Mateo 13
13
Jun tijojb'al tzij chrij jun ajtikanel
1Che i ij le, i Jesús xel ru' ja, x-e chuchi' i semelik ya, xaq xkub'i chila. 2Are uri xemoltaj tan chik uk'iyal winaq ru'. Rumali Jesús x-an chupam jun barco, xaq xkub'i chila, tz'aqat ni'pa i winaq is xekanaj chuchi' i semelik ya. 3Te'uri xujeq uk'utik k'iyal taq b'iroxik chke ru' tijojb'al taq tzij.
“Jun ajtikanel x-e pa tikanik. 4Are xukirij b'i rija, o jub'i' xetzaq pa b'e. Te'uri xek'un i tz'ikin xkitij b'ik. 5Xaq o jub'i' chik xetzaq pa taq ab'aj, pa o wi nti qas ulew. I ija le, juntir xalax loq, man muqtajnaq ti mas. 6Xwiri, are xel li ij, xchaqij na, man nti ra' enaq pulew. 7Xaq jub'an chik xetzaq pa k'ix; i k'ix xk'iyik, xaq xukamsaj i tikon. 8Xaq o ni ija xetzaq pa utz laj ulew; lik k'i ni uwach xuya'o. O ni raqan xuya jo'winaq (100) uwach, o i xuya oxwinaq (60); xaq o i xuya lajuj juwinaq (30) uwach —xcha. 9We yix o ixikin chutayik, chita ub'e uri.” Xcha.
Wach taq usuk' i tijojb'al tzij
10I Jesús are xub'ij ile i utijoxelab' xetejeb' ru' i xkitz'onoj che: “¿B'uchak xa tijojb'al tzij kab'ij are kaya i k'utunik chke i winaq?” Xecha che. 11I Jesús xula' uwach chke: Yix ut, i Dios uya'om chiwe kita ub'e wach usuk' U'atb'al tzij i Dios aj Chikaj. Xwiri chke ike keje ti ile. 12Keje u'onom i Dios ile, man ni'pa i kkik'am na wach kusujuj Ire chke, mas kuya uri chke; keje ile nim ni o ku'. Xwiri ni'pa nti qas o ku' lik xa ne kk'am ni uri i jub'i' chke chi o ku'. 13Rumal uri, xa ru' tijojb'al tzij kink'ut chke i winaq, man ike, tupu ketzunik, xwiri kkil taj; tupu ketanik, kkita taj, xaq kkita ti ub'e. 14Keje ke'el chke pacha ub'im i Dios chupam uwuj utz'ib'am kan i mam Isaías chi profeta; xub'ij:
“Yix qatzij neri, kita na, xwiri kita ti ub'e;
qatzij neri kixtaqen na, xwiri nti kiwilo.
15Man i winaq re i tinimiti, kkaj ti kkita ub'e,
xa kitz'apim i kixikin,
xaq kimutz'um i kib'a'wach,
man ketzun ti ru' kib'a'wach, xaq ketan ti ru' kixikin.
Nti kkita ub'e pkik'ux, rumali lik ketzalij ta li wu',
man keje ile yin keinkunaj.”
16Xwiri yix, ix ti keje ile. Lik utz iwe, man ib'a'wach ketzunik, xaq ixikin ktanik. 17Qatzij i kinb'ij chiwe, je k'i i profeta, xaq je k'i i winaq chi lik je utz, xkaj te'eq rilik iri chi yix kixtijin chrilik wo'or, xwiri xkil taj; xaq xkaj utayik te'eq pacha i kixtijin yix chutayik wo'or, xwiri xkita taj.
I Jesús kusaqij i tijojb'al tzij chrij ajtikanel
18Te'uri i Jesús xub'ij chke: “Chita uri ub'e wach usuk' i tijojb'al tzij chi xinb'ij re i ajtikanel. 19Ni'pa i winaq chi kkita i tzij re ajawinik re i Dios, we kkita ti ub'e, ke'eloq pacha xu'an ija chi xtzaq pa b'e. Keje i winaq ile, man kk'un itzel i kresaj i utz laj tzij chi o pkik'ux. 20Xaq i ija chi xtzaq pa taq ab'aj, ile keje pacha i winaq chi kkita i utz laj tzij, xaq kekikotik xkikojo. 21Xwiri, je pacha jun tikon chi naj taj enaq wi i ra'; kenajtin taj. Are kpe i k'ax pkiwi rumal i utz laj tzij chi kikojom, xaq kpe i kiyo'yaxik kumal i winaq, xa ksach ukub'ib'al kik'ux rumali kko'taj kan utz laj tzij. 22Xaq ija chi xtzaq pa k'ix, ile keje pacha i winaq chi kkita i utz laj tzij, xwiri, xa kek'achir rumal i kik'aslemal waral chwach i jyub' ta'aj, xaq i kirayijb'al lik xa are kkich'ob' ub'itaq ke; ile xa kuchup i utz laj tzij pkik'ux. Rumali kewachin taj. 23Xwiri, ija chi xetzaq pa utz laj ulew, ile keje pacha i winaq chi kkita i utz laj tzij, xaq kkita ub'e. Ike lik kewachinik; jun ija kuya jo'winaq (100) uwach; i jun chik kuya oxwinaq (60) uwach; xaq i jun chik ija kuya lajuj juwinaq (30) uwach.” Keje ile xub'ij i Jesús chke.
I tijojb'al tzij chrij i utz ti laj es chuxol i trigo
24I Jesús xub'ij chik i jun tijojb'al tziji chke: U'atb'al tzij i Dios aj Chikaj ke'eloq pacha i tziji: O jun achi xutik i trigo prulew; chom laj ija xutiko. 25Xwiri, are is kewar konojel, xupon jun ajch'oj chrij i rajaw, xutik kan i utz ti laj tikon chuxol i trigo i x-ek. 26Are xepo'ik, junam xek'iyik; xwiri are xpe uwach i trigo, are uri x-aljin i jub'an chi utz ti laj es o chuxol. 27Te'uri i ajchakib' xe'e chub'ixkil che i rajaw: “Nim laj winaq, i ija chi atikom na, lik chom, ¿Ipa xpe wi i utz ti laj es chi o ru'?” Xecha. 28I rajaw xub'ij chke: Xa are jun ajch'oj chwij x-anaw ile. Te'uri i ajchakib' xkib'ij che: “¿Kawaj keqamich'a i utz ti laj es?” Xecha. 29“Mimich'o”; xub'ij i rajaw, “man we kimich' i utz ti laj es, moqxa kmich'taj i trigo ru'.” Xcha. 30“Utz chiya che kk'iy na, junam ru' i trigo. Are kqaj uch'upik uwach i trigo, are uri, keintaq b'i i ajmolonel chrelsaxik i utz ti laj es. Te'uri ike kki'an yotaj che, man kporox na. We xutzin ile, te'uri kqamol i trigo xaq kqaya puk'olb'al.” Xcha i rajaw.
I tijojb'al tzij chrij ija re mostas
31I Jesús xaq xub'ij jun chik tijojb'al tzij chke. “U'atb'al tzij i Dios aj Chikaj ke'eloq pacha ku'an jun ija re i mostas, chi jun achi kutik prulew. 32I ija le, lik ch'utin chkiwach jub'an chik ija. Xwiri, we xpo'ik, mas nim ni ke'el chkiwach i konojel i tikon. Lik nim ke'eloq, pacha jun che'; te'uri i tz'ikin kek'unik xaq kki'an kisok chupam taq u'ab'.”
I tijojb'al tzij chrij i kunb'al re i wa re trigo
33I Jesús xub'ij chik jun tijojb'al tzij chke: “U'atb'al tzij i Dios aj Chikaj keje pacha i kunb'al re i wa re trigo. Ile, we jun ixoq kuchapo, xaq kukoj oxib' almul arin ru', tupu xa jub'i' kunb'al kukoj che, kwalij uwach ronojel i or.”
I Jesús xu'an k'utunik ru' tijojb'al taq tzij
34I Jesús xuya ronojel i k'utunik le chke i winaq ru' tijojb'al taq tzij; nti tzij xub'ij chke, we ru' ti tijojb'al tzij. 35Xe'eloq pacha ub'im kan i profeta. Xub'ij:
Ru' i tijojb'al tzij kin-an wi i k'utunik chke;
kinsaqirsaj ni'pa taq i uwam uwach,
k'a chuxeb'al ij saq.
Keje ile tz'ib'tal kanoq.
Usaqixik i tijojb'al tzij re i utz ti laj es chupam i trigo
36Te'uri i Jesús xeu'ijla b'i i winaq i xok pa ja. Are uri i utijoxelab' xetejeb' pan ru' xaq xkitz'onoj che: “Chasaqij chqe wach usuk' i tijojb'al tzij chi xab'ij chrij i utz ti laj es chi tiktal kan pa tikon.” 37Te'uri i Jesús xub'ij: “Are i ktikaw i utz laj ija are Yin chi xinalaxoq chwach ulew pacha winaq. 38Ipa kintik wi are chke winaq chwach jyub' ta'aj. Are i utz laj ija, are i winaq chi kijachom kib' pa ajawinik re i Dios, are i utz ti laj taq es are i winaq uri chi je re itzel. 39Are i ajch'oj chrij i rajaw i tikon are itzel chi ktikaw i utz ti laj ija. Are i molonik re uwach i tikon, are i kimolik i winaq pa k'isb'al re uwach i jyub' ta'aj. I ajchakib' chi kkimol uwach i tikon, je are i ángel. 40Keje uri ile, pacha i utz ti laj taq es, kmol uchi', xaq kk'aq pa a' porb'al re. Xaq keje k-an ni ile pa k'isb'al re uwach i jyub' ta'aj. 41Yin, chi Xinalaxoq chwach Ulew pacha Winaq, keintaq li in-ángel ru' intikon, kolkimolb'ej ke ni'pa i je kiminom i kachi'il pa utz taj, xaq konojel ni'pa i ke'anaw i utz taj. 42Te'uri kek'aq ni pa a' pa orno. Chila ke'o' na; xaq kkiqach'ach'ej uwake rumal ni uk'axk'ol. 43Te'uri, ni'pa i je utz chwach i Kiqajaw Dios kek'iji ni pa ajawinik re Ire. I ki'ij kichomal lik kwalch'inik pacha uchomal i ij. We yix o i xikin chutayik, chita ub'e uri.” Xcha i Jesús chke utijoxelab'.
I tijojb'al tzij re i pwaq muqtalik
44U'atb'al tzij i Dios aj Chikaj keje pacha uk'iyal pwaq muqtal pulew che jun k'ijib'al. Kk'un jun achi i kuriqo. Xwiri kresaj ta loq, xa kumuq chik kan uwi, xaq lik kkikotik k-ek; is keuk'ayij na ni'pa i o ru'. Te'uri kpetik i kulo' i ulew man o b'eyomal chupam. Keje u'atb'al tzij i Dios ile.
I tijojb'al tzij re i chom laj ab'aj perla chi lik nim rajil
45U'atb'al tzij i Dios aj Chikaj keje pacha jun ajk'ay perla, k-e chutzukuxik i perla chi lik paqal rajil. 46Are kuriq jun chi lik chom; xaq lik paqal rajil, k-e chuk'ayixik ronojel i ub'itaq re, lo'b'al re ab'aj le. Keje ku'an ire ile man lik chom; xaq keje uri u'atb'al tzij i Dios ile.
I tijojb'al tzij re i ataraya
47U'atb'al tzij i Dios aj Chikaj keje pacha jun ataraya. I je ajchapol kar are kkik'aq b'i i ataraya pa ya, is xa pa chke kar kkichap loq. 48Are nojnaq chik i ataraya, kkesaj li uri chuchi' i ya. Te'uri kekub'i chkitzukuxik i utz chke i kar le. Ni'pa i utz, ke kik'ol ni chupam jun chikach; i ne te utz, ke kik'aq b'ik. 49Keje ku'an ni ile pa k'isb'al re uwach i jyub' ta'aj; ke'el ni ángel chkicha'ik i ne te utz, chkixol i je utz. 50Te'uri kek'aq ni pa a' pa orno. Chila ke'o' na; xaq kkiqach'ach'ej uwake rumal uk'axk'ol xaq i o'ej. Keje i tijojb'al tzij ile xub'ij i Jesús.
I k'ak' xaq i el
51Te'uri i Jesús xutz'onoj chke:
—¿Xita ub'e ronojel iri? —Xcha.
Lik qatzij xqata —xecha ike.
52Te'uri xub'ij chke:
—Jun tijonel re ujer atb'al tzij, we nawnaq che i tzij chi kinb'ij Yin chi re U'atb'al tzij i Dios aj Chikaj, utz re ire uri. Man keje pacha jun rajaw ja chi che ub'itaq re uk'olom, lik kuriq relsaxik i k'ak' xaq el taq b'iroxik.
I Jesús chila Nazaret
53I Jesús, are xutzin chub'ixkil i tijojb'al taq tzij le, xel chila pa Capernaum x-e pa Nazaret. 54Are xupon chila prulew xok chuk'utik chke i aj Judío pa ja re molb'al ib' ke ike. Ike, are xkita, lik xkib'isoj. Xkib'ij:
—¿Ipa xeunawsaj wi rib' i achi le, chi lik o unojb'al? ¿Wach utikilem che i nim laj il le? 55Ire le xa are rak'al i mam chi aj-anol mexa, xaq i uchuch xa are ati Mariy. A Jacobo, a José, a Simón xaq i a Judas, ike le junam kiqajaw ru' i Jesús. 56Xaq i ranab' je jeqel chi qu' yoj. ¿Ipa xretamaj wi ut ronojel ile? —Xecha.
57Rumali, lik xkaj ti xkikojo ni'pa i xub'ij xaq wach i xu'ano. Rumali i Jesús xub'ij chke:
—Jun profeta, konojel i winaq kkikoj u'ij, xwi i je rach aj tinimit kkikoj ti u'ij, xaq keje i je aj prachoch —xub'ij.
58Ire nti qas nimaq taq il uri xu'an chila, man ike nti ukub'ib'al kik'ux che.
Currently Selected:
Mateo 13: ACHICUB
Highlight
Share
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
