Lucas 4

I itzel kutzukuj utzaqsaxik i Jesús

1I Jesús lik ru' Lo'laj Utewal i Dios xel b'i chila che i ya Jordán xaq xk'am b'i uri che jun tz'inilik jyub' chaqij rumal Lo'laj Utewal i Dios. 2Chila xuch'ij kawinaq (40) ij, lik nti xutijo. Are o chila xupon Itzel ru'; xraj utzaqsaxik i Jesús chupam i tzaqsab'al re ire. Are xik'aw i kawinaq (40) ij le, xpe i numik che. 3Are uri, i Itzel xub'ij che:

—We yet lik at Uk'ojol i Dios, cha'ana che i ab'aji chi ku'an wa re trigo che rib' —xcha.

4I Jesús xula' uwach che:

—Kin-an taj —xcha. Man chupam Uwuj i Dios, keje iri tz'ib'talik: “Xwi ti rumal i wa re trigo je k'as i winaq. Man lik je k'as ni rumal ronojel Utzij i Dios.” —Xcha i Jesús.

5Te'uri i Itzel xuk'am b'i che jun nim laj jyub'. Are uri xuk'ut che i Jesús ronojel i nimaq taq tinimit o chwach i jyub' ta'aj. 6Te'uri xub'ij chik che:

—Ronojel iri lik o pin-ab' yin. Xaq o pin-ab' kinsipaj che pachin kwaj yin. 7Kinsipaj chawe xwiri we yet katxuki chinwach xaq kakoj in-ij —xcha i Itzel che.

8I Jesús xula' chik uwach che:

—Man chupam uwuj i Dios keje iri tz'ib'talik: “Xwi Awajwal Dios chakojo u'ij, xwi che ire ka'an wi apatan” —keje ile tz'ib'talik.

9Te'uri i Itzel xuk'am b'i i Jesús pa Jerusalén. Xuk'am b'i chila k'a chutzam i rachoch i Dios chi lik naj uwi. Te'uri xub'ij che:

—We yet lik at uk'ojol i Dios, chak'aqa b'i awib' k'a pulew, 10man chupam uwuj i Dios, keje iri tz'ib'talik:

“I Dios kub'ij ni chke u-ángel chi

katkichajij na.

11Ike lik katkuk'aj ni ru' i ki'ab';

mitene kkiya chawe katakij awaqan che i ab'aj.”#4.11 Salmos 91.11-12.

Keje ile xub'ij Itzel che.

12I Jesús xula' chik uwach che:

—Xaq tz'ib'tal i tziji chupam uwuj i Dios: “Mak'am upam Awajwal Dios”; kub'ij.

13I Itzel, ya kuriq ti chik wach tzaqsab'al re ku'an che i Jesús, rumali xel keb' oxib' ij chwach.

I Jesús xujeq uchak pa ulew Galilea

14Te'uri i Jesús xtzalij pa Galilea, lik o Lo'laj Utewal i Dios ru'. Ronojel wach i xu'ano, lik xel utzijol che ronojel taq jyub' ta'aj chrij chwach. 15Ire xuk'ut utzij i Dios chke i winaq pa taq ja re molb'al ib' ke i judío, xaq konojel xkib'ij chi lik nim u'ij.

I Jesús x-e pa Nazaret

16Te'uri i Jesús x-e pa tinimit Nazaret pa xk'iy wi. Pacha ax ku'on wi che taq i ij sábado, xok pa ja re i molb'al ib' ke aj judío. Are uri xtak'i anoq i xok chrajlaxik uwach uwuj i Dios chke chila. 17Are xtak'i chrajlaxik, xkiya i wuj che chi utz'ib'am kan i mam Isaías, chi profeta. Xujaq i wuj, xutzukuj xaq xuriqo pa o wi i tzij chi keje iri kub'ij:

18“I Utewal i Ajwal lik o wu',

man in ucha'om yin chupaxsaxik i utz laj tzij k'ak' chke i nib'a'ib';

in utaqom li chrelsaxik i k'ax pkik'ux ni'pa i keb'isonik.

In utaqom li chub'ixkil wach i kelb'al chisaq ni'pa i ajprexil

xaq chub'ixkil wach uriqik i kitzunb'al i je mawach.

In utaqom li chkito'ik ni'pa i kkitij i k'ax.

19In utaqom li chutzijoxik i utz laj taq ij re i Ajwal.”#4.19 Are i tzij le xrajlaj i Jesús chke, chi utz'ib'am kan i mam Isaías. (Is 61.1-2)

20Te'uri xub'or chik i wuj, xaq xuya che i chajinel re i ja re molb'al ib' ke i judío, are uri xkub'i'ik. Konojel i je o pa ja to' xkik'am utaqexik.

21Te'uri xujeq i lapanik ku', xub'ij:

—Wo'or, chupam i iji, i Dios ktijin chu'anik pacha i kub'ij i tzij chi tz'ib'tal kan ujer chupam uwuj Ire. Wo'or kiwil ut o chik chi chiwach —xcha i Jesús chke.

22Konojel lik utz xech'aw chrij i Jesús. Lik xkib'isoj i chom laj utzij chi xub'ij. Xkib'ij chkiwach:

—Ire le ¿Xatab'a are ti uk'ojol i ma José? —Xecha.

23I Jesús xub'ij chke:

—Qatzij, yix kib'ij ni i tziji chwe, chi ax b'ital wi: “Ajkun, chakunaj ni awib' yet.” Xaq kib'ij ni uri iri chwe: “Ni'pa i qatom chi a'anom chila pa tinimit Capernaum, cha'ana ni uri waral chupam atinimit yet”. Keje xub'ij i Jesús ile chke.

24Xaq xub'ij:

—Kinsaqij ni chiwe chi lik mijun profeta utz uk'unb'al k-an che putinimit. 25Qatzij kinb'ij, chi je k'i i malkanib' je o pa Israel are o mam Elías chi profeta. Are uri che taq i ij ile xpe ti chik i jab' chi lik oxib' junab' ru' nik'aj xuch'ijo; rumali xpe wa'jal chwach ronojel i jyub' ta'aj, 26xwiri i Dios xutaq ti mam Elías chkito'ik ike; xa xutaq b'i ru' jun ixoq malkan chi aj Israel taj; i ixoq le aj Sarepta, chi re i jyub' Sidón. 27Xaq kinsaqij ni chiwe wach xu'an i mam Eliseo chi profeta. Je k'i je rach aj Israel chi o yob'il che kitz'umalil, xwiri, ire lik mijun xeukunaj, xwi xukunaj i ma Naamán chi aj Siria, ire aj Israel taj. Keje xub'ij i Jesús ile chke.

28Are xkita wach i xub'ij, xpe koywal ni'pa je o pa ja re i molb'al ib' ke i judío. 29Are uri xewalijik xaq xkesaj b'i pa tinimit. Xkik'am b'i tzam jyub' re i tinimit, k'aqb'al loq re chwi jyub', 30xwiri i Jesús xa xik'aw chkixol xaq xumaj b'i ub'e.

Achi chi o te'eq itzel tew che

31Te'uri x-e i Jesús pa Capernaum, chi ukwenta i jyub' Galilea. Che i ij sábado, xeutijoj i winaq. 32Ike lik kkib'isoj wach i k'utunik ku'ano, man lik reta'am wach taq i kub'ij.

33O jun achi pa ja re molb'al ib' ke i judío, o itzel tew che, ire xsik'in chub'ixkil:

34—Jesús aj Nazaret, ¿B'uchak kolamina awib' qu' yoj? ¿Moq xatk'unik re kolasachb'ej qawach? Yin weta'am awach: Yet at are i Lo'laj jun chi petnaq ru' i Dios.

Keje ile ksik'in chub'ixkil.

35I Jesús xuyaj i itzel tew, i xub'ij che:

—¡Match'awik! ¡Chawo'taj kan i achi le! —Xcha che.

Are uri i itzel tew xutzaqsaj i achi pulew chkiwach i winaq. Te'uri xel che, nti chik jun k'ax xu'an che i achi. 36Konojel i winaq xe'ok il che xaq xe'ok chub'ixkil chkiwach:

—¿B'i chi tzijol ile xub'ij? ¡I achi le, utzij lik o ucho'ab'; o pu'ab' keutaq b'i itzel taq tew! ¡I ke'elik! —Xecha.

37Are uri xpax utzijol i Jesús che ronojel i jyub' re i Galilea.

I Jesús xrutzirsaj uchuch uji' i ma Pedro

38I Jesús xel pa ja re molb'al ib' ke i judío xaq x-e chi rachoch i ma Simón. I uchuch uji' i ma Simón lik iwab', lik o a' chrij. Are xok i Jesús pa ja, k'iyal mul xkitz'onoj utzil che chi krilo. 39Are uri Ire xu'aj rib' puwi iwab' le i xu'atij i a'. Juntir xpaktaj i a' chrij ixoq. Are uri ixoq xwalijik i xok chuyijb'axik wach i kkitijo.

I Jesús k'i iwab'ib' xeukunaj

40Are xqaj ij chik, i winaq xkitikb'a li uk'amik iwab'ib' ru' i Jesús. Xab'i chi yob'il o chke, Ire lik xuya u'ab' pkiwi chkijujunal, are uri xerutzirsaj. 41Xaq je k'i i winaq xelsax itzel tew chke. Are xe'el itzel tew chke, xesik'in chub'ixkil:

—¡Yet at Uk'ojol i Dios! —Xecha.

Ire xeu'atij, xaq xub'ij chke: Mixch'awik —xcha, man ike keta'am chi are ire Cristo i aj Israel winaq.

I Jesús xutzijoj utzij i Dios pa taq ja re molb'al ib' ke i judío

42Are xsaqir chukab' ij, i Jesús xel pa tinimit, x-e che jun jyub' tz'inilik. I winaq lik xkitzukuj, are uri xkiriqo ipa o wi. Kkaj ike kkanaj ku', 43xwiri i Jesús xub'ij chke:

—Kin-e chik che jub'an taq tinimit; man lik rajwaxik kintzijoj chke ike i utz laj taq tzij chrij i ajawinik re i Dios. Are rumali ile xinutaq li Dios —xcha chke.

44Are uri, x-e chutzijoxik i utz laj tzij re i Dios chke konojel i winaq pa taq ja re molb'al ib' ke i judío.

Currently Selected:

Lucas 4: ACHICUB

Highlight

Copy