Lucas 5

Kichapik i kik'iyal kar

1I Jesús are o chi ya Genesaret. Lik je k'i i winaq xeuponik, lik to' kkitakpuj chik kib' chrij chwach i Ire, rumal kkaj utayik utz laj tzij re i Dios. 2I Jesús xeril pan keb' barco, je ximtal chuchi' i ya, man i je ajchapol kar. Je elnaq chupam man ketijin chuch'ajik i kataraya. 3I Jesús xok chupam jun chke i barco le, chi chupam i re ma Simón. Te'uri xutz'onoj utzil che i rajaw chi koksax pan jub'i' pa ya. Are uri i Jesús xkub'i chupam i barco xaq xok chuk'utik chke i winaq. 4Are xutzin che i lapanik ku' i winaq, xub'ij che i ma Simón:

—Chak'ama b'i a-barco pa cho, xaq chik'aqa b'i iwatraya chila man keje ile o ni kar kichapo —xub'ij.

5I ma Simón xula' uwach che:

—Tijonel, lik jun a'ab' kojtijin chutzukuxik, xwiri lik nti xqariqo. Xwiri we keje kab'ij yet ile kink'aq chub'i i atraya —xcha.

6Te'uri xkik'aq b'i i kataraya pa ya. Lik k'i i kar xujek' li ataraya; chi lik xutikb'a raqch'ijik 7Te'uri xkik'ut pan ki'ab' chke i kachi'il chi je o chupam jun chik barco, man utz kolkito ni ru' i kataraya. I jub'an x-e chkito'ik i kachi'il; lik xekinojsaj i keb' barco che i kar, man laj xemuqtaj pa ya rumal. 8I ma Simón Pedro, are xril ile, xxuki chwach i Jesús i xub'ij che:

—¡Chat-el chinwach, Ajwal, man yin xa in ajmak! —Xcha.

9Keje xub'ij i ma Simón ile, man lik xuxij rib'. Xaq ni'pa i je o ru' is xe'ok il rumal ni uk'iyal kar xkichapo. 10Xaq i jub'an kachi'il xkixij kib', chi je are i ma Jacobo i ma Wan, chi je uk'ojol i mam Zebedeo chi je rachi'il i ma Simón. Xwiri i Jesús xub'ij che i ma Simón:

—Maxij awib', wo'or kin-an chawe at ajtzukul winaq, —xub'ij che.

11Te'uri xkesaj li ki-barco chuchi' i ya; ronojel is xkiya kanoq xaq xeterej b'i chrij.

I Jesús xukunaj jun achi chi o yob'il che utz'umalil

12X-on panoq, i Jesús, are o che jun tinimit, xupon jun achi ru' chi o yob'il che utz'umalil. Ire, are xril i Jesús, xu'aj rib' chwach, xuqajsaj upalaj chwach ulew, man xutz'onoj utzil chomal che.

—Nim laj winaq, wetene kawaj, kawesaj i itzel laj yob'il chi o chwe —xcha.

13Te'uri i Jesús xuchap ru' u'ab' xaq xub'ij:

—Kwaj, ¡Chatutziroq! Are xub'ij ile che juntir xutzir uch'akul achi, lik xel i yob'il che utz'umalil. 14I Jesús xub'ij che:

—Mitene che jun kab'ij wi wach i xin-an chawe. Xwiri, jat, jak'utu awib' che i rajpatan i Dios chi at utzirnaq chik, chak'ama b'i asipon jasujuj chwach i Dios, pacha ub'im kan i mam Moisés. Keje cha'ana ile, man kketamaj konojel i winaq chi at utzirnaq chik, xaq lik ch'am chik ach'akul.

15Te'uri i Jesús, lik mas xpax utzijol wach i ktijin chu'ankil. I winaq lik kkitzukuj; rumali lik je k'i xemoltaj chutayik utzij; xaq re kekuntaj ni che i kiyob'il. 16Xwiri, Ire olik k-e pa taq tz'inilik jyub' che i lapanik ru' i Dios.

I Jesús xrutzirsaj jun sikirnaq

17Xuk'ulmaj jun ij are chi Jesús ktijin chuk'utik chke i winaq. Xaq chila je kul jub'an aj fariseo, xaq jub'an ajtijonelab' re i ujer atb'al tzij. Ike je petnaq pa taq ronojel komon re i ulew Galilea, xaq i re i ulew Judea, xaq o jujun je petnaq k'a pa tinimit Jerusalén. I ucho'ab' i Dios lik o ru' i Jesús man lik kerutzirsaj iwab'ib'. 18Are uri, xeupon jub'an achiyab', kuk'am b'i jun achi chwach jun ch'at re erb'al man lik sikirnaq uch'akul. Kkaj te'eq ke'ok b'i pa ja re kkiya chwach i Jesús. 19Xwiri kkiriq taj pa ke'ok wi rumal i kik'iyal i winaq. Rumali xe'el puwi i ja xaq xkesaj i xot, xki'an jun tel puwi i ja le. Te'uri xkiqajsaj b'i iwab' chwach ch'at k'a pa ja. Lik chkixol i winaq xkiqajsaj wi, xkiya k'a chwach i Jesús. 20I Jesús xrilo chi i achiyab' le lik kikub'am kik'ux che. Rumali xub'ij che i iwab':

—Wak'al, ni'pa i amak ya kuytajnaq chik —xcha.

21Are uri, i tijonelab' re i ujer atb'al tzij xaq i aj fariseo xe'ok chuch'ob'ik. “¿Pachin taq achi le chi keje ile kub'ij? I tzij kub'ij le lik utz ti laj taq tzij chrij i Dios. Mijun o pu'ab' kukuy kimak i winaq; ¡Xwi i Dios!” —Xecha.

22Xwiri, i Jesús reta'am wach kkich'ob'o. Rumali xutz'onoj chke:

—¿B'uchak yix kich'ob' ile pik'ux? 23¿Pachike lik k'ax ti ub'ixkil: “I amak kkuytaj ni chawe”, o are: “Chatwalijoq, chayaka b'i ach'at xaq chatb'inoq”? 24Xwiri yin, chi Xinalaxoq chwach Ulew pacha Winaq, kin-aljinsaj ni chiwe chi o pin-ab' kinkuy ni kimak i winaq waral chwach i jyub' ta'aj —xcha chke.

Te'uri xub'ij che i achi chi sikirnaq:

—Chata pe', chatwalijoq, chayaka b'i asok i jat chi awachoch.

25Juntir xwalij iwab' chkiwach i winaq. Xuyak b'i usok chi kotz'ol te'eq chwach xaq x-e chi rachoch, ktijin chukojik u'ij i Dios. 26Konojel lik xkib'isoj, xaq xe'ok chukojik u'ij i Dios. Lik je oknaq il, xkib'ij: “I qilom wo'or, lik jun nim laj anik”; xecha.

I Jesús kusik'ij i ma Leví

27Chrijil chik ile i Jesús x-ek. Are ktijin che i b'e xril jun ajtz'onol alkawal chi kul puk'ijib'al ipa ktoj wi i alkawal. I achi le ma Leví ub'i. I Jesús xub'ij che:

—Chatterej chwij. 28Are uri i ma Leví juntir xwalijik, is xukanaj kan ub'itaq re, i xterej b'i chrij i Jesús.

29X-on panoq i ma Leví xu'an jun nim laj nima'ij chi rachoch kojb'al u'ij i Jesús. Je k'i i ajtz'onol alkawal je o ku' chi mexa xaq je o chik jub'an winaq ku'. 30Xwiri i aj fariseo xaq i tijonelab' re ujer atb'al tzij, ike xe'ok chkiyo'yaxik i utijoxelab' i Jesús. Xkib'ij chke:

—¿B'uchak keje ki'an yix ile? Kitij i wa, xaq kitu' i uwa'al uva muqb'am ku' i ajtz'onol alkawal chi je ajmakib' laj taq winaq —xecha chke.

31I Jesús xula' uwach chke:

—Kin-an iri, man are i je iwab' kajwax jun ajkun chke; i utz kiwach, nti uchak jun ajkun chke. 32Yin in k'unnaq ti chkisik'ixik i je utz, yin in k'unnaq chkisik'ixik i je ajmakib', man keje ile ketzalij chik ru' i Dios.

Tz'onb'enik chrij umayixik wa'im rumal lapanik ru' i Dios

33Te'uri ike xkib'ij che i Jesús:

—¿B'uchak i atijoxelab' yet kkimayij ti kiwa'im are kelapan ru' i Dios, pacha kqa'an yoj? I utijoxelab' i ma Wan kki'ano; xaq keje kqa'an yoj oj aj fariseo. Xwiri, i awe yet kki'an taj; ij ij kewa'ik xaq ketu'unik —xkib'ij che.

34I Jesús xub'ij chke:

—I winaq, we ke'e pa nima'ij re jun k'ulankil, ¿Xatab'a yix ki'an chke chi kkimayij kiwa'im rumal kilapanik ru' i Dios we o i achi chkixol chi kk'uli'ik? 35Xwiri, we xuriq i ij chi kk'am b'i i achi chi kk'uli'ik, che taq i ij le te'uri kkimayij kiwa'im.

36Xaq o jun chik tijojb'al tzij xub'ij chke.

—Jun, we kraj kuk'ojoj jun u'u' el, kuk'upij ti ch'aqap che u'u' k'ak', kuk'ojb'ej re u'u' el. We keje ku'an ile lik ku'an uri mal che u'u' k'ak'; xaq keje i ch'aqap k'ak', utz taj ku'an che u'u' el.#5.36 Keje xub'ij i Jesús ile chke, k'utb'al re chke chi i k'utunik re ujer, kuch'ij taj kok ru' i k'utunik k'ak'. 37Xaq mijun kukoj uwa'al uva k'ak' chupam i el taq surum, man i uwa'al uva k'ak' xa kuraqch'ij i surum. Man i uwa'al i uva xaq i surum ke'on mal. 38Rumali o uchak kik'ol i uwa'al uva k'ak' chupam i surum k'ak'. 39Jun, we ax kutu' wi i ujer uwa'al uva, kraj ti chik kutu' i k'ak'. Kuch'ob' ire, “Chi mas utz i ujer uwa'al uva”.

Currently Selected:

Lucas 5: ACHICUB

Highlight

Copy