Hechos 14

Ma Pablo xaq i ma Bernabé kkib'ij utzij i Dios pa Iconio

1I ma Pablo xaq i ma Bernabé, are xeupon che i tinimit Iconio, xe'ok b'i junam pa ja re molb'al ib' ke i judío. Lik utz ub'ixkil utzij i Dios xki'ano, rumali lik je k'i aj Judío xaq i ne te aj Judío xekojon chke. 2Xwiri i aj Judío chi xekojon ti che i Dios, xkiqajsaj kik'ux i ne te aj Judío, man xki'an chke chi xpe koywal chke i kachalal chwach i Cristo. 3Xwiri i apostolab' xenajtin chila pa tinimit; lik ru' ukub'ib'al kik'ux che i Ajwal xkisaqij utzij i Dios, xaq i Ajwal lik kuk'utu chi lik saq laj tzij wach kkib'ij ike chrij i k'axnab'al uk'ux i Dios, man xu'an chke chi ketiki chu'anik i nimaq taq k'utb'al re xaq i nimaq taq il chkiwach i winaq. 4Xwiri i winaq aj pa tinimit le, ki'anom keb' che kiwach, jujun kiya'om kiwach ku' aj Judío i jub'an chik kiya'om kiwach ku' apostolab'. 5Are uri aj Judío, junam ku' i ne te aj Judío xkijunamsaj kiwach ku' uwi ujolom i tinimit chi kkib'ij k'ax chke xaq xkich'ob'o chi kekipuk' che ab'aj. 6Xwiri i ma Pablo y ma Bernabé are xkita rason wach i kinuk'um, xe'el chila; xe'e k'a pa tinimit Listra, xaq i tinimit Derbe; i keb' le ukwenta i ulew Licaonia; xaq xe'e che i ulew chrij chwach. 7Xaq chila xkitzijoj wi i utz laj tzij k'ak' re i Jesucristo.

Ma Pablo kpuk' che i ab'aj pa tinimit Listra

8Chila pa tinimit Listra, o jun achi chi kb'in taj. Ire le lik klis chralaxik, rumali chi mijuyak b'innaq. I achi le kul b'ik, 9ktijin chutayik wach taq kub'ij ma Pablo, are uri ma Pablo xuk'am utaqexik i achi le xaq xrilo chi lik kutzirik man lik nim ukub'ib'al uk'ux 10Rumali chi ko xch'aw che, xub'ij:

—¡Chatwalijoq xaq chatb'inoq! —Xcha.

Are uri i achi le, xtak'i anoq xaq xujeq b'inik. 11I winaq are xkilo wach xu'an ma Pablo, are uri xesik'in chub'ixkil pkich'ab'al ike chi aj Licaonia:

—¡Je qajnaq li dios qu' yoj chi pacha achiyab' ketzunik! Xecha. 12Are uri xkib'ij chi ma Bernabé are i dios Júpiter xaq i ma Pablo are i dios Mercurio man are ire kch'awik. 13I rajpatan i tiox Júpiter, o rachoch kitiox le chila tzam ja che i tinimit, xuk'am li kotz'ij xaq torib' man ire xaq i winaq kkaj ukojik ki'ij i ma Pablo xaq i ma Bernabé, kkaj te'eq usujuxik jun kisipon chkiwach. 14Xwiri ma Pablo xaq i ma Bernabé are xkinab'ej wach taq xe'ok i winaq chu'anik, ike xkiraqch'ij ki'u' xaq xe'ok b'i chkixol i winaq, kesik'in chub'ixkil i tziji:

15Chita pe', ¿B'uchak ki'an ile? Yoj xa oj winaq pacha yix. Rumal ne ile xojk'un waral chutzijoxik i utz laj tzij k'ak' chiwe chi chimayij u'anik ile man lik nti uchak, are i chi'ana, chitzukuj i k'aslik Dios chi are x-anaw i kaj, i jyub' ta'aj, i mar xaq ronojel ni'pa i olik. 16Tupu ujer, i Dios xuya chke i winaq chi kki'an i wach taq kkaj u'anik chkijujunal, 17xwiri lik xumayij ti uk'utik ni'pa i k'axnab'al uk'ux chke ru' i jalajuj taq utz chi kuya chke, man are Ire kyaw li jab', ni'pa i chom laj taq tikon xaq are Ire kyaw i k'iyal taq tijawik chke man keje ile lik kekikotik. Xecha.

18Tupu ma Pablo xaq i ma Bernabé xkib'ij ile chke i winaq, lik pen xetiki chki'atixik chi kkaj te'eq usujuxik kisipon xaq kkaj te'eq ukojik ki'ij i apostolab' le.

19Are ketijin chu'anik ile, xeupon pan jujun chke aj judío je aj Antioquía xaq i je aj Iconio, xe'ok chkitunik i winaq aj pa Listra chu'anik ch'oj chkij i apostolab'; rumali chi xe'ok chupuk'ik ma Pablo che i ab'aj; are xkich'ob'o chi kamnaq chik, xkijukukej b'ik, xkesaj b'i pa tinimit xekiya junla. 20Xwiri i winaq chi kekojon che i Dios, xkimol kib' chrij chwach ma Pablo, ire xwalijik xaq xok chub'i pa tinimit; chukab' ij, ire xaq i ma Bernabé xe'e pa tinimit Derbe.

21Chrijil chik utzijoxik i utz laj tzij k'ak' chila pa Derbe ipa k'iyal winaq xkikoj i Dios, xetzalij chub'i pa tinimit Listra, Iconio xaq pa Antioquía. 22Pa taq tinimit le, xkiya kan ukowil kik'ux i winaq chi kekojon che i Dios, xekipixb'aj kanoq chi lik kkijikb'a kik'ux che i Dios xaq xkib'ij chke chi we kkaj okik chila chikaj ru' i Dios, rajwaxik chi kkich'ij i jalajuj taq k'ax. 23Ma Pablo xaq i ma Bernabé chila pa jalajuj taq tzob'ajil chi kekojon che i Dios, xekich'ik kij kiwi kijolom chi keok'aw utzam chke, te'uri xekijach pu'ab' i Ajwal ru' umayixik kiwa'im xaq ru' lapanik ru' i Dios chi kiya'om kik'ux che.

Kitzalijik chik ma Pablo xaq i ma Bernabé pa Antioquía re i Siria

24Xe'el pa jyub' Pisidia, xeupon pa tinimit Panfilia. 25Xkib'ij utzij i Dios pa tinimit Perge, te'uri xe'e pa tinimit Atalia; 26xe'el chila xe'ok b'i pa barco, xetzalij chik pa Antioquía, ipa xe'el wi are xejach b'i pu'ab' i Dios chu'anik i chak chi wo'or xeutzin chu'anik. 27Are xeupon pa Antioquía, xkimol kichi' konojel jutzob'aj re i Dios, xkilap chke ronojel ni'pa xu'an i Dios pkik'aslemal ike xaq xkib'ij chke wach u'anik xu'an i Ajwal chi xuya chke i ne te aj Judío chi kkita i utz laj tzij k'ak' man xaq ike kekojon ni che i Ajwal. 28I ma Pablo xaq i ma Bernabé xenajtin chila ku' i winaq chi kekojon che i Dios.

Currently Selected:

Hechos 14: ACHICUB

Highlight

Copy