Hechos 28

Ma Pablo o chila Malta chi setel chwi i mar

1Are oj totajnaq chik qonojel, xqetamaj chi oj o chila che i ulew Malta ub'i chi setel chwi i mar. 2I winaq chi aj chila, lik qonojel utz qilik xki'ano, xwiri ktijin i jab' xaq lik joron tew rumali chi xkinuk' jun nim laj a' i xojkisik'ij ku' chila chi a' mi'sab'al qib'. 3I ma Pablo xumol jub'i' si' chaqij, are ktijin chukojik pa a', xaqte'et xel li jun kumatz rumal uk'atanal i a' i xub'atz' rib' che u'ab'. 4I winaq aj chila, are xkil i kumatz tzayal che u'ab' ma Pablo, xkib'ij chkiwach: I achi le moqxa ajkamsanel b'uchak tupu xtotaj pa mar, xwiri i atb'al tzij chi aj-anol i suk'ulik kuya ti che chi kk'asi'ik; xecha.

5Xwiri i ma Pablo xusutij b'i kumatz pa a', lik nti xuk'ulmaj. 6Konojel is koy-em junpa ksipoj an u'ab' o xaq junpa kkam anoq. Xwiri lik naj xkoy-ej; are xkilo chi nti xuk'ulmaj, xkijalwachij kinojb'al i xkijeq ub'ixkil chi ma Pablo are jun tiox.

7Naqaj che i k'ijib'al le, o jub'an rulew jun achi nim upatan pa tinimit chila pa ulew chi setel chwi i mar, ma Publio ub'i, lik xojuk'ulaj ru', xaq lik che oxib' ij le utz qilik xu'ano. 8I xuk'ulmaj chi uqajaw ma Publio lik iwab' xaq kotz'ol chwi uch'at man o a' chrij xaq o kik'puj che. Are uri ma Pablo x-e chusolixik xaq xlapan ru' i Dios puwi, are xumayij i lapanik ru' i Dios, xuya u'ab' puwi i xrutzirsaj. 9Rumal ile, konojel iwab'ib' re i ulew chi setel chwi i mar le, xek'un ru' ma Pablo i xeutzirsaxik. 10Lik k'i utzil chomal xki'an chqe, chrijil chik ile xkiya b'i ni'pa i rajwaxik chqe are xqamaj chub'i qab'e pa barco.

Ruponik ma Pablo pa tinimit Roma

11Are xik'aw oxib' ik' qa'olem chila che i ulew chi setel chwi i mar, xoj-an b'i chupam jun barco chi xaq xrik'awsaj i alaj chila; i barco le petnaq pa tinimit Alejandría. Chutzam i barco antal uk'exwach keb' tiox chi are kib'i iri: Cástor xaq Pólux. 12Xojupon pa tinimit Siracusa chi o chuchi' i mar, chila xojkanaj kan oxib' ij, 13te'uri xqamaj chub'i qab'e, k'a xojupon pa tinimit Regio. Are xoj-e chik chukab' ij, xpe jun tew pa wiqab'; te'uri are xik'aw jun chik ij xojupon pa tinimit Puteoli, 14chila xqariq jujun qachalal chwach i Cristo, chi xkib'ij chqe chi kojkanaj kan jun seman ku'; pa k'isb'al re, xojupon pa tinimit Roma. 15I qachalal chwach i Cristo aj Roma keta'am chik chi yoj kojupon chila, rumali xeupon chqak'ulaxik k'a pa k'eb'al chi Foro de Apio ub'i xaq che jun chik k'ijib'al chi Tres Tabernas ub'i. Are xqil ile, i ma Pablo lik xutioxij che i Dios xaq lik xk'iji ukowil uk'ux. 16Are xojupon pa Roma, xya' che ma Pablo chi kk'iji che jun chik k'ijib'al junam taj ku' i rachi'il xaq xa jun achi chi yij che i ch'oj xchajiwik.

Ma Pablo o chila Roma

17Are xik'aw oxib' ij ruponik ma Pablo, ire xutaq kisik'ixik aj Judío chi nimaq kipatan chila pa Roma. Are kimolom chik kib', xub'ij chke:

—Ix, wachalal chwach i Cristo, yin nti inmak in-anom chke aj Judío xaq mitene chrij i ujer k'utunik ke i qatit qamam. Xwiri, chila pa Jerusalén xinkijach pki'ab' aj Roma, 18i aj Roma le, are xeutzin chutz'onoxik wach taq inmak in-anom, xkaj te'eq wo'taxik man nti inmak xkiriqo we kinkamsax taq rumal. 19Xwiri i aj Judío kkaj te'eq inkamsaxik, rumali xintz'onoj u'atik tzij pinwi rumal i nim laj atol tzij ma César. 20Rumali, ix insik'im wu' wo'or man kwaj rilik iwach xaq kwaj kinlapan jub'i' iwu', chi xa rumal ukub'ib'al qak'ux yoj chi oj aj Judío, chi yin wo'or in kiyut'um ru' i karena.

21Are uri ike xkib'ij che: Yoj nti jun wuj taqtal li chqe we upetik taq chila pa tinimit Judea kojb'al re amak, xaq mijun chke i qachalal chwach i Cristo aj Judío je k'unnaq chub'ixkil waral we o taq amak a'anom. 22Yoj kqaj kqata wach kach'ob' yet, man qeta'am chi xaipa, i winaq k'ax kech'aw chrij i tzob'aj chi kiya'om kiwach ru' i k'ak' k'utunik le; xecha.

23Rumali chi xkich'ik jun ij chi kkimol kib' ru' ma Pablo. Are xuriq i ij, je k'i i winaq xemoltaj chila ipa o wi ma Pablo. I ma Pablo xujeq lapanik ku' are xsaqirik k'ate xumayij xqaj i ij; xub'ij chke wach usuk' i ajawinik re i Dios. Ire xutij u'ijol ub'ixkil chi chkikojo i Jesús, xub'ij usuk' chke ru' u'atb'al tzij i mam Moisés xaq ru' i tzij chi tz'ib'tal kan kumal i profeta. 24O jujun xkikojo wach xub'ij i ma Pablo, xwiri i jub'an chik xkikoj taj. 25Ni'pa i je o chila xkijunamsaj ti kitzij wach kki'ano, rumali chi xkitikb'a enam. Are uri ma Pablo xub'ij chke:

—I Lo'laj Utewal i Dios lik pusuk' xub'ij i tziji chke iwatit imam yix, chi utz'ib'am kan ma Isaías chi profeta, 26xub'ij:

Jat xaq chab'ij chke aj Israel le:

Yix, qatzij neri kixtanik, xwiri nti kita ub'e;

qatzij neri kixtzunik, xwiri nti kiwil ub'e.

27Man i winaqi lik je b'uy,

ike xa kitz'apim kixikin

xaq xa kimutz'um kib'a'wach,

man keje ile ketzun taj xaq ketan taj;

man keje ile kinkitzukuj taj

xaq keje ile yin keinkunaj taj.

28Chiwetamaj uri yix iri, su' wo'or kjeqan usujuxik i elb'al chisaq chke i ne te aj Judío chi kusujuj i Dios, man ike lik kkikoj ni retalil —xcha i ma Pablo chke. 29#28.29 Konojel ti wuj chi o utzij i Dios chupam chi lik mas ujer kanoq, kriqtaj i jun versículo ri.Are xb'itaj ile rumal ma Pablo, i aj Judío xe'ok chuchapik kib' che i tzij chkiwach are xetzalij b'ik.

30I ma Pablo xkanaj kan keb' junab' chila ipa utojom wi uposar, chila xeuk'ulaj wi ru' ni'pa i xeupon chusolixik. 31Lik xutzijoj i ajawinik re i Dios lik nti xuxij rib' che xaq xu'aljinsaj upatan i Ajwal Jesucristo, lik mijun x-atiw chub'ixkil ile.

Currently Selected:

Hechos 28: ACHICUB

Highlight

Copy