Lucas 11

Jesús xaq i lapanik ru' i Dios

1Julaj i Jesús o che jun k'ijib'al, ktijin chutz'onoxik che i Dios. Are xutzinik, o jun chke utijoxelab' xub'ij che:

—Ajwal, chak'utu chqe wach i lapanik kqa'an ru' i Dios pacha xu'an i ma Wan Ajqajsanel Ya; ire xuk'ut chke utijoxelab' wach lapanik kki'an ru' i Dios.

2I Jesús xub'ij:

—Yix, are kixlapan ru' i Dios, keje iri chib'ij:

Qaqajaw chi at o chikaj, choksax u'ij i lo'laj ab'i.

Chpet ni awajawinik pqawi; cha'ana ni urayijb'al ak'ux waral chwach i jyub' ta'aj xaqjun ru' pacha i k-ani chila chikaj.

3Chaya ni lejom wa re trigo chqe man lik rajwaxik chqe.

4Chakuyu ni qamak

man xaq yoj kqakuy ni kimak

ni'pa i je makunnaq chqij.

Maya chqe kojtzaq chupam i tzaqsab'al.

5Te'uri xub'ij chik chke:

—We o jun chiwe yix, tik'il a'ab' kupon jun rula', kub'ij che: “Kintz'onoj utzil chawe chakuyu inmak, kinjal oxib' awa re trigo”; kcha che, 6“man xk'un jun wula' i lik nti kinya che, wach i kutijo” 7I ulok'anij chi o pa ja moqxa kub'ij che, “Minak'ask'a; i uchija tz'apil chik; i xaq oj kotz'ol chik ku' wak'al, i lik k'ax kinwalijik kumal; rumali, nti kinya chawe”; moq keje ile kub'ij che. 8Kinb'ij uri chiwe: Moqxa ire kwalij ti chu'anik jun utzil che ulok'anij; xwiri, we i jun kumayij ti utz'onoxik, i rajaw ja kwalij ni uri. Kuya ni che wach i rajwaxik che man xumayij ti utz'onoxik. 9O jun tzij kinb'ij ni chiwe: Chitz'onoj, man i Dios kuya ni uri chiwe; chitzukuj, xaq kiriq na; chik'ojk'a i uchija, xaq kjaq ni chiwe. 10Keje ile chi'ana, man we jun lik kutz'onoj, kya' ni che; we lik kutzukuj, kuriq na; we lik kuk'ojk'a i uchija, kjaq ni che.

11Yix chi ix qajawxelab', we o jun iwak'al kutz'onoj uwa chiwe, ¿Xatab'a kiya jun ab'aj che puk'exel uwa? Xaq we kutz'onoj kar chiwe, ¿Xatab'a kiya jun kumatz che puk'exel? Keje taj. 12Xaq we kutz'onoj saqmol chiwe, ¿Xatab'a kiya jun sinaj che? Keje taj. 13Yix, chi ix utz ti laj taq winaq, lik ix sik'aj chuya'ik i utz chke iwak'al. B'ay, mas ni utz uri ku'an i Ta chikaj chwach ile. Lik kutaq li Lo'laj Utewal i Dios chke pachin i ketz'onow che. Keje ile xcha i Jesús chke i je teren chrij.

Kkikoj umak i Jesús chi ucho'ab' xa ru' itzel petnaq wi

14I Jesús ktijin chrelsaxik jun itzel tew che jun mem; are xelik, i achi xch'awik. I winaq lik xkib'isoj. 15Xwiri o jujun xkib'ij:

—I achi le kresaj i itzel tew chke i winaq xa rumal ucho'ab' Itzel o ru'. I cho'ab' le chi o ru' xa re i Beelzebú chi kaj-atzil itzel taq tew —xecha.

16O jub'an chik kkaj kkik'am upam. Xkitz'onoj jun nim laj il che k'utb'al re chke we Dios o ru'. 17Ire reta'am chik wach ketijin chuch'ob'ik, rumali xub'ij chke:

—Jun tinimit, we kki'an taq tzob'ajil che kib' re kki'anb'ej ch'oj chkiwach, xa kkisach kiwach uri. Xaq keje jub'an alk'uwalxelab' we junam ti kiwach, ksach kiwach uri. 18Xaq keje ke'el ile che i Satanás; we o jujun taq itzel kki'an ch'oj chkiwach, kenajtin ti uri. I kib'ij yix chi ru' ucho'ab' itzel xwesaj b'i itzel taq tew. 19B'ay, i tijoxelab' yix xaq kkesaj b'i itzel tew chke i winaq; ¿Pachin uri yawnaq ile pki'ab' ike? Ru' ile chi kki'an itijoxelab' yix, k-aljin uri chiwe chi usuk' taj wach i xib'ij. 20Xwiri yin kewesaj b'i itzel taq tew rumal ucho'ab' i Dios chi o wu'. Ile k'utb'al re chiwe chi i ajawinik re i Dios ya o chik chi.

21We o jun achi o ucho'ab', i we lik kuchajij i rachoch, xaq we o ni tob'al rib' rok'am, nti kuk'ulmaj uri ub'itaq re. 22Xwiri we kk'un jun chik achi mas nim ni ucho'ab' chwach ire, ktiki ni uri che i rajaw ja le. Lik kumaj ni uri che wach rok'am re chajb'al re i rachoch xaq kumaj ni uri i tob'al rib' chi kul uk'ux che. Te'uri kresaj b'i ni'pa ub'itaq re, xaq ku'an ni che pacha kraj ire.#11.22 Are i tijojb'al tzij ile xub'ij i Jesús chke k'utb'al re chke chi nim ni ucho'ab' ire chwach Itzel. Te'uri xub'ij chke:

23—Pachin kuya ti uwach wu', ire ajch'oj uri chwij. Xaq pachin jun kinuto ti chkimolik inchij, xa keukichersaj b'i uri kiwach chwe —xcha chke.

Itzel tew ktzalij chik

24I Jesús xaq xub'ij i tziji chke:

—Jun itzel tew, we xel che jun winaq, xa kb'in pa taq chaqij jyub' chutzukuxik pa kuxlan wi, xwiri kuriq taj. Te'uri kub'ij pujolom: “Kintzalij chik pwachoch pa xinel wi”; kcha, xaq ktzalij chik uri. 25Are kupon tan chik ru' i achi, kuriq puk'ux i achi le pacha jun ja lik jos-im xaq lik yijb'am. 26Are uri i itzel tew keutzukuj b'i i rachi'il; keuriq b'i wuqub' chi lik mas je utz ti chwach ire. Keuk'am b'i ru', xaq konojel ke'ok che achi. Chila kejeqi wi. Te'uri i achi le lik mas utz ti ku'ano chwach li ujer. Keje xub'ij i Jesús ile chke.

I saqil laj kikotemal

27Are xutzin ub'ixkil ile chke, o jun ixoq o chkixol k'iyal winaq, ko xub'ij:

—¡Utz re ixoq chi xatalax ru'! ¡Utz re ixoq chi xatutz'umansaj! —Xcha.

28I Jesús xula' uwach che:

—Mas utz ke ike chi kkita utzij i Dios xaq lik kkikojo —xcha.

I winaq chi je utz taj xa kkitz'onoj jun nim laj il

29I winaq lik ktijin kimoltajik chrij chwach i Jesús, are uri Ire xujeq ub'ixkil chke:

—I winaq re wo'or lik je utz taj: Xa kkitz'onoj jun nim laj il, xwiri nti jun nim laj il k-an ni chkiwach. Xwi i nim laj anik chi etamam chrij i ma Jonás chi profeta, chrij wach i xuk'ulmaj. 30I xuk'ulmaj i ma Jonás ujer le ile lik are jun ilb'al chke i winaq aj Níneve. Xaq keje ile ku'an ni i jun chi Xolalaxoq chwach Ulew pacha Winaq, are ire le k'utb'al ni chke i winaq re wo'or chi Dios lik k'aslik. 31Are kuriq ni i ij, i winaq je re wo'or k-at ni tzij pkiwi chrij wach i ki'anom. Are uri i ixoq ajawinel re pa wiqab' ire kukoj ni kimak rumal wach ketijin chu'ankil wo'or. Ire lik naj xpe wi chutayik unojb'al i mam Salomón, chi o uno'oj. Xwiri i winaq re wo'or kkaj ti kkita i Jun chi k'unnaq chkixol; chi lik mas nim ni uno'oj chwach i mam Salomón. 32Xaq keje i aj Nínive are kk'un i ij chi k-at ni tzij pkiwi i winaq je re wo'or, ike kkikoj ni uri i kimak i winaq le chi je re wo'or. Man i aj Nínive xkijalwachij kik'aslemal are xkita utzij i Dios rumal i ma Jonás; xwiri, i winaq re wo'or kkikoj ti i Jun chi k'unnaq ku', chi lik mas nim ni u'ij chwach i ma Jonás —xcha chke i uk'iyal winaq.

I tzuk'b'al re i ch'akulaj

33—Jun we kutzij jun kantil, kruwaj taj xaq kumin ti chuxe' jun kajon. Are i ku'ano kuya an chikaj man ni'pa i ke'ok b'ik, ketzun na. 34I b'a'wachij keje pacha jun kantil chi are i saq che ich'akul. We lik utz ib'a'wach, lik kok i saq uri pik'ux. Xwiri we ib'a'wach utz taj ix o uri pa equmal. 35Chi'ana kwent che i saq chi o iwu', moqxa to' ku'an equmal. 36We lik oknaq i saq iwu' xaq we lik nti pich' equmal chiwe, ronojel uri is saq chiwe, pacha ku'an jun kantil lik saq utzunb'al —xcha chke.

I Jesús kukoj kimak i aj fariseo xaq i tijonelab' re ujer atb'al tzij

37I Jesús, are xutzin che i lapanik, are uri o jun aj fariseo xusik'ij ru' chi rachoch man kutij uwa ru'. Are uri xok pa ja xaq xkub'i chi mexa. 38I aj fariseo xub'isoj wach xu'an i Jesús, man xuch'aj ti uqul u'ab' k'a puch'uk are xok chwa'im pacha kki'an ike. 39Are uri i AJWAL xub'ij che:

—Yix chi ix aj fariseo winaq, lik kich'aj rij tu'b'al ya xaq rij i laq xaq lik ki'an pen chuch'ajik i'ab'. Xwiri pik'ux lik kich'aj taj, ni'pa o iwu' lik iwel-am xaq lik ix utz taj. 40¡Yix nti ino'oj! ¿Iweta'am ti b'ari chi xwi ti ich'akul uyijb'am i Dios? ¡Xaq uyijb'am i pik'ux! 41Cheito i nib'a'ib' ru' ub'itaq iwe, chi'ana i utz ru' ik'ux; te'uri xaq pik'ux ch'am ni ke'eloq; xwi ti i'ab' ch'am.

42¡To' iwach yix, ix aj fariseo! Ni'pa o iwu' chi nti qas uchak, ile are ki'an pen i relsaxik jun tant che i lajuj chi kiya ni che i Dios. Keje ki'an ile ru' i arawen, ru' i aruta, xaq ru' i ral taq es chi kuya ni ujelal i ti'b'al wa'im. Xwiri ki'an ti pen u'anik i suk'ulik chwach i Dios, xaq mitene k'axnab'al ik'ux che. Are ile lik o uchak ki'an na, chi lik kijach ni i nab'e tant che i Dios che i kich'ako.

43¡To' iwach yix, ix aj fariseo! Chi qus kiwil kulem pa kub'ib'al chi o u'ij pa taq ja re molb'al ib' ke i judío. Chi lik qus kita are kixtioxix kumal i winaq pa k'eb'al kojb'al re i'ij.

44¡To' iwach yix, ix tijonelab' re ujer atb'al tzij xaq yix chi ix aj fariseo! ¡Xa keb' ipalaj! Ix pacha jul re kamnaq chi k-aljin taj we o kamnaq chupam, rumali to' keb'in i winaq puwi man keta'am taj. Keje xcha i Jesús ile chke.

45O jun chke i tijonelab' le re i ujer atb'al tzij lik xuta wach xub'ij i Jesús. Xub'ij che:

—Tijonel, Yet are xab'ij i tzij le, xaq lik xojach'ach'a ni yoj i lik k'ax kqata yoj ile —xcha.

46I Jesús xula' uwach che:

—Xaq yix ¡To' ni iwach ix ajtijonelab'! Chi k'i ni atb'al tzij kiya chkiqul i winaq chi kki'an na; pacha jun eqan lik nim chi mijun kch'ijawik, i yix mitene xa jub'i' keito ru'.

47¡To' iwach yix! Chi kiyijb'a i chom laj taq kimuqb'al i profeta, xwiri lik are iwatit imam xekamsawik. 48Keje ile ki'aljinsaj chi yix iweta'am wach i ki'anom, xaq iya'om ni iwach ku'. Ike xekikamsaj; xaq yix kiyijb'a kimuqb'al i kamnaq.

49I Dios, ru' uno'oj; reta'am li ujer wach ki'an ni yix wo'or. Rumali xub'ij: “Keintaq b'i profeta ku', xaq i je apostolab'. Xwiri, o jujun chke kekamsax na; xaq je o jujun k-an ni k'ax chke.” Xcha. 50I winaq je re wo'or kkitoj ni i kikamsaxik i profeta k'a chuxeb'al li ij saq. 51Kkijeq li utojik nab'e ru' ukamsaxik i a Abel keje ile xpetik k'a are xkamsax i mam Zacarías chi xkikamsaj chuxol i lo'laj k'ijib'al re i Dios ru' sujb'al sipon. I winaq re wo'or is kkitoj ni ronojel, ni'pa i petnaq loq k'a chuxeb'al ij saq.

52¡To' iwach yix, ix tijonelab' re i ujer atb'al tzij! Yix lik chiqul o wi uk'utik i saq laj tzij chke i winaq, xwiri ki'an taj. Ke'eloq pacha o jun lawe pi'ab' xwiri kijaq ti uchija, mitene kixok b'i yix xaq mitene kiya chke i jub'an chi ke'ok b'ik. Keje ile xcha i Jesús chke.

53Are uri lik xpe koywal i je tijonelab' re ujer atb'al tzij xaq i je aj fariseo rumal wach i xub'ij Jesús. Xe'ok chuto'taxik xaq xe'ok chutz'onoxik k'iyal tzij che, 54kkitzukuj tzaqsab'al re che utzij re kojb'al umak.

Currently Selected:

Lucas 11: ACHICUB

Highlight

Copy