Lucas 8

Ixoqib' chi kkito te'eq i Jesús

1X-on chik panoq, i Jesús ktijin chkisolixik i tinimit xaq i komon chub'ixkil utzij i Dios i chupaxsaxik i utz laj tzij k'ak' re i ajawinik re i Dios, chke i aj pa taq tinimit le, junam ku' kab'lajuj apostolab'. 2Xaq je o jujun ixoqib' je terejnaq b'i chkij, chi je utzirnaq rumal i Jesús. O jujun, elsam ni itzel tew chke, xaq o jujun je rutzirsam ni che taq yob'il. I jun chke are i ati Mariy chi xaq Magdalena kb'ix che. Are ire le chi wuqub' itzel tew elsam ni che rumal i Jesús. 3Xaq i jun chik chi x-e ku' are i ati Wan, chi rixoqil i ma Chuza, chi are jun chi lik nim upatan chrij i ajawinel ma Herodes, xaq i jun chik chi x-e ku' are i ati Susana. I xaq je k'i jub'an taq chik i ixoqib' xe'e ku', tob'al ke ru' i kipwaq wach i rajwaxik chke.

Tijojb'al tzij chrij i ajtikanel

4Je k'i i winaq xe'el pkitinimit chutayik utzij i Jesús. Rumali je k'i i winaq xemoltajik; are uri xub'ij i tijojb'al tziji chke: 5O jun achi x-e chutikik utikon. Are xukirij b'i rija', o jub'i' xtzaq pa b'e. Rumali, xa xya'yax uwi che aqan, xaq xek'un i tz'ikin i xkitij b'ik. 6Xaq o jub'i' chik xtzaq pa taq ab'aj, xaq are xalax loq, xa xchaqijik man ch'enen ti ulew pa xtzaq wi. 7Xaq jub'an chik xetzaq pa k'ix; i k'ix le xk'iyik xaq xukamsaj i tikon. 8Xaq o ni ija xetzaq pa utz laj ulew, are xk'iyik xuya ni uwach chom; o ni raqan xuya jo'winaq (100) uwach.

I Jesús, are xutzin chub'ixkil ile chke, i ko xsik'in chub'ixkil i tziji: “¡We yix o ixikin chutayik, chita uri ub'e!” —Xcha.

Wach taq usuk' i tijojb'al tzij chi xub'ij i Jesús

9Are uri i utijoxelab' xkitz'onoj che wach kel usuk' i tijojb'al tzij le chi xub'ij. 10Ire xub'ij chke:

—Chiwe yix Dios uya'om chiwe chi kita ub'e i ajawinik re Ire chi x-etamax ti ujer; xwiri i to' winaq xa ru' tijojb'al tzij k-ani i k'utunik chke, man ke'el chke chi ketan neri, xwiri kkita ti ub'e, ketzun neri, xwiri kkil ti ub'e wach k-anik —xcha.

I Jesús kusaqij i tijojb'al tzij chrij i ajtikanel

11Te'uri i Jesús xub'ij chke:

—Kinb'ij uri chiwe wach usuk' i tijojb'al tzij chi xinb'ij le. I ija le, ke'eloq are utzij upixab' i Dios. 12Ni'pa i ija chi xtzaq pa b'e, ke'eloq are i winaq chi kkita utzij upixab' i Dios, xwiri kk'un i Itzel i kresaj b'i i tzij pkik'ux. Man kraj ti ire we kkikoj utzij upixab' i Dios, xaq keresaj chupam i kimak. 13Ni'pa i ija chi xtzaq pa taq ab'aj, ke'eloq are i winaq chi kkita utzij upixab' i Dios xaq lik kekikotik are xkikojo, xwiri je pacha i tikon nti qas ra' enaq pa jyub'. Ike xa attal ij kekojon che, xaq are kpe jun k'ax pkiwi, kko'taj kanoq. 14Ni'pa i ija chi xtzaq pa k'ix ke'eloq pacha i winaq chi kkita utzij i Dios, xwiri kki'an taj wach i kub'ij. Xa kek'achir rumal i kik'aslemal waral chwach i jyub' ta'aj, xa kkitzukuj ub'itaq ke, xaq xa kkich'ob' i kirayijb'al; ile xa kuchup i utz laj tzij pkik'ux. Ke'eloq pacha i tikon chi kwachin taj. 15Are ija chi xtzaq pa utz laj ulew, ile keje pacha i winaq chi lik kkaj utayik i utz laj utzij i Dios ru' ronojel i kik'ux; kkimayij ti u'ankil wach i kitom, k'a kwachin ni utz pkik'aslemal.

I tijojb'al tzij re i tzuk'b'al

16Yix, are kitzij jun kantil, kich'uq ti uri uwi i xaq kimin ti chuxe' i ch'at. Are i ki'ano, kiya an chikaj man ni'pa i ke'ok b'i pa ja ketzun na. 17Man ni'pa i k'amaja k-aljinsaxik, k-aljinsax na; xaq ronojel ni'pa uwam uwach lik k-etamax na man kel chisaq.

18Rumali, chikojo retalil wach kinb'ij. Jun, we o ni chik o ru', kya' ni mas uri che; xaq keje i jun, we nti o ru', kmaj ni uri i jub'i' che le chi kub'ij ire o ru'; xcha i Jesús chke.

Uchuch xaq i rachalal i Jesús

19Are uri uchuch xaq i je ucha' i Jesús xeupon ru' ja ipa o wi ire. Xwiri xe'ok ti ru' rumal uk'iyal winaq. 20Are uri xb'ix che i Jesús:

—I achuch o chisaq ku' acha' kkaj kkil awach —xcha.

21I Jesús xub'ij uri:

—Je ni'pa i kkikoj retalil che utzij i Dios xaq kekojon che, je are inchuch i je are i wachalal —xcha chke.

I Jesús xu'atij i tew xaq uretum i ya

22Che taq i ij le, i Jesús x-an pa barco ku' utijoxelab'. Xub'ij chke:

—Jo', koj-ax ch'aqap che i semelik ya —xcha. Xkijeq uri axik chwi ya. 23Are ketijin che i b'e, i Jesús xwarik. Xaqte'et xk'un jun nim laj tew puwi i ya; i barco xutikb'a nojik che i ya. Lik laj kmuqtaj rumal. 24Are uri ike xe'e ru' i Jesús xaq xkik'astaj. Xkib'ij che:

—¡Tijonel! ¡Qatijonel! ¡Kojmuqtaj pa ya! —Xecha che.

Are uri i Jesús xwalijik i xu'atij i tew xaq i ucho'ab' i ya. Are uri i tew xaq ya lik xesilab' ti chik. 25Te'uri i Jesús xub'ij chke utijoxelab':

—¿B'uchak xisach ukub'ib'al ik'ux? —Xcha.

Xwiri ike, are xkil ile lik xkixij kib' i lik xkib'isoj. Xkib'ij chkiwach:

—¿B'i chi achi ire le chi ku'atij i tew xaq i ya, i lik kekojon che? —Xecha.

I achi chi o itzel tew che aj Gadara

26Are uri xeupon che i ulew Gadara ub'i. I ulew le kkanaj ch'aqap re i jyub' Galilea. 27I Jesús, are xqaj li pa barco, xk'un jun achi ru', aj Gadara. I achi le ya ujer tan o jub'an itzel tew che. Rumali lik nti u'u' kukojo, xaq ru' ja ti jeqel wi, xa pa taq jul jeqel wi ipa kemuq wi i kamnaq. 28Are xril uwach i Jesús, xujeq sik'inik, xxuki la chwach xaq ko xub'ij:

—¿Wach kolatzukuj wu' yin, Jesús, chi at Uk'ojol i nim laj Dios? Lik kintz'onoj utzil chomal chawe ¡Minaya pa tojpen!

29Keje xub'ij ile che, man i Jesús ktijin chik chub'ixkil che i itzel tew chi kel che i achi le. I itzel tew le lik arewi kuya i ucho'ab' che i achi. I winaq lik k'iyalmul kichapom chik i achi le i kiximom raqan xaq u'ab' ru' karena. Ire xa kuraqij, xaq k-anmaj ni pa taq jyub' tz'inilik, k'amtal b'i rumal itzel tew le. 30I Jesús xutz'onoj che:

—¿Wach ab'i? —Xcha che.

—K'iyal Tzob'ajil inb'i —xcha.

Keje xub'ij i itzel tew ile, man lik je k'i je o che i achi. 31I taq itzel tew le lik xkitz'onoj utzil chomal che i Jesús:

—Mojataq b'i pqak'ijib'al pa siwan —xecha. 32Chunaqaj ipa kech'a'at wi le, je o k'iyal taq aq, ketijin chwa'im chwa taq jyub'. I itzel tew lik xkitz'onoj utzil chomal che i Jesús chi kuya chke ke'ok ni chke i aq le. Ire xuya chke pacha xkitz'onoj; 33xe'el uri che achi xaq xe'ok chke taq i aq le, are uri i aq xe'e pa'anem i xkik'aq b'i kib' pa siwan i lik xetzaq pa ya i chila xeji' wi i xekamik.

34I ajyu'ul aq are xkil ile, xe'e pa'anem pa tinimit. Xkijeq ub'ixkil tzam taq ja, te'uri xkipaxsaj utzijol pa tinimit wach xkilo. 35I winaq, are xkita ile, lik xe'e chrilik wach i xk'ulmaxik. Are xeupon chila pa o wi i Jesús, xkil i achi chi elsam chik itzel tew che. Ire kul chwach i Jesús, ukojom chik u'u', utz chik uno'oj. I winaq lik xkixij kib' rumal ile. 36Ni'pa i xkilo wach i xu'an i Jesús, xe'ok uri chub'ixkil chke i jub'an le wach i rutzirsaxik i achi xu'ano. 37Are uri konojel i aj Gadara lik xkitz'onoj utzil chomal che i Jesús chi kel chila pa Gadara man lik xkixij kib' che. Rumali i Jesús xok chik pa barco i x-ek. 38I achi chi xel b'i itzel tew che lik kraj enam ru', xwiri i Jesús xuya ti che. Xub'ij che:

39—Chattzalij chi awachoch xaq chalapa ni'pa i u'anom i Dios chawe —xcha che.

Are uri i achi x-ek; i lik xupaxsaj utzijol pa tinimit wach i nim laj utz x-ani che rumal i Jesús.

Umi'al i ma Jairo xaq i ixoq chi xuchap u'u' i Jesús

40I Jesús, are x-ax chik ch'aqa ya, i winaq lik kekikot chuk'ulaxik man konojel lik koy-em ni uk'unik. 41Are uri xupon jun achi, ma Jairo ub'i, aj-atzil pa ja re molb'al ib' ke i judío. Ire xxuki chwach i Jesús, lik xutz'onoj utzil chomal che chi k-e chi rachoch. 42Keje xu'an ire ile man o jun umi'al ya kkamik. I umi'al le xa jun chrij, o kab'lajuj junab' che.

I Jesús, are ktijin che i b'e, je k'i i winaq je teren b'i chrij; ire lik kpitz'pat chkixol. 43Chkixol i winaq le o jun ixoq iwab'. Ax iwab' wi kab'lajuj junab' o chik che chi kril i rik'il lik k'i; ktani ti chik. Ire usachom chik ronojel upwaq ku' i kunanel; mijun xtiki chrutzirsaxik. 44Are uri i ixoq le xtejeb' pan chrij i Jesús, xuyin pan uchi' u'u'. Are xuyino juntir xtani i rik'il. 45I Jesús xub'ij:

—¿Pachin xinuyino?

I konojel xkib'ij:

—Yoj taj —xecha.

I ma Pedro ku' i rachi'il xkib'ij che i Jesús:

—Qatijonel, lik je k'i i winaq katkipitz'o i katkitakpuj, ¿I yet katz'onoj chqe pachin xatuyino? —Xecha.

46I Jesús xub'ij chik:

—Qatzij o ni xinyinawik, man xinna'o chi o cho'ab' xel chwe —xcha.

47I ixoq are xuta ile, xrilo chi Jesús reta'am chik wach u'anom che. Ire ksiksatik, xxuki chwach i Jesús i xub'ij che chkiwach konojel i winaq wach rumal xuyin u'u'. Xaq xub'ij chi juntir xutzirik. 48Te'uri i Jesús xub'ij che:

—Wak'al, xatutzirik rumal ukub'ib'al ak'ux che i Dios. Jat, matk'achir chik —xcha che.

49K'a ktijin i Jesús che i ch'a'atik are xupon jun aj ru' ja re i ma Jairo chi nim upatan pa ja re molb'al ib' ke i judío. Xub'ij che i rajaw uchak:

—I ami'al ya xkamik; lik rajwaxik ti chik we kab'ayb'a i tijonel —xcha.

50Are xuta i Jesús ile, xub'ij che i ma Jairo:

—Matok il che, xwi chakub'a ak'ux che i Dios i ami'al kutzir ni uri —xcha.

51Are xupon ru' ja xuya ti chke i winaq ke'ok b'i ru' pa ja. Xwi xuya chke i ma Pedro, ma Jacobo, ma Wan, xaq i uqajaw i uchuch i ali. 52I winaq lik ke'o'ik xaq lik kesik'in rumal i kamnaq. Xwiri i Jesús xub'ij chke:

—Mix-o'ik, i ali kamnaq taj. Ire xa kwarik —xcha chke.

53I winaq xa xkitze'ej che, man keta'am ike chi kamnaq chik. 54Are uri i Jesús xuchap u'ab' i ali xaq ko xub'ij che:

—Ali, ¡Chatwalijoq! —Xcha che.

55Are uri xk'un saq chwach xaq juntir xwalijik. Te'uri i Jesús xub'ij chke chi kkiya uwa i ali. 56I uqajaw uchuch i ali lik xkib'isoj. Xwiri i Jesús xub'ij chke chi mkilap che mijun wach xu'an che i ali le.

Currently Selected:

Lucas 8: ACHICUB

Highlight

Copy