G%E9nesis 15

I Dios xu'an jun trat ru' ma Abram

1X-on panoq i Ajwal xuk'ut rib' che ma Abram puwach xub'ij che:

—Maxij awib', ma Abram, man Yin in tob'al awib', xaq i sipon chi kach'ak na lik nim.

2I ma Abram xub'ij:

—Wajwal Dios, ¿Wach uchak i sipon le chwe yin, man nti ne wak'al, xa are i kaj-atzil inmokom chi ma Eliezer aj Damasco kkanaj kan ub'itaq we pu'ab'? 3Man lik nti jun wak'al aya'om, rumali ub'itaq we kkanaj kan pu'ab' jun chke inmokom —xcha ma Abram.

4Are uri i Ajwal xub'ij che:

—Are ti achi ile kkanaj kan ub'itaq awe pu'ab', lik are ni jun ak'ojol rajaw ronojel.

5Are uri i Ajwal xuk'am b'i ma Abram chisaq, xub'ij che:

—Chattaqen chwa kaj, chawajlaj pe i ch'umil we kattiki chrajlaxik. Lik keje ni kik'iyal amuq axikin ile.

6I ma Abram lik xukoj i Ajwal, rumali i Ajwal xukoj pajil chi lik suk'ul laj winaq. 7Xaq xub'ij chik che:

—Yin in Awajwal, chi xatwesaj li pa Ur ke aj Caldea, kinsipaj i ulewi chawe re katk'iji ni chwach.

8I ma Abram xutz'onoj che:

—Wajwal Dios, ¿Wach retamaxik kin-ano we kkanaj kan ulew le pin-ab'?

9I Ajwal xula' uwach che:

—Chak'ama li jun b'akil, jun chab'at, jun chij, chi je aj oxib' junab'; xaq chak'ama li jun ixkuku, xaq jun ral palomax.

10I ma Abram xeuk'am b'i konojel i chikop le, xeu'at pa taq nik'aj, xuya pan i ch'aqap chwach uch'aqapil; xwiri i tz'ikin xeu'at ti pa taq nik'aj. 11I tz'ikin chi ketijaw i kamnaq taq b'iroxik, xeqaj li pkiwi i jalajuj taq chikop chi je kamsam, xwiri ma Abram keroqtaj b'ik.

12Are xqaj ij i ma Abram, xpe jun nim laj waram che, xaq xsutix rij rumal jun tz'intz'ik equm, chi lik xuxij rib' rumal. 13Are uri i Ajwal xub'ij che ma Abram:

—Rajwaxik kawetamaj chi amuq axikin kejeqi ni chwach ulew chi ke taj, lik ketaq ni che i chak xaq k-ani ni k'ax chke chila chwach ulew le chi ke taj, jumo' (400) junab'. 14Xwiri Yin kin-at ni tzij puwi i nim laj tinimit chi ku'an chke kechakunik; te'uri i amuq axikin le, ke'el na li chila ru' nimaq taq b'eyomal. 15Xwiri yet lik utz rijab'ik ka'ano xaq lik utz amuqik k-anik are kat-e pa uxlanem ku' awatit amam. 16Je are ukaj lemajil chke amuq axikin ketzalij li che ulewi, man chuxe'el ile k'amaja kk'iyar kimak aj Hamor —Keje ile xub'ij i Dios che ma Abram.

17Are xqaj ij xaq lik oknaq chik a'ab', are uri xwinaqir jun orno kb'uquq sib' puwi, xaq xwinaqir jun antorcha tzijom xeik'aw chkixol i chikop chi je u'atom pa taq nik'aj. 18Che i ij le, i Ajwal xu'an jun trat ru' ma Abram, xub'ij che:

—Chke amuq axikin kinya wi ulewi, kjeqan li chi raqana Egipto kk'is k'a che i nim laj raqana Éufrates: 19Chi are kulew aj Ken, aj Kenaz, aj Cadmon, 20aj Het, aj Ferez, aj Refa, 21aj Hamor, aj Canaán, aj Girgash xaq i aj Jebús.

Currently Selected:

G%E9nesis 15: ACHICUB

Highlight

Copy