Lucas 9

I Jesús xeutaq b'i utijoxelab' chub'ixkil i ajawinik re i Dios

1I Jesús xeumol i kab'lajuj utijoxelab' ru' xaq xuya kicho'ab', xuya pki'ab' kkesaj itzel taq tew, kekutzirsaj iwab'ib'. 2Te'uri xeutaq b'i chub'ixkil i utz laj tzij k'ak' re i ajawinik re i Dios, xaq chkutzirsaxik iwab'ib'.#9.2 Cf. Marcos 3.14-15. 3Xub'ij chke:

—Are kix-ek lik nti kik'am b'ik re ib'e, mitene ich'amiy, xaq mitene i teb', mitene iwa, mitene pwaq, xaq mitene i'u' re kijalo. 4Xa pachike ja kixupon wi, chixkanaj kan chila, k'ate kiya kanoq are kixel ni che i k'ijib'al le. 5We o tinimit kixkik'ulaj taj, chixel chila. Xwiri are kixel che i tinimit le, chipupa kan ulew che iwaqan k'utb'al re chke chi o k'ax kpe ni pkiwi.

6Ike xkimaj b'i kib'e; xe'e pa taq komon re i ulew le. Xkiya utzijol i utz laj tzij re i Dios, xaq xekikunaj iwab'ib'.

Uk'achirik ma Herodes

7I ma Herodes, chi ajawinel, xuta utzijol ronojel ni'pa i ktijin uk'ulmaxik. Rumali chi lik kuriq taj wach taq ku'ano, man je o jujun kkib'ij chi are i etz ma Wan Ajqajsanel Ya xk'un chik saq chwach. 8Xaq o jub'an chik kkib'ij chi are i profeta mam Elías xwinaqir chik; xaq o jub'an chik kkib'ij chi are jun chik profeta chi xk'un chik saq chwach. 9Xwiri i ma Herodes xub'ij:

—Lik yin xintaq relsaxik ujolom i ma Wan. ¿Pachin uri i achi le chi wo'or kinta chi lik k'i i nimaq taq anik u'anom?

Rumali chi ma Herodes lik kutzukuj wach rilik i Jesús ku'ano.

Jesús xeutzuq lajujwinaq kab'lajujmo' (5,000) achiyab'

10I apostolab' re i Jesús are xetzalij chaloq lik xkilap che i Jesús ronojel wach i xki'ano. Te'uri ire xeuk'am b'i k'a chunaqaj i tinimit Betsaida. 11Xwiri are xkita uk'iyal winaq xaq xeterej b'i chkij. Ire xeuk'ulaj ru' xaq xok chub'ixkil i ajawinik re i Dios chke, xaq xerutzirsaj ni'pa i iwab'ib'.

12Are ya kqaj i ij i kab'lajuj utijoxelab' i Jesús xetejeb' pan ru', i xkib'ij che:

—Chea'ijla b'i i winaqi, man ke'e pa uxlanem xaq che'oj chutzukuxik wach i kkitijo pa taq komon xaq pa taq k'ijib'al naqaj, man waral ipa oj o wi lik nti olik.

13I Jesús xub'ij:

—Chiya yix chke wach i kkitijo

Ike xkila' uwach:

—Yoj lik nti o qu', xwi jo'ob' wa re trigo ru' keb' kar olik. ¿O kawaj yet ke qalo'o wach i kkitij ni'pa i winaqi? —Xkib'ij.

14Kolo je lajujwinaq kab'lajujmo' (5,000) uk'iyal achiyab' je moltajnaq. Xwiri i Jesús xub'ij chke utijoxelab': —Cheikub'a pa taq tzob'ajil, lajuj kawinaq (50) winaq pa taq tzob'ajil chi'ana chke —xub'ij.

15Keje xki'an ile, xekub'i konojel. 16I Jesús xuchap i jo'ob' wa re trigo ru' i keb' kar; are uri xtzun chikaj xaq xutioxij che i Dios puwi. Te'uri xupiro xaq xuya chke utijoxelab', re kkijachb'ej chke i winaq. 17Konojel xkitijo, lik k'a xenoj na. Are xkelej xkimol i ch'aqa taq, xaq k'a xnoj kab'lajuj kub'an che i xk'is taj.

I ma Pedro xusaqij chi Jesús are i Cristo

18O jun ij i Jesús ktijin chutz'onoxik che i Dios utukel, i utijoxelab' je o ru'. Te'uri xutz'onoj ire chke:

—¿In pachin yin kkib'ij i winaq? —Xub'ij.

19Ike xkila' uwach che:

—O jujun kkib'ij chi yet at ma Wan Ajqajsanel Ya, kkib'ij. Xaq o jujun kkib'ij chi yet at mam Elías; xaq o jub'an kkib'ij moq at jun chik ujer profeta, i xk'un chik saq chawach —xkib'ij che.

20Are uri ire xutz'onoj chke:

—I yix, ¿Wach i kib'ij, in pachin yin?

I ma Pedro xula' uwach:

—Yet at Cristo chi at petnaq ru' i Dios —xub'ij che.

I Jesús xutzijoj ukamik

21Xwiri i Jesús lik xub'ij chke chi lik mkilap taq che jun. 22Xaq xub'ij chke:

—Yin chi Xinalaxoq chwach Ulew pacha Winaq o uchak kintij ni k'ax. Kinkixutuj ni nimaq taq winaq, junam ku' i kaj-atzil i rajpatan i Dios, xaq i je tijonelab' re i ujer atb'al tzij. Lik kinkikamsaj na, xwiri churox ij kinwalij tan chik.#9.22 Lucas 9.44; 18.31-33.

23Te'uri i Jesús xub'ij chke konojel i winaq:

—Jun, we kraj kterej chwij, o uchak much'ob' chik rib', xwiri ij ij kterej ni chwij tupu kkam ni rumal ile. 24Man jun we k'ax kuna uk'aslemal waral, kusach uri uk'aslemal chi saqil. Xwiri, we o jun ksach ni uwach uk'aslemal xa wumal yin, kya' uri uk'aslemal saqil che. 25¿Wach taq wa kraj i winaq che we kuch'ak ronojel uwach i jyub' ta'aj, we xa ku'an k'ax che rib' o xaq kusachsaj taq rib' utukel? 26We o jun xa kk'ix che wumal yin, we kk'ix che intzij, xaq yin kink'ix ni che ire are kink'un tan chik. Yin chi Xinalaxoq chwach Ulew pacha Winaq, lik kink'un chik ru' u'ij uchomal Inqajaw xaq ru' ki'ij kichomal i lo'laj ángel.#9.26 Mateo 10.33; Lucas 12.9; 2 Timoteo 2.12. 27Qatzij i kinb'ij chiwe, chi je o jujun waral kekam ti tan, k'a kkil ni ujeqanik i ajawinik re i Dios waral —xub'ij i Jesús chke.

Uyojtajik uwach utzunb'al i Jesús

28Kolo wajxaqib' ij rik'awik ub'ixkil ile, i Jesús xel b'i puwi jun jyub' chutz'onoxik che i Dios. Je rachi'ilam b'i ma Pedro, ma Jacobo, xaq i ma Wan. 29Tz'aqat ktijin chutz'onoxik che i Dios i upalaj lik xyojtajik; i u'u' xu'an saq lik kwalch'inik. 30Xaqte'et xewinaqir keb' achiyab', kelapan ru'; je are i mam Moisés xaq i mam Elías. 31Lik sutim kij rumal jun a' chi lik kwalch'inik xaq ketijin chulapik wach i kamik kik'aw wi i Jesús pa tinimit Jerusalén. 32I ma Pedro ku' i rachi'il lik kkaj waram, xwiri, lik xek'ask'atik xaq xkil i uchomal i Jesús xaq i keb' achiyab' chi je o ru'. 33I keb' achiyab' le are xkitikb'a enam, are uri i ma Pedro xub'ij che i Jesús:

—Qatijonel, ¡Utz xu'ano chi oj o waral! Kqa'an oxib' mujb'al: Jun awe yet, jun re i mam Moisés, xaq jun chik re i mam Elías —xub'ij.

Xwiri i ma Pedro reta'am taj wach i xub'ij. 34Are ktijin che i lapanik, xqaj li jutzob'aj sutz' pkiwi. Lik xkixij kib' are xesach chupam i sutz' le. 35Chupam i sutz' le xkita jun ch'awb'al chi keje iri kub'ij:

—Iri are Ink'ojol chi lik k'ax kinna'o; xaq lik kul ink'ux che, chita wach i kub'ij —xb'ix chke. 36Are xk'is utayik i tzij le, xkil ike chi Jesús utukel chik. Wach i xkil chila ike xkilap taj, lik che taq i ij le lik che mijun jun xkilap wi.

I Jesús xrutzirsaj jun ala chi o te'eq itzel tew che

37Chukab' ij, are xeqaj li tzam jyub', lik je k'i winaq xe'el chuk'ulaxik i Jesús. 38O jun achi chkixol i winaq xsik'in chub'ixkil che i Jesús:

—Tijonel, cha'ana utzil chomal chwe, chawila ni wak'al. Man lik xwi wak'al ile olik. 39O jun itzel tew che chi xaqte'et ksik'in anoq; kok chi siksatik xaq kwoqow uk'axaj rumal. Ku'an k'ax che xaq lik kraj ti kro'taj. 40Lik xintz'onoj utzil chke i atijoxelab' chi kkesaj itzel tew che, xwiri xetiki ti che.

41I Jesús xula' uwach:

—¡To' iwach yix chi kikoj ti i Dios xaq lik ix sachnaq chupam i utz taj! ¿Ni'pa nawi chik ij k'a kraj chi kink'iji iwu' chi xaq lik kinch'ij ni ni'pa i ki'ano le? —Xub'ij chke.

Te'uri xub'ij che i achi:

—Chak'ama li awak'al.

42I ak'al xutikb'a utejeb'ik ru' i Jesús; are uri i itzel tew xutzaqsaj chik pulew xaq xusiksa tan chik; lik xk'achir pu'ab'. Xwiri i Jesús xuyaj i itzel tew, xrutzirsaj i ala xaq xujach b'i che uqajaw. 43Konojel i winaq lik xkib'isoj i nim laj utzil chomal re i Dios.

I Jesús xutzijoj ukamul chi kkamsax na

Tz'aqat konojel xkib'isoj wach i nim laj anik xu'an i Jesús, ire xub'ij chke utijoxelab':

44—Lik chita ub'e wach i kinb'ij chiwe, Yin chi Xinalaxoq chwach Ulew pacha Winaq, kinkijach ni pki'ab' i winaq —xub'ij.

45Xwiri i utijoxelab' lik xkita ti ub'e wach usuk' i tzij le. K'amaja kya' chke kkita ub'e. Xaq xkixij kib' chutz'onoxik che wach ke'el usuk' i tzij le chi xub'ij.

¿Pachin lik mas nim u'ij pu'atb'al tzij i Dios?

46X-on panoq i utijoxelab' i Jesús xe'ok chuchapik kib' chitzij chrij retamaxik pachin lik mas nim u'ij chke. 47I Jesús xunab'ej wach ketijin chuch'ob'ik, rumali xuk'am pan jun ak'al xaq xuya putzal. 48Te'uri xub'ij chke:

—Pachin jun kuk'ulaj i ak'ali ru' pinb'i yin, are yin uri kinuk'ulaj. Pachin kinuk'ulaj yin ru' xaq kuk'ulaj uri i Dios chi in taqawnaq loq. Pachin nti u'ij chixol yix are ire atz u'ij uri chkiwach i rachi'il —xub'ij chke.

Pachin ku'an ti ch'oj chqij lik uya'om uri uwach qu'

49Te'uri i ma Wan xub'ij che:

—Qatijonel, xqil jun achi ktijin chrelsaxik itzel tew ru' ukuxtaxik ab'i yet. Yoj xqab'ij che chi chumayij, man qachi'il taj —xub'ij.

50Xwiri, i Jesús xub'ij che:

—Ile mi'atij, man jun we ku'an ti ch'oj chqij, uya'om uri uwach qu' yoj —xub'ij che.

I Jesús xuyaj i ma Jacobo xaq i ma Wan

51Are ya kuriq i ij re u'enb'al i Jesús chikaj, xukowirsaj uk'ux xaq xumaj b'i ub'e pa Jerusalén. 52Xeunab'saj b'i jub'an ajtaqon kkitzukuj pan kiposar. Xe'e che jun komon ukwenta i ulew Samaria. 53Xwiri i winaq aj Samaria xkik'ulaj ti ku' man xkilo chi ike enam ke pa Jerusalén. 54I utijoxelab', chi ma Jacobo i ma Wan, are xkil ile, xkib'ij che i Jesús:

—¿Ajwal, chaya ni chqe chi kqatz'onoj chi kqaj na li a' aj chikaj porb'al ke i winaq le? ¿Kqa'an na pacha xu'an i mam Elías ujer? —Xkib'ij.

55Xwiri i Jesús xupiskilij rib' i xeuyajo. 56Te'uri xe'ax che jun chik komon#9.56 Chupam i nab'e taq uwuj i Dios kriqtaj ti jub'i' che i versículo ri: Yix iweta'am taj pachike i tewalil kixok'awik; Yin chi xinalaxoq chwach ulew pacha winaq, in k'unnaq ti chkisachik i winaq; xink'unik re kewesaj ni chupam i k'ax —xub'ij..

I jub'an chi kkaj te'eq terejik chrij i Jesús

57Are ketijin che i b'e, o jun achi xub'ij che i Jesús:

—Nim laj winaq, kwaj enam awu' xaipa kat-e wi —xcha.

58I Jesús xula' uwach che:

—I yak o kijul; xaq i tz'ikin o kisok, xwiri Yin chi Xinalaxoq chwach Ulew pacha Winaq, nti pa kinkotz'b'a wi injolom are kinuxlanik —xub'ij che.

59I Jesús xub'ij che jun chik:

—Chatterej chwij,

Xwiri i achi xub'ij:

—Nim laj winaq, nab'e chaya ni chwe chi keinmuqu inqajaw —xcha.

60I Jesús xub'ij che:

—Su' wo'or chatterej chwij. Ni'pa i je kamnaq, chaya chke chi kkimuq ni kikamnaq. Xwiri yet japaxsaj utzijol i ajawinik re i Dios —xub'ij che.

61Te'uri o jun chik xub'ij che:

—Nim laj winaq, yin kwaj kinterej chawij. Xwiri, nab'e chaya ni chwe kein-ijla kan i je o chi wachoch —xub'ij.

62I Jesús xub'ij che:

Yet aweta'am chi we o jun o rij ab'ixb'al, i xa ktaqen chrij, suk'ul ti uchak kelik. Xaq keje ile jun, we kok pa ajawinik re i Dios, utz taj we k'a kutaqej wach ukanam kanoq —xub'ij che.

Currently Selected:

Lucas 9: ACHICUB

Highlight

Copy