Hechos 13

I ma Bernabé xaq i ma Saulo xkijeq kichak chi are ub'ixkil utzij i Dios

1I jutzob'aj re i Dios chi je o pa tinimit Antioquía, je o jujun profeta xaq je o jujun tijonelab' chkixol, chi je are iri: Ma Bernabé, ma Simón (chi xaq ma Eq kb'ix che), ma Lucio chi aj Cirene, ma Manaén (chi xek'itsax junam ru' ma Herodes chi aj-ok'al utzam i jalajuj taq tinimit te'eq pa Galilea) xaq i ma Saulo. 2Xuriq jun ij, chi tz'aqat ketijin chukojik u'ij i Ajwal xaq ko'tam kiwa'im rumal lapanik ru' i Dios, are uri i Lo'laj Utewal i Dios xub'ij: Chijacha ma Bernabé xaq i ma Saulo chwe, man yin je in-ulum chik chu'anik jun chak; xcha.

3Are xeutzin che i lapanik ru' i Dios xaq xkimayij chi kkitij ti kiwa, xkiya ki'ab' pkiwi ma Bernabé xaq i ma Saulo, te'uri xeki'ijla b'ik.

I apostolab' kkib'ij utzij i Dios pa Chipre

4I Lo'laj Utewal i Dios xutaq b'i ma Bernabé xaq i ma Saulo, xe'e pa tinimit Seleucia, xe'el chila, xe'ok b'i pa barco enam ke k'a pa tinimit Chipre chi are jun ulew setel chwi i mar. 5Are xeupon chila ipa ke'el wi i barco chuchi' i mar re i tinimit Salamina, are uri xkijeq ub'ixkil utzij i Dios pa taq ja re molb'al ib' ke i Judío. I ma Wan enaq ku' man keuto che i chak.

6Xeb'in chupam ronojel ulew chi setel chwi i mar, k'a xeupon che i tinimit Pafos, chila xkiriq jun aj Judío chi aj-itz, ma Barjesús ub'i, xwi ta la ile, xaq lik jun ajt'oronel man kub'ij chi profeta. 7Ire o ru' i aj-ok'al utzam i jalajuj taq tinimit chi ma Sergio Paulo ub'i, chi lik o uno'oj. I aj-ok'al utzam i jalajuj taq tinimit le xutaq kisik'ixik ma Bernabé xaq i ma Saulo, man kraj utayik utzij i Dios. 8Xwiri i aj-itz le ma Elimas ub'i pa kich'ab'al aj Grecia, xeu'atij ma Bernabé xaq i ma Saulo, man kraj ire chi i aj-ok'al utzam i jalajuj taq tinimit kukoj ti utzij i Dios. 9Are uri ma Saulo chi xaq ma Pablo kb'ix che, lik o Lo'laj Utewal i Dios ru', xuk'am utaqexik i aj-itz le, 10xaq xub'ij che:

—¡At t'oronel laj winaq, at utz ti laj winaq, lik at rak'al itzel xaq lik at ajch'oj chrij i utz! ¿B'uchak chi kamayij ti ujech'b'axik i saq laj tzij re i Ajwal? 11Wo'or i Ajwal kuya ni utojb'alil chawe: Katpotz'ir ni keb' oxib' ij, lik kawil ti uwach i saq re i ij.

Are uri lik juntir xok i equm chwach ma Elimas, rumali xok chutzukuxik pachin kchapaw b'i che u'ab', man ktzun ti chik. 12I aj-ok'al utzam i jalajuj taq tinimit, are xril ile, lik xukoj utzij i Dios xaq lik xub'isoj i k'utunik chrij i Ajwal.

Ma Pablo xaq i ma Bernabé kkib'ij utzij i Dios pa Antioquía re i Pisidia

13I ma Pablo ku' i rachi'il xe'el pa tinimit Pafos, xe'ok b'i pa barco, xe'e k'a pa tinimit Perge chi ukwenta i Panfilia, xwiri ma Wan chila xeukanaj kanoq, ire xtzalij chik Jerusalén. 14I jub'an xe'el pa Perge, xe'e pa tinimit Antioquía chi ukwenta i tinimit Pisidia. Are xuriq i ij sábado, xe'ok pa ja re molb'al ib' ke i judío, xekub'i chila. 15Chrijil chik rajlaxik uwach i wuj ipa tz'ib'tal wi i atb'al tzij xaq kitzij i profeta, i aj-atzil re i ja re molb'al ib' ke i judío xkib'ij chke i ma Pablo:

—Qachalal chwach i Cristo, moqxa o kiwaj ub'ixkil yab'al re ukowil kik'ux i qachalal chi je o waral, utz kib'ij na —xb'ix chke.

16Are uri ma Pablo xwalij anoq xaq ru' u'ab' xuk'ut chke i winaq chi mech'awik; xub'ij chke:

—Chinita yix ix aj Israel xaq yix chi ix aj naj chi kixkojon che i Dios. 17I ki-Dios aj Israel, xeucha i qatit qamam ujer, xu'an jun nim laj tinimit chke are k'a je jeqel chila pa Egipto chi kitinimit taj, te'uri ru' nim laj ucho'ab' xeresaj li chwach ulew le.#13.17 Éxodo 1.7; 12.51. 18I Dios xuch'ij ronojel ni'pa xki'an aj Israel are xeb'in kawinaq (40) junab' pa tz'inilik jyub' chaqij, 19xaq xusachsaj kiwach wuqub' nimaq taq tinimit chila Canaán, jachb'al re ulew chke i qatit qamam. 20Ronojel ile xuch'ij lajuj kawinaq jumo' (450) junab'.

Chrijil ile, xuya jub'an ajk'amol utzam chke, k'a che taq i ij re ma Samuel chi profeta. 21Are uri i qatit qamam xkitz'onoj jun kajawinel chi ku'at tzij pkiwi, i Dios xuya ma Saúl chke chi uk'ojol ma Cis re utzob'ajil ma Benjamín, ire kawinaq (40) junab' x-ajawin pkiwi. 22X-on panoq, i Dios xresaj ma Saúl che upatan, are uri xuya ma David pkajawinel, xaq xub'ij iri chrij ma David: I a David le chi uk'ojol ma Isaí, lik utz uk'ux kwilo xaq lik ku'an ni ronojel pacha kwaj yin. 23Jun chke umuq uxikin ma David le, are i Jesús chi xutaq li Dios waral chwach i jyub' ta'aj, tob'al ke aj Israel, chrij pacha ub'im kan ujer. 24Are k'amaja kk'un i Jesús, i ma Wan chi Ajqajsanel Ya lik kutzijoj utzij i Dios chke konojel aj Israel, xub'ij chke chi lik rajwaxik ketzalij chik ru' i Dios xaq rajwaxik chi kqajsax i ya pkiwi. 25I ma Wan le chi Ajqajsanel Ya, are ya kuriq i ij chi kk'is uwach uk'aslemal waral chwach i jyub' ta'aj, xub'ij: Mich'ob' yix we are yin in Cristo, chi usujum i Dios chiwe, man in are taj; xwiri chwijil chik yin, kk'un jun achi chi lik nim u'ij chi mitene kmajaw chwe we kintor taq uwach uxajab'.

26Ix, wachalal chwach i Cristo, chi ix umuq uxikin mam Abraham xaq yix ix aj naj chi kixkojon che i Dios: I tziji re iwelb'al chupam imak, lik iwe yix. 27Ni'pa i winaq chi je jeqel chila Jerusalén xaq i kaj-atzil, keta'am taj pachin i Jesús le xaq kkita ti ub'e ni'pa kib'im i profeta are kkajlaj uwach i wuj pa taq ja re molb'al ib' ke i judío che i ij sábado; keje uri ile chi lik je are ike xe'anaw ronojel ni'pa kub'ij i wuj le, man xkikamsaj i Jesús. 28Tupu nti umak xriqtajik kamsab'al re, ike xkib'ij che ma Pilato chi chutaqa ukamsaxik. 29Are xeutzin chu'anik ronojel ni'pa tz'ib'tal chrij i Jesús chupam i wuj re i Dios, xkiqajsaj li chwach i krus xaq xkimuqu. 30Xwiri, i Dios xuwalijsaj chik che i kamik. 31Te'uri i Jesús k'iyalmul xuk'ut chik rib' chke utijoxelab' chi xkachi'ilaj che uchak chila pa Galilea k'a pa Jerusalén; wo'or je are ike chi je ajsaqinel tzij ketijin chulapik chke i winaq wach xkilo xaq wach xu'an i Jesús.

32Rumali chi yoj kojtijin chutzijoxik i utz laj tzij k'ak' chiwe, chi are iri: I sujunik chi xu'an i Dios chke i qatit qamam ujer, 33lik ktijin chu'anik qu' yoj chi oj kimuq kixikin kan i qatit qamam. Ile xu'ano are xuwalijsaj i Jesús che i kamik chrij pacha tz'ib'tal kan ujer chupam ukab' b'ix re i Salmos chi kub'ij: “Yet at ink'ojol, yin wo'or inya'om ak'aslemal.”#13.33 Isaías 55.3. 34I Dios le uya'om chik retamaxik chi kuwalijsaj che i kamik man keje ile i uch'akul k-ay taj, chrij pacha tz'ib'tal chupam uwuj i Dios chi keje iri kub'ij: Kin-an ni ronojel i lo'laj utzil chomal chi xinsujuj che ma David ujer.#13.34 Isaías 55.3. 35O jun chik tzij chupam i wuj Salmos chi kub'ij: Yet kaya taj chi k-ay uch'akul i lo'laj ataqon.#13.35 Salmos 16.10. 36Lik qatzij ile chi ma David xu'an upatan chkij i winaq che taq i ij le, chrij pacha ub'im i Dios che, chrijil chik ile, xkamik xaq x-e ku' uqajaw uchuch, i uch'akul x-ayik. 37Xwiri i uch'akul i Jesús chi xuwalijsaj i Dios che i kamik lik k-ay taj. 38Rumali wachalal chwach i Cristo, lik rajwaxik kiwetamaj chi xa rumal i Jesús kriqtaj i kuyb'al mak. 39Konojel i winaq chi kkikoj ire, lik kkuytaj kimak chke chi kkuytaj ti te'eq che u'atb'al tzij ma Moisés. 40Rumali lik chi'ana kwent iwib' man keje ile ktzaq ti tojpen piwi chi kitz'ib'am kan i profeta:

41Chita pe', yix chi kixyo'yanik,

lik chixok il xaq chix-anmajoq

man che taq i ij le,

yin kinya ni jalajuj taq tojpen piwi chi lik kikoj taj

wetene jun chik kulap taq ile chiwe.

Keje ile xub'ij ma Pablo chke.

42I ma Pablo xaq i rachi'il are xe'el chila pa ja re molb'al ib' ke i judío le, are uri i winaq chi je aj Judío taj chi kalaxik, xkib'ij chke chi cheupon che i jun chik sábado chub'ixkil utzij i Dios chke. 43Are xeutzinik, xe'el li konojel chila pa ja re molb'al ib' ke i judío, je k'i i winaq aj judío xaq i jub'an chik chi kiya'om kiwach ku' aj Judío, xeterej b'i chkij ma Pablo xaq i ma Bernabé. Are uri ma Pablo xaq i ma Bernabé xekipixb'aj chi lik chkikub'a kik'ux che i k'axnab'al uk'ux i Dios.

44Che uwuq ij, chi are i ij sábado, laj konojel i winaq re i tinimit xkimol kib' pa molb'al ib' chutayik utzij i Ajwal. 45Xwiri i aj Judío are xkilo chi lik je k'i i winaq xemoltajik, lik xpe koywal chke, rumali xe'ok chula'ik uwach utzij ma Pablo, xa xe'ok chkik'oqoxik. 46Are uri ma Pablo xaq i ma Bernabé, lik ru' ukowil kik'ux xkila' uwach chke:

—Lik o chqaqul ub'ixkil utzij i Dios chiwe yix nab'e chi ix aj Judío; xwiri, yix kich'ob'o chi lik kmajaw ti chiwe kya' ik'aslemal chi nti uk'isik, rumali wo'or koj-e chub'ixkil chke i jub'an chi ne te aj Judío. 47Man keje ile xojutaq i Ajwal chu'anik ru' i tziji:

At inkojom pacha jun a' pa jalajuj taq tinimit

man kasaqij ni intzij re i k'aslemal chke i winaq

chi je o naj naqaj chwach i jyub' ta'aj;#13.47 Cf. Isaías 42.6; 49.6. xecha.

48I ne te aj Judío are xkita ile lik xekikotik xaq xe'ok chub'ixkil chi utzij i Ajwal lik utz. Are uri ni'pa i je chatal rumal i Dios chi kkiriq ni kik'aslemal chi nti uk'isik, is xkikoj utzij i Ajwal. 49Keje ub'ixkil utzij i Ajwal ile xki'an chila che i tinimit le. 50Xwiri i aj Judío xe'e ku' i achiyab' chi nimaq kipatan pa tinimit xaq ku' jub'an ixoqib' chi lik je utz xaq kekojon che u'atb'al tzij ma Moisés, chub'ixkil chke chi rajwaxik ke'oqtax b'i ma Pablo xaq i ma Bernabé che i tinimit le. 51I ma Pablo xaq i ma Bernabé, are xe'el chila xkipu kan ulew che i kaqan k'utb'al re chke chi utz ti xki'ano. Te'uri xe'e che i tinimit Iconio. 52Xwiri, i winaq chi kekojon che i Dios, lik kekikotik xaq i Lo'laj Utewal i Dios lik o ku'.

Currently Selected:

Hechos 13: ACHICUB

Highlight

Copy