Málkúsi 7
7
Mɛt alāʼ pɔ́ ashuŋne Ndém
(Mat 15.1-20)
1Amɔ̄ʼ aleʼé á shʉʼ ŋkūʼ, epuɔ Falísia mbɔɔ emɔ̄ʼ wɔ kɛ́ʼte‑mbé Ndém é shʉʼ ncúʼte á lezēŋ Yɛɛ́so, éfhɔ́ɔ á Yelósalɛm. 2Ńjʉ́ɔ emɔ̄ʼ epuɔ ánɛ nnɔ Yɛɛ́so, é nɔŋ mpfɛ́tɛ azō mé mbū tepɔŋ, té sok epe éwú.
3Á gɔ́ páʼ, epuɔ Yúda metsem tɛ ŋkó epuɔ Falísia, é gɛ te mpfɛ́tɛ azō, té gɔ́ yīi pɔ́ é lɔk ntshi esōk mbū mɔ́p tɛ ŋkó ánɛ metswiʼté, páʼ memɔʼɔ́ pɔ́p é le láʼ nzápa épúp ɔ́. 4Ŋ́kɔ́ʼ á ajʉʼ nnɔ, ńdáʼ ŋgē epfɛ́t azō, mbɔ pɔ́ é sok epe ánɛ pɔ́p. Pɔ́ zeéŋ ŋkúʼte emɔ̄ʼ menu tɛ nzáne mīi, é fhɔ́ɔ á mbū memɔʼɔ́ pɔ́p, páʼ lesok epe ánɛ tsitsi lepé, méndɔ̄ŋ, méŋgwʉ́ŋ mbɔɔ ekāŋ, mbɔɔ [mekó] lā. 5Epuɔ Falísia pɔ́ wɔ kɛ́ʼte‑mbé mɛ́t, é zɛ́tte á Yɛɛ́so ŋ́gɛ: «Megaŋ nnɔ pú é si mpfɛ́tɛ etsō té sok epe á mbū pɔ́p. Pɔ́ té si nzīŋɛ ánɛ mɛt alāʼ yīi, wɔ maŋgānjʉʼ pímpɛ é le ziʼné ɛ̄, melaʼ akɔ̄?» 6Yɛɛ́so á pwɛt á mbū pɔ́p ŋ́gɛ: «Pɛ pwɔ̄ é megaŋ ŋkɔŋ menēk. Izayi ntswi‑ŋke Ndém a le té njhʉ̄ eshúŋne ánɛ pɛ, a le lé ŋ́gɛ:
«Epuɔ alāʼ puɔ, pɔ́ lɔɔ̄k áa mekup nchu tɛ́ ŋghʉ̄ mekuʼ má.
Ntē wɔ́p é pú te ánɛ
meŋ tshí léée.
7Pɔ́ gɛ pɔ́ é si ŋgūʼtɛ á gá páʼā, á gɔ́ áa ndémndēm.
Anu zīi pɔ́ zíʼnɛ epuɔ, ńtɔ́ŋɔ lɛ anu zá lā,
é gɔ́ áa menu mīi, epuɔ menɔŋ mé le zapáā. »
8Á épúp tɛ́ pɛ é si ŋgwáʼa mbé Ndém, ńcʉ́ʼɛ ŋkúʼtɛ áa mɛt epuɔ menɔŋ. 9Yɛɛ́so á zéŋ ndé á mbū pɔ́p ŋ́gɛ: «Pɛ é si nchʉ́ɛ nnɛ̄t ŋgwáʼa mbé Ndém, ńcʉ́ʼɛ ŋkúʼtɛ áa mɛt alāʼ wɛ. 10Á gɔ́ɔ lɛ, Mɔɔ́sɛ a le lé ŋ́gɛ: «Ghʉ mekuʼ mɔʼɔ́ wu pɔ́ mɛ́ wu. » Ńzéŋ ndé ŋ́gɛ: «Ŋiŋ yīi a á piŋ nzɔ̄ á mɔʼɔ́ yi, kɛ́ á mɛ́ wɔp, mɛ́ lɛ nzwhí á ŋgaŋ zwhií. » 11Táʼ, pɛ pwɔ̄, pɛ kʉʉ̄ŋ esɛt, ńcʉ́ʼɛ ndʉ́ɛ́ ŋ́ghʉ̄ áa lɛ: «Ŋiŋ a wiɛ ajū mīi, a gɔ elɔ̄ɔk ntswíte á mɔʼɔ́ yi kɛ́ á mɛ́ wɔp, ḿbīŋ ndé ŋ́gɛ, á cʉ́ʼ á Kɔɔban, ńdɔkɔ ŋ́gɛ á cʉ́ʼ á ajūɔ Ndém, 12mbɔ pɛ gɔ le cʉ́ʼ, ŋgaŋ á zéŋ mbɛ́ azō mɛ́t, ńdɔk ntswíte á mɔʼɔ́ yi kɛ́ mɛ́ wɔp ɔ́. 13Púp, pɛ elɔ̄ɔk á mɛt alāʼ wɛ yīi, pɛ é si nzíʼnɛ epuɔ, ḿbík ashuŋne Ndém. Ńzéŋ nnɔŋ ŋghʉ̄ɛ emɔ̄ʼ menu mīi, é swhií emuɔ tɛ é zánɛ.
Kwaʼ ajū mīi, á gɔ etsēŋte á ŋiŋ
(Mat 15.10-20)
14Yɛɛ́so á zéŋ ntɔ́ŋ alāʼ, ńdé á mbū pɔ́p ŋ́gɛ: «Pɛ metsem etéŋɛ metuúŋ, ńjúʼ anu zīi meŋ gɔ á ndʉ́ɛ́ la. 15Amɔ̄ʼ ajū mīi á gɔ efhó á nzem apɛ́, ŋ́kó á ntē nnɛ̄t ŋiŋ, ŋ́ghʉ̄ á cʉ́ʼ á ŋgaŋ epe, aziɛ́ á té éwú ú. Ajū mīi á fhoó á ntē ŋiŋ tɛ́ ntó, aziɛ́ mé ghʉ̄ʉ, á cʉ́ʼ á ŋgaŋ epe. [ 16Ŋiŋ a wiɛ metuúŋ á lelɔk njúʼ ejʉʼ, á júʼ.]
17Yɛɛ́so á ghʉ efhó á nnɔ alāʼ ntó, ḿbīŋ nzem tɛ ŋkó á ŋgyā, megaŋ nnɔ pí é zɛ́tte á yí ŋ́gɛ, a ekɛ́ʼte ashuŋne lepúʼ jʉɔ mɛ́t, éshúŋ á wɔ́p. 18Á pwɛt á mbū pɔ́p ŋ́gɛ: «Mbɔɔ pɛ azɛ́, pɛ ka wɛ̄ leghi á lelɔk njúʼ anu jʉɔ mɛ́t ɛ́ lɛ̄? Pɛ ka zhɛ́ á légɛ, azō á gɔ le fhó á nzem apɛ́, ŋ́kó á ntē nnɛ̄t ŋiŋ, ḿbiŋ ntsēŋte á yí lɛ̄? 19Azi á fhoó á nzem apɛ́ lā, á té á ntē ŋiŋ kó, á koó áa levem ŋiŋ, ŋ́ghʉ ntɔ́k ŋ́gwhʉ̄ á akwɛt. Yɛɛ́so á lɛɛ́ ndʉ́ɛ́ épúp, ńdɔkɔ ŋ́gɛ, etsō lejhʉ̄ ntsem é páʼā, amɔ̄ʼ alɔ́ʼ á pú te éwú ú. » 20Yɛɛ́so á zéŋ ndé ŋ́gɛ: «Ajū mīi á toó á nchu ŋiŋ lā, aziɛ́ mɛ́t mé ghʉ̄ʉ, á cʉ́ʼ á ŋgaŋ epe. 21Anu tepɔŋ á fhoó á ntē ŋiŋ. Akwaŋte tepɔŋ mé fhoó á ntē ŋiŋ ntshóne á yí, á leghʉ agā. Á lejʉ, á lezwhīte epuɔ. 22Á lewɛ á mɛgap, á lecʉ̄ʼ á ŋgaŋ atsɔʼɔ́ ntɔ̄ŋ, á lecʉ̄ʼɛ nzáa esɔ̄, á lecʉ̄ʼɛ mbɔ̄pɔ epuɔ pɔpe, á legɔ̄ kékwáʼ, á lecʉ̄ʼ á ŋgaŋ sɛ́h ntē, á lecʉ̄ʼɛ esɛ́ʼɛ epuɔ sɛʼé, á lecʉ̄ʼɛ ŋŋáʼne ŋaʼné, á lecʉ̄ʼɛ ŋghʉ̄ɛ páʼ ŋiŋ te athū lā. 23Ntií ntiī etsō tepɔŋ cʉɔ mɛ́t, é toó á ntē nnɛ̄t ŋiŋ, tɛ́ ŋghʉ̄, ŋiŋ á cʉ́ʼ á ŋgaŋ epe. »
Lefɛ̄ nnɛ̄t menzwí yīi, a te ŋiŋ Yúda á
(Mat 15.21-28)
24Yɛɛ́so á fhó á ajʉʼ mɛ́t, ŋgʉ̄ɔ mé eshhʉ̄ apak ŋgɔŋ Tíi, ŋ́kó á ntē mmɔʼ ŋgyā, ńnɔŋ te ŋkɔ̄ŋɔ ŋ́gɛ, ŋiŋ a ezhɛ́ ajʉʼ zīi, a á éwú ú. Mɛ́ ke nzhɛ́ zhɛ́. 25Mmɔʼ menzwí, mbɔ esī e lē ŋgɔ á méŋ yi mɔ́ menzwí, á lɛ njúʼ á légɛ Yɛɛ́so a á shʉʼ, ńnáte eshʉ̄ʼ ŋ́gwhʉ̄ á mekhu yí, 26ḿbúʼ mbū ŋ́gɛ, Yɛɛ́so a elɛ njūŋ esī ánɛ méŋ yi. Menzwí wuɔ mɛ́t a lɛ te á mɔ́ Yúda á, ŋ́gɔ́ á mɔ́ Fenísia á ntē ŋgɔŋ Sília, ńnɔŋ eshúŋnɛ alāʼ epuɔ Glɛk. 27Yɛɛ́so á piŋ mbwɛ̄t á mbū yí ŋ́gɛ: «Cʉ́ʼ, ewɔŋkhʉ̄ e ezī mvhɔ mpfɛ́t azō tɛ nzwɛ́t. Á ka pɔ̄ŋ ŋ́gɛ, mɛ́ epɛ́ etsō ewɔŋkhʉ̄, ḿmāʼ á mbū epɔ̄ mbhʉ̄ ɛ́. » 28Menzwí mɛ́t á pwɛt á mbū Yɛɛ́so ŋ́gɛ: «Á épúp me Ndi, epɔ̄ membhʉ̄ é gɔ eké ndākte mesa ecū mīi, ewɔŋkhʉ̄ é nɔŋ mpfɛ́tɛ azō, é whʉte á esī, ḿpfɛ́t. » 29Yɛɛ́so á júʼ épúp, ńdé á mbū yí ŋ́gɛ: «Páʼ anu jʉɔ mɛ́t, á ké ntó á nchu lā, piŋ nzem mé mba ju. Esī e é tó ánɛ méŋ wu. » 30Á piŋ nzem tɛ ŋkó á mba, ŋ́kó á ŋgyā, ńjʉ́ɔ mɔ́ á nɔŋ á ndo ekó, ńzéŋ njʉ́ɔ páʼ esī e é tó ánɛ yí.
Yɛɛ́so a á ega mbɛ́tɛ á mbúʼ‑nchu, ŋ́gɔ́ á apuúʼ‑metuúŋ
31Yɛɛ́so á fhó á ntē Tíi ega mɛ́t ńtó, ńnɔŋ mbīŋɛ nzem mé eshhʉ̄ akʉŋɛ́ mía ntshi Ŋgaliléa, ńzápa á Sidɔŋ, ńtɔ́k ánɛ amɔ̄ʼ apak alāʼ, mɛ́ tɔ́ŋ lɛ Metésɔŋ-Legēm. 32Ŋ́gʉɔ tɛ ŋkó éwú, mɛ́ lɔk amɔ̄ʼ apuúʼ‑metuúŋ zīi, a gɛ eshúŋnɛ ndɔpne lɔpné, éshʉʼ mbúʼ mbū á mbū yí ŋ́gɛ, a elɛ nzápa apū zí ánɛ yí, a etē. 33Yɛɛ́so á lɔk á yí efhó á nnɔ ntó, pɔ́ yí é gʉɔ ntshí tɛ mé nzem, Yɛɛ́so á néŋ nthū mbū á ntē metuúŋ yí, ńzéŋ ntsōk mekī á apū yí, ńdɔk mpfēŋ alē zí, 34ńdɛ mbʉ́ʼɛ menēk mí, ńcʉ̄ lephū, ŋ́kɔ́ʼne azwakne, ńdé á mbū yí mé alāʼ zɔ́p ŋ́gɛ: «Efāta», ńdɔkɔ ŋ́gɛ: «Tsɔ́ʼɔ nnɛ̄t. » 35Metuúŋ mí é lɛ ntsɔ́ʼɔ, alē zí á lɛ ŋkɛ́ʼte, á zi á leshūŋne á mbɔŋɔ́. 36Yɛɛ́so á piŋ nzem, ńtɔ̄ʼ ŋ́gɛ, ndɛ́ʼ pɔ́ pú eshúŋ á ŋiŋ. Ŋ́ké nnɔŋ ntɔ̄ʼɔ á wɔ́p é lɛ akɔ̄ lɛ́, pɔ́ nɔŋ ntswīʼnɛ éshúŋ shuúŋ. 37Á le nɔ̄ŋ mbú ŋkʉ̄ʼnɛ á wɔ́p tɛʼ tɛʼ, pɔ́ nɔŋ ndʉ́ɛ́ ŋ́gɛ: «Ŋiŋ wuɔ á si ŋghʉ̄ɛ akʉ̄ɛ akʉ̄ɛ á mbɔŋɔ́ tɛʼ. A á si ŋghʉ̄ɛ wɔ apuúʼ‑metuúŋ, é júʼu ejʉʼ, wɔ mbúʼ‑nchu, é shúŋnɛ. »
Currently Selected:
Málkúsi 7: ybb
Highlight
Share
Copy
Want to have your highlights saved across all your devices? Sign up or sign in
© CABTAL
