G%E9nesis 17
17
I circuncisión are k'utb'al re i trat
1I mam Abram are o chik b'elejlajuj kajwinaq (99) junab' che, xuk'ut rib' i Ajwal che, xaq xub'ij che:
—Yin in Dios chi Ronojel Kintiki Che, cha'ana i utz xaq ch'am che ak'aslemal chinwach. 2Man keje ile Yin kin-an ni intrat awu', kin-an na chi lik kek'iyar ni amuq axikin.
3I mam Abram are xuta chi k-ijlax rumal i Dios, xxuki'ik, xuqajsaj upalaj k'a chwach ulew, tz'aqat i Dios ktijin che i lapanik ru':
4—Are intrat iri chi kin-an awu': Yet at kiqajaw ni k'iyal nimaq taq tinimit. 5Kb'ix ti chik ma Abram chawe, wo'or lik mam Abraham kb'ix ni chawe, man kin-an chawe chi at kiqajaw ni uk'iyal nimaq taq tinimit. 6Kin-an ni chawe chi lik katk'uwalinik, lik je k'i ni amuq axikin, xaq lik ke'on ni k'iyal taq tinimit, chkixol ike le kewinaqir ni k'iyal taq ajawinelab'. 7Intrat chi kin-an ni awu' yet xaq ku' amuq axikin pa taq kilemajil, i trat le chi nti uk'isik are iri: Lik arewi Yin na in a-Dios yet, xaq in ki-Dios ni amuq axikin. 8Chawe yet xaq chke amuq axikin kinya wi ronojel ulew Canaán, are ulew ipa at jeqel wi wo'or, ile lik awe yet ronojel ij saq, xaq Yin na ki-Dios amuq axikin. —Keje ile xub'ij i Dios che mam Abraham.
9I Dios xub'ij chik che mam Abraham:
—Yet, xaq konojel amuq axikin lik chi'ana pacha kub'ij intrat. 10Are trat iri chi kin-an awu' yet xaq ku' amuq axikin, lik rajwaxik kixkojon ni che: Ile are u'anik i circuncisión chke achiyab' chi je o chixol. 11I circuncisión le chi k-an che ich'akul, are k'utb'al re intrat chi xin-an iwu'. 12Rumali konojel i ral taq alab'om pa taq kilemajil chi je o chixol, are o chik wajxaqib' ij che kalaxik, rajwaxik uri k-an i circuncisión chke, xaq keje k-ani chke i alab'om chi je alaxel taj ru' ja, chi xa je lo'talik, lik keje ile k-an ni chke i je aj naj chi je o chixol, chi je amuq axikin taj. 13Rajwaxik chi konojel koksax ni circuncisión le che kich'akul: Alaxel pa wachoch, xaq i je alo'om ru' amer, man keje ile i intrat le kkanaj ni che ich'akul ronojel ij saq. 14Xwiri jun achi we antal ti circuncisión che uch'akul, kelsax b'i uri chixol yix man lik uqelom intrat.
15Xaq xub'ij chik i Dios che mam Abraham:
—I tit Sarai, chi awixoqil, kb'ix ti chik tit Sarai che, wo'or tit Sara kb'ix ni che 16Yin, lik kinya ni utzil chomal puwi, xaq kin-an na chi kalax jun ak'ojol ru', xaq lik kin-an ni che chi kichuch i k'iyal nimaq taq tinimit, i umuq uxikin je ajawinel na ke i nimaq taq tinimit le.
17Are uri mam Abraham xxuki'ik, xulukb'a upalaj k'a chwach ulew, xaq xutze'ej puk'ux are ktijin chuch'ob'ik i tziji: “¿Xatab'a k'a kalax taq rak'al jun mam chi o chik jo'winaq (100) junab' che? Xaq ¿Xatab'a k'a kk'iji taq rak'al tit Sara chi o chik lajuj kajwinaq (90) junab' che?” 18Rumali mam Abraham xub'ij che i Dios:
—Lik utz teri wetene kawil tob'al uwach a Ismael.
19Xwiri i Dios xula' uwach che:
—Yin xinb'ij chi tit Sara, chi awixoqil, kralaj ni jun ak'ojol chi kaya ni pub'i a Isaac. Yin kin-an ni intrat ru' ire le xaq ku' umuq uxikin, lik are jun trat chi nti uk'isik. 20Xaq kinya ni utzil chomal puwi a Ismael pacha xatz'onoj chwe. Kin-an ni che chi kk'uwalinik, xaq lik keink'iyarsaj ni umuq uxikin, xaq are ni ire kiqajaw i kab'lajuj raqan u'ab' i ajawinel, xaq lik kin-an ni jun nim laj tinimit chke umuq uxikin. 21Xwiri intrat lik ru' a Isaac kin-an wi chi kalax ni ru' awixoqil tit Sara che i junab' jun che taq i ij pacha i ij chi oj o wi wo'or.
22I Dios are xuk'is lapanik ru' mam Abraham xel chila. 23Lik che i ij le mam Abraham xu'an i circuncisión che uk'ojol, xaq chke umokom chi je alaxel chi rachoch, xaq chke konojel i je ulo'om ru' umer xaq chke konojel i achiyab' chi je o chi rachoch, pacha ub'im i Dios che. 24I mam Abraham o chik b'elejlajuj kajwinaq (99) junab' che are x-an circuncisión che uch'akul. 25I a Ismael chi uk'ojol, oxlajuj junab' o chik che are x-an circuncisión che uch'akul. 26I mam Abraham xaq i uk'ojol chi a Ismael lik xaqjun chi ij x-an i circuncisión che kich'akul, 27junam ku' konojel achiyab' chi je o chi rachoch, umokom chi je alaxel ru' ja, xaq i je aj naj chi je lo'tal ru' mer, x-an circuncisión chke.
Currently Selected:
G%E9nesis 17: ACHICUB
Highlight
Share
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
