Mateo 11

I je rajtaqon i ma Wan chi Ajqajsanel Ya

1I Jesús are xutzin chub'ixkil chke i kab'lajuj utijoxelab' wach kki'ano. Te'uri x-e pa taq tinimit re i jyub' le, chkitijoxik xaq chub'ixkil utzij i Dios chke i winaq. 2Are ktijin i Jesús che uchak le, are uri i ma Wan Ajqajsanel Ya, tz'apim chik prexil. Ire, are xuta utzijol wach ktijin i Cristo chu'anik, xeutaq b'i jujun chke utijoxelab' ru'. 3Are xeupon ru' i Jesús, xkitz'onoj che:

—¿Yet i at Tol qe chi ub'im i ma Wan chi katk'unik? ¿O kqoy-ej jun chik? —Xkib'ij che.

4I Jesús xub'ij chke: “Chixtzalij chik ru' i ma Wan; chib'ij che wach i xita xaq wach i xiwilo chi kintijin yin chu'ankil. 5Chilapa che chi i mawach ketzun chik; xaq i je sik keb'inik; xaq i iwab'ib' chi o itzel ch'ak che kitz'umalil; xaq i je tak ketanik; xaq i kamnaq kewalijik; xaq i nib'a'ib' kitom i utz laj tzij k'ak' re i Dios re kelb'al pa k'ax.” 6Chib'ij che “chi utz re i jun chi kusach ti ukub'ib'al uk'ux chwe”; keje ile xub'ij i Jesús chke utijoxelab' ma Wan.

7Are xe'e utijoxelab' i ma Wan, i Jesús xujeq lapanik chrij i ma Wan le. Chke i winaq “Yix, are xix-e che i tz'inilik jyub' chaqij chutayik i ma Wan, ¿Wach xiwil chila? ¿Xatab'a xa xiwil jun es b'usum rumal tew chi xaq kusilab'saj? Are taj. 8¿Wach uri xix-e chrilik? ¿Xatab'a xix-e chrilik jun achi, chom uwiqik u'anom che rib'? Are taj. Ni'pa i o ki'u' chom chi lik paqalik, ne te o pa ta'aj tz'inilik jyub' chaqij, lik je jeqel prachoch i ajawinel. 9¿Wach uri xix-e chrilik? ¿Jun profeta? Qatzij, are. I jun chi xiwilo le, lik nim ne u'ij chkiwach i je profeta. 10I ma Wan are i jun chi tz'ib'tal kan chupam Uwuj i Dios chi kutaq na loq.”

“Yin nab'e kintaq nu b'i jun ajb'il intzij chawach yet,

man kuyijb'a ni b'e chawach.”

Keje ile tzib'tal kan chupam uwuj i Dios.

11Qatzij i kinb'ij chiwe: I ma Wan Ajqajsanel Ya, nim ni u'ij ire chkiwach konojel i winaq, k'a chuxeb'al ij saq. Xwiri, wo'or konojel ni'pa i ke'ok ni Pu'atb'al tzij i Dios aj Chikaj, mas nim ni ki'ij ike chwach ire.

12U'atb'al tzij i Dios aj Chikaj je k'i ke'anaw ch'oj chrij. Keje ki'anom li ile k'a are xujeq uchak i ma Wan, k'a are o wi wo'or. Lik kki'at kipen chu'atixik. 13Keje ile kki'ano, man konojel i profeta, xaq i atb'al tzij re i mam Moisés is xa xkib'ij chi kk'un ni ajawinik re i Dios k'a arewi keje ile are xk'un li ma Wan. 14Xaq we kiwaj kiwetamaj i saq laj tzij, i ma Wan are i profeta mam Elías chi xkib'ij ike kk'un na. 15We yix o ixikin chutayik, chita ub'e iri.

16I winaq wo'or, ¿Wach nawi keinjunamsaj wi ru'? Xa je pacha ak'alab' chi kesik'inik je kul pa taq k'eb'al; kesik'in chke i kachi'il: 17“Yoj xqaxut'ij i su' chiwe, xwiri yix xiwaj ti xixxajawik. Xaq xqab'ixaj i b'ix re b'is, xwiri xix-o' taj”. 18Man xk'un i ma Wan chi lik nti o kutijo xaq nti kutu'u, i kkib'ij chi o itzel che. 19Are xink'un Yin, chi Xinalaxoq chwach Ulew pacha Winaq, is ronojel kintijo xaq kintu'u, xwiri kib'ij yix chi lik nti usuk' kinwa'ik, xaq in aj-ab'arel laj winaq. Xaq kikoj inmak chi Yin in kachi'il i ajmakib' laj taq winaq, xaq i utz ti laj taq ajtz'onol alkawal re i nim laj tinimit Roma. Xwiri, kiwetamaj uri chi no'oj re Dios k-aljin chrij i utz laj anik.

Tojpen pkiwi i tinimit chi kekojon ti che i Dios

20Ni'pa i tinimit ipa u'anom wi uk'iyal nimaq taq il i Jesús, i winaq chila lik xkijalwachij ti kik'aslemal. Rumali, xok ire chkiyajik. Xub'ij: 21“¡To' iwach yix, ix aj tinimit Corazín! ¡To' iwach yix, ix aj tinimit Betsaida! Man wetene in-anom uk'iyal nim laj il chila pa Tiro xaq pa Sidón pacha in-anom iwu' yix, ike uri ya kijalwachim teneri chik i kik'aslemal. Xaq kikojom ti neri ki'u' as xaq chaj pkija' k'utb'al re i kimak. 22Xwiri yix, are kk'un i k'isb'al ij, nim ni tojpen kpe piwi yix chwach i tojpen chi kpe pkiwi i je aj Tiro, xaq i je aj Sidón. 23Xaq yix, chi ix aj tinimit Capernaum, ¿Kich'ob' yix lik ix utz, lik ya kixok k'a chila chikaj? Xwiri, yin kinb'ij chiwe chi lik k'a naj kixk'aq nu b'i pa jul re i tojpen chi nti uk'isik. Man i uk'iyal i nimaq taq il antal chiwach yix, wetene x-an ile chkiwach i aj Sodoma ujer, ike xkijalwachij teneri kik'aslemal; i kitinimit le lik k'a o teneri wo'or. 24Xwiri kinb'ij chiwe, are kk'un i k'isb'al ij, nim ni tojpen kpe piwi, chwach i tojpen chi kpe pkiwi ike chi je aj Sodoma.” Xcha.

Xwi i Jesús reta'am pachin uqajaw

25Are uri i Jesús xukoj u'ij i Dios; xub'ij: “Kintioxij chawe Ta, chi at Rajaw i kaj ulew. Kintioxij chawe, man aya'om chke i nti ki'ij chi kkita ub'e wach ach'ob'onik yet. Xwiri, awuwam uwach chke i o kino'oj, chke i nimaq kinojb'al. 26Qatzij, Ta, keje a'anom ile man keje ile kawaj yet.” Xcha.

27Te'uri xub'ij chke i winaq: “Ronojel ni'pa i olik, Inqajaw uya'om pin-ab'. Mijun reta'am uwach Uk'ojol i Dios, xwi i Ta chikaj reta'am. Xaq mijun reta'am uwach i Dios, xwi Yin, chi in Uk'ojol weta'am uwach; xaq chke ni'pa i jub'an chi yin kwaj u'aljinsaxik chke, re kketamaj ni uwach. 28Chixpet wu' Yin, iwonojel yix chi ix kosnaq che ichak, iwonojel yix chi o iweqan; man Yin kinya ni uxlanem chiwe. 29Chiya iwib' che inyuku chi kinkoj chiwe; chixnaw ni wu' Yin, man Yin nim ink'ux, xaq utz ink'ux chiwe. Keje ile kiriq ni uri uxlanb'al ik'ux. 30I yuku chi kinkoj Yin, k'ax ti b'inik ru', xaq iweqan chi kinya'o, al taj.” Keje ile xub'ij i Jesús chke.

Currently Selected:

Mateo 11: ACHICUB

Highlight

Copy