Hechos 27

Ma Pablo ktaq b'i pa Roma

1Are xkich'ob' b'i qataqik pa Italia, i ma Pablo junam ku' jub'an chik ajprexil, xejach pu'ab' ma Julio chi kaj-atzil i achiyab' chi je yij che i ch'oj aj Roma, chi kki'an kipatan chrij i atol tzij ma Augusto. 2Xoj-an b'i chupam jun barco chi o pa tinimit Adramitio chila chuchi' i mar, enam re pa taq tinimit chi je o chuchi' i mar chila pa nim laj tinimit Asia. Xaq enaq ma Aristarco qu' chi aj pa Tesalónica, ukwenta i tinimit Macedonia. 3Chukab' ij, xojupon pa tinimit Sidón chi o chuchi' i mar. I ma Julio lik utz rilik ma Pablo xu'an chila, man xuya che chi xeusolij i ramiy xaq xuya chke i ramiy chi kkiya wach taq i rajwaxik che ma Pablo. 4Are xojel chila pa Sidón xoj-an b'i pa barco, xojik'aw chila pa ulew Chipre chi o ya chrij chwach, man to' qatom qib' chwach jun nim laj tew chi xpe chqawach. 5Xojb'in chwi mar chwach pan i tinimit Cilicia xaq Panfilia, te'uri xojupon pa tinimit Mira, ukwenta i tinimit Licia.

6Chila, i kaj-atzil i achiyab' chi je yij che i ch'oj aj Roma xuriq jun barco aj pa tinimit Alejandría chi enam re pa tinimit Italia xaq xub'ij chqe chi koj-an b'i chupam man keje ile kqamaj chub'i qab'e. 7K'iyal ij xqach'ijo chi kok'il xojb'inik xaq lik k'ax uponik xqa'an che i tinimit Gnido. Xwiri lik k'a nim i tew chi o chqawach, rumali xqa'at qab'e, xojik'aw chwach pan i tinimit Salmón, keje ile xojsutin chrij chwach i ulew Creta chi o ya chrij chwach; 8ru' i k'ax laj ik'awik chi xqa'an chuk'ulel i ulew le, xojupon che jun ral tinimit Buenos Puertos ub'i, chi o naqaj che i tinimit Lasea.

9K'iyal ij ik'awnaq chik xaq lik k'ax chik b'inik chwi mar man ya kpe jub'an tew, xaq ya kpe alaj. Rumali chi ma Pablo xuya kino'oj, xub'ij chke:

10—Achiyab', kwil yin chi che i qa'enami lik xib'in ib' ru' xaq i barco ksach ni uwach junam ru' i eqan chi rok'am, xwi ta la ile, xaq moq kojkam yoj.

11Xwiri i kaj-atzil i achiyab' chi je yij che i ch'oj aj Roma xukoj ti retalil che utzij ma Pablo man ire xa xukoj retalil utzij i rajaw i barco xaq i achi chi kok'aw i barco. 12Xwiri utz taj we kqoy-ej rik'awik i tew joron xaq i jab' chi tew upam, chila pa ral tinimit chi o chuchi' i mar, rumali laj konojel xkich'ob'o chi utz kojel chila man moqxa kqach'ij uponik pa tinimit Fenice chi o chila chuchi' i mar xaq chila uri kqoy-ej wi rik'awik i tew joron, xaq i jab' chi tew upam. I tinimit Fenice le ukwenta i tinimit Creta chi setel chwi i mar chi o keb' okb'al che, jun o chuxol i moxab' prelb'al ij xaq i jun chik o chuxol i wiqab' prelb'al ij.

Upetik jun nim laj jab' tew upam chwi mar

13Ru' i ch'ob'onik le chi utz kkimaj chub'i kib'e man i tew to' kpuypat chila pa wiqab', xe'el chila xaq xeb'in chwi mar chuchi' i ulew Creta. 14Xwiri, are xa jub'i' je b'innaq, xpe jun nim laj jab' tew upam chi xjeqan li chuxol i moxab' prelb'al ij, i ya lik kuxa' rib' chwach i barco, rumali lik laj kumuq b'ik, 15xaq lik xucharej b'ik. Yoj xojtiki ti chik chub'insaxik i barco suk'ulik, rumali xqaya che chi xojuk'am b'i i tew. 16Xojik'aw chrij jun ral setaj ulew chi setel chwi i mar chi Clauda ub'i, chila qas ti nim ucho'ab' i tew xaq lik pachalo xojtiki chujek'ik i ral kanuw re tob'al qib' puwi i ya. 17Chrijil u'ansaxik i ral kanuw re tob'al ib' pa barco, xkib'atz' jub'an laso nimaq upam chrij i barco man keje ile kpax ti rumal i tew. Ike lik kixijom kib' man moqxa i tew kumin b'i barco pa seneb' chuchi' i mar chi Sirte ub'i, rumali xkiqajsaj i nimaq taq k'ul chi kripip puwi i barco, te'uri xkiya che i tew chi xaipa xeuk'am wi b'ik. 18Chukab' ij, k'a nim ucho'ab' i tew, rumali xkijeq uk'aqik b'i eqan chwi ya ob'sab'al ralil i barco. 19Churox ij, ike xkik'aq b'i chwi i ya i jalajuj taq b'iroxik chi xel che i barco, pacha taq la i laso xaq i k'am. 20Lik k'iyal ij, x-iltaj ti uwach i ij, mitene i ch'umil, xwi i tew lik nim ucho'ab', rumali chi yoj xqaj ukub'ib'al qak'ux che i qatotajik.

21Lik k'iyal chik ij chi nti wa qatijom, rumali i ma Pablo xtak'i an chqaxol xaq xub'ij:

—Achiyab', wetene xi'ano pacha xinb'ij chiwe chi kojel ta li chila pa tinimit Creta, keje teneri kqatij i k'axi xaq i uyej. 22Xwiri wo'or, chikowij ik'ux man mijun chiwe kkamik, tupu lik ksach ni uwach i barco. 23Man i Dios xutaq li jun ángel wu' cha'ab', i Dios le chi in o pu'ab' xaq are kin-an inpatan chrij. 24Ire xub'ij chwe: Maxij awib' ma Pablo, man lik rajwaxik katupon chwach i ma César chi aj Roma xaq awumal yet, i Dios keuto ni konojel i winaq chwach kamik chi je o awu' pa barco —xcha. 25Yix achiyab', rumali chikowij ik'ux man yin lik kul ink'ux che i Dios chi ku'an na pacha xub'ij i ángel chwe. 26Xwiri i tew lik kumin ni i barco pa seneb' chuchi' jun ral ulew chi setel chwi i mar; xcha i ma Pablo.

27Che jun a'ab' are xik'aw i keb' seman chi kojtijin che i b'e chwi mar Adriático ub'i, chi xaq are to' xojuk'am b'i i tew k'ulala; kolo tik'il a'ab', i ajchakib' re i barco xkinab'ej chi naqaj chik oj o wi che i ulew. 28Rumali, xkipaj upam i ya, are uri xkilo chi o juwinaq xik'ab' che uchoyil. Jub'i' chupanoq xkipaj chik upam i ya, xe'eloq chi xa jo'lajuj xik'ab' chik o che uchoyil. 29Ile lik xeuxib'ij man moqxa kkitanij kib' chwach i ab'aj, rumali xkesaj li kajib' nimaq taq ch'ich' xok utzam chi xaq o laso che u'ab', xkik'aq pa mar chrij i barco tak'b'al re, te'uri lik xkitz'onoj che i Dios chi we' ksaqirik. 30Xwiri, i ajchak re i barco xkich'ob' anmajik, are uri xkijeq uqajsaxik b'i ral kanuw re tob'al kib' chwi ya chi ke'anmaj te b'i chupam, xki'an che kib' chi xa ketijin chuk'aqik b'i jub'an chik ch'ich' xok utzam pa ya chwach pan i barco. 31Xwiri ma Pablo are xunab'ej ile, xub'ij che i aj-atzil xaq chke uwinaq chi je yij che i ch'oj aj Roma:

—I achiyab' le we kekanaj ti pa barco, yix lik kixtotaj ti uri —xcha.

32Are uri i achiyab' le chi je yij che i ch'oj xki'at i laso re i ral kanuw chi tob'al kib', xaq xkiya che xtzaq b'i pa ya.

33Are ya ksaqirik, i ma Pablo xub'ij chke konojel chi chkitija kiwa. Xub'ij chke:

—Are chik keb' seman iri chi yix lik nti wa itijom, rumal iwoy-em wach taq kqak'ulmaj. 34Kintz'onoj utzil chiwe chi chitija iwa. Man ile lik rajwaxik we kiwaj kixk'asi'ik, man lik mijun kutzaqsaj jun ral uwi che ujolom; xub'ij chke.

35Are xb'itaj ile, i ma Pablo xuk'am pan jun wa re trigo i xutioxij che i Dios chkiwach konojel. Xupiro i xujeq utijawik. 36Are uri konojel lik xkikowij kik'ux xaq xe'ok chutijawik kiwa. 37Ni'pa i oj o pa barco, waqlajuj oxlajujwinaq (276) winaq. 38Are kojtijin chwa'im, xqatijo ni'pa i rajwaxik chqe, are xkelej wa'im are uri xe'ok chuk'aqik b'i i trigo pa ya, ob'sab'al ralil i barco.

Umuqtajik i barco pa ya

39Are xsaqirik, i ajchakib' re i barco xkil ti ub'e ipa je o wi, xwiri xkil jun rokb'al i ya chi o ulew chuchi', are uri xkich'ob' uminik b'i i barco k'a chila. 40Xkik'atzij i laso re i ch'ich' chi xok utzam, xkik'aq kan pa mar xaq xkitor i laso ximb'al re i che' chi kb'insaw i barco chwi i ya. Te'uri xkiyak an i k'ul chikaj chwach i barco, are uri i barco xujeq tejeb'ik chuchi' i ulew. 41Xwiri xumina rib' chupam jut'ub'aj seneb' chi o chuxe' i ya. I barco xch'api utzam chupam i seneb' le, kuyin ti chik rib' xaq i utun i barco le xutikb'a u'anik ch'aqa taq rumal ucho'ab' i b'olol i ya.

42I achiyab' chi je yij che i ch'oj xkaj kikamsaxik ajprexil man keje ile ke'anmaj tu b'i chwi taq ya. 43Xwiri i kaj-atzil i achiyab' chi je yij che i ch'oj aj Roma chi xraj uto'ik ma Pablo, xuya ti chke chi kki'an ile, ire xub'ij chi ni'pa i keta'am i mux chkik'aqa b'i kib' chwi ya, keje ile kekiriqa uwach ulew, 44xwiri ni'pa i keta'am ti mux, chkichapa kib' che jub'an taq tz'alam, we ntaj che i ch'aqa taq re i barco. Are u'ankil uri chi qonojel xojtotajik xojupon chwach ulew.

Currently Selected:

Hechos 27: ACHICUB

Highlight

Copy