Lúkási 14
14
Yɛɛ́so a á ega nzéŋɛ ŋghʉ̄ɛ ŋiŋ á tʉɛ aleʼé aswite
1Á lɛ amɔ̄ʼ aleʼé aswite, mmɔʼ mɔ́ ndʉɛ epuɔ Falísia á tɔ́ŋ á Yɛɛ́so á mba yí ŋ́gɛ, a eshʉʼ mpfɛ́t azō. Epuɔ pīi é lɛ á esī, é lɛ nnɔ̄ŋ mbípnɛ á Yɛɛ́so, ŋ́gɔ̄ á njʉ́ɔ ajū mīi, a lɛ eké eghʉ aleʼé mɛ́t. 2Mmɔʼ ŋiŋ á lɛ eshʉ̄ʼ, ńtshí á mvhɔ Yɛɛ́so, mbɔ alute á lē ŋkó á ánɛ yí. 3Yɛɛ́so á zɛ́tte wɔ kɛ́ʼte‑mbé Ndém pɔ́ epuɔ Falísia pīi pɔ́ ŋgɔ́ á esī, ŋ́gɛ: «Lepé tsímpɛ é si mvéŋɛ ŋ́gɛ, mɛ́ gɔ epɛ́t á ŋiŋ aleʼé aswite kɛ ŋgáŋ ŋ́?» 4Pɔ́ pú te pwɛ̄ɛt. Yɛɛ́so á lɛ mpfēŋ á ŋgɔ mɛ́t, á te. Yɛɛ́so á lé á mbū yí ŋ́gɛ, a egʉ̄ɔ mé mba zi. 5Yɛɛ́so á zéŋ nzɛ́tte epuɔ mɛ́t ŋ́gɛ: «Awɔ́ a á tsetsɛlɛ pɛ yīi, méŋ yi a whʉɛ á aphʉ̄ ntshi aleʼé aswite, kɛɛ efɔŋ zi lɛ́, á néŋ té náte, ŋ́gákne nzíʼ ŋ́kó á ntē lephʉ̄, éfók á yí í?» 6Á tsya á wɔ́p, tɛ pɔ́ té anu pwɛ̄ɛt.
Ndém a kɔʼneé á ŋiŋ yīi, a soʼneé nnɛ̄t zi
7Yɛɛ́so á jʉ́ɔ páʼ epuɔ é si ŋkúɔ́ ajʉʼ zīi, mɛ́ é tɔ́ŋ á wɔ́p éwú, ŋ́kāŋa ajʉʼ mekuʼ, tɛ́ nnáŋa éwú, ńdɛ ndɔ̄k ashuŋne lepúʼ jʉɔ, ńdé á mbū pɔ́p ŋ́gɛ: 8«Ŋiŋ a tɔ́ŋɔ á wú ánɛ lekāk alaá‑ŋgyā, ndɛ́ʼ o ekó ndɛ̄ ŋkāŋ ajʉʼ mekuʼ tɛ́ nnáŋ éwú. O pikɛ tɛ nnáŋ éwú, á gɔ́ éyi mɛ́ ntɔ́ŋ mmɔʼ ŋiŋ yīi, a faáŋ ntsya á wú, 9ŋgaŋ á shʉ̄ʼ, mbɔ ŋiŋ yīi a á ntɔ́ŋ á wɛ́ yí, a a shʉʼ elé á mbū wu égɛ: “Lu á esī, ŋ́gyá ajʉʼ á mbū ndʉɛ wuɔ.” O elɛ efhó éwú, ńdū á esī, ńdɔ̄k esē ŋgʉɔ nnáŋ á nzem. 10Á gɔ́ áa lɛ, mɛ́ láʼa ntɔ́ŋ á wú ánɛ lekāk, o egʉɔ ŋkó éwú, ńnáŋ á tɛ nzem, ńzhɛ́ á légɛ, ŋiŋ yīi a á ntɔ́ŋ á wú, a ge eshʉʼe, ńjʉ́ɔ o náŋ éwú, mbɔ a a lé á mbū wu égɛ: “Íyʉ, shʉʼɛ nnáŋ ega páʼa, ájʉʼ mbɔŋ.” A eghʉ̄ épúp, ńdɔkɔ ŋgyáa mekuʼ mú á mvhɔ epuɔ. 11Ndeŋ ndeŋ épúp, ŋiŋ a nɔŋ ŋkɔ́ʼnɛ nnɛ̄t, mbɔ Ndém a a sóʼne á yí. Ŋiŋ a piŋɛ nnɔ̄ŋ nnɛ̄t zi á esī, mbɔ Ndém a a kɔ́ʼne á yí. »
Pɛ nɔŋ ŋghʉ̄ɛ lekāk, pɛ etɔ́ŋ áa wɔ te kuʼ ánɛ azō
12Yɛɛ́so á zéŋ ndé á mbū ŋiŋ yīi, a á ntɔ́ŋ á yí ŋ́gɛ: «O nɔŋ ntɔ́ŋɔ epuɔ ŋ́gɛ, pɔ́ eshʉ̄ʼ á ŋgyā wu mpfɛ́t etsō, te tɔ́ŋ áa ndaʼ mesoó pú, kɛ́ epuɔ mba pɛ́, kɛ́ epɔ̄ memía pú mbɔɔ megaŋ lewūʼ ŋkɔʼɔ́ mba pú, ḿbɔ́k epuɔ puɔ mɛ́t, á lé shʉʼ nzéŋ ńtɔ́ŋ á wú ajú, ńtsɔ́ʼ eshʉ̄ʼ wú. 13O shʉʼɛ nnɔ̄ŋ ŋghʉ̄ɛ lekāk, o etɔ́ŋ áa wɔ te kuʼ ánɛ azō, ńtɔ́ŋ megaŋ alɔʼ, ńtɔ́ŋ wɔ kékʉɔ́ʼ‑akhu, ńtɔ́ŋ wɔ efʉʉ́‑menēk. 14O ghʉɛ épúp, o egɔ́ á eshhʉ̄ mbɔŋ, melaʼ mīi epuɔ puɔ mɛ́t, é té shʉʼ ekuʼ á letsɔ̄ʼ eshʉ̄ʼ wú ú, Ndém a epiŋ efú ńtsɔ́ʼ afaʼ jú, aleʼé zīi, epuɔ pí é zímɛ. »
Ashuŋne lepúʼ ánɛ leghʉ lekāk Ndém
(Mat 22.1-10)
15Yɛɛ́so á lé épúp, mmɔʼ ŋiŋ á nnɔ epuɔ pīi, pɔ́ a pɔ́p é nɔŋ mpfɛ́tɛ etsō, á lé ŋ́gɛ: «Eshhʉ̄ mbɔŋ a á ŋiŋ yīi, a a shʉʼ ejhʉ́ lekāk tsīi, Ndém á yáa á ntē ŋgɔŋ eswhī. » 16Yɛɛ́so á lɛ nzī á lelē ŋ́gɛ: «Mmɔʼ ŋiŋ a le nɔ̄ŋ ŋgɔ̄ á ŋghʉʉ̄ á mía lekāk, ŋ́gó epuɔ tɛ pɔ́ záne. 17Afʉʼ á lejhʉ̄ etsō á kuʼ, á tó á méŋkhʉ̄ yi ŋ́gɛ, a egʉɔ ndé á mbū epuɔ mɛ́t ŋ́gɛ, mɛ́ cuŋte etsō tɛ ntshí, pɔ́ elɛ eshʉ̄ʼ. 18Á gʉɔ njʉ́ɔ á wɔ́p, awíɛ awíɛ á cʉ́ʼɛ ndɛ̄ʼte lɛʼte. Ŋgaŋ mvhɔ á lé á mbū yí ŋ́gɛ: “Kúɔ́ ntswī á mbū yí ŋ́gɛ, meŋ ke zó ŋkāʼ gá, meŋ gɔ le néŋ té gʉɔ njʉ́ɔ ɔ́. Tsɔ́ʼɔtsɔ́ʼ, kaá á laʼ á gá.” 19Mmɔʼ ŋgaŋ á lé á mbū yí ŋ́gɛ: “Meŋ ke zó mefɔŋ legēm, meŋ gʉɔ mé nzwiíʼ pɔ́p ayáʼa. Tsɔ́ʼɔtsɔ́ʼ, kaá á laʼ á gá.” 20Á jʉ́ɔ mmɔʼ ŋiŋ. Á lé á mbū yí ŋ́gɛ: “Meŋ ke zɛ́t ndáa ŋgyā, melaʼ épúp tɛ́, á ka pɔ̄ŋ páʼ, meŋ gɔ eshʉ̄ʼ tsetsɔŋɔ ɔ́.” 21Méŋkhʉ̄ yi wɔ̄, á piŋ nzem, ḿbɛ́te eshúŋ á mɔʼɔ́ afaʼ yi, á júʼ épúp, ńzáŋ á lɔ́ŋ, ńzéŋ ntó á yí ŋ́gɛ: “Kʉtɛ ŋgʉ̄ɔ á methū mɛnzhɛ pɔ́ a mefakné‑nzhɛ, á tésɔŋ, ŋ́kʉ́ʼne ntɔ́ŋ wɔ te kuʼ ánɛ azō, ńtɔ́ŋ megaŋ alɔʼ, ńtɔ́ŋ wɔ efʉʉ́‑menēk pɔ́ a wɔ kékʉɔ́ʼ‑akhu, ńdɔk eshʉ̄ʼ mé ega.” 22Á gʉɔ, ḿbīŋ nzem eshúŋ á mɔʼɔ́ afaʼ yi ŋ́gɛ: “Meŋ á ghʉ páʼ o ó tswi épúp me Ndi. Táʼ, ŋgyā e zɛɛ́t áa te ló.” 23Mɔʼɔ́ afaʼ yi á lé á mbū yí ŋ́gɛ: “Fhó á tésɔŋ ntó tsetsɔŋɔ, ŋ́gʉɔ ŋkʉ́ʼne á methū nzhɛ mekap alāʼ, ŋ́kōne awíɛ awíɛ yīi, o ó jʉ́ɔ á yí, pɔ́ eshʉʼ ŋkó tɛ ŋgyā za e eló. 24Meŋ á kʉɔ́ʼ ŋkwɛ ŋ́gɛ: awíɛ awíɛ yīi meŋ ke tɔ́ŋŋ̄, a puú ecʉ́ʼ etsō tsá á nchu yí néŋ ɛ́.”»
Ntií á lelɔk ncūŋte nnɛ̄t, tɛ́ ntsé á nzem Yɛɛ́so
(Mat 10.37-38)
25Yɛɛ́so a le zɛ́t ntswiʼnɛ ndɔ̄kɔ á leziŋ yi ŋgʉ̄ɔ mé mvhɔ, epuɔ tɛ nzáne, é nɔŋ nzhɛ̄nɛ á yí. Afʉʼ á kuʼ, á pekne nnɛ̄t, ńdé á mbū pɔ́p ŋ́gɛ: 26«Ŋiŋ a gɔ́ éyi a a tsé á nzem meŋ, ŋ́ké te éyi a a kɔŋ á gá etɔ́k á mɔʼɔ́ yi pɔ́ mɛ́ wɔp ɔ́, étɔ́k á nzwí yi pɔ́ ewɔŋkhʉ̄ pí í, ézéŋ etɔ́k mbɔɔ epɔ̄ memía pí, mbaŋa pɔ́ a wɔnzwí í, ékɔŋ á gá etɔ́k á kwaʼ athū nnɛ̄t zí í, mbɔ a gɔ le kūʼ á legɔ̄ á ŋiŋ nnɔ ga á. 27Ŋiŋ a nɔŋɔ ŋkɔ̄ŋɔ á letsē á nzem meŋ, ŋ́ké te éyi, a a véŋ á lewhʉ̄, páʼ mɛ́ véŋɛ á lepiʼ mbaŋne paŋné lā, mbɔ a gɔ le kūʼ á legɔ̄ á ŋiŋ nnɔ ga á.
28Ŋiŋ a gɔ́ɔ á tsetsɛlɛ pɛ, ńnɔ̄ŋ ŋgɔ̄ á ŋkwɛ́t á sisia apaʼa meleŋ athʉ́, mbɔ a ezi lɛ akɔ̄? Mbɔ a te ge ezi, énáŋ á esī, ékwaŋte á mbɔŋɔ́, éjʉ́ɔ ŋkāp zīi a wɛɛ̄, kɛɛ e gɔ ekuʼ á lelɔk ŋkwɛ́t ɛ́ kɛ? 29Á gɔ́ te ghʉ̄ épúp ɔ́, ŋ́gɔ́ mmɔʼ mbɔ a a zi apaʼa mɛ́t, énɔŋ atseŋ ndaʼ, lepiŋ ŋkwɛ́t a etsyā á yí. Á gɔ́ épúp, epuɔ e shʉʼ ŋgē etsia ajʉʼ mɛ́t, ńzwī á yí ndé ŋ́gɛ: 30“Ŋiŋ wuɔ a ke nɔ̄ŋ apaʼa, á tsya á yí.”
31«Ŋ́ké te épúp ɔ́, mbɔ mmɔʼ efɔ a túɔ́ mé epuɔ ntsāʼ legēm, ńnɔŋ ŋgɔ̄ á ndʉɔ́ʼ mmɔʼ ncu, ḿbīŋ njʉ́ɔ ewiɛ́ mɛ́t, á fhó ege eshʉ̄ʼ, mé epuɔ ntsāʼ megēm mbīa, mbɔ a a ghʉ páʼ lā? Mbɔ a ge ezi, énáŋ á esī pɔ́ a epuɔ pí, e efaʼ njʉ́ɔ kɛ a gɔ ekūuʼ ánɛ yí lɛ́ɛ? 32Ńjʉ́ɔ ŋgɔ́ éyi, a a tsya á yí, á tó wɔ mɛmekém, tɛ́ eyi mmɔʼ efɔ, á zɛ́t tɛ éwú, ŋ́gɛ pɔ́ egʉɔ eswíŋte á yí, a eshúŋ akɔ̄ lɛ́ zīi mɛ́ gɔ eyá, ńdɔk nthʉ́ á yí, tɛ́ ncu é mi. » 33Yɛɛ́so á fhó epúp, ńdé ŋ́gɛ: «Awíɛ awíɛ á nnɔ pɛ, a etém nzem ánɛ etsō tsí ntsem, tɛ́ ŋkūʼ eyi, a gɔ etsé ánɛ nnɔ gá.
Ŋiŋ yīi a ka cūŋte nnɛ̄t zi, tɛ́ ntsé á nzem Yɛɛ́so ó
(Mat 5.13; Mlk 9.50)
34«Ŋgwāŋ é si ŋgɔ́ ajūɔ mbɔŋ. Táʼ, é piŋɛ ncʉ́ʼɛ ndáp lapé, mɛ́ lɔk akɔ̄ ŋghʉ̄, tɛ é zéŋ ndē é? 35Mbɔ é gɔ le zéŋ azō ŋkó ɔ́, tɛ mbɔɔ á lelɔk ŋghʉ̄ ekaŋne, tɛ mbɔɔ á lelɔk mbwɛ́ne atsáʼ. Mbɔ mɛ́ e cʉ́ʼɛ ewáʼ waʼé. Ŋiŋ a wiɛ metuúŋ á lelɔk njúʼ ejʉʼ, á júʼ. »
Currently Selected:
Lúkási 14: ybb
Highlight
Share
Copy
Want to have your highlights saved across all your devices? Sign up or sign in
© CABTAL
