Lúkási 16
16
Yɛɛ́so a á ega eshúŋɔ ajū mīi mɛ́ gɔ elɔ̄ɔk ŋkāp ŋghʉ̄
1Yɛɛ́so á piŋ ndé á mbū nnɔ yí ŋ́gɛ: «Mmɔʼ ŋgaŋ lewūʼ a le wɛ̄ mmɔʼ ŋiŋ yīi, a le néŋ á yí ŋ́gɛ, a a nɔŋ ncʉ̄tɛ á tsitsi yi. Mɛ́ shʉʼ njhʉ́ á zoʼ eshúŋ á yí ŋ́gɛ, ŋgaŋ afaʼ yi wɔ̄, a á si ntsēŋtɛ ŋkāp zi tseŋte. 2Mɔʼɔ́ afaʼ yi á tɔ́ŋ á yí, ńdé á mbū yí ŋ́gɛ: “Meŋ ke júʼ mɛ́ gɛ, o ó si ŋgāa á lɛ́? Cuŋte meŋwaʼne esaá, ńdɔk eshʉ̄ʼ. O té shʉʼ ezéŋ á tsitsi ga ecʉte ɛ́.”
3Ŋgaŋ afaʼ wuɔ mɛ́t, á gʉɔ efhʉ̄te á ntē yí, tɛ ndé ŋ́gɛ: “Mɔʼɔ́ ga a á si ŋgɔ̄ á efók meŋ afaʼ. Meŋ á páʼa, éghʉ páʼ lā? Meŋ te wɛ̄ mbʉʼ á lelɔk njʉ́ʼ ŋgɔ̄ŋ ɔ́. Meŋ a piŋ ecʉ́ʼ esē gɔ́, tɛ́ lɔ́ ndɔ̄ ɔ̄?” 4Éfhʉ̄te épúp, tɛ ndé ŋ́gɛ: “Meŋ á zhɛ́ páʼ meŋ a ghʉ épúp, tɛ mesoó esaá pá, é ekókne á gá á ŋgyā pɔ́p, afʉʼ zīi mɔʼɔ́ afaʼ ga, a á shʉʼ njūŋ á gá.” 5Ńdɛ ntɔ́ŋ epuɔ pīi, pɔ́ pɔɔ́ŋ njú á mbū mɔʼɔ́ yi, á taʼ a taʼ, ńzɛ́tte á ŋgaŋ mvhɔ ŋ́gɛ: “O pɔɔ́ŋ akɔ̄ zīi, o o yá á mbū mɔʼɔ́ ga ā?” 6Á pwɛt ŋ́gɛ: “Mévɛ̄t ekūm ŋkhʉ.” Ŋgaŋ afaʼ á lé á mbū yí ŋ́gɛ: “Aŋwaʼne zīi o le tíī, a ajʉɔ. Náŋ á esī, ŋ́kúmne ntí ŋ́gɛ, ekūm megēm táa.” 7Ńzɛ́tte mmɔʼ ŋgaŋ ŋ́gɛ: “O pɔɔ́ŋ akɔ̄ zīi, o o yá á mbū mɔʼɔ́ ga ā?” Á tsɔ́ʼ ŋ́gɛ: “Ŋ́gesáŋ epa ŋkhʉ.” Á lé á mbū yí ŋ́gɛ: “Aŋwaʼne zīi o le tíī, a ajʉɔ. Kɔ, ŋ́kúmne ntí ŋ́gɛ, epa megēm lefaá.” 8Mɔʼɔ́ afaʼ á shʉʼ njʉ́ɔ páʼ ŋgaŋ afaʼ a á jʉ á yí épúp, ńdé ŋ́gɛ: «Ndʉɛ wuɔ, a yiīk tɛʼ. »
Yɛɛ́so á ge ezoko, ńdé ŋ́gɛ: «Anuúnē, wɔ néŋ‑ntē ánɛ tsitsi ŋgɔŋ wuɔ, é zhɛɛ́ á letē njhʉ̄ ncūŋte menu mɔ́p á nnɔ pɔ́p, ńtɔ́k epuɔ pīi, pɔ́ é nzem Ndém. »
9Yɛɛ́so á zéŋ ndé ŋ́gɛ: «Ŋkāp é páʼā ŋgɔ́ yīi, e gɔ eghʉ̄ʉ menu tepɔŋ ntií ntiī. Meŋ ké eshúŋɔ á wɛ́ ŋ́gɛ, pɛ elɔ̄k ezɛ ŋkāp, ŋ́ghʉ̄ áa mefaʼ membɔŋ á mvhɔ Ndém. Ńzhɛ́ á légɛ, e shʉʼɛ nnáŋ tɛ mmī á mbū pɛ á ndo esī atsetsáʼ, mɛ́ lɔk á wɛ́ mé lephū, pɛ a Ndém mé cʉ́ʼɛ nnáŋa. 10Ŋiŋ a gɔ́ɔ ndeŋ ndeŋ ánɛ mezízí menu, mbɔ a a shʉʼ ezéŋ egɔ́ ndeŋ ndeŋ ánɛ memía. Ŋiŋ a piŋɛ ŋgwɛ̄ mekɛ̄t ánɛ mezízí menu, mbɔ a ezéŋ ewɛ mekɛ̄t ánɛ memía. 11A gɔ éyi, pɛ kɛ te ndeŋ ndeŋ ánɛ ŋkāp zīi, é gɔ ezéŋ ŋghʉ̄ mefaʼ tepɔŋ ɔ́, mbɔ Ndém a gɔ eghʉ̄ʉ páʼ lā, tɛ́ ŋgyá á kwaʼ lewūʼ á mbū pɛ ɛ̄? 12A gɔ éyi, pɛ kɛ te ndeŋ ndeŋ, ánɛ ecū mīi, ŋiŋ ndɛʼɛ a á ntsékne á mbū pɛ tsékne ɛ́, mbɔ awɔ́ a gɔ eshʉ̄ʉʼ ńzéŋ ŋgyá á amɔ̄ʼ azō á mbū pɛ, ŋ́gɛ, a ecʉ́ʼ azɛ́ ɛ́?
13«Taʼ ŋgaŋ afaʼ, a gɔ le fāʼ á mbū memɔʼɔ́ afaʼ mémpīa á taʼ legʉɔ ɔ́. A ghʉɛ épúp, mbɔ a a shʉʼ epa mmɔʼ, épiŋ ekɔŋ mmɔʼ, ŋ́gɔ́ te épúp ɔ́, á júʼ nchu mmɔʼ, ḿbiŋ ŋgwák eyi mmɔʼ. Ŋiŋ a gɔ le júʼ á mbū Ndém, ḿbiŋ nzéŋ njúʼ á mbū ŋkāp á. »
14Epuɔ Falísia é júʼ ashuŋne jʉɔ mɛ́t, ńcʉ́ʼɛ nzwī á Yɛɛ́so zwi, melaʼ mīi pɔ́ tshií ntē wɔ́p ánɛ ŋkāp tɛʼ. 15Yɛɛ́so á lɛ mbwɛ̄t, ńdé á mbū pɔ́p ŋ́gɛ: «Pɛ pwɔ̄, pɛ kʉʼneé mbɔp menēk epuɔ, ŋ́gɛ, pɛ é megaŋ anuúnē. Táʼ, Ndém á ke nnɔ̄ŋ nzhɛ́ɛ ajū mīi, pɛ é aziɛ́. Pɛ eké nzhɛ́ á légɛ, mmɔʼ mía ajū mīi, epuɔ menɔŋ é wuʼtɛ, á mbū Ndém, ŋ́gɔ́ áa ajūɔ ŋŋyaŋne ŋyaŋne. »
Lefɔ Ndém é tɔɔ́k lepé efʉʼ mvhɔ
(Mat 11.12-13; 5.31-34; Mlk 10.11-12)
16Yɛɛ́so á zéŋ ndé ŋ́gɛ: «Á lɛ afʉʼ mvhɔ, mɛ́ nɔŋ njúʼɔ áa lepé Mɔɔ́sɛ, mbɔɔ anu zīi, metswi‑ŋke Ndém é le tíī. Tɛ efhó afʉʼ zīi Jáaŋ Mbaptísi a le shʉ̄ʼē, ŋ́kó tsetsɔŋɔ, mɛ́ cʉ́ʼɛ ntswī ŋke mbɔŋ ndʉ́ɛ́ ŋ́gɛ, Ndém a á si ntshíɛ lefɔ tsí. Awíɛ awíɛ á nɔŋ efóko mbʉʼ, ŋ́gɔ́ɔ á nzem yí. 17Mɛ́ ké te ndʉ́ɛ́ ŋ́gɛ, lepé Mɔɔ́sɛ é pí í, lephū pɔ́ esī atsetsáʼ e láʼ ege emii, méŋ azō a á le fhó ánɛ lepé mɛ́t, ŋ́ŋɛ̄nne ɛ́. 18Ńdɔkɔ ŋ́gɛ, ŋiŋ a juŋɔ á nzwí yi, ḿbīŋ nnéŋ mmɔʼ á ŋgyā, mbɔ a á ghʉ agā. Ŋiŋ a piŋɛ ndá ŋgyā pɔ́ menzwí yīi, ndō yi a á njūŋ á yí, mbɔ ŋgaŋ a á ghʉ agā. »
Ashuŋne lepúʼ ánɛ ŋgaŋ lewūʼ pɔ́ Lazaa, te kuʼ ánɛ azō
19Yɛɛ́so á zéŋ mbɛ́te ashuŋne lepúʼ jʉɔ, ńdé ŋ́gɛ: «Mmɔʼ ŋgaŋ lewūʼ a lɛ éwú, ŋ́gɔ́ eleʼé etsem ncūŋte nnɛ̄t zi, ḿmāʼ menzhó mīi é teē nzwiŋ, ńnáŋ efʉʼ metsem, ŋ́ghʉ̄ lekāk, ḿpfɛ́t etsō mbɔŋ. 20Mmɔʼ ŋiŋ a le zéŋ ŋgɔ́ azí éwú, lezēŋ tsí é gɔ́ lɛ Lazaa, ŋ́gɔ́ á te kuʼ ánɛ azō, mbɔ meféŋ é lē mbú njhʉ́ á yí. Á shʉʼɛ nnɔ̄ŋɔ á nchu ŋgyā ŋgaŋ lewūʼ wuɔ mɛ́t efʉʼ metsem. 21Ńnɔŋ ntsáa ŋ́gɛ, ŋiŋ wuɔ mɛ́t a láʼa ŋgē epfɛ́t etsō, mesa é whʉte á esī, á pɛ́te mpfɛ́t lɛ́. Mbɔɔ membhʉ̄ é lɛ si eshʉ̄ʼɛ éwú, ḿbēŋtɛ meféŋ mí. 22Á shʉʼ nnáŋ tɛ ŋkwhʉ́, mecɔʼ Ndém é shʉʼ ndɔ̄k á yí ŋgʉ̄ɔ, ńnáŋ á lezēŋ Ablaham. Ŋgaŋ lewūʼ á shʉʼ ŋkwhʉ́ azí, mɛ́ chʉ́ nnɛ̄t ntúŋ á yí, 23á sóʼo mé apwɛt, ńnáŋ éwú á ntē mía ŋgʉɔ̄ʼ. Éshʉʼ nnáŋ tɛ mbwʉ́ʼɛ lezēk tsí, ńjʉ́ɔ á Ablaham tɛ éwú, Lazaa á náŋ á lezēŋ yí. 24Á tɔ́ŋ ndé ŋ́gɛ: “Mɔʼɔ́ ga Ablaham, lɛ ntsá mezeŋɛ má, ńtó á Lazaa, a egʉɔ ncɔ̄ʼ á thu‑apū yi, á ntē ntshi, ńdɔk eshʉ̄ʼ ńtsāpa agāk zá. Meŋ á ntē mmók ega, ḿbú njʉ́ɔ ŋgʉɔ̄ʼ tɛʼ.” 25Ablaham á lɛ mbwɛ̄t ŋ́gɛ: “Méŋ ga, kímte páʼ o le náŋ á ndo esī atsetsáʼ, á ntē lepɔŋ, Lazaa á nɔŋ njʉ́ɔɔ ŋgʉɔ̄ʼ. Á tsetsɔŋɔ, Lazaa á gɔ́ á ntē lepɔŋ, o gɔ́ á ntē ŋgʉɔ̄ʼ. 26Ńzi ŋké te épúp ɔ́, mbɔ mía mía apeŋte, a fakneē á yímpɛ, tɛ ŋgɔ́ yīi, ŋiŋ a gɔ le fhó á nzéŋ ega, ŋ́gʉ̄ɔ ejɔ̄ nzéŋ ɛ́, ḿbīŋ le fhó ejɔ̄ nzéŋ, éshʉ̄ʼ ega á.” 27Á zéŋ eswíŋte á yí ŋ́gɛ: “Á gɔ́ épúp, mɔ́ʼɔ, o elɛ ntó á Lazaa á mba pek, 28a gʉɔ eshúŋ á mbū metsiʼnzem pá métáa, ntií zīi pɔ́ gɔ eghʉ̄ʉ azɔ́p épúp, tɛ pɔ́ le fú ŋkó á ntē ŋgʉɔ̄ʼ jʉɔ zīi, meŋ á éwú la á.” 29Á gɛ: “Pɔ́ wɛɛ̄ meŋwaʼne mīi, Mɔɔ́sɛ pɔ́ metswi‑ŋke Ndém é le tíī, pɔ́ elɛ njúʼ ajū mīi, á ntē éwú.” 30Á lʉʼ ŋ́gɛ: “Ŋgáŋ me mɔ́ʼɔ Ablaham, ŋiŋ mé ké efhó á apwɛt, éshʉ̄ʼ ntswī ŋke á mbū pɔ́p, mbɔ pɔ́ e gɔ nnɛ̄t zɔp, éwáʼ atswhī tepɔŋ zɔ́p.” 31Á pwɛt ŋ́gɛ: “Pɔ́ nɔŋ ndʉ̄ʼɛ á lejūʼ ŋke Mɔɔ́sɛ, mbɔɔ eyi metswi‑ŋke Ndém, mbɔ pɔ́ gɔ́ le pīŋ mvéŋ eyi ŋiŋ yīi, a fhɔ́ɔ á apwɛt ɛ́.”»
Currently Selected:
Lúkási 16: ybb
Highlight
Share
Copy
Want to have your highlights saved across all your devices? Sign up or sign in
© CABTAL
