G%E9nesis 11

I Ja tak'tik pa Babel

1Che taq i ij le xa jun te'eq kich'ab'al i winaq chwach ronojel uwach i jyub' ta'aj. 2Are xe'el chila pusuk' i relb'al ij, xkiriq jun nim laj ta'aj che ulew Sinar; xejeqi chila. 3Xuk'ulmaj jun ij, i winaq xkib'ij chkiwach: “Chqa'ana natril xaq chqacha'saj pa a'”; xecha. I natril le xuriq uchak chke puk'exel ab'aj, xaq i asfalto xkikoj puk'exel ulo'. 4Te'uri xkib'ij chik chkiwach: “Chqa'ana jun tinimit xaq chqa'ana jun ja tak'tik chi kupon uwi k'a chikaj man keje ile, k-on panoq lik knimar ni qa'ij xaq kojkicher tu b'i chwach i jyub' ta'aj.”

5Xwiri i Ajwal xqaj li chrilik i tinimit le xaq i ja tak'tik chi ketijin i winaq chu'anik, 6are uri xub'ij puk'ux: “Konojel i winaq le, xa je jun tinimit xaq xa jun kich'ab'al; xa ujeqanik ile xki'ano, k-on panoq ni'pa kkich'ob' u'anik lik ketikar ni che. 7Rumali chojqaj b'i chuyojik kich'ab'al, man keje ile kkita ti chik kib' chkiwach.”

8Are u'ankil uri ile chi Ajwal xeukichersaj b'i konojel i winaq chwach i jyub' ta'aj, rumali xkimayij u'ankil i nim laj tinimit. 9Are u'ankil uri chi xkiya pub'i i nim laj tinimit le, Babel, man chila xyoj wi kich'ab'al konojel i winaq rumal i Ajwal xaq xeukichersaj b'i chwach i jyub' ta'aj.

Je umuq uxikin ma Sem

10Iri are u'anoj ma Sem: Keb' junab' chik rik'awik i nim laj jab', are o jo'winaq (100) junab' che, are uri xuk'uwalij a Arfaxad. 11Chrijil chik uk'uwalixik a Arfaxad le, i ma Sem k'a xk'asi jo'winaq jumo' (500) junab'; xaq k'a xeuk'uwalij rak'al alab'om xaq i altom.

12I ma Arfaxad o chik jo'lajuj juwinaq (35) junab' che are xuk'uwalij a Sala, 13chrijil chik uk'uwalixik a Sala le, ma Arfaxad k'a xk'asi oxib' jumo' (403) junab'; xaq k'a xeuk'uwalij rak'al alab'om xaq i altom.

14I ma Sala o chik lajuj juwinaq (30) junab' che are xuk'uwalij a Heber, 15chrijil chik uk'uwalixik a Heber le, ma Sala k'a xk'asi oxib' jumo' (403) junab'; xaq k'a xeuk'uwalij rak'al alab'om xaq i altom.

16I ma Heber o chik kajlajuj juwinaq (34) junab' che are xuk'uwalij a Peleg, 17chrijil chik uk'uwalixik a Peleg le, ma Heber k'a xk'asi lajuj juwinaq jumo' (430) junab'; xaq k'a xeuk'uwalij rak'al alab'om xaq i altom.

18I ma Peleg o chik lajuj juwinaq (30) junab' che are xuk'uwalij a Reu, 19chrijil chik uk'uwalixik a Reu le, ma Peleg k'a xk'asi b'elejeb' lajujwinaq (209) junab'; xaq k'a xeuk'uwalij rak'al alab'om xaq i altom.

20I ma Reu o chik kab'lajuj juwinaq (32) junab' che are xuk'uwalij a Serug, 21chrijil chik uk'uwalixik a Serug le, ma Reu k'a xk'asi chik wuqub' lajujwinaq (207) junab'; xaq k'a xeuk'uwalij rak'al alab'om xaq i altom.

22I ma Serug o chik lajuj juwinaq (30) junab' che are xuk'uwalij a Nacor, 23chrijil chik uk'uwalixik a Nacor le, ma Serug k'a xk'asi chik lajujwinaq (200) junab'; xaq k'a xeuk'uwalij rak'al alab'om xaq i altom.

24I ma Nacor o chik b'elejeb' juwinaq junab' (29) che are xuk'uwalij a Taré, 25chrijil chik uk'uwalixik a Taré le, ma Nacor k'a xk'asi b'elejlajuj jo'winaq (119) junab'; xaq k'a xeuk'uwalij rak'al alab'om xaq i altom.

26I mam Taré le are o chik lajuj oxwinaq (70) junab' che, je uk'uwalim chik uk'ojol chi a Abram, a Nacor xaq i a Harán.

Umuq uxikin mam Taré

27Are ulemajil mam Taré iri chi uqajaw a Abram, a Nacor xaq i a Harán. I ma Harán le are uqajaw a Lot. 28I ma Harán, xkam pa Ur ke aj Caldea chila ipa alaxnaq wi, are k'a k'as uqajaw chi mam Taré.

29I a Abram xk'uli ru' al Sarai xaq a Nacor xk'uli ru' al Milca, umi'al ma Harán. I ma Harán le xk'iji chik jun umi'al chi al Isca ub'i. 30Xwiri al Sarai lik kalan taj, rumali nti rak'al.

31I mam Taré xel pa Ur ke aj Caldea, x-e k'a Canaán, xuk'am b'i uk'ojol ru' chi a Abram, a Lot chi ri umam xaq i ralib' chi al Sarai rixoqil a Abram. Xwiri are xeupon che i tinimit Harán xejeqi chila che i tinimit le. 32Xaq chila xkam wi mam Taré are o jo'ob' lajujwinaq (205) junab' che.

Currently Selected:

G%E9nesis 11: ACHICUB

Highlight

Copy