Popular Bible Verses from G%E9nesis 39

Share

Xwiri i Ajwal o ru' a José, rumali ni'pa i ku'ano lik utz kel ru' are o chila chi rachoch i rajaw chi aj Egipto.

Rumali ma Potifar le lik nti kub'isoj che ub'itaq re man ronojel xuya pu'ab' a José, ire lik ij ij xwi kb'ison che uwa'im. I a José le lik chom laj ala xaq lik b'irir uch'akul.

Rumali xuya kan a José pa aj-atzil pkiwi i je tz'apil chila prexil, xaq puwi ronojel i taqanik, xaq jalajuj taq k-an chila.

Rumali xuchap a José, xutaq uminik prexil chila ipa je utz'apim wi jujun ajprex re i ajawinel, keje u'enam a José ile prexil. Tupu xmin b'i a José prexil xwiri i Ajwal xro'taj taj xaq xumayij ti uk'utik i k'axnab'al uk'ux che, man xu'an che chi utz x-il rumal i chajal ke ajprexil.

X-on panoq i rixoqil ma Potifar chi rajaw uchak lik qus xril a José, rumali xel uchi' che, xub'ij: —Kwaj yin kamin awib' wu' —xcha. Xwiri a José lik xraj ti utayik che, rumali xub'ij che: —Chata pe', i wajaw is uya'om kan chinqul ronojel ni'pa ub'itaq re, rumali ire lik kul uk'ux chwe —xcha. Che i ja ri lik nti jun chik nim u'ij chinwach yin; i wajaw is uya'om chwe ronojel, xwiri uya'om ti chwe we kinmin taq wib' awu', man yet lik at rixoqil i wajaw le ¿Wach usuk' uri ile chi kin-an taq jun utz taj che i wajaw xaq kinmakun taqi chwach i Dios? —Xcha a José.

Xuriq jun ij chi konojel ajchakib' chi kechakun chila ru' ja, je nti tan pa ja are xok b'i a José chu'anik uchak chi o chuqul. Are uri i rixoqil ma Potifar le xuchap che u'u' a José, xub'ij che: —Chamina awib' wu' —xcha. Xwiri a José pa'anem x-anmajik, lik xkanaj kan u'u' pu'ab' ixoq le.