Málkúsi 6
6
Epuɔ Naázalɛt é ka ntē ánɛ Yɛɛ́so néŋ ɛ́
(Mat 13.53-58; Lúk 4.16-30)
1Yɛɛ́so á fhó á ajʉʼ mɛ́t, ŋgʉ̄ɔ mé Naázalɛt, álāʼ zīi a le tswhí éwú, nnɔ yí é gɔ́ á nzem nzhɛ̄nɛ á yí. 2Aleʼé aswite á shʉʼ ŋkūʼ, á gʉɔ ŋkó á ŋgyā aswiŋte, ńzī á lezīʼne epuɔ. Á lɛ si ŋkʉ̄ʼnɛ epuɔ tɛ nzáne pīi, pɔ́ júʼɔ á yí, pɔ́ nɔŋ ndʉ́ɛ́ ŋ́gɛ: ŋiŋ wuɔ a lɔkɔ ejʉɔ ntií anu ŋkɔ́ʼɔ egɔ́? A lɔkɔ ejʉɔ ntií azhɛ̄‑anu efhɔ́ɔ egɔ́? Tɛ nzéŋɛ ndɔkɔ ŋghʉ̄ɛ meŋkʉʼne menu páʼa ā? 3Ŋiŋ wuɔ a te ŋkwɛ‑methū ŋgyā, ŋ́gɔ́ á méŋ Malía á kɛ? A te zéŋ ŋgɔ́ á méŋ mɔ́ Jáak, pɔ́ Jozé mbɔɔ Zwíde ŋghʉ̄ á Simɔŋ ɔ́ kɛ? Epɔ̄ memía pí epi wɔnzwí é té zéŋ nnáŋte ega á mbū pímpɛ ɛ́ lɛ̄? Ńdé épúp, pɔ́ té fɛ́ nnɛ̄t ŋgyá á mbū yí í. 4Yɛɛ́so á lé á mbū pɔ́p ŋ́gɛ: «Mɛ́ wuʼteē á ntswi‑ŋke Ndém ejʉʼ tsem, tɛ cʉ́ʼ á alāʼ pɔ́p. Mɛ́ waák á yí wáke á atseŋ ŋgyā pɔ́p, mbɔɔ á mba pɔ́p. » 5Á gɔ gɔɔ́, tɛ Yɛɛ́so a te kūʼ á leghʉ tsɔ taʼ ŋkʉʼne anu éwú ú, ńdaʼ páʼ, a le zapá mbū mí á athū megaŋ agɔ tsɔ méshɔ́ʼɔ́ lɛ́, pɔ́ te. 6Á kʉʼne á Yɛɛ́so tɛʼ, páʼ pɔ́ ka fɛ́ nnɛ̄t ŋgyá mé yí í.
Yɛɛ́so a á ega ntúɔ́ meziŋ‑ntō pí ntsɔp pīa mé legēm
(Mat 10.5-15; Lúk 9.1-6)
Yɛɛ́so á fhó éwú, ńzī á lekʉ̄ʼne ánɛ mekap alāʼ á eshhʉ̄ ajʉʼ mɛ́t, ńnɔŋ nzíʼnɛ epuɔ. 7Ŋ́ghʉ ncúʼte megaŋ nnɔ pí epuɔ ntsɔp pīa mé legēm, ńtó á wɔ́p mémpīa mémpīa, ŋ́gē etó á wɔ́p, ŋ́gyá á wɔ́p mete á lelɔk ŋkó ńjūŋ mesī ánɛ epuɔ. 8Ńtɔ̄ʼ á wɔ́p ŋ́gɛ: «Ndɛ́ʼ ŋiŋ á gē egʉɔ, ḿbɛ́ azō, ńdaʼ athʉ́ ntɛte tɛté. Ndɛ́ʼ ŋiŋ á tswík etsō lejhʉ̄, ndɛ́ʼ ŋiŋ á pɛ́ apa. Ndɛ́ʼ ŋiŋ á wɛ ŋkāp á apa yí. 9Pɛ ezwík ezaŋné meláŋ, ndɛ́ʼ ŋiŋ á maʼ menzhó mɛ́mbīa. » 10Yɛɛ́so á zéŋ ndé á mbū pɔ́p ŋ́gɛ: «Pɛ gʉɔ tɛ ŋkó á ajʉʼ, mɛ́ kókne á wɛ́ ánɛ eziɛ́ ŋgyā lɛ́, pɛ enáŋ éwú tɛ ndáʼ efhó á ajʉʼ mɛ́t ŋgʉ̄ɔ. 11Pɛ gʉɔ tɛ ŋkó á ajʉʼ, mɛ́ té á wɛ́ kókne, ŋ́gɔ́ te anu zɛ́ júʼ, pɛ ge efhó á ajʉʼ mɛ́t egʉɔ, ńjɔ̄kte avɔ́p á mekhu pɛ, ńtsyā éwú, ńdɔk ntswī á légɛ, pɛ a pɔ́p é té wɛ. 12Meziŋ‑ntō é lɛ ŋgʉ̄ɔ, ŋ́kʉ́ʼne esáʼ éshúŋ epuɔ ŋ́gɛ, pɔ́ egɔ̄ nnɛ̄t zɔ́p, ŋ́gwáʼ atswhī tepɔŋ zɔ́p. 13Pɔ́ le zéŋ nnɔŋ njūŋɔ mesī ánɛ epuɔ tɛ nzáne. Ńnɔŋ ndɔ̄kɔ mevɛ̄t ntswɛ́tɛ megaŋ agɔ tɛ nzáne, pɔ́ tʉɛ.
Elōde pɔ́ Jáaŋ nnoʼ‑epuɔ á ntshi
(Mat 14.1-12; Lúk 9.7-9)
14Lezēŋ Yɛɛ́so é le pú nnɔŋ esɛ̄tɛ ejʉʼ, efɔ Elōde á júʼ azí. Ḿbiŋ njúʼ mɛ́ nɔŋ ndʉ́ɛ́ ŋghʉ̄ɛ lɛ, Jáaŋ nnoʼ‑epuɔ á ntshi, a á zím á nnɔ mepfhō, melaʼ épúp tɛ́ a wɛɛ̄ mete, á lelɔk ŋghʉ̄ meŋkʉʼne menu. 15Emɔ̄ʼ epuɔ é nɔŋ ndʉ́ɛ́ ŋ́gɛ: «A gɔ́ áa Eli. » Emɔ̄ʼ é nɔŋ ndʉ́ɛ́ azɔ́p ŋ́gɛ: «A gɔ́ áa mmɔʼ ntswi‑ŋke Ndém páʼ epi efʉʼ mvhɔ lā. » 16Elōde á júʼ menu muɔ mɛ́t, ńdé azí ŋ́gɛ: «Á anuúnē, ŋiŋ wuɔ mɛ́t a á Jáaŋ, meŋ nde tswī mɛ́ záʼ athū zí, yí tɛ́ a á zím ánɛ lewhʉ̄. »
17Á zi ŋgē egɔ́ épúp, mbɔ Elōde a le tswī mɛ́ gɔ Jáaŋ, ŋ́kwɛ́t á yí, ńnéŋ á ŋgyā atʉɛ́. A lɛɛ́ ŋghʉɛ épúp, melaʼ Elodiade yīi, a lɛ á nzwí méŋ mɔ́ yi Fílíio, tɛ́ á kʉɛ. 18Jáaŋ a le nɔ̄ŋ eshúŋɔ á Elōde ŋ́gɛ: «Lepé é té si mvéŋɛ ŋ́gɛ, o ekʉ̄ɛ á nzwí méŋ mɔ́ wu, ńdɔk ŋghʉ̄ ewu ú. » 19Á gɔ́ épúp, Elodiade á tém lefā Jáaŋ. Ńnɔŋ efāʼa á lezwhī á yí, ḿbiŋ nnɔ̄ŋ te ŋgwīɛ̄ eshhʉ̄ ɛ́, 20melaʼ mīi, Elōde a le nɔ̄ŋ ŋguʼtɛ á Jáaŋ, páʼ a á ŋiŋ Ndém, ńzéŋ nnɔŋ ŋghʉ̄ɛ ajū mīi, Ndém a á si ŋkɔ̄ŋɔ. Elōde a le zéŋ nnɔŋ ŋkáptɛ á yí. Ńnɔŋ nzwíʼtɛ anu zīi, a shúŋɔ, anu mɛ́t á nɔŋ ŋgēnɛ á yí, á ke nnɔ̄ŋ ŋkɔ̄ŋɔ á lezwīʼte ashuŋne zí.
21Mɛnzhɛ á shʉʼ aleʼé ntsɔ́ʼɔ á mbū Elodiade: efɔ Elōde á gɔ́ á anɔʼ ŋghʉ̄ɛ lekāk, ńdɔkɔ ŋkímtɛ aleʼé zīi, mɛ́ le zhí á yí, mbɔ a á ntɔ́ŋ mekém alāʼ, ńtɔ́ŋ metɛŋgyā wɔ lʉɔ́ʼ‑ncu, mbɔɔ memía epuɔ á Ŋgaliléa. 22Méŋ Elodiade eyi menzwí, á kó á ŋgyā lekāk, ńzéŋ, á pɔŋ á efɔ Elōde pɔ́ a mege pí pɔŋŋ, tɛ á lé á mbū mɔ́ menzwí mɛ́t ŋ́gɛ: «Zɛ́tte á gá ajū mīi, o ó kɔŋ, meŋ ndɔk mmāʼ á wú. » 23Éshúŋ tɛ ŋkā meka muɔ á mbū yí ŋ́gɛ: «O púu nzɛ́tte ŋ́gɛ, meŋ emāʼ á wú ŋgyá akɔ̄ lɛ́, mbɔ meŋ a yá, tɛ á zi mbú ŋgɔ́ amɔ̄ʼ apak alāʼ zá. » 24Mɔ́ menzwí mɛ́t á tó ŋgʉ̄ɔ ńzɛ́tte á mɛ́ wɔp ŋ́gɛ: «Meŋ etswī ŋ́gɛ efɔ a elɔ̄k akɔ̄ mmāʼ á gá á?» Mɛ́ wɔp á tsɔ́ʼ ŋ́gɛ: «Gʉɔ nzɛ́tte á athū Jáaŋ nnoʼ‑epuɔ á ntshi. » 25Á lɛ ŋkʉ̄te, ḿbīŋ nzem ndé á mbū efɔ ŋ́gɛ: «Meŋ á kɔŋ ŋ́gɛ, mɛ́ eyá á athū Jáaŋ nnoʼ‑epuɔ á ntshi á mbū meŋ, é tsetsɔŋɔ á ntē apak akāŋ. » 26Efɔ á júʼ épúp, mbū mí é pwɛ́t, lelʉʼ á piŋ te zɛ́t éwú, melaʼ meka mīi, a á ndáʼ ŋkā á mvhɔ mege pí. 27Á lɛ ntó á taʼ mmaʼ‑ncu ŋ́gɛ, á egʉɔ ndɔ̄k athū Jáaŋ nnoʼ‑epuɔ á ntshi eshʉ̄ʼ. Mmaʼ‑ncu á lɛ gʉ̄ɔ á ŋgyā atʉɛ́, ńzáʼ athū Jáaŋ, 28ńnéŋ ánɛ apak akāŋ, ńdɔk eshʉ̄ʼ ŋ́gyá á mbū mɔ́ menzwí. Mɔ́ menzwí á tswí, ŋ́gyá mé mɛ́ wɔp. 29Megaŋ nnɔ Jáaŋ é júʼ anu jʉɔ mɛ́t, éshʉʼ ŋkʉ̄ɛ apfhō zí ndɔk ŋgʉ̄ɔ ńtúŋ.
Yɛɛ́so a á ega nzékɛ á ŋiŋnɔŋ ntsāʼ táa
(Mat 14.13-21; Lúk 9.10-17; Jáŋ 6.1-14)
30 Meziŋ‑ntō Yɛɛ́so mɛ́t é piŋ nzem, ńcúʼte á lezēŋ yí, ḿbɛ́te menu ntsem mīi pɔ́ ŋghʉ̄, éshúŋ á yí, mbɔɔ emi pɔ́ é nzíʼne epuɔ. 31Pɔ́ zɛ́t éwú, epuɔ tɛ nzáne é nɔŋ eshʉ̄ʼɛ ńjʉ́ɔ á Yɛɛ́so: wɔ nɔŋ ŋgʉ̄ɔ, wɔ nɔŋ ŋkɔ́ʼɔ, tɛ pɔ́ a meziŋ‑ntō pí, é té wɛ̄ njhʉ̄ zīi, pɔ́ gɔ elɔ̄ɔk ḿpfɛ́t azō ɔ́. Yɛɛ́so á lé á mbū pɔ́p ŋ́gɛ: «Pɛ eshʉ̄ʼ, ḿpɛ efwɔ̄ʼ nnɛ̄t, éfāʼ ajʉʼ zīi, ŋiŋ a te éwú ú, pɛ ezwīte éwú. » 32Pɔ́ a pɔ́p ndaʼ, é lɛ ŋgʉ̄ɔ nzíʼ ŋ́kó á ntē akɛnūʼ, éfwɔ̄ʼ nnɛ̄t ŋgʉ̄ɔ mé ajʉʼ zīi ŋiŋ a te éwú ú. 33Ńnɔŋ ŋgʉ̄ɔ, epuɔ tɛ nzáne é jʉ́ɔ á wɔ́p, ŋ́gīŋ, éfhó ánɛ metésɔŋ ntsem nzīŋ á esī, ŋ́kʉte mbīk á ajʉʼ zīi, Yɛɛ́so pɔ́ a meziŋ‑ntō pí é nnɔŋ ŋgʉ̄ɔ mé éwú. 34Yɛɛ́so á kó éwú, ńtó á ntē akɛnūʼ, ńjʉ́ɔ atʉtʉ epuɔ mɛ́t, mezeŋɛ mɔ́p é kú á yí tɛʼ, melaʼ mīi pɔ́ lɛ éwú páʼ memvhō mīi, é té á mpfɛnne wɛ̄ɛ lā. Á zi á lezīʼne á wɔ́p menu tɛ nzáne. 35Njhʉ̄ e le gɔ́ mbɔ e é zii ntɔ́k. Megaŋ nnɔ Yɛɛ́so é shʉʼ ndé á mbū yí ŋ́gɛ: «Ajʉʼ zīi ḿpɛ é éwú la, mba ŋiŋ e te éwú ú, njhʉ̄ é zéŋ ŋgɔ́ mbɔ e é zii ŋgʉ̄ɔ. 36Tswiī epuɔ e epīŋ nzem mé mekap alāʼ mīi, é ŋgʉ̄ŋ ega, mbɔɔ mé emɔ̄ʼ ejʉʼ, ŋ́kó nzó azō mpfɛ́t. » 37Yɛɛ́so á pwɛt á mbū pɔ́p ŋ́gɛ: «Pɛ méŋwɛ̄t eyá á wɔ́p etsō pɔ́ epfɛ́t. » Pɔ́ lé á mbū yí ŋ́gɛ: «Á páʼa, pek egʉɔ nzó mblɛ mé ndenía#6.37 Ndenía é si ŋgɔ́ ŋkāp zīi, mɛ́ gɔ elɔ̄ɔk mbɛ́ á ŋiŋ, ánɛ taʼ aleʼé alāʼ afaʼ. ŋkhʉ pīa, ńdɔk nzék á wɔ́p lɛ́?» 38Yɛɛ́so á zɛ́tte á wɔ́p ŋ́gɛ: «Pɛ wɛɛ̄ mblɛ ega ntāʼ shɔ́ʼɔ́? Pɛ egʉ̄ɔ ncʉ̄te. » Pɔ́ gʉɔ njʉ́ɔ, ḿbīŋ nzem mbwɛ̄t á mbū yí ŋ́gɛ: «Pek wɛɛ̄ mblɛ ega ntāʼ táa, ŋ́ghʉ̄ mesōh ntāʼ pīa. » 39Á tswi á mbū pɔ́p ŋ́gɛ: «Pɛ eghʉ̄, epuɔ metsem e enáŋte á esī epfhɔɔ́ epfhɔɔ́, ánɛ mvēŋ eswī. » 40Pɔ́ náŋte á esī epfhɔɔ́ epfhɔɔ́. Taʼ apfhɔ́ á nɔŋ ŋkūʼɔ ŋiŋnɔŋ megēm táa, amɔ̄ʼ á kó nnɔ̄ŋ ŋkūʼɔ á ŋiŋnɔŋ ŋkhʉ. 41Yɛɛ́so á tswí mblɛ jɔ̄ ntāʼ táa pɔ́ mesōh mwɔ̄ ntāʼ pīa, ḿbʉ́ʼɛ menēk mí ncʉ̄ lephū, ésyákne á Ndém éwú. Ḿbwɔ́ʼte mblɛ ŋgyá á mbū megaŋ nnɔ pí ŋ́gɛ, pɔ́ egāpte á mbū alāʼ. Á gapte azí mesōh ntāʼ pīa á mbū epuɔ metsem. 42Awíɛ awíɛ á pfɛ́t tɛ nzwɛ́t. 43Mɛ́ lakte epwɔ̄ʼ mblɛ tsīi, é vuʼɔ pɔ́ mesōh, é ló metúŋ ntsɔp pīa mé legēm. 44Epuɔ pīi é le pfɛ́t mblɛ jʉɔ mɛ́t, é le zá tɛʼ, mbaŋa ndaʼ ndaʼ é gɔ́ ntsāʼ táa.
Yɛɛ́so a á ega nzīŋɛ á ndo ntshi
(Mat 14.22-33; Jáŋ 6.16-21)
45Ajʉɔ anu mɛ́t á lɛ ŋgē etɔ́ke, Yɛɛ́so á kone nnɔ yí ŋ́gɛ, pɔ́ ekɔ́ʼ ŋkó á ntē akɛnūʼ, ńtó ntshi mbīk á nzéŋ mmɔʼ, á eshhʉ̄ Betsayída, yí ecʉ́ʼ nzɛ́t ndāʼnɛ alāʼ, pɔ́ egʉ̄ɔte. 46Pɔ́ a alāʼ é gɔ́ tɛ efākne, á pe mé ndo lekwɛ̄t á eswíŋte Ndém. 47Á ghʉ ŋgɔ́ eseéŋ‑njhʉ̄, nnɔ yí é lɔk akɛnūʼ ŋgɔ́ á tsetsɛlɛ ntshi, yíléyī é cʉ́ʼ nzɛ́t á ndo ŋgia. 48Ńjʉ́ɔ páʼ nnɔ yí é si njʉ́ɔ ŋgʉɔ̄ʼ á lelɔk akɛnūʼ nzīŋ, melaʼ mīi afēm á lɛ si ntúʼu mé eshhʉ̄ yīi, é gɔ eyá alɔ́ʼ. Á kó ŋgɔ́ ánɛ ajūɔ melanjhʉ̄, Yɛɛ́so á nɔŋ nzīŋɛ á ndo ntshi, éshʉ̄ʼɛ mé lezēŋ tsɔ́p, ŋ́kó nnáʼ ŋ́ghʉ̄ páʼ a gɔ á ntáʼte pɔ́p lā. 49Pɔ́ jʉ́ɔ páʼ a á si nzīŋɛ á ndo ntshi, ŋ́kwāŋ ŋ́gɛ, agega ŋiŋ. Ńzī á lelēŋte meŋguŋ. 50Pɔ́ metsem é le jʉ́ɔ á yí épúp páʼā, ḿbú mbɔ́k tɛʼ. Yɛɛ́so á lɛ eshúŋne á mbū pɔ́p ŋ́gɛ: «Pɛ ekúʼte nnɛ̄t zɛ. A gɔ́ áa gá, ndɛ́ʼ pɛ ezéŋ mbɔ́k. » 51Ŋ́kɔ́ʼ ntswɛ́tte á wɔ́p á ntē akɛnūʼ, afēm á lɛ nzáʼa. Á pú ŋkʉ̄ʼne á wɔ́p, tɛ mɛ́ la amɔ̄ʼ azō épúp jʉ́ɔ ɔ́. 52Ŋ́kʉ̄ʼnɛ á wɔ́p melaʼ mīi, leghi tsɔ́p é le zɛɛ́t ntsɛ́tte tsɛtté. Pɔ́ lɛ te júʼ ŋke yīi, Yɛɛ́so a le lɔ̄k mblɛ, ńtswī á mbū pɔ́p ɔ́.
Yɛɛ́so a á ega á tésɔŋ Jenezalɛt ŋghʉ̄ɛ, megɔ é tʉɛ
(Mat 14.34-36)
53Pɔ́ tó ntshi tɛ mmāk, ŋ́kó á Jenezalɛt, á amɔ̄ʼ akap alāʼ, ńtsēŋɛ akɛnūʼ á akʉŋɛ́ ntshi. 54Éfhó á ntē akɛnūʼ ntó tɛ ndɛ̄ ŋgē etshí á esī, epuɔ é yiŋ á Yɛɛ́so. 55Ŋ́kʉte ŋgʉ̄ɔ á memba ntsem, ŋ́kʉ̄ɛte megaŋ agɔ ánɛ ekō, ńdɔk eshʉ̄ʼ egʉ́ɛ egʉ́ɛ yīi, mɛ́ é si mbúu ŋghítɛ ŋ́gɛ, Yɛɛ́so a á éwú. 56Tɛ mbɔɔ akɔ̄ ajʉʼ lɛ́ yīi, Yɛɛ́so a le nɔ̄ŋ ŋkúɔ́ éwú, kɛ á lepfhō alāʼ lɛ́ɛ, kɛ á metésɔŋ lɛ́ɛ, kɛ á ntē akap alāʼ lɛ́ɛ, mɛ́ lɔkɔ megɔ eshʉ̄ʼɛ nnɔ̄ŋtɛ á legʉ̄ŋ mɛnzhɛ, ájʉʼ zīi Yɛɛ́so a a nɔŋ etɔ́kɔ, mɛ́ epúʼ mbū ŋ́gɛ, a elɛ ncʉ́ʼ, megaŋ agɔ e epfēŋ tsɔ alē nzhó zí ndaʼ. Epuɔ menɔŋ ntsem pīi, é le nɔ̄ŋ mpfeŋɛ á yí, é le pú nnɔŋ ntʉ̄ɛ̄.
Currently Selected:
Málkúsi 6: ybb
Highlight
Share
Copy
Want to have your highlights saved across all your devices? Sign up or sign in
© CABTAL
