G%E9nesis 12

I Dios kusik'ij ma Abram

1Jun ij, i Ajwal xub'ij che ma Abram: “Chawo'taj kan awulew, awachalal, xaq i kachoch aqajaw achuch, man kat-e che ulew chi kink'ut ni Yin chawe. 2Kin-an ni jun nim laj tinimit chke amuq axikin, kinya ni utzil chomal pawi; i ab'i xaipa na kkuxtax wi, xaq at utzil chomal na chke jub'an chik winaq. 3Kinya ni utzil chomal pkiwi i winaq chi kkitz'onoj utzil chomal pawi, xaq keink'oqoj ni jub'an chi kkitz'onoj i k'oqb'al pawi; xaq awumal yet kinya ni utzil chomal pkiwi konojel i alk'uwal chwach i jyub' ta'aj.”

4X-e uri ma Abram chrij pacha xb'ix che rumal i Ajwal xaq x-e ma Lot ru' chi rika'; ma Abram le o jo'lajuj oxwinaq (75) junab' che are xel chila pa Harán. 5Ma Abram xuk'am b'i rixoqil ru', chi ati Sarai, xaq i rika' chi ma Lot, xaq ronojel ub'itaq ke chi kich'akom, xaq i winaq chi kich'akom chila pa Harán, junam xe'el chila che ulew Harán le xaq junam xeupon k'a che ulew Canaán, 6i mam Abram xeik'aw chupam ronojel ulew Canaán xeupon k'a che ulew Siquem, chila ipa o wi i sik'al More. Che taq i ij le je are aj Canaán je o chwach ulew le. 7I Ajwal chila xuk'ut wi rib' che ma Abram xaq xub'ij che: “Chke amuq axikin kinya wi ulewi.” Are uri ma Abram xuyijb'a jun sujb'al sipon chila, re kojb'al u'ij i Ajwal man chila xuk'ut wi rib' che.

8Relik chila x-e chik chijyub' prelb'al ij che ulew Bet-el, are xuponik xuyijb'a umujb'al chila; i Bet-el le xkanaj puqajb'al ij che, xaq i ulew Hai xkanaj prelb'al ij che, xaq xuyijb'a chik jun sujb'al sipon chila re i Ajwal; xaq xukuxtaj xunataj ub'i i Ajwal. 9Te'uri xel ma Abram chila, kok'ilal xupon k'a pa Neguev.

Ma Abram pa Egipto

10Che taq i ij le xpe jun nim laj wa'jal chila ipa jeqel wi te'eq ma Abram; rumali x-e jeqi pa Egipto. 11Are okik chik ke pa Egipto, xub'ij che i rixoqil chi ati Sarai: “Yin weta'am chi lik at chom laj ixoq; 12saq laj tzij are katkil achiyab' aj Egipto, kkib'ij na: I ixoq le rixoqil i achi le; kecha na. Rumal ile kinkikamsaj na, xwiri yet katkik'asb'a. 13Rumali kab'ij ni chke chi at wanab', keje ile kinkikamsaj taj xaq lik utz inwach uri kin-ek, man yet kinato.”

14Are xeupon pa Egipto, i achiyab' chi je aj chila xkilo chi ati Sarai lik chom laj ixoq. 15Xaq x-iltaj uwach kumal i je uwi ujolom re ma faraón, are uri ike le xe'e la chub'ixkil che chi ati Sarai lik chom laj ixoq, rumali xk'am b'i ati Sarai pa nim laj ja re i ajawinel ma faraón.

16Rumali lik utz rilik ma Abram x-anik man xsipax uchij, uchikop, u'axna, ukamey#12.16 Kamey. Jun chikop keje pacha unimal jun kaway, lik kya' eqan, xaq ke'an chrij pacha kqa'an yoj chke i kaway. I kamey le lik kkich'ij k'atik k'iyal ij chi kkitij ti ya. xaq i winaq chi je o pa k'ax. 17Xwiri i Ajwal xuk'ajsaj uwach ma faraón ru' nimaq taq yob'il, rumal ati Sarai chi rixoqil ma Abram, xaq keje xu'an chke ni'pa je o prachoch. 18Are uri ma faraón xutaq usik'ixik ma Abram, xutz'onoj che: “¿B'uchak xinat'oro? ¿B'uchak xab'ij ti chwe we awixoqil? 19¿B'uchak xab'ij chwe chi xa awanab'? Rumali, yin laj xin-an te wixoqil che. Wo'or chak'ama b'i awixoqil i jat.” 20Are uri ma faraón xeutaq uwinaq che chi kekito ma Abram ru' rixoqil chrelsaxik b'i ub'itaq ke.

Currently Selected:

G%E9nesis 12: ACHICUB

Highlight

Copy