Mateo 10

I Jesús xeucha kab'lajuj apostolab'

1Te'uri i Jesús xeusik'ij i kab'lajuj utijoxelab' ru', xaq xuya pki'ab' chi ketiki chrelsaxik itzel laj taq tew, xaq ketiki chrutzirsaxik xab'i chi k'ax, xab'i chi yob'ilal.

2I kib'i i kab'lajuj apostolab' are iri: Nab'e, are i ma Simón, chi xaq “ma Pedro” kb'ix che; te'uri i ucha', chi are ma Andrés ub'i; te'uri, i keb' uk'ojol i mam Zebedeo: Chi je are ma Jacobo xaq i ma Wan; 3te'uri i ma Felipe, xaq i ma Bartolomé; te'uri i ma Tomás, xaq i ma Mateo chi ajtz'onol alkawal re i nim laj tinimit Roma; te'uri i ma Jacobo chi uk'ojol i mam Alfeo; xaq i ma Lebeo chi xaq ma Tadeo kb'ix che; 4te'uri i jun chik ma Simón, aj Cananista#10.4 Kikwenta jun tzob'aj ke aj Judío chi lik kch'ojin chuto'ik i utinimit xaq keresaj b'i je aj naj chi kkaj ki'an i utz taj chke.; te'uri i ma Judas Iscariote chi x-on panoq xk'ayiw i Jesús.

I Jesús xeutaq b'i apostolab' chub'ixkil utzij i Dios

5I Jesús xeutaq b'i kab'lajuj utijoxelab' le, xaq xub'ij b'i usuk' chke wach kki'ano: “Are kixok pa taq tinimit, mix-e ipa je jeqel wi i ne te aj Israel winaq; xaq mixok pa taq tinimit ke i aj Samaria. 6Xwi ku' i aj Israel winaq kix-e wi; man ike je pacha jub'an chij chi je sachnaq. 7Are kix-ek, chipaxsaj uwach i tzij aj chikaj, chi lik are i U'atb'al tzij i Dios aj Chikaj lik ya xnaqajab'ik. 8Cheiwutzirsaj iwab'ib'; cheiwalijsaj i je kamnaq; chiwesaj i k'ax chke ni'pa o i yob'il lepra chke; xaq cheiwesaj b'i itzel taq tew chke i winaq. Keje ile chi'ana na. Man i anik le sipam chiwe rumal i Dios, ni'pa i kixtiki yix chu'ankil, ilo'om taj, xaq mitz'onoj rajil, we xi'an i utzil chke i winaq.

9Are kix-ek, mik'am b'i ipwaq, mik'am b'i an-o'oj xaq i saq-o'oj. 10Xaq mik'am b'i iteb', xaq mitene jun chik ikamix, xaq mitene jumolaj chik ixajab', xaq mitene ich'amiy. Lik nti kik'am b'ik, man jun ajchak lik rajwaxik kkiya ni che wach i kutijo.

11Yix are kixupon che jun tinimit, are kixupon che jun komon, chitzukuj jun winaq chi kixuk'ulaj chi rachoch; chixjeqel chila, k'a te kikanaj kanoq are kixel chila. 12Are kixok ru' ja, chitz'onoj che i Dios chi kuya i uxlanb'al kik'ux i je aj ru' ja le. 13I winaq chi je rajaw ja, we utz ik'ulaxik kki'ano, kk'iji uri i utz pkiwi chrij pacha urayijb'al kik'ux. Xwiri we utz ti ik'ulaxik kki'ano, i utz olem xaq i jikilem k'uxij lik xwi uri i we yix. 14We o i kixkik'ulaj ti ku', xaq kkaj ti utayik i tzij chi kib'ij chke, chixel uri chila che i ja le, xaq che i tinimit le, chipu kan i ulew che iwaqan.#10.14 K'utb'al re chke chi o kimak chkij. 15Qatzij i kinb'ij chiwe: Chi pa k'isb'al ij, are k-at ni tzij pkiwi i tinimit, mas nim ni tojpen kpe puwi i tinimit le, chwach i xpe pkiwi i keb' tinimit Sodoma xaq Gomorra ujer.

Ch'oj chkij i je re i Cristo

16Chita pe', yin kixintaq b'i yix chkixol i je ajch'oj chiwij; ix pacha chij chkixol i utiw. Chi'ana kwent iwib', pacha ku'an jun kumatz, kuya ti rib' che i jun. Xwiri xaq chi'ana utz che iwib' pacha kki'an i palomax. 17Chi'ana kwent, man o ni winaq kixkijach ni pki'ab' i atb'al tzij, xaq kkijik ilo'xik pa taq ja re molb'al ib' ke i judío. 18Xaq kixkik'am b'i chkiwach i Aj-ok'al utzam i jalajuj taq tinimit, xaq chkiwach i nimaq taq ajawinelab' xa wumal Yin. Xwiri, keje ile kinilap ni chkiwach ike, xaq chkiwach i ne te aj Judío winaq. 19Are kixjach ni pki'ab' i atb'al tzij, mixk'achir chuch'ob'ik wach i kib'ij chke, xaq mixk'achir chuch'ob'ik wach ub'ixkil kib'ij na. Man are kuriq i or le, i Dios kub'ij ni chiwe wach i kib'ij chke. 20Man yix, are kixch'awik, are ti yix kixch'awik, are Utewal i Ta chikaj kch'aw chiwij.

21Kiwil na, o i winaq kekijach ni i katz kicha' i je ajch'oj chkij, kamsab'al ni ke; xaq je o ni qajawxelab' keje kki'an ile lik kekijach ni kak'al. Xaq keje i kak'al kekijach ni kiqajaw kichuch pki'ab' ajkamsanel. 22Konojel i winaq tzel kixkil na xa wumal Yin: Xwiri pachin i kuch'ijo k'a pa k'isb'al re, lik ktotaj na. 23We ix o che jun tinimit i kixkiterb'ej man kki'an ch'oj chiwij, chix-anmajoq; jix chik che jun tinimit. Qatzij i kinb'ij chiwe, i pacha Winaq chi xalax chwach Ulew, kk'un na are k'amaja ne kixtiki yix che usolixik ronojel i tinimit Israel.

24Jun tijoxel, nim ti u'ij chwach u'ij utijonel; xaq keje jun ajchak, nim ti u'ij chwach u'ij i rajaw uchak. 25Jun tijoxel, rajwaxik kkikot ru' we ke'el na pacha u'ij utijonel; xaq keje jun ajchak, rajwaxik chi kkikot ru' we ke'el na pacha rajaw uchak. Jun rajaw ja we kb'ix ni Itzel che, xaq keje uri kb'ix ni chke i ralk'uwal.

Ch'awik chi nti xib'rikil ru'

26Rumali, mixij iwib' chke i winaq wach kki'an chiwe. Man nti jun anik ani'al we k-etamax taj, xaq lik nti jun uwam uwach we kel ti chisaq; 27Ni'pa i kinb'ij chiwe pa equmal, chipaxsaj uwach yix pa'ij; ni'pa i kinb'ij chiwe ani'al, chixsik'in chub'ixkil chke i winaq puwi taq ja. 28Mixij iwib' chke i ketiki chukamsaxik i ch'akul, xwiri iwanima ketiki ti che. Are, chixija iwib' che i Jun, chi o pu'ab' kusachsaj uwach i ch'akul xaq iwanima pa a'.

29Iweta'am chi kk'ayix ti keb' tz'ikin chwach jun pwaq mer. Xwiri, i Dios lik kerilo; mijun chke ktzaq li pulew we Iqajaw yix chikaj kuya ti che. 30Xaq keje yix, i Dios lik kixrilo. Ire reta'am neri ni'pa uk'iyal wi'ij o che ijolom. 31Rumali mixij iwib'; yix ut mas o ni i'ij chkiwach uk'iyal tz'ikin.

O uchak kqalap i Cristo chke i winaq

32Ronojel ni'pa i kkib'ij i winaq chkiwach xaq chke i kiya'om kiwach wu', xaq keje Yin uri, kinb'ij ni che Inqajaw chikaj chi inya'om inwach ru' Ire. 33Xaq ni'pa i kkib'ij chkiwach i winaq chi kiya'om ti kiwach wu', xaq keje Yin uri, kinb'ij ni che Inqajaw chikaj chi ne te we Yin.

Uk'utik i saq laj tzij xaq upetsaxik i ch'oj

34Mich'ob' yix we in k'unnaq chuk'amik i utz laj olem ke i winaq chwach i jyub' ta'aj. Rumal ti ile in k'unnaq; Yin in k'unnaq chuya'ik ch'oj chkixol i winaq. 35Usuk' ink'unb'al Yin are iri; kki'an ni ch'oj jun ala ru' uqajaw, jun ali ru' uchuch, jun alib'xel ru' uchuch ralib'. 36Ke'el ni uri chi ajch'oj chiwij chijujunal, je are iwalk'uwal.

37Xwiri i jun chi lik we Yin, o uchak k'ax kinuna yin chkiwach uqajaw uchuch. Xaq o uchak k'ax chinuna ni Yin chwach uk'ojol xaq umi'al. We keje ti ku'an uri ile, lik kmajaw ti uri che we yin. 38Jun we Yin o uchak kterej chwij, tupu kkam ni rumal. Pachin kraj ti u'anik ile, kmajaw ti uri che chi we Yin. 39Pachin jun xa k'ax kuna uk'aslemal waral, xa kusach uri uk'aslemal chi saqil. Xwiri, i jun chi ksachsax ni uwach uk'aslemal xa wumal Yin, kya' uri uk'aslemal saqil.

I sipon

40Pachin jun kixuk'ulaj ru', ke'el ni uri pacha Yin kinuk'ulaj ni ru'. Xaq pachin kinuk'ulaj ni yin ru', ke'el ni uri chi kuk'ulaj ni Jun chi in taqawnaq loq. 41Xaq pachin i kuk'ulaj jun profeta ru', man rumal utaqon i Dios, ire kya' ni sipon uri che xaqjun ru' pacha i kya' che i profeta. Xaq pachin jun kuk'ulaj jun utz laj winaq ru' man rumal utz chwach i Dios, xaq i Dios kuya ni uri i utz che pacha i kuya che i winaq chi lik utz. 42Pachin jun kuya jub'i' uya' jun ral ch'utini, we xuya ni che xa rumal teren ni chwij Yin, qatzij uri xaq kya' ni usipon rumal i Dios; xub'ij i Jesús chke.”

Currently Selected:

Mateo 10: ACHICUB

Highlight

Copy