Lucas 6

Utijoxelab' i Jesús kkich'up i trigo che i ij sábado

1X-on panoq, che jun ij sábado, i Jesús kb'in ku' utijoxelab' chupam jub'an tikon. I utijoxelab' xe'ok chuch'upik uwach i trigo, xaq xkib'ar pki'ab' kkesb'ej re usolot; te'uri xkitijo. 2Are uri o jujun chke aj fariseo xkitz'onoj chke:

—¿B'uchak yix ki'an i chak le iweta'am tab'a ri chi utz taj kixchakun che i ij sábado?

3I Jesús xula' uwach chke:

—¿Xatab'a yix iwajlam taj wach i xu'an i mam David ujer are xutij numik junam ku' i rachi'il? 4Xok prachoch i Dios, xaq xuchap i wa re trigo chi sujtal chwach i Dios. Xutijo, xaq xuya chke i rachi'il. Keje xu'an ire ile, tupu nti re che. Man kub'ij i ujer atb'al tzij chi xwi i rajpatan i Dios ketijaw i wa re trigo le.

5Xaq xub'ij:

—Yin chi Xinalaxoq chwach Ulew pacha Winaq, o atb'al tzij pin-ab' puwi i ij sábado —xub'ij chke.

I Jesús xrutzirsaj jun achi chi sikirnaq u'ab' che i ij sábado

6Xuriq chik jun ij sábado, i Jesús xok pa ja re molb'al ib' ke aj judío xaq xok chik chuk'utik chke i winaq. Chila o jun achi sikirnaq u'ab' wiqab'im. 7Xaq chila je o wi jujun tijonelab' re ujer atb'al tzij, xaq jujun aj fariseo winaq. Ike kkik'ak'alij i Jesús, we krutzirsaj i achi le che i ij sábado, man kkitzukuj umak. 8Ire reta'am wach kkich'ob' pkik'ux; rumali xub'ij che i achi chi chaqijnaq u'ab':

—Chatwalijoq i chattak'al chqawach —xub'ij che. Are uri i achi xwalijik xaq xtak'i'ik. 9Te'uri i Jesús xub'ij chik chke i ketzukuw umak:

—Kwaj kin-an jun tz'onb'enik chiwe: ¿Wach i utz chi k-an che i ij sábado, ¿Are i utz o are i utz taj? ¿Utz kqato jun chi ya kkamik? ¿O xa kqaya che chi kkamik? Keje ile xub'ij i Jesús chke.

10Xutaqej konojel ni'pa i je o chrij chwach, te'uri xub'ij che i achi:

—Chasuk'b'a i a'ab'.

I achi xusuk'b'a u'ab', i xutzirik. 11Xwiri i jub'an lik xpe koywal; xe'ok chub'ixkil chkiwach wach jun utz taj kki'an che i Jesús.

I Jesús xeucha i kab'lajuj apostolab'

12Che taq i ij le, i Jesús xel b'i puwi jun jyub' re klapan ru' i Dios. Lik jun a'ab' xlapan ru'. 13Are xsaqirik, xeusik'ij utijoxelab' ru'. Te'uri xeucha kab'lajuj chkixol chi xuya pkib'i je apostolab'.#6.13 Ke'el pqach'awb'al, je utaqon. 14Are i kib'i i kab'lajuj le are iri: Jun, ma Simón, chi xaq ma Pedro kb'ix che rumal i Jesús. Xaq o i ma Andrés, chi ratz ucha' i ma Pedro. Xaq je o i ma Jacobo, ma Wan, ma Felipe, xaq ma Bartolomé. 15Xaq o ma Mateo, ma Tomás; ma Jacobo chi uk'ojol i ma Alfeo; xaq o chik jun ma Simón, chi ma Zelote#6.15 Kikwenta jun tzob'aj ke aj Judío chi lik kch'ojin chuto'ik i utinimit xaq keresaj b'i je aj naj chi kkaj ki'an i utz taj chke. kb'ix che. 16Xaq o i ma Judas chi rak'al ma Jacobo. Xaq o i ma Judas Iscariote chi xa k-on keb' upalaj ru' i Jesús.

I Jesús kuk'ut chke uk'iyal winaq

17Te'uri i Jesús xeqaj li tzam jyub' ku' utijoxelab', xaq xek'iji che jun uwa ta'aj. Je k'i i tijoxelab' xemoltaj ku', xaq je k'i i winaq xek'un ku', chi je ronojel i ulew Judea, xaq xek'un i je aj pa tinimit Jerusalén, xaq xek'un i je aj pa tinimit, Tiro xaq i Sidón, 18ike xeupon chutayik utzij i Jesús, xaq chukunaxik i k'ax chi o chke. I ni'pa i o itzel tew chke xaq xerutzirsaj. 19Konojel i winaq kkaj kkiyin pan i Jesús man ru' i ucho'ab' keukunaj iwab'ib'.

Ile chi lik qatzij kukoj pajil i Dios

20Are uri i Jesús xeutaqej i utijoxelab', xub'ij chke:

—Utz iwe yix, chi ix nib'a', man i ajawinik re i Dios lik iwe yix.

21—Utz iwe yix chi wo'or kixnumik, man kixnoj na. Utz iwe yix chi wo'or kix-o'ik, man kixtzen na.

22Utz iwe yix chi lik tzel kixkilo xa wumal yin chi Xinalaxoq chwach Ulew pacha Winaq, xaq we kixkesaj chkixol, xaq we kixkiyo'ya, xaq we kkik'aq b'i u'ij ib'i pacha taq jun b'iroxik chi utz taj. 23Lik chixkikotoq, ¡Chixsak'lin chikaj rumal kikotemal! Man yix kich'ak ni nim laj i sipon chila chikaj; man xaq keje xki'an i katit kimam ile chke i profeta lik k'ax xkib'ij chke.

24Xwiri ¡Lik to' iwach yix ix b'eyomab'! Man lik itijom chik i utz chwach i jyub' ta'aj.

25¡To' iwach yix chi wo'or ix nojnaq, man k-on panoq kitij ni numik!

¡To' iwach yix chi kixtzen wo'or man k-on panoq kixo' ni rumal i b'is!

26¡To' iwach yix we konojel i winaq kkikoj ni i'ij, xaq keje xki'an iwatit imam yix ku' ajt'oronel laj taq profeta.

K'ax cheina i je ajch'oj chiwij

27Xwiri yix chi kixtijin chutayik intzij, kwaj kinb'ij iri chiwe: K'ax cheina i ajch'oj chiwij; chi'ana i utz chke i tzel kixkilo. 28Chitz'onoj i utz re i Dios pkiwi i ketz'onow i k'ax piwi yix. Chitz'onoj che i Dios pkiwi i k'ax kech'aw chiwij. 29We o jun katuch'ay che juperaj apalaj, chasujuj i juperaj chik che; we o jun kumaj achaket, xaq chaya b'i akamix che. 30We o jun kutz'onoj chawe wach i rajwaxik che, chaya che, xaq we o jun kumaj ub'itaq awe, matz'onoj chik che. 31Pacha i kiwaj yix chi kki'an i winaq chiwe, xaq keje chi'ana yix chke.

32Yix, we xwi k'ax keina i k'ax kixkina yix ¿Wach kich'ak uri che ile? Xaq i ajmakib' keje kki'an ile. 33Xaq we xwi ki'an i utz chke i ke'anaw i utz chiwe yix, ¿Wach kich'ak uri che ile? Xaq i ajmakib' keje kki'an ile. 34Xaq we o i kiya pacha'im xa rumal we o taq kya' chiwe, ¿Wach kich'ak uri che ile? Xaq keje i ajmakib' kechi'man chkiwach je ajmakib', man keta'am chi o ni kkiya chkiwach. 35Xwiri yix, k'ax cheina i je ajch'oj chiwij; chi'ana i utz chke; xaq we o kiya pa cha'im miwoy-ej we o taq kya' chiwe chwach. We ki'an ni'pa taq ile, nim i sipon kya'ik, xaq yix ix rak'al ni i Nim laj Dios chikaj. Lik ix rak'al ni Ire man xaq keje ku'an Ire, aj-anol utz chke i ne te utz, xaq chke i kkitioxij ti che xaq chke i ne te utz. 36Chi'ana chi o i rutzil ik'ux xaqjun pacha i Ta chikaj chi xaq o i rutzil uk'ux.

Mi'at tzij chkij jub'an chik

37Mi'at tzij pkiwi iwachi'il, wach ki'anom, man xaq ku'at ti tzij i Dios piwi yix; xaq mikoj kimak iwachi'il, man koksax ti imak yix rumal i Dios. We o i ki'anom kimak chiwe, chikuyu man i Dios kukuy ni imak yix. 38Cheito ni'pa i o rajwaxik chke, man i Dios kuya ni chiwe yix wach i rajwaxik chiwe. Ire k'i kuya ni chiwe we k'i iya'om yix; lik kunojsaj ikoxtal yix, lik kuch'aych'a, xaq kula'puj, xaq mas kuya puwi, tzub'ub' ku'an che.

39Te'uri xub'ij chik jun tijojb'al tzij chke, xub'ij:

—¿Xatab'a jun mawach kub'insaj rach mawach? Lik utz taj man we keje ile lik chekeb' ketzaq b'i pa jul. 40Mijun tijoxel mas nim u'ij chwach utijonel. Xwiri i tijoxel we xutzin che unawsaxik rib' lik ku'on ni uri pacha utijonel.

41¿B'uchak katk'achir chutaqexik i tz'il chi o pub'a'wach i awachalal chwach i Cristo, i yet kana ti awib' chi o jun nim laj et chupam ab'a'wach yet? 42We akojom ti retalil chi o jun et pab'a'wach, ¿B'uchak uri kab'ij che i awachalal chwach i Cristo: “Wachalal chwach i Cristo, chaya ab'a'wach chwe man kwesaj i tz'il chi o chupam,” Yet ¡Keb' apalaj! Nab'e chawesaj ni et pab'a'wach yet, man kattzun na, i kattiki ni uri chrelsaxik i tz'il chi o chupam ub'a'wach i awachalal chwach i Cristo.

I che' are uwach kk'utuwik b'i chi uche'lal

43Nti jun che' utz we kuya uwach utz taj; xaq i che' chi utz taj kuya ti uwach utz. 44Chkijujunal i che' lik ke'aljinik rumal i echa' chi kkiya'o. Jun k'ix: Are kuya uwach, kuwachij ti higo; xaq keje jun k'ix lokej, kuwachij ti uva. 45Jun achi we utz, utz i kub'ij, man xwi i utz o puk'ux. Xaq keje jun achi we utz taj, xwi i utz taj kub'ij, man xwi i utz taj o puk'ux. Man ru' i qachi' kqab'ij wach i o pqak'ux.

I keb' ukub'ib'al ja

46¿B'uchak yix kib'ij chwe, “Lik at Ajwal”, xwiri ki'an taj wach kinb'ij chiwe? 47Jun, we kk'un wu' xaq lik kuya uxikin chutayik intzij, xaq ku'an pacha i kinb'ij, yin kinb'ij ni uri chiwe wach kmajaw ire. 48Ire keje pacha jun aj-anol ja chi utz i kub'ib'al xukoj che i rachoch. Nab'e, naj xuwor i jul k'a xeuriqa ni ab'aj; te'uri xukoj i kub'ib'al ja puwi ab'aj. X-on panoq xnimar i ya, xaq xuya li ucho'ab' che i ja. Xwiri i ya xtiki ti chub'oqik i ja man lik utz u'anik x-ani che. 49I jun chi kuta intzij, xwiri ku'an taj pacha i kinb'ij, lik keje uri pacha jun aj-anol ja chi xukoj ti ukub'ib'al i rachoch. Ire to' xukub'a i rachoch chwach ulew, nti ukub'ib'al xuyijb'a. X-on panoq, are xnimar i ya, xuya li ucho'ab' che i ja; are uri xtzaq i ja pulew i xsach uwach.#6.49 Keje i tijojb'al tzij ile xub'ij i Jesús chke.

Currently Selected:

Lucas 6: ACHICUB

Highlight

Copy