Lucas 7
7
I Jesús xrutzirsaj umokom jun aj-atzil ke i achiyab' chi je yij che i ch'oj aj Roma
1I Jesús, are xutzin che i ch'a'atik ku' i winaq xok pa tinimit Capernaum. 2Chila o wi jun aj-atzil ke i achiyab' chi je yij che i ch'oj aj Roma chi o jun umokom ru' ja lik k'ax kuna'o. I umokom le lik iwab', ya kkamik. 3I aj-atzil ke i achiyab' le are xuta utzijol i Jesús, xeutaq b'i jujun nimaq taq winaq ru' chi je aj Judío chutz'onoxik utzil che i Jesús, chi lik kpe ru' ja chukunaxik i umokom. 4Ike are xeupon ru' i Jesús, xetejeb' ru' xaq ru' ronojel kik'ux xkib'ij che:
—I aj-atzili ke i achiyab' chi je yij che i ch'oj lik kmajawik k-eato na. 5Ire lik kojraj chi oj aj Israel, xaq xuyijb'a jun ja re molb'al ib' qe yoj aj judío —xecha.
6Te'uri i Jesús x-e ku'. Are ya keupon ru' ja xkik'ulaj jub'an chik achiyab' chi keta'am uwach i aj-atzil ke i achiyab' chi je yij che i ch'oj aj Roma; ike je taqtal li rumal ire. Xolkib'ij utzij i aj-atzil ke i achiyab' chi je yij che i ch'oj che i Jesús. Keje iri ub'im loq:
—Nim laj winaq, chakuyu inmak; nti uchak katk'un k'a ru' ja. Kmajaw ti chwe we katok chi wachoch man nim ti in-ij chawach yet. 7Rumali, nti ukowil ink'ux kinupon chawach. Xwiri we kab'ij li yet kutzir inmokom lik kutzir ni uri. 8Weta'am ile, man xaq yin in o pki'ab' i je waj-atzil, xaq je o jub'an achiyab' chi je yij che i ch'oj pin-ab' yin, xaq we kinb'ij che jun “¡Jat!”, K-ek; xaq we kinb'ij che i jun chik, “¡Sa'aj!”. Kpetik. We xaq kintaq b'i jun wajchak, ire ku'an na wach i kinb'ij che.#7.8 Keje xkib'ij ike ile che i Jesús, chi ub'im li aj-atzil ke i achiyab' chi je yij che i ch'oj.
9I Jesús are xuta wach ub'im li aj-atzil ke i achiyab' chi je yij che i ch'oj, lik xub'isoj. Xeutzu i winaq chi je teren chrij xaq xub'ij chke:
—Mitene jun chke i aj Israel winaq kul uk'ux chwe pacha u'anom i achi le —xcha.
10I ramiy i aj-atzil ke i achiyab' chi je yij che i ch'oj chi je utaqom loq, xetzalij chik ru' ja. Are xeuponik, xkil i achi utzirnaq chik.
I Jesús xuwalijsaj che i kamik ralab' i ixoq malkan
11X-on panoq, i Jesús x-e che jun tinimit Naín ub'i, kuk'am kib' ku' utijoxelab' xaq ku' uk'iyal winaq. 12Are ya kuponik xeuk'ulaj jub'an winaq kuk'am jun kamnaq, enam ke chumuqik. I kamnaqi, jun ala, xa jun chrij uchuch chi malkan. Je k'i i winaq aj tinimit ketijin ki'enam ru' uchuch chumuqik. 13I Ajwal Jesús are xril i ixoq, k'ax xuna uk'ux i xub'ij che:
—Mato'ik —xcha che.
14Are uri xtejeb' pan ku', xaq xuyin i tz'alam pa kotz'ol wi i kamnaq. I je ok'awnaq xetak'i'ik. I Jesús xub'ij che i kamnaq:
—Ala, ¡chatwalijoq! —Xcha che.
15I kamnaq juntir xkub'i anoq xaq xok che i lapanik ku'. Te'uri i Jesús xujach b'i che uchuch. 16I winaq, are xkil ile, lik xe'ok il che. Xkijeq ukojik u'ij i Dios:
—Jun nim laj profeta k'unnaq qu' yoj —xecha.
Xaq i xkib'ij:
—I Dios xojoluto yoj oj uwinaq ire —xecha.
17Lik xel utzijol i Jesús, wach ktijin chu'ankil chwach ronojel i jyub' ke aj Judío winaq, xaq i aj chrij i aj chwach.
I je rajtaqon i ma Wan chi Ajqajsanel Ya
18I utijoxelab' ma Wan chi Ajqajsanel Ya, kib'im che wach taq ku'an i Jesús. Rumali xeusik'ij keb' chke utijoxelab', 19xeutaq b'i ru' i Jesús. Xub'ij chke: “Jix ru' i Jesús xaq chitz'onoj che we are ire i Cristo chi qoy-em o moq k'a kqoy-ej ni jun chik.” Xcha. 20I utaqon ma Wan, are xeuponik, xetejeb' ru' i Jesús xaq xkib'ij che:
—I ma Wan Ajqajsanel Ya xojutaq loq kolqatz'onoj jun tzij chawe. ¿Moq yet i Cristo chi ub'im i Dios kk'unik? ¿O xa kqoy-ej ni jun chik? —Xecha che.
21Che i ij le are xeupon i utaqon i ma Wan i Jesús xeukunaj k'iyal iwab'ib'. Ni'pa i k'ax o chke, ni'pa i yob'il o chke, xaq ni'pa itzel tew lik xresaj ni chke. Xaq lik k'i i mawach xeutzunsaj. 22Rumali i Jesús xub'ij chke i utaqon i ma Wan:
—Jix ru' i ma Wan xaq chib'ij che wach taq iwilom xaq wach taq itom chi kintijin yin chu'anik. Chib'ij che chi i mawach ketzunik; xaq i je sik, keb'inik; xaq i iwab'ib' chi o itzel k'ax “lepra” chke keutzir na; xaq i je tak ketanik; xaq i kamnaq kewalij na; xaq i nib'a'ib' kb'ix ni utz laj tzij k'ak' re i kelb'al pa k'ax chke. 23Xaq chib'ij che, ¡Chi utz ke ike ni'pa kkisach ti ukub'ib'al kik'ux chwe! —Xcha i Jesús chke i keb' utijoxelab' i ma Wan.
24Are xe'e i utaqon i ma Wan, i Jesús xujeq ub'ixkil chke i winaq wach u'anom i ma Wan. Kub'ij:
—Yix, are xix-e che i tz'inilik jyub' chaqij keitab'ej re i ma Wan, ¿Wach xib'ij yix keiwila? ¿Xix-e b'awa chrilik jun es ksilab' rumal i tew? 25¿Wach xix-e chrilik? ¿Xatab'a xix-e chrilik jun achi chi chom uwiqik rib' u'anom ru' u'u'? Ni'pa i o ki'u' chom i paqal rajil, xaq lik o ku' wach taq kkitijo, ike ne te o pa taq jyub', ike je jeqel prachoch i ajawinelab'. 26¿Wach xiwila ut? ¿Jun profeta? Qatzij, are. I jun chi xiwilo le mas nim ni u'ij chkiwach i profeta chi je ik'awnaq. 27I ma Wan le are i jun chi ub'im kan i Dios chi kutaq na loq. I Dios ub'im kan chupam uwuj:
Yin nab'e kintaq nu b'i jun ajb'il intzij chawach yet,
kuyijb'a ni ab'e chawach.
28Qatzij i kinb'ij chiwe:
—I ma Wan Ajqajsanel Ya nim ni u'ij ire chkiwach konojel i winaq k'a chuxeb'al ij saq. Xwiri wo'or, konojel ni'pa i ke'ok ni pa ajawinik re i Dios mas ni nim ki'ij uri chwach ire —xcha i Jesús.
29I winaq are xkita ile, xkib'ij chi Dios lik suk'ul i ku'ano, xaq keje xkib'ij i ajtz'onol alkawal ile, man ike lik xkikojo wach ku'an i Dios, rumali xkitz'onoj uqajsaxik ya pkiwi che i ma Wan. 30Xwiri i tijonelab' re i ujer atb'al tzij, xaq i aj fariseo xkitz'onoj ti uqajsaxik ya pkiwi man xumaj ti kiwach wach uyijb'am i Dios chke.
31I Jesús xub'ij chik iri chke i je o chila:
—I winaq wo'or ¿Wach taq keinjunamsaj ru'? ¿Wach i kemajawik? 32Ike xa je pacha jutzob'aj ak'alab' je kul xol taq b'e; i kesik'in chke i kachi'il: “Yix lik nti o kiwaj”; kecha. “Yoj xqaxut'ij i su' chiwe xwiri xixxajaw taj, xaq xqab'ixaj jun b'ix re i b'isonb'al xwiri xix-o' taj”; Kecha. 33Keje ketijin i winaq chu'anik wo'or; nti o kkaj man xk'un i ma Wan Ajqajsanel Ya chi nti wa re trigo kutijo xaq nti uwa'al uva muqb'am kutu'u, i are uri kib'ij yix chi xa o itzel tew ru'. 34Are xink'un yin chi Xinalaxoq chwach Ulew pacha Winaq, chi lik ronojel kintijo xaq kintu'u wach o chinwach, are uri kib'ij yix chi lik in ajnumel xaq in ab'arel laj winaq, kixcha. Xaq kikoj inmak chi yin in kachi'il ajmakib' xaq in kachi'il i utz ti laj taq ajtz'onol alkawal. 35Xwiri i uno'oj i Dios kqilb'ej pkik'aslemal i winaq chi suk'ul i kki'ano man kekojon che i Dios.
I Jesús o chi rachoch i ma Simón chi aj fariseo
36Jun chke, aj fariseo ma Simón ub'i, xub'ij che i Jesús chi k-eutija wa ru'. I Jesús x-e ru' chi rachoch xaq xkub'i chwa'im. 37Che i tinimit le, o jun ixoq chi lik ajmak laj ixoq. Are xuta utzijol chi i Jesús ktijin chwa'im prachoch i aj fariseo, ire x-e ku'. Rok'am b'i jun chom laj b'axo antal che ab'aj pacha saqcho', nojnaq che kunb'al muy. 38Are xuponik, xxuki chwach raqan i Jesús, lik ko'ik xk'iji chila; are uri xok chuch'ajik raqan i Jesús ru' uwa'al uwach xaq xuchaqijsaj ru' uwi. Te'uri xutz'ub'aj uwach raqan i Jesús xaq lik xukoj i kunb'al muy che. 39I aj fariseo chi o i Jesús ru' chi rachoch, are xril ile xub'ij puk'ux: “I achi le, wetene profeta, kretamaj uri b'i chi ixoqil ile chi kuyin i raqan; xaq kretamaj uri chi lik ajmak laj ixoq”. 40Te'uri i Jesús xub'ij che:
—Ma Simón, o jun tzij kwaj kinb'ij chawe —xcha.
—Utz, Nim laj Winaq, chab'ij chwe —xcha i aj fariseo.
41Te'uri i Jesús xub'ij jun tijojb'al tzij che. Keje iri xub'ij:
—Je o keb' achiyab' o kik'as ru' jun achi. I jun o quinientos uk'as ru', i jun chik, xa lajuj kawinaq (50) uk'as ru'. 42Ike ketiki ti chik chutojik kik'as, rumali i achi le xukuy kimak xutz'onoj ti chik i kik'as chke. Chab'ij pe chwe, ¿pachin chke i je keb' le o ni mas k'axnab'al uk'ux che i xkuyuw kimak? —Xcha i Jesús.
43Te'uri i ma Simón xub'ij che:
—Kinb'ij yin are i jun chi mas nim uk'as ru' —xcha.
I Jesús xub'ij:
—Utz i xab'ij le —xcha.
44I Jesús xutaqej i ixoq, are uri xub'ij che i ma Simón:
—¿Kawil i ixoqi? Lik utz i ktijin chu'anik. Yet, are xinok chi awachoch, nti ya xaya chwe ch'ajb'al re waqan. Xwiri i ixoqi xuch'aj i waqan ru' uwa'al uwach xaq xuchaqijsaj ru' uwi. 45Yet lik xinatz'ub'aj taj are xinak'ulaj ru' awachoch. Xwiri i ixoqi umayim ti utz'ub'axik i waqan ni'pa i wokik loq. 46Yet mitene aceite xakoj che injolom; xwiri ire ujamom ni kunb'al muy chrij waqan. 47Keje ile, u'aljinsam chi lik k'ax kinuna'o. I u'anomi k'utb'al re chi lik k'i umak kuytajnaq chik. Xwiri jun chi nti qas umak kuytajnaq che, ire nti qas k'axnab'al uk'ux uri. Keje xub'ij i Jesús ile che i ma Simón.
48Te'uri xub'ij che ixoq:
—I amak lik kuytajnaq chik —xcha.
49Te'uri i jub'an chi ketijin chwa'im xe'ok chub'ixkil chkiwach:
—¿B'i chi achi ire le chi xaq kukuy i kimak i winaq? —Xecha.
50I Jesús xub'ij che i ixoq:
—I ukub'ib'al ak'ux at resam chik chupam amak. Jat chi awachoch, matk'achir chik —xcha che.
Currently Selected:
Lucas 7: ACHICUB
Highlight
Share
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
