' xeukunaj 16xwiri, xub'ij chke chi kkib'ij ti xolk'iyal pachin Ire. 17Keje ile xe'eloq, xtz'aqat uwach pacha ub'im kan i Dios chupam i wuj tz'ib'tal kan rumal i mam Isaías chi profeta. Are xub'ij:
18Are iri are i wajchak chi incha'om na;
ire lik k'ax kinna'o, lik kinkikot ru'.
Kintaq b'i Intewal puwi ire,
man lik keuya retamaxik chke konojel i tinimit chrij u'atb'al tzij i Dios.
19Ire kraj ti kula' uwach i tzij, xaq lik ksik'in taj;
xaq lik mijun kuta taq uch'awb'al xol taq b'e.
20Ire ku'an ti k'ax che jun chi nti ucho'ab': We o jun winaq pacha jun ajij ya kpatz'ik, ire kuk'is ti upatz'ik;
xaq we o jun winaq pacha jun chij re i a' chi kurayij kchupik, ire kuk'is ti uchupik.
Keje ku'an ire ile, k'a kpe ni utz, xaq i suk'ulik chwach i jyub' ta'aj.
21Konojel i tinimit, kkikub'a ni kik'ux che Ire, chi rumal Ire ke'el ni ike pa k'ax.
Kkikoj umak i Jesús chi ucho'ab' xa ru' itzel petnaq wi
22Te'uri o jun achi mawach xaq mem, xk'am b'i chwach i Jesús, xaq lik o jun itzel tew che. I Jesús xrutzirsaj, te'uri i achi chi mawach xtzunik xaq xch'awik. 23Konojel i winaq lik xkib'isoj xaq xkitz'onoj chkiwach, ru' i tziji: “¿Are nawi i Tol qe ile chi qoy-em?” Xecha.
24Xwiri, i je aj fariseo are xkita, xkib'ij: “Are taj. I achi le, i cho'ab' chi o ru' xa ru' itzel kpe wi. Are rumal uri ktiki chrelsaxik b'i itzel tew. I cho'ab' chi o ru', xa ru' i Beelzebú kpe wi chi o pkiwi itzel taq tew.” Xkib'ij.
25I Jesús reta'am wach kkich'ob'o, rumali xub'ij chke aj fariseo: We kki'an taq tzob'ajil che kib' man re kki'anb'ej ch'oj chkiwach, xa kkisach kiwach uri. Xaq keje uri jun tinimit, xaq keje i je alal; we junam ti kiwach, we kkijach kib' chkiwach, kenajtin ti uri. 26Xaq keje ke'el ile che i Satanás, man we je o jujun itzel kki'an ch'oj chkiwach, kenajtin ti uri. 27Kib'ij yix chi Yin ru' ucho'ab' i Beelzebú xwesaj b'i itzel tew. B'ay, xaq i tijoxelab' yix kkesaj b'i itzel tew chke i winaq; ¿Pachin yawnaq i kicho'ab' ike ut? Keje ile kki'an i tijoxelab' yix; k-aljin uri chiwe chi usuk' taj wach i xib'ij. 28Xwiri, Yin kewesaj b'i itzel taq tew rumal Lo'laj Utewal i Dios chi o wu'. Ile k'utb'al re chiwe chi i U'atb'al tzij i Dios aj Chikaj ya o chik chi.
29Wach nawi rel-axik ub'itaq re jun achi chi lik o ucho'ab' i we kuyut' taj, man lik xwi keje ile k-an tikilem uri che i el-anik. Xaq xub'ij:
30“Pachin kuya ti uwach wu', ire ajch'oj uri chwij. Xaq pachin jun kinuto ti che i molonik, ire xa kukichersaj b'ik.”
31“Rumali kinb'ij chiwe, chi'ana kwent mib'ij xaqmanal taq tzij chrij i Lo'laj Utewal i Dios. I winaq kkuytaj ni kimak chke, xaq ni'pa i utz taj chi kkib'ij; xwiri, we kkib'ij utz ti laj taq tzij chrij i Lo'laj Utewal i Dios, ile kkuytaj ti chik chke. 32I winaq, we k'ax kech'aw chwij Yin, ile kkuytaj ni chke; xwiri we k'ax kech'aw ni chrij i Lo'laj Utewal i Dios, lik kkuytaj ti chik kimak chke. Kkuytaj ti wo'or, xaq mitene k-on panoq, lik kkuytaj ti chik chke.”
I che' are uwach kk'utuwik b'i chi uche'lal
33“Jun che', we utz laj che', kuya uwach utz; xaq we utz ti laj che', i uwach xaq utz taj. Jun che' k-iltaj ni che uwach we utz. 34¡Yix ix rak'al kumatz! ¿Wach nawi ub'ixkil i utz ki'an na? Man lik ix utz ti laj taq winaq. Jun, are kch'awik, wach i kel puchi', puk'ux petnaq wi ni'pa umolom rib' chila. 35Jun utz laj winaq, utz i kub'ij man utz o pranima; xaq i jun utz ti laj winaq, utz ti kub'ij, man utz ti o pranima. 36Xaq yin kinb'ij chiwe, are kk'un i k'isb'al ij, iwonojel is k-at ni tzij piwi chwach i Dios chrij junpa taq i tzij chi utz taj ib'im. 37Man rumal wach taq i tzij ab'im, k-at ni tzij pawi, k-iltaj uri we o amak, o we ntaj.”
I winaq xa kkaj rilik jun nim laj il
38Je o jujun aj fariseo winaq, xaq jujun ajtijonelab' re ujer atb'al tzij, xkib'ij che i Jesús:
—Tijonel —xecha—, kqaj kqil jun nim laj il, k'utb'al re chqe chi Dios o awu'.
39I Jesús xula' uwach chke:
—I winaq wo'or, lik ne te utz, lik kkikoj ti chik i Dios. Yix kiwaj chi k-an ni jun nim laj il chiwach, k'utb'al re ucho'ab' i Dios wu'; xwiri, nti jun nim laj il k-an ni chiwach. Xwi i nim laj anik chi iweta'am chrij i ma Jonás chi profeta i wach xuk'ulmaj. Xwi ile kiwil na. 40Ire xuch'ij oxib' ij, oxib' a'ab', chupam i nim laj kar; b'ay, xaq keje kin-an ni Yin, chi Xinalaxoq chwach Ulew pacha Winaq; kinch'ij ni oxib' ij, oxib' a'ab', man kinmuq ni pa ulew. 41Are kpe i ij chi k-at ni tzij pkiwi i winaq, i aj Níneve chi xeupixb'aj i ma Jonás, kkikoj ni imak yix ix winaq aj wo'or. Keje kki'an ni ile, man i winaq aj Níneve xkijalwachij kik'aslemal are xupon i ma Jonás chub'ixkil utzij i Dios chke. Xwiri, yix lik kijalwachij ti ik'aslemal tupu o jun chi mas nim ni u'ij chwach i ma Jonás; rumali kkikoj ni imak ike. 42Xaq i ixoq, chi ujer ati ajawinel re i pa wiqab', xaq ire kukoj ni imak yix ix winaq aj wo'or are kpe i ij chi k-at ni tzij pkiwi i winaq. Keje ku'an ni ire le, man yix kiwaj ti kita i jun chi o uno'oj. I ixoq le, lik mas naj xpe wi chutayik unojb'al i ma Salomón, chi mas o uno'oj. Xaq wo'or o jun chi, lik mas nim ni u'ij chwach i ma Salomón, xwiri yix kiwaj ti utayik wach i kub'ij —xub'ij i Jesús chke.
Itzel tew ktzalij chik
43I Jesús xaq xub'ij i tziji chke: Jun itzel tew, we xel che jun winaq, k-e pa taq chaqij jyub' chutzukuxik ipa kuxlan wi, xwiri kuriq taj. Te'uri kuch'ob'o: 44“Kintzalij chik pwachoch pa i xinel wi”; kub'ij; are ktzalij chik uri. Are kupon tan chik ru' achi, kuriqo pacha jun ja nti upam, lik jos-im, xaq yijb'am. 45Te'uri i itzel tew keutzukuj b'i rachi'il, xaq keuriq je wuqub' chik rachi'il, chi mas ko kicho'ab' chwach ire. Keuk'am b'i ru', man konojel ke'ok che achi. Chila kejeqi wi. Te'uri i achi le, lik mas utz ti ku'an chwach i xu'an ujer. Xaq keje ile ke'el chke i utz ti laj taq winaq wo'or.
Uchuch xaq i rachalal i Jesús
46I Jesús k'a kch'a'at ku' i winaq are xupon uchuch, xaq i rachalal. Ike je o chisaq, kkaj kelapan ru' Ire. 47Are uri o jun xub'ij che i Jesús:
—I achuch ku' i awachalal je o chisaq, kkaj kelapan awu' —xecha.
48Xwiri, i Jesús xub'ij che.
—¿Pachin inchuch, xaq je pachin i wachalal? —Xcha.
49Are uri, xeuk'ut ni'pa utijoxelab' ru' u'ab', i xub'ij:
—Ike le je are inchuch, xaq je are i wachalal —xcha.
50Pachin i ku'an pacha kraj Inqajaw chikaj, je are inchuch uri, je are i wachalal xaq je are i wanab' —xcha i Jesús.
Currently Selected:
Mateo 12: ACHICUB
Highlight
Share
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
