Lucas 2

Ralaxik i Jesús

1Che taq i ij le, i mam Augusto César aj Roma#2.1 I tzij César ri b'iyaj taj, iri are ub'i upatan chi lik mas nim u'ij, chila kki'at wi tzij aj Roma. xutaq u'anik jun atb'al tzij man k-an jun ajlanik, chwach ronojel i jyub' ta'aj. 2I nab'e ajlanik le x-anik are ma Cirenio rok'am utzam i tinimit Siria, rumali chi are ire x-anawik. 3Konojel i winaq is ke'e uri chutz'ib'axik kib'i pa taq kitinimit ipa je alaxnaq wi.

4I ma José xel pa tinimit Nazaret, chi ukwenta i Galilea. Ire, umuq uxikin kan i ajawinel mam David. Rumal i atb'al tzij chi xel loq, o ni uchak k-e putinimit pa alaxnaq wi i mam David ujer. I tinimit le are i Belén ukwenta i ulew Judea. 5X-e uri i ma José chutz'ib'axik ub'i pa Belén junam ru' i al Mariy chi yatal chik che re rixoqil. Are xe'ek, i al Mariy k'aqtajnaq chik. 6Are je o pa tinimit Belén, xuriq u'ij i ali le; 7chila xk'iji wi i nab'e rak'al, ral ala. Xwiri xkiriq ti kik'ijib'al ipa ke'uxlan wi, rumali al Mariy xa xupasij i rak'al pa ch'aqa taq k'ul, xaq xukotz'b'a puwayb'al chikop.

I ángel xaq i je ajyu'ul chij

8Naqaj che i tinimit Belén je o jub'an ajyu'ul chij pa taq es chi kkichajij kichij cha'ab'. 9Xaqte'et xwinaqir jun ángel re i Ajwal Dios ku', xaq i uchomal i Ajwal Dios lik kwalch'in chkij chkiwach. Ike lik xkixij kib'. 10I ángel xub'ij chke: “Mixij iwib', man yin xa kolinya jun utz laj tzij k'ak' chiwe chi is kekikot ni winaq rumal: 11Wo'or xalax jun Tol iwe pa tinimit Belén chi utinimit kan i mam David ujer. Are i Cristo, chi Ajwal. 12K'utb'al re chiwe chi qatzij i kinb'ij, we kitzukuj, kiriq ni ak'al kotz'b'am puwayb'al chikop, pasim pa taq k'ul.” Keje ile xub'ij i ángel chke.

13Che taq i or le, xaqte'et xewinaqir uk'iyal ángel aj chikaj ru' i jun. Ike, ketijin chukojik u'ij i Dios —kkib'ij:

14“¡Choksax u'ij i Dios chila chikaj!

¡Chuxlan kik'ux i winaq chwach i jyub' ta'aj, chi je ucha'om ire!” Xkib'ij i ángel.

15Are uri i ángel xetzalij chik chikaj; te'uri i je ajyu'ul chij xkib'ij chkiwach:

—Jo' pa tinimit Belén, kqilb'ej re wach i x-anik chi u'aljinsam i Ajwal Dios chqe —xkib'ij.

16Te'uri i je ajyu'ul chij xe'e pa'anem. Are xeuponik, xkiriq i al Mariy ru' i ma José, xaq i ak'al kotz'b'am puwayb'al chikop. 17Are xekilo xe'ok chub'ixkil chke wach i xub'ij i ángel chke chrij i ak'al le. 18Konojel ni'pa i xetawik lik xkib'isoj wach i xkib'ij i je ajyu'ul chij. 19I al Mariy lik xkikotik xaq lik xuya puk'ux ni'pa i tzij chi xuta, xaq lik xsach ti chuk'ux. 20I je ajyu'ul chij xetzalij chik ipa i je petnaq wi. Are xe'ek, ketijin chukojik u'ij i Dios; xkib'ij chi lik nim u'ij rumal ronojel i kitom xaq i kilom. Xe'eloq lik qatzij pacha xb'ix chke.

I ak'al Jesús xk'am b'i prachoch i Dios

21Xel wajxaqib' ij, xki'an i circuncisión che i uch'akul i ak'al#2.21 Circuncisión: Are i k-an che i anb'al uchul i ak'al.; are uri xkiya pub'i a Jesús. Are ub'i ile chi b'ital che i al Mariy rumal i ángel are k'amaja kk'aqtajik. 22Are xtz'aqat ij chi ike lik je ch'am chik, chrij pacha kub'ij i ujer atb'al tzij re i mam Moisés, are uri xkik'am b'i i ak'al pa Jerusalén re kkijach che i Ajwal Dios. 23Keje xki'an ike ile man chupam i u'atb'al tzij i Ajwal Dios, keje iri tz'ib'talik: “Are kalax i nab'e ak'al, we ala, o uchak kjach ni pu'ab' i Dios.” 24Rumal uri, xe'e chusujuxik keb' palomax o ntaj keb' ixkuku, pacha i kub'ij u'atb'al tzij i Ajwal Dios.

25Che taq i ij le o jun mam jeqel chila pa Jerusalén, mam Simeón ub'i. Ire lik jun suk'ul laj mam, lik ajkojol u'ij i Dios. Ire roy-em chik i Cristo i aj Israel winaq. I mam le lik o Lo'laj Utewal i Dios ru'. 26Rumal i Lo'laj Utewal i Dios reta'am chik chi kkam ti tan, k'a kril ni uwach i Cristo, i jun chi ub'im i Ajwal Dios chi kutaq na loq. 27I mam le xok prachoch i Dios, uk'am rumal Lo'laj Utewal i Dios. Are uri i ma José i ati Mariy xaq kik'amom b'i a Jesús prachoch i Dios, chu'anik pacha i tz'ib'tal kan chupam u'atb'al tzij i mam Moisés. 28Are uri i mam Simeón xu'aluj i ak'al, xuk'amwaj che i Dios, xaq xub'ij:

29“Wo'or, Ajwal Dios, lik kuxlan ink'ux; lik a'anom na, pacha ab'im chwe;

wo'or utz we kinkamik.

30Kuxlan ink'ux man wilom chik wach i tob'al qe.

31Chi ajeqom u'anik

chkiwach konojel i winaq chwach i jyub' ta'aj.

32Lik are ni jun saq chi ktzun ni pkiwi konojel i winaq re i uwach jyub' ta'aj,

are ile kyaw u'ij i tinimit Israel.”

Keje ile xub'ij i mam Simeón.

33I ma José, xaq i uchuch i a Jesús, lik xkib'isoj wach i xkita, chi xb'ix chrij i ak'al. 34I mam Simeón xuya i utzil chomal pkiwi. Xaq xub'ij che ati Mariy, chi uchuch i ak'al:

—I Dios xuya i ak'ali chqaxol man keje ile lik je k'i i aj Israel ketotaj na, xaq lik je k'i keya' ni pa tojpen. Ire are ni k'utb'al re chi lik je k'i kkixutuj na. 35Man iri are i kuya i retamaxik wach i kkich'ob' chkijujunal, yet, al Mariy, iri lik kuya ni uk'axk'ol chawe pacha taq kkichap jun ch'ich' chi k'ulala o uware che awanima. Keje ile xub'ij i mam Simeón che.

36Xaq o jun ixoq chila, tit Ana ub'i chi profeta. Ire umi'al i ma Fanuel chi ulemajil kan mam Aser. I tit Ana le lik rij chik. Are k'a ali xk'uli'ik xa wuqub' junab' xkuk'aj kib' ru' i rachijil. 37Kajib' kajwinaq (84) junab' che umalkanijik kanoq. Xwiri ire lik xel ti prachoch i Dios, lik ku'an upatan chwach i Dios chipa'ij, chicha'ab'; xaq kumayij uwa'im rumal ulapanik ru' i Dios 38Are uri juntir xtejeb' pan ku' xaq xujeq utioxixik che i Dios rumal, xaq xujeq ulapik i ak'al chi lik are i Jesús chke konojel ni'pa i koy-em relik i Jerusalén chisaq.

I tzalijik pa Nazaret

39I ati Mariy i ma José, are xeutzin chu'ankil pacha tz'ib'tal chupam u'atb'al tzij i Ajwal Dios, are uri xetzalij chik pkitinimit Nazaret chi pa jyub' Galilea. 40Chila i ak'al ktijin uk'iyik; xk'iji ucho'ab', lik xk'iji unojb'al, xaq i rutzil i Dios lik o puwi.

I ak'al Jesús xriqtaj prachoch i Dios

41I uqajaw i uchuch i Jesús, ronojel junab' ke'e pa Jerusalén chrilik i nima'ij Pascua#2.41 Nima'ij chi lik o u'ij chke aj Israel chi k'unsab'al re chkik'ux i kelik loq pa Egipto.. 42Rumali chi are o kab'lajuj junab' che i Jesús, xe'e pa Jerusalén, pacha ax kki'an wi pa nima'ij. 43Are xk'is i nima'ij, xetzalij loq, are uri i Jesús xkanaj pa Jerusalén. I uqajaw uchuch xkinab'ej taj we xkanaj kanoq. 44Xkich'ob' ike chi i Jesús teren li chkixol i winaq; xik'aw jun ij kib'e, te'uri xkijeq utzukuxik chkixol i kachalal xaq chkixol ni'pa i keta'am kiwach. 45Lik xkiriq taj rumali xetzalij chik chutzukuxik chila Jerusalén.

46Xik'aw urox ij, te'uri xkiriq prachoch i Dios. Lik kul chkixol i tijonelab' re i ujer atb'al tzij ktijin chutayik kitzij, xaq k-on tz'onb'enik chke. 47Konojel ni'pa i xkita wach i xub'ij, lik xkib'isoj unojb'al xaq wach ula'ik uwach k-ono 48I uqajaw i uchuch, are xkil uwach, lik xkib'isoj. I uchuch xub'ij che:

—Wak'al, ¿B'uchak keje xa'an ile chqe? Yin, ru' aqajaw, lik xojk'achir chatzukuxik —xcha.

49Are uri i Jesús xub'ij chke: —¿B'uchak kinitzukuj? ¿Iweta'am ti b'ari chi yin o i kin-an prachoch Inqajaw? —Xcha.

50Xwiri ike xkita ti ub'e i tzij chi kub'ij chke.

51Te'uri i Jesús xtzalij ku' pa tinimit Nazaret; xaq lik xkojon chke pacha ax k-on wi te'eq. I uchuch lik xukoj retalil ronojel ile puk'ux. 52I Jesús ktijin uk'iyik, xaq lik ktijin upetik unojb'al; xaq lik kuna i utz laj utzil re i Dios; xaq ke i winaq chi utz kkilo.

Currently Selected:

Lucas 2: ACHICUB

Highlight

Copy