G%E9nesis 40

A José kusaqij wach usuk' i keb' achik'

1X-on panoq i ajya'ol uwa'al uva muqb'am, xaq i ajya'ol ukaxlanwa i ajawinel re i tinimit Egipto, xki'an kimak chwach i ajawinel le. 2Rumali i ma faraón chi ajawinel re i tinimit Egipto xpe roywal chke i keb' rajchak le, chi are aj-atzil ke ajya'ol uwa'al uva muqb'am xaq i aj-atzil ke ajya'ol kaxlanwa; 3rumali xeumin prexil chi rachoch i aj-atzil ke i chajal, chila ipa tz'apil wi a José. 4I aj-atzil ke i chajal xeuya i keb' achiyab' le pu'ab' a José, man kuya chke wach i rajwaxik. Are k'iyal chik ij ki'olem i keb' achiyab' le prexil.

5O jun a'ab' i keb' ajprex le, jun are ajya'ol uwa'al uva muqb'am xaq jun chik are ajya'ol wa re ma faraón xki'an jun achik' chkijujunal, xwiri i kachik' le is junwi ke'eloq. 6Are xupon a José chkilik xsaqirik, are uri xrilo chi lik keb'isonik. 7Rumali xutz'onoj chke:

—¿B'uchak chi lik kb'ison ipalaj? —Xcha.

8Ike xkib'ij che:

—Chojkeb' xqa'an jun achik', xwiri nti jun kusaqij chqe wach usuk' ke'eloq —xecha.

Are uri a José xub'ij chke:

—¿Xatab'a are ti Dios ksaqiwik wach usuk' ke'eloq? ¿B'uchak kib'ij ti chwe wach xiwachik'aj? —Xcha.

9Are uri i aj-atzil ke ajya'ol uwa'al uva muqb'am xulap rachik' che a José, xub'ij:

—Yin xwachik'aj chi o jun tikb'al uva o pan chinwach, 10i tikon le o oxib' u'ab' chi keje iri xwil che, nab'e xpe utux, te'uri xpe usij xaq juntir xu'on an uwach chwi raqan, i uwach le uva. 11Yin wok'am i tu'b'al uya' ma faraón pin-ab', xinyitz' i uva chupam i tu'b'al uya' le te'uri xinya che; keje ile xwachik'aj —xcha.

12Are uri a José xub'ij che:

—I awachik' le keje usuk' iri ke'eloq: I oxib' u'ab' i tikon le ke'eloq oxib' ij. 13Pa oxib' ij panoq i ma faraón k-on ni atb'al tzij chawe are uri kuya chik achak, xaq yet kaya chik uya' pu'ab' pacha ax ka'an wi te'eq are at ajya'ol uya'. 14Xwiri, kintz'onoj jun utzil chawe minsach chak'ux are katel utz ru' achak le; chinalapa che ma faraón man keje ile kinresaj b'i prexil, chawila tob'al inwach 15yin xa in el-am li pkulew aj Hebreo xaq nti jun inmak in-anom waral, rumali kmajaw ti chwe chi intz'apil taq prexil —xcha.

16I aj-atzil ke ajya'ol kaxlanwa, are xrilo chi utz usaqixik i rachik' i ajya'ol uwa'al uva x-anik, are uri ire xub'ij che a José:

—Xaq yin xin-an jun achik', xwachik'aj chi wikram oxib' chikach lejom wa re trigo. 17I urox chikach chi o li puwi i rachi'il, o jalajuj taq kaxlanwa chupam re ma faraón, xwiri i tz'ikin keqaj li chutijawik i jalajuj taq kaxlanwa le —xcha.

18Are uri a José xub'ij che:

—I awachik' le keje usuk' iri ke'eloq: I oxib' chikach le ke'eloq oxib' ij. 19Pa oxib' ij panoq i ma faraón k-on ni atb'al tzij chawe are uri kutaq ni atzayb'axik che jun che', te'uri i tz'ikin kkitij nu b'i ati'lal —xcha.

20Are xuriqa urox ij, i ma faraón le, xu'an jun nima'ij re ralaxik ire xaq xeusik'ij konojel i rajchakib' che i nima'ij le; chkiwach konojel i ajchakib' le xutaq b'i kelsaxik prexil i aj-atzil ke i ajya'ol uwa'al uva muqb'am xaq i aj-atzil ke i ajya'ol kaxlanwa. 21I ajya'ol uwa'al uva muqb'am xya' chik uchak xaq ire xujeq chik uya'ik uya' ma faraón pacha ax ku'an wi. 22Xwiri i ajya'ol kaxlanwa xtaq ujitz'axik pacha xsaqix che rumal a José. 23Xwiri i ajya'ol uwa'al uva muqb'am lik xk'un ti chik a José chuk'ux.

Currently Selected:

G%E9nesis 40: ACHICUB

Highlight

Copy