Hechos 26
26
Ma Pablo kuya utob'al rib' chwach i ajawinel ma Agripa
1Are uri i ajawinel ma Agripa xub'ij che ma Pablo:
—Utz katch'awik re tob'al awib'.
I ma Pablo xuyak u'ab' i keje iri xok chub'ixkil: 2Wo'or lik kinkikotik man kinb'ij jupaj kapaj intzij chawach yet nim laj ajawinel ma Agripa, tob'al wib' che ronojel ni'pa taq inmak le chi xkikoj aj Judío, 3man yet lik aweta'am wach i jalajuj taq ki'anoj aj Judío kki'ano xaq aweta'am wach rumal xqachap qib' che i tzij. Rumali kintz'onoj utzil chawe chi chinata ni ru' unimal ak'ux.
4Konojel aj Judío keta'am wach te'eq ink'aslemal chkixol ike are k'a in k'ojol ala chila pwulew xaq chila pa Jerusalén. 5Lik keta'am, chi yin arewi in aj fariseo we kkaj chkisaqij chi le lik qatzij, chi are jun tzob'aj chi lik kqa'ano wach rajwaxik che qakojonik che i Dios. 6Wo'or in kik'amom li chwach i atb'al tzij lik xa rumal ukub'ib'al ink'ux che i sujunik chi xub'ij i Dios chke i qatit qamam ujer. 7I kab'lajuj qatzob'ajil lik koy-em u'anik usujunik i Dios, rumali lik kkikoj u'ij, chipa'ij chicha'ab' lik kki'an kipatan chrij. Nim laj ajawinel ma Agripa, lik rumal uri i sujunik re i Dios le xaq ukub'ib'al ink'ux che, aj Judío kkikoj inmak wo'or. 8¿B'uchak kikoj ti yix chi i Dios keuwalijsaj chik i kamnaq che i kamik? Xcha i ma Pablo.
9Yin ujer xinch'ob'o chi lik rajwaxik kin-an ch'oj chrij i k'utunik re i Jesús aj Nazaret, 10xaq keje ile xin-an chila pa Jerusalén. I kaj-atzil i rajpatan i Dios xkiya chwe chi xeintz'apij k'iyal taq winaq chi je kojonnaq che i Dios prexil, xaq are kekamsaxik yin inya'om inwach ku' i ke'anawik. 11K'iyal taq mul xin-an k'ax chke anb'al re chke chi kkikub'a ti kik'ux che i Jesús. Xaq keje xin-an ile pa taq ja re molb'al ib' ke i judío, xaq lik nim woywal chke rumali xeinterb'ej b'ik k'a pa taq tinimit naj.
12Lik are in-anol re ile, rumali xinmaj b'i inb'e pa tinimit Damasco, i kaj-atzil i rajpatan i Dios xkiya b'i jun wuj chwe k'utb'al re chi lik intaqtal b'ik xaq lik o i atb'al tzij pin-ab'. 13Xwiri, nim laj ajawinel, are kojtijin che i b'e, kolo tik'il i ij xwil jun utzunb'al a' aj chikaj chi lik mas o utzunb'al chwach i ij lik xrep kan chqij chqawach ku' i wachi'il. 14Are uri qonojel xojtzaq pulew; are uri xinta jun ch'awb'al chikaj chi xub'ij pa ch'ab'al Hebreo: Ma Saulo, ma Saulo, ¿B'uchak kattijin chu'anik ch'oj chwij? Yet atukel ka'an k'ax che awib' man keje ka'ano pacha ku'an jun b'oyex are kukoj aqan che jun puyu, utukel ire ku'an k'ax che rib'. 15Are uri xinb'ij: ¿At pachin yet Nim laj Winaq? I Ajwal xula' uwach chwe: Yin in Jesús, chi kattijin chu'anik ch'oj chwij. 16Chatwalijoq i chattak'aloq man yin xink'ut wib' chawe man kwaj ka'an ni apatan chwij xaq kalap ni chke i winaq wach awilom chwe wo'or xaq wach kink'ut ni chawe k-on panoq. 17Katinto ni pki'ab' i aj Judío xaq pki'ab' i ne te aj Judío chi katintaq b'i ku' wo'or, mijun chke ike k-on k'ax chawe. 18Katintaq b'i ku' ike man kwaj kajaq kib'a'wach chke xaq keawesaj pa equmal man keje ile keb'in ni chisaq. Xaq kekojon ti chik che i Itzel, lik xwi chik che i Dios kekojon wi; xaq kekojon ni chwe yin man keje ile kkiriq ni kuyb'al kimak. Xaq keje ile keu'on ni ch'am laj utinimit i Dios; xcha.
19Rumali, nim laj ajawinel ma Agripa, yin xinqel taj wach xub'ij i Ajwal chwe pa wachij, 20man are i xin-ano, nab'e xinpaxsaj utzij i Dios chke i winaq aj Damasco, te'uri chke aj Jerusalén xaq keje ile xin-an pa ronojel taq tinimit Judea xaq xinpaxsaj chke i ne te aj Judío, xinb'ij chke chi chkijacha kib' pu'ab' i Dios xaq lik chki'ana i utz laj taq chak re i Dios, k'utb'al re chi lik qatzij kijalwachim chik kik'aslemal. 21Xa rumal ile chi aj Judío xinkichap chila prachoch i Dios xaq xkaj inkamsaxik. 22Xwiri ru' utob'al i Dios, yin lik inkub'am ink'ux che k'a are o wi wo'or, kinb'ij utzij i Dios chke konojel i winaq, chke ch'utiq xaq chke nimaq. Yin nti taq to' junwi tzij kinb'ij chke we are ti wach kib'im kan i profeta xaq pacha ub'im kan ma Moisés, chi kk'ulmax na k-on panoq: 23Xkib'ij chi i Cristo lik rajwaxik kkamsaxik, xwiri che oxib' ij kwalij che i kamik, te'uri knab'ej ni chusaqixik i utz laj k'aslemal chke i winaq aj Judío xaq chke jub'an chik tinimit.
Ma Pablo xukoch'ij rib' chujalwachixik uk'aslemal ma Agripa
24Are xb'itaj ile rumal ma Pablo re tob'al rib', i ma Festo xsik'in chub'ixkil i tziji:
—¡Xa at ch'uj, ma Pablo! Xa rumal i nim laj no'oj chi atijom awib' che, xatch'ujerik! —Xcha.
25Xwiri ma Pablo xub'ij che:
—Yin in ch'uj taj, nim laj winaq ma Festo, man ni'pa i kinb'ij le is pusuk' xaq lik saq laj tzij. 26Ley i ajawinel le chi ma Agripa, chi reta'am usuk' i tzij chi xinb'iji; rumali yin o ukowil ink'ux che i lapanik chwach ire, man yin weta'am chi ire lik reta'am usuk' ni'pa i kinb'ij, man ni'pa i xk'ulmaxik lik ani'al ti x-anik xaq lik uwam ti uwach. 27Nim laj winaq ma Agripa ¿Yet kakojo wach xkib'ij kan i profeta? Yin weta'am chi yet lik kakojo —xcha i ma Pablo.
28I ma Agripa xula' uwach che:
—¡Kach'ob' taq yet xa ru' jub'i' ka'an taq chwe chi kinkojon che i Cristo!
29I ma Pablo xub'ij che:
—Nti k-ono we k'iyal ti ij xaq we lik k'i, xwiri kintz'onoj che i Dios chi xwi ti yet kajach awib' pu'ab' Ire xaq rajwaxik chi konojel ni'pa i je o waral chi ketijin chintayik, chki'ana che kib' wo'or keje pacha yin, tupu ike nti karena che i ki'ab' —xcha.
30Are uri i ma ajawinel Agripa xaq i aj-ok'al utzam i jalajuj taq tinimit junam ru' ati Berenice xaq ni'pa i je kul chila xewalijik, 31xe'e pan junla che i lapanik chrij wach taq kki'ano. Xkib'ij chkiwach:
—I achi le nti umak u'anom we rajwaxik taq kkamsaxik, lik mitene kmajaw che chi tz'apil prexil; xecha.
32I ma Agripa xub'ij che ma Festo:
—I achi le kmajaw te'eq chi ko'tax b'ik, matiji xutz'onoj u'anik atb'al tzij puwi rumal i ma César —xcha.
Currently Selected:
Hechos 26: ACHICUB
Highlight
Share
Copy
Want to have your highlights saved across all your devices? Sign up or sign in
© Biblia Achí de Cubulco, Derechos reservados de Sociedad Bíblica de Guatemala
