Lúkási 15
15
Ashuŋne lepúʼ ánɛ mvhō zīi e le píī, mɛ́ zéŋ njʉ́ɔ
(Mat 18.12-14)
1Mɛ́ zɛ́t nzhɛ̄nɛ á Yɛɛ́so zhɛne. Emɔ̄ʼ epuɔ é gɔ́ éwú, ŋ́gɔ́ epuɔ pīi mɛ́ gɛ ntónɛ á wɔ́p, ŋ́gɛ epuɔ tepɔŋ. Emɔ̄ʼ é gɔ́ á nnɔ pɔ́p, ŋ́gɔ́ wɔ tswí‑ncup. Pɔ́ lɛɛ́ ntshótɛ nnɛ̄t mé lezēŋ Yɛɛ́so efʉʼ metsem, ŋ́gɔ̄ á nzwíʼtɛ ashuŋne zí. 2Epuɔ Falísia pɔ́ wɔ kɛ́ʼte‑mbé Ndém, e ejʉ́ɔ épúp, ḿbú nzwɛ́ttɛ á tsetsɛlɛ pɔ́p, ńdʉ́ɛ́ ŋ́gɛ: «Ŋiŋ wɔ̄ pɔ́ epuɔ tepɔŋ, é si nzīŋɛ, ńzéŋɛ mbútɛ etsō mpfɛ́tɛ. » 3Yɛɛ́so á lɛ ndɔ̄k ashuŋne lepúʼ jʉɔ, ḿbwɛt ndé ŋ́gɛ: 4«Awɔ́ ŋiŋ a á nnɔ pɛ, ŋ́gɔ́ éyi a wiɛ memvhō mí mbaŋ ŋkhʉ, taʼ á pí éwú, á néŋ té tshi emi ntsɔp levuʼɔ́ megēm levuʼɔ́ á késáatswɛt néŋ, ŋ́gʉɔ ndáʼ efāʼ ewiɛ́ táʼ mɛ́t, tɛ njʉ́ɔ á yí í? 5Ŋ́gɔ́ éyi a faʼa á yí tɛ ŋgɔ̄, mbɔ ŋgɔŋ e pɔŋ á yí. A ekʉ̄ɛ á yí, ńzápa á lekwɛ̄ yí. 6Ńdɔk mbīŋ nzem, ŋ́kó á mba, ńtɔ́ŋ mesoó pí, mbɔɔ megaŋ ŋkɔʼɔ́ mba, ńdé á mbū pɔ́p ŋ́gɛ: “Meŋ á jʉ́ɔ mvhō za zīi e ke píī, pɛ eshʉ̄ʼ ḿpɛ ekák.” 7Ndeŋ ndeŋ épúp, meŋ á si eshúŋɔ á wɛ́, mía mía lekāk a a shʉʼ egɔ́ á athʉ́ lephū, ánɛ athū taʼ ŋgaŋ mefa yīi, a á gɔ nnɛ̄t zi, ŋ́gwáʼ atswhī tepɔŋ zí, étsya epuɔ ntsɔp levuʼɔ́ megēm levuʼɔ́ pīi, pɔ́ é si ŋkwāŋa ŋ́gɛ, pɔ́ é wɔ te fa, pɔ́ gɔ le atswhī zɔ́p wáʼ.
Ashuŋne lepúʼ ánɛ ŋkāp zīi e le píī, mɛ́ zéŋ njʉ́ɔ
8«Oo, ŋ́ké te épúp ɔ́, mbɔ ewiɛ́ menzwí a wiɛ ŋkāp zi, memía epak legēm#15.8 Á lɛ ánɛ afʉʼ Yɛɛ́so, taʼ mía apak ŋkāp é kuʼ á lelɔk mbɛ́ aleʼé alāʼ ŋgaŋ afaʼ., taʼ apak á tó éwú mbí, á néŋ té kók ŋkaʼ, éfāʼ ajɔk, ńjɔ̄k esī ŋgyā mé nda mé nda, tɛ ndáʼ njʉ́ɔ ɔ̄? 9Afʉʼ zīi a á jʉ́ɔ, á tɔ́ŋ mesoó pí, pɔ́ a megaŋ ŋkɔʼɔ́ mba pí, ńdé ŋ́gɛ: “Ḿpɛ epú ŋkák, páʼ ŋkāp za e ke píī, meŋ á faʼ tɛ njʉ́ɔ.” 10Ndeŋ ndeŋ épúp, meŋ ndɔkɔ eshúŋɔ á wɛ́ ŋ́gɛ, lekāk é nnɔ mecɔʼ Ndém á lephū, ánɛ athū taʼ ŋgaŋ mefa yīi, a á gɔ nnɛ̄t zi, ŋ́gwáʼ atswhī tepɔŋ zí. »
Ashuŋne lepúʼ ánɛ mmɔʼ mɔ́ yīi, a le píī, ńzéŋ mbīŋ nzem
11Yɛɛ́so á zéŋ ndé ŋ́gɛ: «Mmɔʼ ŋiŋ a lɛ éwú, ŋ́gwɛ̄ ewɔŋkhʉ̄ pí mémpīa. 12Eyi ŋkhʉ̄ á shʉʼ nnáŋ tɛ ndé á mbū mɔʼɔ́ yi ŋ́gɛ: “Mɔ́ʼɔ, tsɔ́ʼɔtsɔ́ʼ, yá azá atekɛ́.” Mɔʼɔ́ yi á júʼ épúp, ńdɛ ŋgāpte etsō tsí á mbū ewɔŋkhʉ̄ pí mɛ́t. 13Á ge etɔ́k eleʼé shɔ́ʼɔ́ lɛ́, mɔ́ wɔ̄ á cúʼte etsí ecū mwɔ̄, éswīŋ. Ńdɛ ndɔ̄k ŋkāp mbú ŋgʉ̄ɔ mé atō. Ŋ́kó éwú, ńdɔ̄k atswhī tepɔŋ ntsēŋte ŋkāp jɔ̄ tɛ é pú mmī. 14Ŋkāp e le gē emi, afʉɔne á whʉ á ntē alāʼ mɛ́t. Nzi é zi á lezāŋ á yí. A te zéŋ ŋgwɛ̄ ajū mīi, a gɔ pfɛ́t ɛ́. 15Ńdɛ ŋgʉ̄ɔ njʉ́ɔ mmɔʼ ŋiŋ alāʼ mɛ́t, ŋ́kó afaʼ á mbū yí. Á tó á yí ŋ́gɛ a egʉ̄ɔ á ŋkāʼ, ńnáŋa ncʉ̄tɛ mekúna pí. 16Á kó ndɔ̄kɔ nzi, ncʉ̄tɛ, ŋ́gɔ́ tɛ esé á yí á lepfɛ̄t mmɔʼ etsō kúna mɛ́t, mɛ́ piŋ nzéŋ te véŋ. 17Á kwaŋ kwaŋ, tɛ ŋgɔ̄ nnɛ̄t zi. Ńdé ŋ́gɛ: “Megaŋ afaʼ mɔʼɔ́ ga, é mba mpfɛ́tɛ etsō tɛ ŋgwáʼa mvuʼ, meŋ mbiŋ ŋgɔ́ ega ŋkwhʉ́ɛ nzi. 18Meŋ a piŋ nzem, égʉɔ mé mba zek. Ékó éwú, éwhʉ á mekhu mɔʼɔ́ ga, élé gɛ: mɔ́ʼɔ, meŋ ke fā á mbū Ndém, ńzéŋ efā á mbū wu. 19Meŋ ka zéŋ ŋkūʼ yīi, o gɔ etɔ́ŋ á gá lɛ, méŋ wu ú. Lɛ ncʉ́ʼɛ ntswíi á gá áa páʼ, ŋgaŋ afaʼ wu lā.”
20«A le kwāŋ épúp, ńdɛ ndū á esī, ńdɔ̄k nzhɛ mba zɔp ŋgʉ̄ɔ. Ńzɛ́t tɛ éwú, mɔʼɔ́ yi á maʼ lezēk njʉ́ɔ á yí, mezeŋɛ mí é kó á yí. Á náte á yí, ŋ́gwhʉ̄ ánɛ yí, ésēŋte á yí. 21Mɔ́ á lé ŋ́gɛ: “Mɔ́ʼɔ, meŋ ke fā á mbū Ndém, ńzéŋ efā á mbū wu. Meŋ ka zéŋ ŋkūʼ yīi, o gɔ etɔ́ŋ á gá lɛ, méŋ wu ú.” 22Á zɛ́t té mak á leshūŋne, mɔʼɔ́ yi á tswi á mbū megaŋ afaʼ pí ŋ́gɛ: “Pɛ egákne ŋgʉɔ efāʼ nzhó mbɔŋ, ńdɔk eshʉ̄ʼ ḿmāʼ ánɛ yí. Éfāʼ á kwáŋ mbɔŋ, ńzwík á apū yí. Éfāʼ meláŋ membɔŋ, ńzwík á mekhu yí. 23Pɛ efāʼ á mbɔŋ ashʉ̄ mɔ́ efɔŋ, ńtém, ḿpɛ elɔk ŋghʉ̄ lekāk. 24Meŋ nde nɔ̄ŋ nzhɛ́ɛ á légɛ, mɔ́ wuɔ a lē ŋkwhʉ́, a á zéŋ eshʉ̄ʼ. A le píī, meŋ á zéŋ njʉ́ɔ á yí.” Pɔ́ lɛ nnéŋ lekāk á ŋgyā.
25«Á le gē egɔ́ épúp, mɔ́ lethū yi á gɔ́ á ŋkāʼ, ŋ́ghʉ nnɔ̄ŋ ŋkɔ́ʼɔ, ŋ́gʉɔ tɛ ncʉ́ʼ á lekō á mba, ńtshí njúʼ mɛ́ gɔ́ éwú nzɔ̄pɔ nzéŋɛ. 26Á tɔ́ŋ mmɔʼ ŋgaŋ afaʼ mɔʼɔ́ yi, ńzɛ́tte á yí ŋ́gɛ: “Akɔ̄ mé cʉ́ʼ ŋghʉ̄ á mba ā?” 27Á pwɛt ŋ́gɛ: “Ntsiʼnzem wu, a á ncʉ́ʼ eshʉ̄ʼ. Páʼ mɔʼɔ́ wu a á piŋ njʉ́ɔ á yí, á zɛ́t ntenté lā, á tswi mɛ́ zwhí á mbɔŋ ashʉ̄ mɔ́ efɔŋ, ńdɔk ŋkák.” 28Á júʼ anu jʉɔ mɛ́t, ḿbú nzáŋ á lɔ́ŋ, tɛ ndʉ̄ʼ á lekō á ŋgyā. Mɔʼɔ́ yi á tó á apɛ́, ńdʉ̄te á yí ŋ́gɛ, a ekó á ŋgyā. 29Á pwɛt á mbū yí ŋ́gɛ: “Mɔ́ʼɔ, ŋgia é éwú yīi, meŋ nde kó á lefaʼ á mbū wu. Meŋ ndaá ŋgɔ́ aleʼé, éfā lepé cú ú. O lé ké ŋgyá á gá tsɔ mɔ́ mvhō ndaʼ, ŋ́gɛ pek a mesoó pá, e ezwhí ndɔk ŋkák kɛ? 30Méŋ wu yīi, pɔ́ a megaŋ agā wɔnzwí, é lē mbú eshɔ́ʼ ŋkāp ju, a á lɛ ŋgē eshʉʼe, o tém á mbɔŋ ashʉ̄ mɔ́ efɔŋ, ńdɔk ŋghī á yí.” 31Mɔʼɔ́ yi, á lé á mbū yí ŋ́gɛ: “Méŋ ga, pɔkɔ mé gɔ nzóko, akʉ̄ɛ akʉ̄ɛ zīi, meŋ wɛ̄ɛ, á gɔ́ áa ajú tɛ mmī. 32Ḿbiŋ ŋgɔ́ mé ntsiʼnzem wu wuɔ, mbɔ á pɔŋ ŋ́gɛ, ḿpɛ egáŋte, ŋ́kák melaʼ mīi, mɛ́ le nɔ̄ŋ nzhɛ́ɛ á légɛ, a lē ŋkwhʉ́, a á piŋ nzéŋ eshʉ̄ʼ. A le píī, mɛ́ zéŋ njʉ́ɔ á yí.”»
Currently Selected:
Lúkási 15: ybb
Highlight
Share
Copy
Want to have your highlights saved across all your devices? Sign up or sign in
© CABTAL
