Lúkási 13
13
Ŋiŋ a gɔ́ te atswhī zí kúmne, mbɔ a a láʼ epíi
1Á lɛ a efʉʼ mɛ́t, emɔ̄ʼ epuɔ é shʉʼ eshúŋ á Yɛɛ́so anu, ánɛ lewhʉ̄ emɔ̄ʼ epuɔ Ŋgaliléa. Epuɔ Ŋgaliléa mɛ́t é lɛ á ntē Mía Ŋgyā Ndém, ńnɔŋ nzwhítɛ mena, ńdɔkɔ ŋgɔ̄ á nnɔɔ̄ŋ epɔʼ á mbū Ndém. Pilat á tó mɛ́ shʉʼ éwú, ńzwhíte á wɔ́p, metshi mɔ́p é tó mbú nnūʼ emi mena pɔ́p. 2Yɛɛ́so á júʼ, ńzɛ́tte á wɔ́p ŋ́gɛ: «Pɛ é kwaŋ ŋ́gɛ, epuɔ Ŋgaliléa puɔ, é lɛɛ́ ŋkwhʉ́ɛ ejʉɔ ntií lewhʉ̄ páʼa, ńdɔkɔ ŋgɔ́ɔ memía megaŋ mefa, ńtɔ́kɔ emɔ̄ʼ epuɔ Ŋgaliléa lɛ́? 3Ŋgáŋ, á té épúp ɔ́, á gɔ́ áa lɛ, pɛ gɔ́ te gɔ̄ nnɛ̄t zɛ, ŋ́gwáʼ atswhī tepɔŋ zɛ́ ɛ́, mbɔ pɛ e shʉʼ ezéŋ elákne azɛ́ metsem. 4Pɛ ekímte anu zīi á le ghʉ̄ á ntē lepfhō Silowɛ, sisia apaʼa, a le kemnē eswɛ́t epuɔ ntsɔp lefaá mé legēm, pɛ é kwaŋ ŋ́gɛ epuɔ puɔ mɛ́t, é lɛɛ́ ŋkwhʉ́tɛ páʼā, ńdɔkɔ ŋgɔ́ɔ memía megaŋ mefa, ńtɔ́kɔ epuɔ metsem á Yelósalɛm lɛ́? 5Ŋgáŋ, á té épúp ɔ́, á gɔ́ áa lɛ, pɛ gɔ te gɔ̄ nnɛ̄t zɛ, ŋ́gwáʼ atswhī tepɔŋ zɛ́ ɛ́, mbɔ pɛ e shʉʼ ezéŋ elákne azɛ́ metsem. »
Ashuŋne lepúʼ ánɛ athʉ́ fiŋge zīi, á ŋkíŋ
6Yɛɛ́so á lɛ ndɔ̄k ashuŋne lepúʼ jʉɔ, ńdé á mbū pɔ́p ŋ́gɛ: «Mmɔʼ ŋiŋ a le phī athʉ́ fiŋge á ŋkāʼ methʉ́ lɛzɛŋ yí, éfú nnáŋ tɛ ŋgʉ̄ɔ éwú, ŋ́gɛ yí gʉɔ á ŋkápa, ŋ́kó te tsɔ áa atá jʉ́ɔ. 7Ńdɛ ndé á mbū ŋgaŋ afaʼ ŋ́gɛ: “Á ayáʼa ŋguʼ tɛ́t, páʼ meŋ á si nzīŋɛ á ŋkāʼ ega, ńtsāʼa ntá ánɛ athʉ́ jʉɔ, meŋ nda jʉ́ɔ ɔ́. Kʉɔ́ʼɔ́, á si njhʉ́ɛ ajʉʼ atsáʼ ndémndēm.” 8Á pwɛt á mbū yí ŋ́gɛ: “Ndi, tsɔ́ʼɔtsɔ́ʼ, zéŋɛ esákne ŋguʼ jʉɔ, meŋ etāʼ letseŋ, ńnéŋ ekaŋne éwú. 9Ŋ́gɔ́ amɔ̄ʼ, á láʼ efʉʼ páʼa, ńzém ntá. Ŋ́gɔ́ te zém, ajɔ̄ afʉʼ, o ké ntswī meŋ ekʉɔ́ʼ.”»
Yɛɛ́so a á ega ŋghʉ̄ɛ menzwí á tʉɛ, á aleʼé aswite
10Á lɛ amɔ̄ʼ aleʼé aswite, Yɛɛ́so á gɔ́ á ŋgyā aswiŋte nzíʼnɛ epuɔ. 11Mmɔʼ menzwí á gɔ́ éwú, mbɔ mmɔʼ esī e lē mbwɔ́ʼ ŋkaʼte yí, tɛ á ghʉ ŋguʼ ntsɔp lefaá mé legēm, páʼ a gɛ ncʉ́ʼɛ nzīŋɛ áa ŋŋɔʼne ŋɔʼné, tɛ ŋgɔ́ yīi a gɔ le pʉ́ʼɛ nnɛ̄t ntshí á ajʉʼ nzīŋ ɛ́. 12Yɛɛ́so á jʉ́ɔ menzwí wuɔ mɛ́t, ńtɔ́ŋ á yí, á shʉʼ, á lé á mbū yí ŋ́gɛ: «Maá, o ó ndáʼ ntē agɔ jú. » 13Ŋ́gē elé épúp, ńnɔŋ nzápa mbū mí ánɛ yí. Á lɛ mbʉ́ʼɛ nnɛ̄t ntshí ajʉʼ efʉʼ mɛ́t efʉʼ mɛ́t, ńzī á lewuʼte á Ndém.
14Ŋiŋ yīi a cʉtɛ menu á ŋgyā aswiŋte, á jʉ́ɔ páʼ Yɛɛ́so a á pɛ́t á ŋiŋ aleʼé aswite, ntɔ̄ŋ yí é fuʼ. Á cɔ́k alāʼ zīi á ŋgɔ́ á esī, ńdé ŋ́gɛ: «Meleʼé alāʼ é esī ntokó, émi mɛ́ gɔ elɔk ŋghʉ̄ afaʼ, pɛ eshʉ̄ʼ ánɛ meleʼé muɔ mɛ́t, mɛ́ epɛ́t á wɛ́. Ndɛ́ʼ ŋiŋ á zéŋ eshʉ̄ʼ ega aleʼé aswite. » 15Ndi Yɛɛ́so á pwɛt á mbū yí, pɔ́ epuɔ pí ŋ́gɛ: «Pɛ é páʼā, ŋ́gɔ́ megaŋ ŋkɔŋ menēk. Á té kūʼ aleʼé aswite pɛ kɛ́ʼɛ mefɔŋ mɛ́ pɔ́ menjakási mɛ́, ŋ́gʉɔ ŋghʉ̄ pɔ́ nú ntshi ɛ́ kɛ? 16Menzwí wuɔ á si ŋgɔ́ ndhu Ablaham, mbɔ Sɛ́ta a lē ŋkwɛ́t á yí mé agɔ, á jʉ́ɔ ŋgʉɔ̄ʼ ŋguʼ ntsɔp lefaá mé legēm, á ka lɛ̄ mbɔ̄ŋ ŋ́gɛ mɛ́ ekɛ́ʼɛ á yí, ánɛ agɔ mɛ́t aleʼé aswite ɛ́ lɛ̄?» 17Yɛɛ́so á lé épúp, esē é ge ekú megaŋ mbo pí, epuɔ tɛ nzáne é piŋ nnɔ̄ŋ ŋkáka ánɛ meŋkʉʼne anu mīi, a á si ŋghʉ̄ɛ.
Yɛɛ́so a á ega ntswīi páʼ Lefɔ Ndém e ziīŋ épúp á tsetsɛlɛ epuɔ
(Mat 13.31-32; Mlk 4.30-32)
18Afʉʼ á kuʼ, Yɛɛ́so á zéŋ ndé ŋ́gɛ: «Lefɔ Ndém é péʼe, é swhí akɔ̄? Meŋ gɔ elɔk akɔ̄, ŋ́ghíte ajū mīi é swhí aziɛ́ ɛ́? 19É swhií mmɔʼ ntií lesa sésōk tsīi, mmɔʼ ŋiŋ a le māʼ á ŋkāʼ yí, é shʉʼ esáʼ, ńtswhí, mbū é tó, tɛ á cʉ́ʼ páʼ athʉ́ lā, tɛ meséŋ é shʉʼ éwú mbáʼ meŋka mɔ́p. »
(Mat 13.33)
20Yɛɛ́so á zéŋ ndé ŋ́gɛ: «Meŋ gɔ elɔ̄ɔk akɔ̄ ŋghíte ajū mīi Lefɔ Ndém é swhí aziɛ́ ɛ́?» 21Ézéŋ ŋgɔ́ páʼ levwi yīi, mmɔʼ menzwí a le kʉɔ́ʼ afalíin memía ekāŋ tsɛ́ tɛ́t, ńnéŋ éwú ndɔk esɛ̄t, ńtshí, ńzwíʼte tɛ levwi á ghʉ á kɔ́ʼ. »
Nchu ŋgyā á lelɔk ŋkó á ntē Lefɔ Ndém é swɛ́nne swɛnné
(Mat 7.13-14, 21-23)
22Yɛɛ́so a le nɔ̄ŋ ŋgʉɔ mé swɛ́t alāʼ, á Yelósalɛm, ńziŋɛ ntɔ́ktɛ ánɛ metésɔŋ pɔ́ mekap elāʼ, ŋ́gyáa ntekné á mbū epuɔ. 23Mmɔʼ ŋiŋ á ghʉ nzɛ́tte á yí ŋ́gɛ: «Ndi, epuɔ pīi pɔ́ e láʼ etswɛ́te, é té záne lɛ́?» Yɛɛ́so á fhó épúp, ńzī á lelē á mbū alāʼ ŋ́gɛ: 24«Pɛ ekāk ete, á letɔ̄k ánɛ nchu ajʉʼ yīi é swɛ́nne swɛnné tɛ́ ntswɛ́t. Pɛ ezhɛ́ á légɛ, epuɔ tɛ nzáne e shʉʼ enɔŋ efaʼa á letɔ̄k éwú, tɛ́ pɔ́ le mɛnzhɛ jʉ́ɔ. 25Afʉʼ a fú ekuʼe, ŋgaŋ ŋgyā á elū á esī, éfē ŋgyā. A piŋɛ ŋgē efe ŋgyā, pɛ zɛ́t á apɛ́, mbɔ pɛ e tshí éwú, énɔŋ ekwáʼtɛ nchu ŋgyā elʉ́ɛ́ gɛ: “Ndi, tsɔ́ʼ nchu ŋgyā pek ekó éwú.” A epwɛ̄t á mbū pɛ ŋ́gɛ: “Meŋ ka zhɛ́ ajʉʼ zīi, pɛ kɔ́ʼɔ éwú ú.” 26Ajɔ̄ afʉʼ, pɛ epiŋ nzī á lelhʉ athū zɛ́, ńdé ŋ́gɛ: “Ḿpɛ mé kɛ te si mbútɛ etsō mpfɛ́tɛ, ḿbiŋɛ nnúu kɛ? Wu mé kɛ té si ntɔ́ktɛ ánɛ mekap alāʼ mék, ńtékɛ epuɔ ɔ́ kɛ?” 27A ezéŋ ndé leswhī leswhī ŋ́gɛ: “Meŋ ka zhɛ́ ajʉʼ zīi, pɛ kɔ́ʼɔ éwú ú. Pɛ efhó á nchu ŋgyā meŋ ŋgʉ̄ɔ, pɛ pīi, pɛ kʉ́ʼnɛ efʉ̄ʼtɛ menu tepɔŋ.” 28Pɛ efú mbīŋ njʉ́ɔ wɔ maŋgānjʉʼ pɛ́, á Ablaham, á Izak, á Yakɔ́p, mbɔɔ emɔ̄ʼ metswi‑ŋke Ndém, pɔ́ a Ndém e enáŋ á ntē ŋgɔŋ eswhī, pɛ epiŋ ŋgɔ́ á nzem apɛ́, ńdaa mpfɛ́tɛ mesɔŋ. 29Afʉʼ mɛ́t, emɔ̄ʼ epuɔ e efhó á mbuʼ esaáʼ‑nu pɔ́ mbuʼ mbií‑nu, éfhó á mbuʼ ŋkɔŋ pɔ́ mbuʼ ntsēŋ, éshʉʼ mbú ncúʼte ńnáŋ á lezēŋ Ndém, ńjhʉ́ á mía lekāk. 30Pɛ ezhɛ́ á légɛ emɔ̄ʼ epuɔ pīi, pɔ́ é tsetsɔŋɔ, ŋ́gɔ́ mezoknzem, pɔ́ e shʉʼ ecʉ́ʼ megaŋ mvhɔ. Emɔ̄ʼ epuɔ pīi pɔ́ é megaŋ mvhɔ, e ecʉ́ʼ mezoknzem. »
Epuɔ Yelósalɛm e epá epuɔ pīi Ndém a á tó á wɔ́p
(Mat 23.37-39)
31Á lɛ afʉʼ mɛ́t, emɔ̄ʼ epuɔ Falísia é shʉʼ ndé á mbū Yɛɛ́so ŋ́gɛ: «Fhó ega ŋkʉ̄ ŋgʉ̄ɔ mé ajʉʼ ndɛʼɛ, efɔ Elōde a á si efāʼa á lezwhī á wú. » 32Á pwɛt ndé ŋ́gɛ: «Pɛ ekó ntswī á mbū ŋgaŋ mekɛ̄t wuɔ mɛ́t ŋ́gɛ, a ejúʼ á mbɔŋɔ́, meŋ á ayáʼa, ńjūŋɔ mesī ánɛ epuɔ, ŋ́ghʉ̄ɛ, megaŋ agɔ é tʉɛ, njhʉ̄ e elá, meŋ ezéŋ nzɛ́t ŋghʉ̄ɛ épúp. Ńdáʼ á páte ezɔ́, ḿmākne mefaʼ má. 33Táʼ, meŋ a ké egʉɔ ayáʼa, éshʉʼ ezók ezɔ́ eziŋɛ, élu á páte ezɔ́, élɔk á leziŋ ga egʉɔ mé mvhɔ, mé Yelósalɛm. Á ka pɔ̄ŋ ŋ́gɛ, mɛ́ ezwhí á ntswi‑ŋke Ndém ajʉʼ á ndɛʼɛ, té gɔ́ áa Yelósalɛm ɛ́. »
34Ḿbiŋ ndé ŋ́gɛ: «Yaāa me pɛ, epuɔ Yelósalɛm, yaāa me pɛ pīi, pɛ zwhítɛ metswi‑ŋke Ndém, ńdɔ̄kɔ metɔ́ ntémtɛ epuɔ metsem pīi, Ndém a á tó á mbū pɛ, ńzwhítɛ. Meŋ á faʼ lɛ akɔ̄ lɛ́, á lecūʼte á wɛ́ á lezēŋ meŋ, páʼ mía ŋgāp yīi, a júptɛ epɔ̄ pí á ntē mbap yí lā. Pɛ epīiŋ te véŋ. 35Pɛ eké nzhɛ́ á légɛ, Ndém a a shʉʼ ewáʼ alāʼ zɛ́ mɛ́t, tɛ a etshí efemm. Meŋ shúŋɔ á wɛ́ ŋ́gɛ, pɛ cʉʉ́ʼ á gá jʉ́ɔ ɔ́, tɛ eláʼ etshí afʉʼ zīi, pɛ é yá lepɛ ndé ŋ́gɛ: “Mbwɛ́né e egɔ́ á mbū ŋiŋ yīi, a shʉʼɛ, mbɔ Ndém mé chʉ́ á yí, ńtó á mbū pek.”»
Currently Selected:
Lúkási 13: ybb
Highlight
Share
Copy
Want to have your highlights saved across all your devices? Sign up or sign in
© CABTAL
