Lúkási 17
17
Yɛɛ́so a á ega ntékɛ nnɔ yí páʼ pɔ́ gɔ enáŋ épúp
(Mat 18.6-7, 21-22; Mlk 9.42)
1Yɛɛ́so a le lé á mbū nnɔ yí ŋ́gɛ: «Tɛ mbɔɔ eséŋɛ́ lɛ́, ajū mīi á gɔ eghʉ̄ʉ, ŋiŋ á fa nzhɛ, á gɔ le púŋ. Táʼ, ndɔ e é athū ŋiŋ yīi, a á tshóne á ŋiŋ, ńnéŋ á ntē mefa. 2A ghʉɛ épúp, tɛ mbɔɔ á mbū taʼ, á nnɔ ewɔŋkhʉ̄ puɔ, mbɔŋ á gɔ́ mbū yí, á mɛ́ legaŋ á mía mía tɔ́ á ntɔ̄ŋ yí, ḿmāʼ á yí á ntē mía ntshi, ńtɔ́k á letshi á yí néŋ, á kʉɛ ndɔ á mbū Ndém. 3Pɛ epá nnɛ̄t zɛ, ánɛ ntií menu muɔ mɛ́t.
Méŋ mɔ́ wu a faa anu á mbū wu, o egʉɔ njʉ́ɔ á yí, ńték á yí. Ŋ́gɔ́ éyi a á gɔ nnɛ̄t zi, ḿvéŋ mefa, o elēkne ŋgyá á mbū yí. 4A zi ŋgē ezók á taʼ aleʼé alāʼ, éfā á mbū wu ŋgʉɔ esambīa, ḿbīŋ nnɔ̄ŋ mbīŋɛ nzem etsiɛ́ legʉɔ lɛ́, ḿvéŋɛ mefa mí, o elēkne ŋgyá á mbū yí. »
Ntií zīi nnɔ Yɛɛ́so é gɔ elɔ̄ɔk efɛ́ nnɛ̄t
5 Meziŋ‑ntō Yɛɛ́so é shʉʼ ndé á mbū yí ŋ́gɛ: «Lɛɛ ŋghʉ̄, pek etswiʼne efɛ́ nnɛ̄t zek, ŋ́gyá á mbū Ndém. » 6Yɛɛ́so á pwɛt ŋ́gɛ: «Lefɛ̄ nnɛ̄t wɛ ŋgyá á mbū Ndém, a á ŋgwíʼe efáŋ páʼ lesa sésōk, mbɔ pɛ lʉ́ɛ́ á mbū athʉ́ jʉɔ ŋ́gɛ: “Fhó ega ntsɔ́ʼɔ mé meŋgaŋ, ŋ́gʉɔ ntshí á ntē mía ntshi.” Mbɔ a tsɔ́ʼɔ páʼ pɛ é lé épúp. »
Megaŋ nnɔ Yɛɛ́so é pɔŋteé á lechʉ̄ nnɛ̄t ŋghʉ̄ afaʼ zɔ́p
7Yɛɛ́so á zéŋ ndé ŋ́gɛ: «Ḿpɛ elé ŋ́gɛ, ŋiŋ wɛ a wiɛ á ŋgaŋ afaʼ yīi, a pípɛ mena pí, kɛɛ éyi a jʉ́ʼɛ ŋgɔ̄ŋ yí lɛ́ɛ, á lɛ ŋgē ekɔ́ʼ afaʼ, wu mɔʼɔ́ afaʼ yi, o elé á mbū yí ŋ́gɛ, a egákne eshʉʼ ḿpfɛ́t azō o? 8Ŋgáŋ, mbɔ mɔʼɔ́ afaʼ a a lé á mbū yí é ghʉ áa lɛ: “Cuŋte nnɛ̄t, ńdá lekʉŋ, ńdɔ̄k etsō eshʉ̄ʼ, meŋ mpfɛ́t etsá tɛ e emī, tɛ́ o epfɛ́t ecú.” 9A ghʉɛ páʼ mɔʼɔ́ yi a á tswi épúp, mɔʼɔ́ yi á piŋ nzóko esyákne syákne lɛ́? 10Á zéŋ ŋgɔ́ ndeŋ ndeŋ épúp á mbū pɛ. Pɛ ghʉɛ afaʼ zīi, mɛ́ ntswī á mbū pɛ tɛ á mī, pɛ elé azɛ́ ŋghʉ̄ áa lɛ: “Pek lɛɛ̄ ŋgɔ́ áa megaŋ afaʼ, ŋ́ghʉ̄ azék áa ajū mīi mɛ́ tswi.”»
Yɛɛ́so a á ghʉ, megaŋ kaʼpáp legēm é te, taʼ mé syákne
11Yɛɛ́so a le shʉ̄ʼ nnɔŋ nzɛ́t ŋ́gʉ̄ɔ gʉɔ mé Yelósalɛm, ńnɔŋ ntɔ́kɔ á ndhʉ alāʼ epuɔ Samalía pɔ́ epuɔ Ŋgaliléa. 12Pɔ́ nnɔ yí é gʉɔ tɛ nnɔ̄ŋ ŋkúɔ́ ánɛ amɔ̄ʼ akap alāʼ, megaŋ kaʼpáp legēm é jʉ́ɔ á yí, ńnɔŋ eshʉ̄ʼɛ mé lezēŋ tsí, ńtshí tɛ éwú, 13ńdé mé ŋghi teté á mbū yí ŋ́gɛ: «Ndi Yɛɛ́so, tsɔ́ʼɔtsɔ́ʼ, lɛ ntsá mezeŋɛ mék. » 14Á júʼ, ńjʉ́ɔ á wɔ́p, ńdé á mbū pɔ́p ŋ́gɛ: «Pɛ egʉɔ ntswī nnɛ̄t zɛ á mbū wɔ nɔŋ‑epɔʼ, pɔ́ etsāʼ á wɛ́ njʉ́ɔ#17.14 Wɔ nɔŋ‑epɔʼ mé pɔŋteé á letsaʼ ŋgaŋ kaʼpáp, tɛ mvéŋ ŋ́gɛ, a á te, tɛ́ nzéŋ nnéŋ á yí á nnɔ.. » Pɔ́ júʼ épúp, ńnɔŋ ŋgʉ̄ɔ, ŋ́kó á mɛnzhɛ, ńdɛ ntē.
15Taʼ ŋiŋ á nnɔ pɔ́p á jʉ́ɔ páʼ yí é te, ḿbīŋ nzem, ńziŋɛ nzɔ̄pɔ ŋgūʼtɛ á Ndém, mé ŋghi teté. 16Éshʉʼ tɛ ŋkó á lezēŋ Yɛɛ́so, ńtswíʼte á mvhɔ á yí, ŋ́ŋɔ́ʼne tɛ athū zí á pfeŋ esī, ésyákne á yí. Ŋiŋ wuɔ mɛ́t, a lɛ ŋiŋ Samalía. 17Yɛɛ́so á jʉ́ɔ tɛ mbwɛ̄t ŋ́gɛ: «Meŋ á zhɛ́ ŋ́gɛ, epuɔ legēm é mbú ntē, ewuɔ ŋiŋ a piīŋ ŋgɔ́ ega páʼa, epi emɔ̄ʼ epuɔ levuʼɔ́, é gɔ́ egɔ́? 18Ŋiŋ yīi a á kwaŋte á leshʉʼ esyákne á Ndém, a ka á nnɔ pɔ́p túɔ́, tɛ ndaʼ á ŋge wuɔ lɛ́?» 19Ńdɛ ndé á mbū ŋiŋ wuɔ mɛ́t ŋ́gɛ: «Lu á esī, ŋ́gʉ̄ɔ mé mba ju. O ó te páʼa, melaʼ mīi o ó fɛ́ nnɛ̄t ju, ŋ́gyá á mbū meŋ. »
Yɛɛ́so a á ega eshúŋɔ páʼ leshʉʼ Méŋ‑Ŋiŋnɔŋ a a láʼ egɔ́ épúp
(Mat 24.23-28)
20Afʉʼ á kuʼ, epuɔ Falísia é shʉʼ nzɛ́tte á Yɛɛ́so ŋ́gɛ: «Ndém a a láʼ ezi á lesāʼ lefɔ tsí á ndo esī atsetsáʼ ega eséŋɛ́?» Yɛɛ́so á pwɛt á mbú pɔ́p ŋ́gɛ: «Amɔ̄ʼ ayiŋne zīi, mɛ́ é si nzwíʼtɛ, ázi, a shʉʼ etswi á légɛ, Ndém a á si nnɔ̄ŋ ŋgɔ̄ ezi á lesāʼ lefɔ tsí, á té éwú ú. 21Mɛ́ té shʉʼ eghíte ŋ́gɛ, Ndém a á zi á lesāʼ lefɔ tsí ega kɛ́ egʉ ʉ́. Pɛ ezhɛ́ á mbɔŋɔ́ á légɛ, Ndém a á ndáʼ ŋgɔ́ si esáʼa lefɔ tsí á nnɔ pɛ#17.21 Emɔ̄ʼ epuɔ é fhoó á letseŋ, ńjúʼ ŋ́gɛ, ajʉʼ jʉɔ mɛ́t á lɔkɔ ŋ́gɛ, á ntē pɛ. Epuɔ puɔ mɛ́t, é té zá.. »
22Á zéŋ ndé á mbū nnɔ yí ŋ́gɛ: «Emɔ̄ʼ meleʼé e shʉʼ ekuʼe, pɛ esé á wɛ́ a Méŋ‑Ŋiŋnɔŋ wuɔ á lezēŋ nzók tsɔ taʼ aleʼé alāʼ, tɛ́ afʉʼ á yí á leshʉʼ, a ké nzɛ́t té kuʼ. 23Meleʼé mɛ́t, mɛ́ elé á mbū pɛ ŋ́gɛ, yí wuɔ ega, kɛ yí a ayi egʉ lɛ, ndɛ́ʼ pɛ egʉ̄ɔ éwú, ndɛ́ʼ pɛ ezhɛ̄ne á wɔ́p. 24Méŋ‑Ŋiŋnɔŋ a a láʼ egē eshʉʼe, éshʉʼ áa páʼ ŋŋí mbeŋ zīi, e ŋwaŋa, ḿbú ŋkɛ̄ʼɛ lephū ntsem lā. 25Táʼ, a a zi eké eláʼ ege eshʉʼ épúp, mbɔ a ke té njhʉ̄, ńjʉ́ɔ ŋgeŋge tɛʼ, epuɔ ŋguʼ puɔ é ŋkʉŋne á yí.
(Mat 24.37-41)
26«A a láʼ ege eshʉʼe, anu zīi á le láʼ ŋghʉ̄ epuɔ, ŋguʼ Noe, a ezéŋ ŋghʉ̄. 27Epuɔ menɔŋ é lɛɛ́ nnáŋa mpfɛ́tɛ, ńnúu, ńdáa‑ŋgyā, ńtsóʼo epɔ̄ pɔ́p, tɛ ŋkó aleʼé zīi, Noe pɔ́ atseŋ ŋgyā zí, é le kó á ntē mía mɛtúa ntshi, pík‑ŋgɔŋ mbeŋ á pú ndú, ntshi é pú ŋkɔ́ʼ ńdɔ̄k mvoʼ epuɔ. 28A láʼ ezéŋ egɔ́ páʼ anu zīi, á le láʼ ŋghʉ epuɔ, ŋguʼ Lɔ́ɔt: epuɔ menɔŋ é lɛɛ́ nnáŋa, ḿpfɛ́tɛ, ńnúu, ńtáŋa esaá, ńjʉ́ʼɛ ŋgɔ̄ŋ, ŋ́kwɛ́tɛ meŋgyā. 29Tɛ ŋkó aleʼé zīi, Lɔ́ɔt pɔ́ atseŋ ŋgyā zí, é le fhó á ntē tésɔŋ Sodɔm ntó, Ndém á piŋ ŋghʉ̄, mmók meka é fhó á athʉ́, ésóʼo páʼ mbeŋ lā, ḿbú nzwhíte epuɔ tésɔŋ Sodɔm mɛ́t. 30Ndeŋ ndeŋ épúp, emuɔ menu mɛ́t, e láʼ ezéŋ etɔ́ke, aleʼé zīi Méŋ‑Ŋiŋnɔŋ a tswii lefɔ tsí. 31A láʼ ekuʼ aleʼé mɛ́t, ŋ́gɔ́ éyi ŋiŋ a á ŋgɔ́ á athʉ́ ŋgyā, ntsi zí é piŋ nzɛ́t á ŋgyā, ndɛ́ʼ á piŋ nzem á ŋgyā ŋ́gɛ, yí gʉɔ mé mbíɛ́, tɛ́ kʉʉ. Ndeŋ ndeŋ épúp, ŋiŋ yīi a á ŋgɔ́ á ŋkāʼ, ndɛ́ʼ á piŋ nzem á mba. 32Pɛ ekímte ajū mīi á le ghʉ̄ á nzwí Lɔ́ɔt#17.32 Tɔ́ŋɔ́, á ntē Aŋwaʼne Anɔŋɔ́ Ŋgɔŋ. 19.26, ńjúʼ anu zīi, á le ghʉ̄ á nzwí Lɔ́ɔt.. 33Ŋiŋ a nɔŋ ŋŋíŋɛ efāʼa á lepīp athū nnɛ̄t zí, ŋ́gɛ yí té láʼ ekwhʉ́ ɛ́, mbɔ a a ké eláʼ ekwhʉ́, épíi. Ŋiŋ a piŋɛ ŋgwáʼ athū nnɛ̄t zí, melaʼ Ndém, mbɔ a a láʼ egɔ́ éwú.
34Meŋ echʉ́ nnɛ̄t eshúŋ á wɛ́, a láʼ egɔ́ etsōʼ aleʼé mɛ́t, epuɔ mémpīa pīi pɔ́ nnɔ̄ŋ á ndo ekó ndíi, mɛ́ elɔ̄k mmɔʼ ŋgʉ̄ɔ, ḿbiŋ ntshī mmɔʼ néŋ. 35Wɔnzwí mémpīa pīi pɔ́ nnɔŋ nzéŋnɛ ŋgɔ̄ʼɔ ŋgesáŋ, mɛ́ elɔ̄k mmɔʼ ŋgʉ̄ɔ, ḿbiŋ ntshī mmɔʼ néŋ. [ 36Epuɔ mémpīa pīi, pɔ́ ŋgɔ́ á ŋkāʼ efāʼa, mɛ́ elɔ̄k á taʼ ŋgʉ̄ɔ, ḿbiŋ ntshī mmɔʼ néŋ#17.36 Emɔ̄ʼ membúʼ meŋwaʼne tɛ efʉʼ mvhɔ, é té menu mīi, é ntē akɛ [..] lāa wɛ̄ɛ.. »] 37Nnɔ Yɛɛ́so é júʼ épúp, ńzɛ́tte á yí ŋ́gɛ: «Mɔʼɔ́ wek, emuɔ menu mɛ́t e láʼ etɔ́k egɔ́?» Yɛɛ́so á pwɛt ŋ́gɛ: «A láʼ elem, membhʉ̄ e ejúʼ. »
Currently Selected:
Lúkási 17: ybb
Highlight
Share
Copy
Want to have your highlights saved across all your devices? Sign up or sign in
© CABTAL
