Hechos 12

Ukamsaxik ma Santiago xaq i utz'apixik ma Pedro prexil

1Che taq i ij le, i ma Herodes chi ajawinel, xujeq kiterb'exik jujun chke i jutzob'aj re i Dios. 2Xutaq ukamsaxik ma Santiago ru' ch'ich' chi o uware k'ulala, i ma Santiago le katz kicha' kib' ru' ma Wan; 3i ma Herodes, are xrilo chi utz xkil aj Judío, are uri xutaq chik uchapik ma Pedro. Ile xuk'ulmaj che taq i ij re i nima'ij chi ktijaw i wa re trigo chi nti kunb'al ru'. 4Are xuchap ma Pedro xutz'apij prexil, chila je o kajib' tzob'aj achiyab' chuchajixik chi je yij che i ch'oj, je kajkaj pa taq tzob'ajil. Xuch'ob' ire chi are kk'is i nima'ij Pascua, kresaj li ma Pedro chkiwach i winaq. 5Keje uri ile chi ma Pedro o prexil xaq lik utz uchajixik antalik, xwiri i jutzob'aj chi je re i Dios lik xkimayij ti kilapanik ru' i Dios ru' ronojel kik'ux, tob'al re i ma Pedro.

Relsaxik li ma Pedro prexil rumal jun ángel re i Dios

6O jun a'ab' chuxe'el ujachik te'eq i ma Pedro chkiwach i winaq rumal ma Herodes, i ma Pedro qus uwaram chila prexil, lik chkixol i keb' achiyab' o wi chi je yij che i ch'oj, xaq ximom u'ab' ru' keb' karena xaq je o jub'an chik achiyab' chi je yij che i ch'oj je o chila xol uchija man kkichajij. 7Xaqte'et xwinaqir jun ángel re i Ajwal ru' i ma Pedro, xaq o jun a' chi lik xwalch'inik lik xu'an saq che i pa ja. I ángel xuyin pan uk'alk'ax ma Pedro, xuk'astaj xaq xub'ij che: ¡Chatwalijoq! Are uri lik juntir xetzaq i karena pulew chi o che u'ab' ma Pedro. 8I ángel xub'ij che: Chakojo a'u' xaq chakojo axajab'. Are uri ma Pedro xu'ano wach xb'ix che, te'uri i ángel xub'ij chik che: Chakojo i k'ul jurjik chrij a'u' xaq chatterej chwij.

9I ma Pedro xterej b'i chrij i ángel, tupu qas ti kukoj ronojel ni'pa i ktijin i ángel chu'anik man kub'ij ire moqxa xa ilanik pa wachij. 10Xwiri xeik'aw chila che i nab'e tzob'aj chajal, te'uri xeik'aw chik che ukab'. Are xeupon che uchija ch'ich' chi re elb'al b'ik pa b'e, i uchija le lik utukel xujaq b'i rib'. Are uri xe'el loq, are kijalom chik jun uxol b'e, te'uri i ángel xukanaj kan ma Pedro utukel.

11Are uri ma Pedro xril ub'e chi ni'pa ktijin chrilik lik qatzij, rumali xub'ij: Wo'or kwilo chi lik qatzij chi i Ajwal utaqom li u-ángel, chi kinresaj pu'ab' ma Herodes xaq chupam i k'ax chi kich'ob'om u'anik aj Judío chwe; xcha.

12Chrijil chik unab'exik ile, x-e chi rachoch ati Mariy chi uchuch ma Wan chi xaq ma Marcos kb'ix che; ipa kimolom wi kib' k'iyal winaq che i lapanik ru' i Dios. 13Xuk'ojk'a uchija chi o chi b'e xaq xch'awik, are uri jun ali chi al Rode ub'i, xel li chrilik pachinoq. 14I ali le are xuta uch'awb'al ma Pedro, xsach uno'oj rumal chik ukikotemal, xujaq ti chik uchija, x-e la pa'anem chub'ixkil chke i je o pa ja chi ma Pedro tak'al chwach uchija. 15Ike xkib'ij che:

—¡Xa at ch'uj!

Xwiri i ali lik kub'ij chi qatzij are ma Pedro. Ike xkib'ij chik:

—Ile are taj, xa u-ángel —xecha.

16Tz'aqat i ma Pedro xumayij ti uk'ojk'axik uchija. Are xkijaq uchija xaq are xkilo chi qatzij are ire, lik xkixij kib'. 17Xwiri ma Pedro xuk'ut ru' u'ab' chi mech'awik. Te'uri xulap chke wach relsaxik xu'an i Ajwal che chila prexil. Xaq xub'ij chke:

—Chiya retamaxik che ma Jacobo xaq chke i qachalal chwach i Cristo.

Te'uri xel b'ik, x-e chik che jun tinimit.

18Are xsaqirik, i achiyab' chi je yij che i ch'oj lik xe'ok che i k'achirik, man keta'am taj ipa o wi i ma Pedro. 19I ma Herodes xutaq utzukuxik, xwiri are xuriq taj, xuya keqan i chajal rumali xutaq kikamsaxik. Chrijil chik ile, i ma Herodes xel pa Judea, x-e jeqel pa tinimit Cesarea.

Ukamik ma Herodes

20X-on panoq i ma Herodes xpe roywal chke i winaq aj Tiro xaq chke aj Sidón. Rumali ike le, xkiyijb'a chkiwach chi konojel is keupon ni chwach ma Herodes. Are uri xetiki chuqajsaxik uk'ux ma Blasto chi jun nim laj ajpatan chrij i ajawinel ma Herodes. Rumali xkitz'onoj utzil che chi kukoj kitzij chwach ma Herodes, chomsab'al kib' ru', man i keb' tinimit le chila putinimit i ajawinel le kpe wi kiwa. 21I ma Herodes xuch'ik jun ij junpa keupon chwach. Are xuriq i ij, xukoj u'u' chi lik chom xaq nim u'ij te'uri xkub'i pukub'ib'al ipa ku'at wi tzij, te'uri xujeq lapanik chkiwach. 22Are uri i winaq, xe'ok che i sik'inik xaq xkib'ij: “¡I achi chi kch'awik le to' ti winaq, ile lik dios!” Xecha. 23Are uri lik che i or le, jun ángel re i Ajwal xu'an che ma Herodes chi xpe jun yob'il che, man xukoj ti u'ij i Dios. Are uri xkamik i xtijaw kumal i amol.

24Tz'aqat i utzij i Dios ktijin upaxik uwach xaq xaipa ktijin wi utzijoxik.

25I ma Bernabé xaq i ma Saulo, are xeutzin che i kichak pa Jerusalén, xetzalij chik chila pa Antioquía, xkik'am b'i ma Wan ku', chi xaq ma Marcos kb'ix che.

Currently Selected:

Hechos 12: ACHICUB

Highlight

Copy