Juan 19

1Are uri ma Pilato xutaq uya'ik ulo'xik i Jesús. 2I achiyab', chi je yij che i ch'oj, xkiyijb'a jun koron re k'ix, xkikoj che ujolom i Jesús xaq xkikoj jun u'u' naj raqan akoj. 3Te'uri xetejeb' pan ru' xaq xe'ok chuyo'yaxik u'ij; xkib'ij che:

—¡Chk'asi ni i Ajawinel ke aj Judío!

Xaq lik kkich'ay che upalaj.

4I ma Pilato xel chal julaj chik, xub'ij chke i winaq:

—Chiwila pe', kwesaj na li achi chiwach man kiwilb'ej re chi yin lik nti umak xinriqo.

5Are uri xel li Jesús chkiwach i winaq, kojtal li koron re k'ix che ujolom xaq kojtal li u'u' chrij chi akoj i naj raqan. I ma Pilato xub'ij chke:

—¡B'ay, riy i achi ri!

6I kaj-atzil i rajpatan i Dios xaq i ajchajinelab' re i rachoch i Dios are xkil uwach i Jesús, xesik'in chub'ixkil:

—¡Chatz'awa chwach i krus! ¡Chatz'awa chwach i krus! —Xecha.

I ma Pilato xub'ij chke:

—Chik'ama b'i ri yix; chiripa xaq chitz'awa chwach i krus, man yin nti jun umak kinriqo —keje ile xub'ij ma Pilato chke.

7I aj Judío xkib'ij che:

—Yoj o jun qa'atb'al tzij, chrij pacha kub'ij i qa'atb'al tzij le, ire kkamsax na man ku'an taq che rib' chi Uk'ojol i Dios.

8I ma Pilato are xuta ile, lik mas xuxij rib' che. 9Xok chub'i julaj chik pa nim laj ja ipa ku'at wi tzij, xutz'onoj che i Jesús.

—¿Ipa katpe wi yet? Xwiri i Jesús lik xula' ti uwach che. 10Rumali ma Pilato xub'ij chik che:

—¿Xatab'a kala' ti uwach chwe? ¿Aweta'am ti b'ari chi o pin-ab' kintaq aripik xaq atz'awik chwach i krus, i xaq o pin-ab' we katwo'taj b'ik? —Xcha.

11Are uri i Jesús xula' uwach che:

—Nti neri pa'ab' wach kawaj ka'an chwe mati uya'om li i Dios chawe. I jun chi xinjachaw pa'ab', ire le lik mas nim ni umak chawach yet.

12Are uri i ma Pilato xujeq utzukuxik wach taq ro'taxik b'i i Jesús ku'ano. Xwiri aj Judío, xesik'in chub'ixkil:

—¡We kawo'taj b'i achi le, at ajch'oj uri chrij i ma César#19.12 I tzij César ri b'iyaj taj, iri are ub'i upatan chi lik mas nim u'ij, chila kki'at wi tzij aj Roma.! ¡Man pachin jun ku'an taq ajawinel che rib', lik ajch'oj uri chrij ma César! —Xecha.

13I ma Pilato are xuta ile xresaj li Jesús are uri ire xkub'i puwi jun kub'ib'al re i atol tzij. I k'ijib'al ipa xkub'i wi le Gabata kkib'ij che pkich'ab'al aj Hebreo, chi ke'eloq “k'ijib'al chi tusum ab'aj che”. 14I ij le are jun ij chuxe'el i nima'ij Pascua, xaq kolo tik'il ij. Are uri ma Pilato xub'ij chke aj Judío:

—¡Riy iwajawineli! 15Are uri i winaq xesik'in chub'ixkil:

—¡Chtz'awoq xaq chrip ni chwach i krus! ¡Chtz'awoq xaq chrip ni chwach i krus! —Xecha.

I ma Pilato xub'ij chke:

—¿Xatab'a kinrip iwajawinel xaq kintz'aw chwach i krus?

Are uri i aj-atzil chke i rajpatan i Dios xkila' uwach che:

—¡Yoj nti chik jun qajawinel, xwi i ma César chi aj Roma! —Xecha.

16Are uri i ma Pilato xujach b'i Jesús pki'ab' ike man kkiripo xaq kkitz'aw chwach i krus. Keje uri ile ike xkik'am b'i i Jesús.

Uripik xaq utz'awik i Jesús chwach i krus

17Are uri Jesús xel b'ik i rok'am b'i ukrus xol uteleb', x-e che jun k'ijib'al chi “K'ijib'al re ub'aqil ujolom kamnaq” ub'i; pkich'ab'al aj Hebreo ke'eloq “Gólgota”. 18Chila uri xkirip wi xaq xtz'aw wi i Jesús chwach i krus. Xaq junam ku' keb' achiyab', jujun pa taq utzal. 19Are uri ma Pilato xutaq utz'ib'axik jub'an tzib' puwi ukrus i Jesús; chi keje iri kub'ij: “Jesús aj Nazaret, Ajawinel ke aj Judío”. 20Lik je k'i aj Judío xkajlaj uwach i tz'ib' le, man i k'ijib'al ipa xkirip wi xaq xtz'aw wi i Jesús chwach i krus naqaj o wi che i tinimit Jerusalén. I tzij chi tz'ib'talik, tz'ib'am pkich'ab'al aj Hebreo, pkich'ab'al aj Grecia xaq pkich'ab'al aj Latín. 21Rumali i kaj-atzil i rajpatan i Dios xkib'ij che ma Pilato are xutz'ib'aj ile:

—Matz'ib'aj: Ajawinel ke aj Judío, are keje iri chatz'ib'aj: —Ire xub'ij: Yin in Ajawinel ke aj Judío —Xecha.

22Xwiri ma Pilato xub'ij chke:

—I tzij chi xintz'ib'aj, lik xintz'ib'aj, kinyoj ti chik —xcha.

23Chrijil chik uripik xaq utz'awik i Jesús chwach i krus, i achiyab' chi je yij che i ch'oj, xkik'am u'u' i Jesús are uri xki'an kajib' tant che, i xkijach b'i chkiwach. Xwiri o jun u'u' naj raqan xaq nti t'is che, 24are uri i achiyab' chi je yij che i ch'oj le xkib'ij chkiwach:

—Mqaraqch'ij, utz we kqasakij chqawach, man keje ile k-iltajik pachin chqe kk'amaw b'ik —xecha. Keje uri ile chi x-antaj na pacha i tz'ib'tal kan chupam uwuj i Dios chi keje iri kub'ij: —Xkijach in-u' chkiwach xaq xki'an sakinik chrij in-u' chi naj raqan. Lik keje xki'an achiyab' ile chi je yij che i ch'oj.

25Chunaqaj i krus je o jub'an ixoqib', chkixol ixoqib' le, o uchuch i Jesús xaq i ucha' uchuch, xaq ati Mariy, chi rixoqil ma Cleofas, xaq ati Mariy Magdalena. 26I Jesús are xril uchuch, xaq i utijoxel chi o putzal uchuch chi lik k'ax kuna'o, are uri xub'ij che uchuch:

—Ixoq, cha'ana che ire le lik pacha awak'al yet.

27Xaq xub'ij che utijoxel:

—Cha'ana che ire le lik pacha achuch.

Are uri lik che i ij le i tijoxel xuk'am b'i uchuch i Jesús chi rachoch ire.

Ukamik i Jesús

28Are x-antaj ronojel ile i Jesús reta'am chi ronojel lik utzinnaq chik, xaq k-antaj na pacha i tz'ib'tal chupam uwuj i Dios, i xub'ij:

—Kink'atik.

29Chila o wi jun xar nojnaq che i uwa'al uva muqb'am chi lik ch'am. Are uri xkimu jun esponja chupam, te'uri xkiya tzam che' i xkiya an puchi'. 30I Jesús xutz'ub' b'i i uwa'al uva muqb'am chi lik ch'am; te'uri xub'ij:

—X-antaj ronojel ni'pa o te chinqul u'anik.

Are uri xulukb'a ujolom, i xel uk'ux.

Jun achi chi yij che i ch'oj xujil b'i uche' ch'ich' utzam puk'alk'ax i Jesús

31I ij chi xrip wi xaq xtz'aw wi i Jesús chwach i krus chuxe'el i ij sábado, rumali i aj Judío kkaj taj chi kkanaj kan i ch'akulaj chila chwach i krus. Xaq i ij sábado le are i ij re i nima'ij Pascua, i nima'ij le lik o u'ij. Rumali k'iyal mul xkitz'onoj utzil che ma Pilato chi kutaq upatz'ik kaqan i je riptalik chi xaq je tz'awom chwach i krus, man keje ile su' keqajsax li chwach i krus. 32Are uri i achiyab', chi je yij che i ch'oj, xe'e chupatz'ixik kaqan i keb' chi je tz'awom chwach i krus ru' i Jesús, nab'e xkipatz' raqan i jun te'uri xaq keje ile xki'an chik che i jun. 33Xwiri are xeupon ru' i Jesús, xkilo chi kamnaq chik, rumali xkipatz' ti ub'aqil i raqan ire.

34Xwiri jun chke achiyab', chi je yij che i ch'oj, xujil b'i uch'ich' puk'alk'ax i Jesús. Are uri juntir xel kik' xaq i ya che. 35I jun chi xlapaw iri, xulapo man lik xrilo xaq lik saq laj tzij i kub'ij. Ire reta'am chi lik kub'ij i saq laj tzij man keje ile yix lik kikoj na. 36Xuk'ulmaj ronojel ni'pa ile man keje ile k-antaj na chrij pacha tz'ib'tal chupam uwuj i Dios, chi keje iri kub'ij: “Lik mijun ub'aqil kpatz' ni che” 37Xaq tz'ib'tal chupam uwuj i Dios: “Kkil ni uwach i jun chi xjil b'i ch'ich' puk'alk'ax.”

Umuqik i Jesús

38Chrijil chik ronojel ile, i ma José, chi aj Arimatea, xutz'onoj utzil chomal che ma Pilato chi kya' b'i uch'akul i Jesús che, man kuk'am b'ik. I ma José le are jun chi terejnaq chrij i uk'utunik i Jesús, xwiri ani'al man kuxij rib' chke aj Judío. Are uri ma Pilato xuya che, rumali ma José xuk'am b'i uch'akul i Jesús. 39Xaq xupon ma Nicodemo, chi xupon juyak che i lapanik ru' i Jesús cha'ab'; ire le xuto i ma José. I ma Nicodemo le rok'am b'i wajxaqib' almul kunb'al chi lik muy, chi are mirra xaq i áloe. 40Are uri ma José junam ru' ma Nicodemo xkik'am b'i uch'akul i Jesús, are uri xkikoj k'i i kunb'al muy chrij xaq xkipasij chupam jun sawan, pacha kki'an aj Judío che kikamnaq are kkimuqu. 41Che i k'ijib'al le ipa xkirip wi xaq xtz'aw wi i Jesús chwach i krus, o jun chom laj k'ijib'al re tikonb'al. Chupam i tikonb'al le o jun muqb'al kamnaq k'ak', chi mijun kamnaq yatal chupam. 42Chila xkimuq wi uch'akul i Jesús, man xa naqaj o wi xaq ya knaqajab' i ij sábado ke aj Judío.

Currently Selected:

Juan 19: ACHICUB

Highlight

Copy