Popular Bible Verses from Juan 19

Share

I Jesús xutz'ub' b'i i uwa'al uva muqb'am chi lik ch'am; te'uri xub'ij: —X-antaj ronojel ni'pa o te chinqul u'anik. Are uri xulukb'a ujolom, i xel uk'ux.

Are x-antaj ronojel ile i Jesús reta'am chi ronojel lik utzinnaq chik, xaq k-antaj na pacha i tz'ib'tal chupam uwuj i Dios, i xub'ij: —Kink'atik.

I Jesús are xril uchuch, xaq i utijoxel chi o putzal uchuch chi lik k'ax kuna'o, are uri xub'ij che uchuch: —Ixoq, cha'ana che ire le lik pacha awak'al yet. Xaq xub'ij che utijoxel: —Cha'ana che ire le lik pacha achuch. Are uri lik che i ij le i tijoxel xuk'am b'i uchuch i Jesús chi rachoch ire.

Xwiri are xeupon ru' i Jesús, xkilo chi kamnaq chik, rumali xkipatz' ti ub'aqil i raqan ire. Xwiri jun chke achiyab', chi je yij che i ch'oj, xujil b'i uch'ich' puk'alk'ax i Jesús. Are uri juntir xel kik' xaq i ya che.

Xuk'ulmaj ronojel ni'pa ile man keje ile k-antaj na chrij pacha tz'ib'tal chupam uwuj i Dios, chi keje iri kub'ij: “Lik mijun ub'aqil kpatz' ni che” Xaq tz'ib'tal chupam uwuj i Dios: “Kkil ni uwach i jun chi xjil b'i ch'ich' puk'alk'ax.”

Are uri Jesús xel b'ik i rok'am b'i ukrus xol uteleb', x-e che jun k'ijib'al chi “K'ijib'al re ub'aqil ujolom kamnaq” ub'i; pkich'ab'al aj Hebreo ke'eloq “Gólgota”.

I achiyab', chi je yij che i ch'oj, xkiyijb'a jun koron re k'ix, xkikoj che ujolom i Jesús xaq xkikoj jun u'u' naj raqan akoj.