Lucas 10

I Jesús xeutaq b'i kab'lajuj oxwinaq (72)

1Chrijil chik ni'pa ile i Ajwal xeucha chik kab'lajuj oxwinaq (72) tijoxelab', xaq xeutaq b'i pa taq kakab'il, xenab'ej b'i chwach xe'e pa taq tinimit, xe'e pa taq k'ijib'al ipa uch'ob'om wi enam.

2Xub'ij chke:

—Qatzij, lik k'i kraj molonik; xwiri i ajchakib' ne te k'i. Rumali chitz'onoj che i Rajaw i chak chi cheutaqa li rajchakib' chumolik. 3Jix yix pa chak. Kixintaq b'ik pacha ix ral taq chij chkixol i utiw. 4Mik'am b'i imer, mitene i teb'; xaq mik'am chub'i jumolaj ixajab'; xaq mib'ay iwib' chuya'ik rutzil kiwach i winaq pa taq b'e. 5Ni'pa i ja pa kixok wi, chitioxij i rajaw ja, chitz'onoj i utz re i Dios pkiwi ni'pa i je o chila. 6I rajaw ja, we utz uk'ux, kk'iji i utz le puwi chi xitz'onoj che i Dios. Xwiri we utz ti ik'ulaxik kki'ano, i utz re i Dios lik kkanaj ti uri pkiwi. 7Are kiriqo ipa kixk'ulax wi, chix-ol chila to' mixb'in chi taq ja. Wach kkiya chiwe tzuqb'al iwe, chitija xaq chitu'u, man jun ajchak kmajaw che chi ktoj na man lik uch'akom. 8Are kixok che jun tinimit, we kixkik'ulaj, chitija wach kkiya chiwe, 9cheikunaj iwab'ib' chi je o chila; chib'ij chke i winaq: “I ajawinik re i Dios lik naqaj chik o wi chiwe”; chixchoq chke. 10Xwiri we xixupon che jun tinimit chi kixkik'ulaj taj, chixel uri pa b'e xaq chib'ij chke: 11“¡I ulew re itinimit yix chi xnak'i che i qaqan kqapu kan chiwach; iri k'utb'al re chiwe chi imak yix. Xwiri, chk'un chik'ux, chi i ajawinik re i Dios lik naqaj chik o wi chiwe.” 12Kinb'ij iri chiwe: Pa k'isb'al ij, nim i tojpen ktzaq ni puwi i tinimit le. Lik mas nim ni i tojpen kya' chke chwach i kya' che i tinimit Sodoma —xub'ij i Jesús chke utijoxelab'.

Tojpen pkiwi i tinimit chi kekojon ti che i Dios

13Xub'ij i Jesús chke i winaq: ¡To' iwach yix, ix aj tinimit Corazín! ¡To' iwach yix, ix aj tinimit Betsaida! Man wetene in anom uk'iyal nim laj il chila pacha in anom iwu' yix, ike uri ya kijalwachim teneri chik i kik'aslemal. Xaq kikojom ti neri ki'u' as xaq chaj pkija' k'utb'al re i kimak. 14Xwiri yix, are kuriqa i k'isb'al ij, i k'ax chi kpe ni piwi lik mas k'ax na chwach i kya' chke i winaq je aj Tiro xaq i je aj Sidón. 15Xaq yix, chi ix aj tinimit Capernaum, ¿Kich'ob' yix lik ix utz, lik ya kixok k'a chila chikaj? Xwiri, yin kinb'ij chiwe chi lik k'a naj kixqaj b'i pa jul re i tojpen chi nti uk'isik. 16“Pachin jun lik kukoj retalil wach i kib'ij yix, ke'el uri chi yin ktijin chintayik; xaq pachin jun kixuxutuj yix, ke'el uri chi are yin kinuxutuj. Ke'eloq chi kuxutuj i Dios chi in taqawnaq loq”.

Kitzalijik li kab'lajuj oxwinaq (72)

17X-on panoq xetzalij li kab'lajuj oxwinaq (72) tijoxelab', lik kekikotik. Xkib'ij:

—¡Ajwal, xaq i itzel taq tew xe'el chke i winaq are xqakuxtaj ab'i chke! —Xkib'ij che.

18I Jesús xub'ij chke:

—Xaq i Itzel, lik xwil yin wach utzaqik xu'ano pacha taq jun ray aj chikaj. 19Yin nim i cho'ab' inya'om chiwe: Re kixb'in ni pkiwi i kumatz, xaq pkiwi i sinaj, xaq lik kixtiki ni chuqajsaxik ronojel i ucho'ab' itzel, lik mijun ku'an k'ax chiwe. 20Xwiri, mixkikot rumal itzel tew chi kekojon chiwe. Are chixkikot rumal ib'i chi tz'ib'tal chik chila chikaj. Keje xub'ij i Jesús ile chke.

Xwi i Jesús reta'am pachin uqajaw

21Che i or le, i Jesús lik kkikot rumal Lo'laj Utewal i Dios. Xub'ij:

—Kinkoj a'ij, Ta, chi at rajaw i kaj, at rajaw i ulew, man ak'utum chke i nti ki'ij i b'iroxik chi awuwam uwach chke i o kino'oj, chke i nimaq taq kinojb'al. Keje xa'an ile, Ta, man keje ile kawaj yet —xub'ij i Jesús.

22Te'uri xub'ij chke i winaq: Inqajaw uya'om pin-ab' yin ronojel ni'pa i olik. Lik mijun reta'am pachin i Uk'ojol i Dios, xwi i Ta chikaj. Xaq lik mijun reta'am pachin i Ta; xwi yin chi in Uk'ojol weta'am ni'pa i winaq chi kin-aljinsaj i Dios chke keta'am.

23Are uri, i Jesús xeutaqej i utijoxelab'. Xub'ij chke ike kitukel: Utz ke i winaq chi kkilo pacha kixtijin yix chrilik. 24Kinb'ij chiwe: Chi je k'i profeta, xaq ajawinelab' xkaj rilik ni'pa taq i kixtijin yix chrilik wo'or, xwiri xkil taj; xkaj te utayik i tzij chi kixtijin yix chutayik, xwiri xkita taj. Xcha

I tijojb'al tzij chrij i utz laj aj Samaria

25O jun tijonel re i ujer atb'al tzij kraj kuk'am upam i Jesús; rumali x-e ru', xutz'onoj che:

—Tijonel, ¿Wach i kin-ano kinriqb'ej re ink'aslemal chi nti uk'isik?

26I Jesús xula' uwach che:

—¿Wach o chupam i ujer atb'al tzij? ¿Wach i kawajlaj uwach yet chupam che i wuj le?

27Ire xub'ij:

—Kub'ij i uwuj i Dios, “K'ax chana'a Awajwal Dios ru' ronojel ak'ux, ru' ronojel awanima, ru' ronojel anojb'al, xaq ru' ronojel acho'ab'” Xaq “K'ax chana'a i alok'anij pacha k'ax una'ik awib' yet ka'ano”.

28Te'uri i Jesús xub'ij che:

—Lik utz i xab'ij; we keje ka'an ile kariq uri ak'aslemal —xcha.

29Xwiri i tijonel re i ujer atb'al tzij kraj ire lik o uno'oj chkiwach winaq, rumali xutz'onoj chik:

—¿Je pachin inlok'anij? —Xub'ij.

30Are uri i Jesús xujeq ub'ixkil jun tijojb'al tzij che.

—O jun achi xel pa Jerusalén, enam re pa Jericó. Are ktijin che i b'e, xeuk'ulaj jub'an ili'omab' xaq xkichapo. Xkel-aj ub'itaq re, xaq i u'u'. Xki'an k'ax che, lik xki'an kan k'ax che chi lik laj xkikamsaj kanoq; te'uri xe'ek. 31Chrijil chik ile xaqte'et jun rajpatan i Dios xik'aw che i b'e le. Are xril i achi chi antal k'ax che, xusol ub'e chwach i xik'awik 32X-on chupan jub'i', o jun ajpatan prachoch i Dios chi xaq xik'aw che i b'e le. Are xupon chila pa o wi i achi le, xwi xrilo, xusol ub'e chwach i x-ek. 33 X-on chupan jub'i' o jun achi aj Samaria xik'aw che i b'e le. Ire, are xrilo, lik k'ax xuna uk'ux, 34i xtejeb' ru', xukunaj i soktajnaq che; xukoj aceite che xaq i uwa'al uva muqb'am. Xaq xuxim ru' k'ul. Te'uri xuya b'i chrij ukaway i xuk'am b'ik, xaq xutzukuj uposar i xuchajij. 35Chukab' ij, are ya kumaj ub'e, xuya kan umer re keb' ij uchak che i rajaw ja. Xub'ij che: “Kachajij i achi ri chwe, xaq we ku'an ti pwaq le, are kintzalij chaloq, kinyijb'a chawe”; xub'ij.#10.35 (Keje i tijojb'al tzij ile xub'ij i Jesús che i tijonel re i atb'al tzij.) 36Te'uri xub'ij che:

—Wo'or chab'ij chwe. ¿Pachin chke i je oxib' le xu'an ulok'anij che i achi chi soktajnaq kumal ili'omab'?

37I tijonel re i atb'al tzij xub'ij:

—Are i jun chi k'ax xuna i achi chi soktajnaq —xcha.

Te'uri i Jesús xub'ij che:

—Xaq yet keje cha'ana ile.

I Jesús xupon chi kachoch ati Mariy i ati Marta

38I Jesús xumaj chub'i ub'e, k'a xupon che jun komon ipa o wi i rachoch jun ixoq chi ati Marta ub'i. Ire xuk'ulaj i Jesús ru' ja. 39I ixoq le, o jun ucha' chi ati Mariy ub'i. Ire le xkub'i chi raqan i Jesús, re kuta wach i kub'ij. 40I ati Marta le lik o i ku'ano, rumali lik kk'achirik. Are uri ire xtejeb' pan ru' i Jesús. Xub'ij che:

—Ajwal, yin lik o kin-ano, incha' kinuto taj. ¿Nti kach'ob' yet ile che? Chab'ij che chi kinuto —xcha.

41I Jesús xub'ij che:

—Ati Marta, lik latz' awach ru' wach taq ronojel i ka'ano, lik katk'achir rumal. 42Xwiri xa jun b'iroxik o uchak ka'ano, ile are pacha ktijin i ati Mariy chu'anik. Ire lik ucha'om ni utz chawach yet, xaq mijun kmajaw che.

Currently Selected:

Lucas 10: ACHICUB

Highlight

Copy