G%E9nesis 16
16
Ati Agar xaq i rak'al a Ismael
1I tit Sarai, chi rixoqil mam Abram, kalan taj rumali alaxnaq ti rak'al mam Abram ru'; xwiri o jun rajke'el aj Egipto, chi ati Agar ub'i. 2Rumali tit Sarai le xub'ij che rachijil chi mam Abram:
—I Ajwal u'anom chwe chi kinalan taj; rumali chamina awib' ru' wajke'el, moqxa kealax wak'al ru' ire.
I mam Abram le utz xuta wach xb'ix che rumal tit Sarai. 3Rumali i tit Sarai xujach rajke'el chi ati Agar aj Egipto, pu'ab' mam Abram re rixoqil. Ile xuk'ulmaj are o chik lajuj junab' ujeqelem mam Abram chila Canaán. 4I mam Abram, xumin rib' ru' ati Agar, are uri ati Agar le xk'aqtajik; are xunab'ej ati Agar chi raxwinaq chik xujeq uyo'yaxik tit Sarai chi rajaw uchak. 5Are uri i tit Sarai le xub'ij che mam Abram:
—Amak yet chi ati Agar ktijin chinyo'yaxik, yin neri xinjachaw i wajke'el le pa'ab', xwiri wo'or chi xunab'ej raxwinaq chik, xujeq inyo'yaxik. ¡Chu'ata ni tzij uri i Ajwal pqawi awu', we yin in ajmak o we yet!
6I mam Abram xub'ij che tit Sarai:
—I awajke'el le pa'ab' o wi, cha'ana che pacha kumaj awach yet.
Are uri tit Sarai le xujeqo chi to' tzel chik kril ati Agar; rumali ati Agar le xb'a'krij b'i uk'ux, x-anmaj b'ik. 7Xwiri i ángel xuriq ati Agar chuchi' jun ralaxb'al ya chila pa tz'inilik jyub' chaqij, che i b'e chi k-e pa Shur. 8Are uri i ángel le xutz'onoj che:
—Ati Agar, chi at rajke'el tit Sarai, ¿Wach taq ka'an chi, xaq ipa kat-e wi?
I ati Agar xub'ij:
—Kin-anmaj chwach tit Sarai, chi rajaw inchak —xcha.
9I ángel xub'ij che:
—Chattzalij chub'i ru' rajaw achak xaq chaya awib' pu'ab'.
10Man lik saq laj tzij iri:
Chi keink'iyarsaj ni amuq axikin,
chi mijun ktiki chkajlaxik rumal kik'iyal.
11Man yet at raxwinaq chik, kalax ni jun awak'al
xaq kaya ni pub'i a Ismael
man i Ajwal rilom chi lik at o pa k'ax.
12Xaq i awak'al le ke'eloq pacha jun axna chi mijun ktiki chupek'ik,
lik ajch'oj na chkij konojel i winaq, xaq konojel i winaq je ajch'oj na chrij ire;
lik ajch'oj na ku' ratz ucha';
xwiri o ni uk'ijib'al chkixol.
Keje ile xub'ij i ángel che ati Agar. 13I ati Agar le are xuta chi Ajwal xch'aw ru', xuya pub'i i Ajwal le: “Dios chi Kinrilo”, man xub'ij puk'ux: “Wilom uwach i jun chi arewi kinrilo”. 14Rumali i k'otom chi o chuxol i tinimit Cades xaq i Bered xkanaj pub'i “K'otom re i K'aslik Dios chi Kinrilo.”
15I mam Abram xuk'uwalij jun rak'al ru' ati Agar, i ak'al le xkiya pub'i a Ismael. 16I mam Abram le o chik waqib' kajwinaq (86) junab' che, are xuk'uwalij a Ismael.
Currently Selected:
G%E9nesis 16: ACHICUB
Highlight
Share
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
