Lucas 1

Utz'ib'anik ma Lucas che ma Teófilo

1Lik je k'i ki'anom pen utz'ib'axik ni'pa i anik chi u'anom i Dios chqaxol yoj.

2Kitz'ib'am wach i k'uttal chqe kumal i xe'ilaw li k'a chuxeb'al, xya' chkiqul i chak re upaxsaxik utzijol i utz laj tzij.

3Xaq yin, nim laj winaq, ma Teófilo, xintak'i ni praqan, man lik utz u'anik xin-an che k'a chuxeb'al loq, rumali xinch'ob' yin, chi lik utz kintz'ib'aj ni usuk' i aniki chawe yet.

4Man keje ile lik kawetamaj i saq laj tzij chi k'uttal chawe.

Jun ángel xutzijoj ralaxik i ma Wan Ajqajsanel Ya

5Xuk'ulmaj chi are o ma Herodes#1.5 I tzij Herodes ri b'iyaj taj, iri are ub'i upatan xaq rumal u'ij. pa ajawinel che i jyub' Judea, are uri jeqel jun achi chila chi, mam Zacarías ub'i. Ire rajpatan i Dios. Xaq ukwenta i jutzob'aj ajsujul sipon re i mam Abías. I rixoqil ati Elisabet ub'i, xaq umuq uxikin kan i nim laj ajsujul sipon chwach i Dios mam Aarón. 6I mam Zacarías xaq ati Elisabet chekeb' lik je utz chwach i Dios. Lik xekojon che ronojel utzij upixab' i Ajwal, lik nti jun kimak kriqtajik. 7Ike nti kak'al, man i ati Elisabet kalan taj; i xaq lik chekeb' je nimaq winaq chik.

8Xuriq i ij, chi mam Zacarías chi rajpatan i Dios, ktijin chu'ankil upatan chwach i Dios, man xuriqa i ij re i jutzob'aj re ire. 9Ni'pa taq i jutzob'aj rajpatan i Dios, are u'anik kki'ano kkisakij na, kkilb'ej re pachin chrij ktzaq wi chi kuporoj pom chwach i Dios. Che i ij le, i patan xtzaq chrij i mam Zacarías, chi are ire kok pa ja che i lo'laj k'ijib'al prachoch i Ajwal Dios.#1.9 Cf. Éxodo 30.1-8; 1 Reyes 7.48-50. 10Are uri xok i mam Zacarías chila xaq are ktijin chuporoxik i pom, i uk'iyal winaq chi xkoy-ej kan chisaq is ketijin che i lapanik ru' i Dios. 11Xaqte'et, o jun ángel re i Ajwal xwinaqir chwach i mam Zacarías chila pa ja. I ángel le tak'al pa wiqab'im re i sujb'al sipon ipa kporox wi i pom. 12I mam Zacarías, are xrilo, lik xok il che xaq lik xuxij rib'. 13Xwiri i ángel xub'ij che:

—Mam Zacarías, maxij awib'. I Dios utom wach atz'onom che. Yet ru' awixoqil ati Elisabet kk'iji ni jun iwak'al chi kiya ni pub'i a Wan. 14Yet lik katkikot na; xaq lik je k'i i winaq kekikot na rumal i ralaxik, 15man i ak'ojol le, nim upatan chwach i Dios. Ire le kutu' ti uwa'al uva muqb'am, xaq mitene i ya chi k-ab'arsanik. Ire, lik chuxe'el li ralaxik uk'am rumal Lo'laj Utewal i Dios. 16Rumal uk'utunik Ire, je k'i ni aj Israel winaq kkijeq tan chik ukojik i Dios. 17I a Wan le knab'ej ni chwach i Ajwal chi kk'unik. Ru' ucho'ab' i profeta chi mam Elías. Ire kuchomarsaj ni kinojb'al i qajawxelab' ku' i kak'al xaq re kekojon ni ni'pa i kekojon taj. Keje u'anik uri ile chi kuyijb'a ni kik'ux i winaq re tinimit re uk'ulaxik i Ajwal. Keje ile xub'ij i ángel.

18I mam Zacarías xutz'onoj che i ángel:

—¿Wach i retamaxik kin-an yin we lik qatzij? Man yin xaq i wixoqil lik oj rijab' chik —xcha.

19I ángel xula' uwach che:

—Yin in ángel Gabriel, chi in utaqon li Dios. Xinutaq loq re kolinb'ij i utz laj tzij k'ak' chawe. 20Xwiri, wo'or rumal i xakoj taj wach i xinb'ij chawe, rumali katmemer na. Katch'aw ti chik k'a kuriq i ij chi uch'ob'om i Dios kalax ni awak'al ru' awixoqil —xcha i ángel che.

21Tz'aqat i winaq chi je o chisaq koy-em mam Zacarías prachoch i Dios; lik xkitz'onoj chkiwach b'uchak kb'aytaj li che i elik chupam i lo'laj k'ijib'al re i Ajwal. 22Are xel loq lik kel ti chik uch'awb'al. Rumali xketamaj ike chi xril jun nim laj il chila pa lo'laj k'ijib'al re i Ajwal. Ire to' ru' chik u'ab' klapan ku' man lik kel ti chik uch'awb'al.

23I man Zacarías le are xk'is i ij re upatan, x-e chi rachoch. 24X-on panoq xk'aqtaj i rixoqil chi ati Elisabet; i ixoq le, jo'ob' ik' chi lik xel ti chi rachoch; man lik kch'ob'onik: 25“Xub'ij, keje xu'an i Ajwal Dios ile chwe tob'al we, xaq elsab'al ink'ix chkiwach i winaq”; man kuya ni jun wak'al.

Jun ángel xutzijoj i ralaxik i Jesús

26Che i waqib' ik', i Dios xutaq li ángel Gabriel che i tinimit Nazaret chi ukwenta i jyub' Galilea. 27Xutaq b'i ru' jun apoj ali, al Mariy ub'i. I ali le ya uya'om chik utzij che jun achi, ma José ub'i chi kk'uli ru'. I ma José le umuq uxikin kan i ajawinel mam David. 28Xok i ángel ipa o wi i al Mariy, xaq xuya rutzil uwach. Xub'ij che:

—¡Chatkikotoq! ¡Utz awe yet! I Ajwal Dios lik o awu'.

29I al Mariy are xril i ángel, lik xub'isoj i tzij chi xb'ix che; xuch'ob' puk'ux wach usuk' i tzij chi xub'ij i ángel le che. 30Rumali, i ángel xub'ij chik che:

—Maxij awib', al Mariy; man i Dios lik nim ni rutzil uk'ux chawe. 31Chata pe', lik katk'aqtaj na; i ak'al le kaya ni pub'i Jesús. 32K-on panoq nim ni u'ij; kb'ix ni Uk'ojol i nim laj Dios che. I Ajwal Dios ku'an ni Ajawinel che pacha umam mam David ujer. 33Ire lik arewi krajawin ni pkiwi i aj Israel winaq; i u'atb'al tzij lik nti uk'isik. Keje ile xub'ij i ángel che.

34I al Mariy xutz'onoj che:

—¿Wach u'ankil uri ile, yin nti achi k'ijinaq wu'? —Xcha.

35I ángel xub'ij che:

—I Lo'laj Utewal i Dios kk'un ni pawi yet; i ucho'ab' i nim laj Dios kqaj na li pawi. Rumali i ak'al chi kalaxik lik o ni re i Dios che. Lik lo'laj Uk'ojol i Dios kb'ix ni che. 36Xaq i awachalal, ati Elisabet, ya xk'aqtajik tupu rij chik. Kkib'ij i winaq chi kalan taj, xwiri waqib' ik' o chik chrij. 37Keje ile u'anom i Dios che, man i Dios is ronojel ktiki che —xcha i ángel.

38I al Mariy xub'ij:

—Lik in rajchak i Dios, lik chu'ana ni chwe pacha ub'im —xcha.

Are uri i ángel x-ek.

I al Mariy xeb'in ru' ati Elisabet

39X-on chupan jub'i', che taq i ij le, i al Mariy x-ek; xub'isoj b'i ub'e, x-e che jun tinimit chujyub' chi ukwenta i Judea. 40Are xupon chila, xok prachoch i mam Zacarías xaq xuya rutzil uwach i ati Elisabet. 41Ire, are xuta chi xtioxix rumal i al Mariy i ak'al xuyin rib' che upam, are uri xk'un i Lo'laj Utewal i Dios puwi ati Elisabet. 42Are uri, ko xch'awik xaq xub'ij che i al Mariy:

—¡I Dios, nim ni utzil chomal uya'om pawi chkiwach ni'pa ixoqib', xaq nim i utzil chomal uya'om ni puwi awak'al! 43¿In pachin taq yin man kk'un i uchuch Wajwal chinsolixik? 44Man xaqte'et are xaya rutzil inwach, i wak'al chi o che inpam lik xuyin rib' rumal i kikotemal. 45¡Lik utz awe yet man xakojo chi i Ajwal Dios ku'an na pacha ub'im chawe! —Xub'ij.

46Te'uri, xub'ij i al Mariy:

“Yin, lik ronojel ink'ux kinkoj u'ij i Ajwal.

47I wanima yin lik kkikot rumal i Dios Tol we.

48Yin nim ti in-ij, xwiri i Dios xuya i utz pinwi, tupu xa in ajke'el re ire.

Wo'or xaq lik arewi, konojel i winaq kkib'ij na chi Dios nim i utzil chomal uya'om pinwi

49Keje kkib'ij ni ike ile, man i Dios chi Ronojel Ktiki Che, u'anom nimaq taq anik chwe.

¡Lik nim u'ij ub'i!

50Ire lik arewi kril tob'al kiwach ni'pa i winaq chi kkiya u'ij;

keje u'anom ile chke i qatit qamam; xaq keje ku'an ile chke i qamuq qaxikin we kkiya u'ij.

51Ire ru' i nim laj ucho'ab' nim i u'anom;

uqajsam ki'ij ni'pa i kki'an nim che kib', man kkina ike o kinojb'al.

52Ire resam i nimaq taq ajawinelab' pa kikub'ib'al chi o u'ij;

i ni'pa i nti ki'ij, ire xuya ki'ij.

53Ni'pa i kenumik lik k'i utzil chomal xuya chke;

xwiri i b'eyomab' lik nti xuya chke.

54Xuto i tinimit Israel, chi utaqon;

i xsach ti chuk'ux chi keril ni ru' i k'axnab'al uk'ux

55Xu'an na pacha ub'im kan chke i qatit qamam,

che mam Abraham, xaq chke i umuq uxikin k-e ij saq chkij.” Xcha.

56Ire xkanaj ru' ati Elisabet kolo oxib' ik', te'uri xtzalij chi rachoch.

Ralaxik i ma Wan Ajqajsanel Ya

57I ati Elisabet, are xuriq u'ij chi xalax i rak'al, lik jun ala xalaxik. 58Ni'pa i je o chrij chwach xaq ni'pa i rachalal, xe'e chuya'ik rutzil uwach are xkita chi i Ajwal Dios lik nim i utz xu'on puk'aslemal ire 59Are xtz'aqat i wajxaqib' ij, xe'e chu'anik i circuncisión che i ak'al. Ni'pa je o chila kkaj ike kkiya pub'i ak'al a Zacarías pacha i ub'i uqajaw. 60I uchuch xub'ij:

—¡Are taj! I ub'i: A Wan —xcha.

61—¿B'uchak uri? —Xkib'ij che— mijun chke i awachalal o i ub'i keje ile —xecha.

62Te'uri ike xkitz'onoj che uqajaw ru' ki'ab' wach ub'i kraj kuya che. 63Are uri i uqajaw xutz'onoj ch'aqap tz'alam chke, te'uri xutz'ib'aj “A Wan”. Lik konojel xkib'isoj wach i kilom. 64Are uri i mam Zacarías juntir xel chik uch'awb'al; xujeq lapanik xaq xujeq ukojik u'ij i Dios. 65Ni'pa i je o chrij chwach lik xkib'isoj. Xel utzijol chwi taq jyub' re i Judea: I winaq is xkilapo wach i x-anik. 66Ni'pa i winaq chi xetaw ile, xe'ok chi ch'ob'onik xaq xkitz'onoj chkiwach: “¿Wach nawi upatan i ak'al le?” —Xecha. Xkib'ij ile man xkilo chi lik i ucho'ab' i Dios lik o ru'.

Ub'ix i mam Zacarías

67I mam Zacarías, chi uqajaw i ak'al, lik o i Lo'laj Utewal i Dios puwi, rumali xujeq ub'ixkil i tziji:

68¡Lik chqab'ij u'ij i Ajwal Dios, chi Dios ke aj Israel;

ire xojoluto ni yoj, chi oj uwinaq ire; utojom i qelsaxik chisaq!

69Man utaqom li jun Tol qe chi nim ucho'ab';

ire le, umuq uxikin kan i mam David chi lik rajchak i Dios ujer.

70Keje ile ub'im kan ujer, chi lik ku'an na;

kumal i je lo'laj profeta:

71Ire kojuto ni chkiwach i je ajch'oj chqij,

xaq chkiwach ni'pa i tzel kojkilo.

72Keje ile ub'im kan chke i qatit qamam ujer chi lik o ni rutzil uk'ux chke.

Xaq lik ksach ti chuk'ux i lo'laj utrat chi u'anom.

73I trat le i Dios xu'an ru' i qamam,

mam Abraham

chi kuya ni chqe:

74Xub'ij chi kojresaj pki'ab' i je ajch'oj chqij,

man utz kqaxij ti qib'

chu'anik qapatan che ire;

75rajwaxik chi lik oj ch'am, xaq lik oj utz chwach Ire, ronojel i ij re i qak'aslemal.

76Xaq yet, ral wak'al,

kb'ix ni profeta re i Nim laj Dios,

keje ile kkib'ij ni chawe, man katnab'ej nu b'i chwach i Ajwal,

re ke'ayijb'a pan ub'e.

77Man keje ile kaya ni retamaxik che utinimit

chi kkuytaj ni kimak, xaq lik o ni

kik'aslemal chi nti uk'isik.

78Man i qa-Dios k'ax kojuna'o lik kril tob'al qawach; rumali,

kutaq na li jun aj chikaj; i uk'unik pacha k-on i saq re usaqirb'al.

79Ire kuk'am na li saq chke

i je o pa tz'intz'ik equm;

kuk'am li saq chke i kkixij kib' che i kamik, xaq kojuk'am b'i ipa o wi i b'e re i utz laj olem.

80I ak'al lik ktijin uk'iyik xaq ktijin uk'iyik ukub'ib'al uk'ux che i Dios; x-e jeqel che i jyub' tz'inilik. Chila xk'iji wi k'a xuriq ni ij re uk'utik rib' chke i aj Israel winaq.

Currently Selected:

Lucas 1: ACHICUB

Highlight

Copy