G%E9nesis 39

A José xaq i rixoqil i ma Potifar

1Are xk'am b'i a José pa Egipto kumal i aj Ismael, ike le xkik'ayij che jun achi chi o upatan chrij ma faraón, i achi le ma Potifar ub'i, kaj-atzil i chajal. 2Xwiri i Ajwal o ru' a José, rumali ni'pa i ku'ano lik utz kel ru' are o chila chi rachoch i rajaw chi aj Egipto. 3I ma Potifar xunab'ej chi Ajwal o ru' a José, man ronojel ni'pa i ku'ano, i Ajwal ku'an che chi kel utz ru'. 4Rumali ma Potifar le xukub'a uk'ux che a José, rumali xuya pa aj-atzil puwi ronojel ni'pa o prachoch xaq ronojel ni'pa i o ru'. 5Xuk'ulmaj are xya' kan a José le pa aj-atzil rumal ma Potifar puwi ronojel ub'itaq re chi o prachoch xaq ronojel ni'pa o pa taq es. Are uri i Ajwal xuya utzil chomal puwi ronojel ni'pa taq ile, i utzil chomal re i Ajwal xaq lik xqaj puwi ronojel ni'pa ub'itaq re ma Potifar. 6Rumali ma Potifar le lik nti kub'isoj che ub'itaq re man ronojel xuya pu'ab' a José, ire lik ij ij xwi kb'ison che uwa'im.

I a José le lik chom laj ala xaq lik b'irir uch'akul.

7X-on panoq i rixoqil ma Potifar chi rajaw uchak lik qus xril a José, rumali xel uchi' che, xub'ij:

—Kwaj yin kamin awib' wu' —xcha.

8Xwiri a José lik xraj ti utayik che, rumali xub'ij che:

—Chata pe', i wajaw is uya'om kan chinqul ronojel ni'pa ub'itaq re, rumali ire lik kul uk'ux chwe —xcha. 9Che i ja ri lik nti jun chik nim u'ij chinwach yin; i wajaw is uya'om chwe ronojel, xwiri uya'om ti chwe we kinmin taq wib' awu', man yet lik at rixoqil i wajaw le ¿Wach usuk' uri ile chi kin-an taq jun utz taj che i wajaw xaq kinmakun taqi chwach i Dios? —Xcha a José.

10Tupu ixoq le lik ij ij k-on pen che a José, xwiri ire le lik xuya ti uwach che chi kumin rib' ru' xaq lik xraj ti rachnimaxik xaipa x-e wi. 11Xuriq jun ij chi konojel ajchakib' chi kechakun chila ru' ja, je nti tan pa ja are xok b'i a José chu'anik uchak chi o chuqul. 12Are uri i rixoqil ma Potifar le xuchap che u'u' a José, xub'ij che:

—Chamina awib' wu' —xcha.

Xwiri a José pa'anem x-anmajik, lik xkanaj kan u'u' pu'ab' ixoq le. 13I ixoq le are xrilo chi xkanaj kan u'u' a José pu'ab', rumal pa'anem x-anmajik, 14xeusik' la ajchakib' chi kechakun chila ru' ja, xub'ij chke:

—Chiwila pe', i achi aj Hebreo chi xukoj li wachijil pqachoch xa xoluqajsaj qa'ij, xok li wu' pa ja lik xraj xumin rib' wu', xwiri yin ko xinsik'inik. 15Are xuta chi lik ko xinsik'inik, pa'anem xel b'i chisaq xuk'am ti chub'i u'u', xuya kan pintzal —xcha.

16I ixoq le xuk'ol u'u' a José ru' k'a xupon ni rachijil ru' ja. 17Are xupon i rachijil ru' ja xaq keje ub'ixkil xub'ij che pacha xub'ij chke ajchakib':

—I mokom aj Hebreo chi xakoj li waral ru' ja lik xok wu' pa ja, lik xraj xumin rib' wu'. 18Xwiri are ko xinsik'inik, pa'anem x-anmajik, xuk'am ti chub'i u'u', xuya kan chi —xcha.

19I ma Potifar are xuta wach xu'an a José, chi xb'ix che rumal i rixoqil, are uri lik xpe roywal. 20Rumali xuchap a José, xutaq uminik prexil chila ipa je utz'apim wi jujun ajprex re i ajawinel, keje u'enam a José ile prexil. 21Tupu xmin b'i a José prexil xwiri i Ajwal xro'taj taj xaq xumayij ti uk'utik i k'axnab'al uk'ux che, man xu'an che chi utz x-il rumal i chajal ke ajprexil. 22Rumali xuya kan a José pa aj-atzil pkiwi i je tz'apil chila prexil, xaq puwi ronojel i taqanik, xaq jalajuj taq k-an chila. 23I Ajwal o ru' a José, rumali lik utz kel ronojel ni'pa i ku'ano, i atz laj chajal ke i ajprexil lik nti kuch'ob' chkisolixik ajprex man lik kul uk'ux che a José.

Currently Selected:

G%E9nesis 39: ACHICUB

Highlight

Copy