Malakus 2

Yeso baŋə wù tə kpu doʼonə bad kəmɔʼ

(Mat 9.1-8; Luk 5.17-26)

1Ambə tsuʼu n loʼ n tsəghə tsunə, Yeso n ndow dzəŋŋə n naʼ i Kapenum. Ghə̂ ghey fu inaʼ n zow tsəghə ndow nə̀ tə n fən nyi. 2Sey ghə n tsuŋ tsu fu n ndaw sa, buʼ kə n kəm way tə̀ wù ni təmi tii, kasə̀ a bii. Yeso n naʼlə ndow ghəə a Kəzə̀ tə̀ ghə. 3Ghə̂ a loʼ ghə n ndòw bə fu, tow ghə ukaykə ghi wù loʼ ghə boʼo keelinə nə kəmbùŋ nə̀ wû u wi wə n kpu doʼo. 4Ambə ghə dəm kìi tsunə ni nyi koʼ Yeso bòʼ nɔɔ kə aghə̂ key, ghə n kɔʼ ndòw n tow kə ndaw, chi tsu kəbùʼ, nyiəllə nyi tsu ndòw wù wey n mbùŋ kə tii kə. 5Nghee tə̀ Yeso koʼ tsunə bəghəm i fə̀ŋ i ghə zə, tə n dza ndòw tə̀ wù wey wû u wə â kpu doʼonə nə̀, “N waa, Mə n ghəə a bəbə ghə a neyzəə.”

6Ghə̂ a dii a kəlaŋ a loʼ ghə, ghə â loʼnə fu n bəbə n fə̀ŋ tə ghə nə̀, 7“A loʼ kee mbwɔ wən ghɔɔmənə ndzoʼo ghəə ghən ə? Tə sey tsayyə Kəzə̀. À kəm loʼ ndee tə loʼnə ni neyzəə bəb zə aghə̂ zə ə? A may kə Kəzə̀.”

8Yeso n daŋŋə keeli tsu n fə̀ŋ ə wi ghə zey ghə â moʼlənə n fə̀ŋ tə ghə. Tə dza ndòw tə̀ ghə nə̀, “a loʼ kee ghaa moʼlənə ndzoʼo ghəə ghey n fə̀ŋ tə ghaa ə? 9À loʼ ghə i ghaa zə i taw tsəghəshinə ni dza, ni dza nə̀, ‘Mə n ghəə ghə a bəbə a neyzəə,’ nkee ni dza nə̀, ‘nuu kɔʼ, wə ney kɔʼ mbuŋ kə, wə bwey ndòw.’ 10N maŋa ləghə nə̀ ghaa keeli tsu nə̀ n loʼ Waa Wù sɔŋtsuʼ, n khə kədaʼa ni neyzəə ghəə a ghə̂ a bəbə ghə fa n mbi.” Sey, tə n dza ndòw tə̀ wù dzaŋa wey nə̀, 11“N dza bə tə̀ wɔ nə̀, nuu kɔʼ, wə ney kɔʼ mbùŋ kə, wə ndòw dzəŋŋə n ndaw zə.”

12Wù tii n daŋŋə nuu kɔʼ, ney kɔʼ mbùŋ kə wi, bwey nuu shi ndòw n sə̂ kə ghə adzəm. Ghə i tii zə n tɔʼ loʼ ghə i zum zə idzuu zə tə̀ ghə̂ ghə adzəm. Ghə n fu kali u Kəzə̀, ghɔɔmə n wû i ghə nə̀, “ghey ka kam koʼ koʼ tsə ghə i loʼ zə tə̀ a loʼ i zən.”

Yeso tɔŋɔ Levi nə̀ tə doʼo ngəd ə wi

(Mat 9.9-13; Luk 5.27-32)

13N tsuʼ fə loʼ fə, Yeso n ndòw soʼo n nguŋ inyi, Nɔɔ kə aghə̂ kə n dzəŋi bə fu n səə wi. Tə n dii ghə n ghəə ghə. 14Nghee tə̀ tə bwey ndownə, tə n koʼ ndòw Levi waa Afus tə doʼnə n luʼu k-a-fwaʼ kə wi kə kwɔɔ kə màʼlə kə tsow kə. Tə n dza ndòw tə̀ wi nə̀, “Dzûmə bə mə.” Levi n bɔɔmə nuu kɔʼ dzûmə ndòw wi.

15Nghee tə̀ i zən tsəghə tsunə, Yeso n kaʼ ndow ni zə̂ n ndaw Levi. Ndəmə ghə̂ kwɔɔ a kəmàʼlə ghə nsə ghə̂ ghey ghə loʼ nə̀ ghə mâ dzum nuu shi ghə inaʼ n dzûmə bə Yeso. Ndəmə ghə̂ a tii ghə n təmdzəŋi ndow Yeso nsə dzûmə tə wi tə ni zə̂ ghi ghə. 16Ambə ghə̂ a dii a kəlaŋ ghey ghə â loʼ soʼonə ghə̂ a tə Falasi ghə, koʼ tsunə nghee Yeso zəə dzəŋinə ghi ghə̂ a bəbə ghə nsə ghə̂ a kwɔɔ a kəmàʼlə ghə. Ghə n bəb ndòw tə̀ dzûmə tə wi tə nə̀, “A loʼ kee tə zəə dzəŋinə ghi ghə̂ a kwɔɔ a kəmàʼlə ghə nsə ghə̂ a bəbə ghə?” 17Nghee Yeso zow tsunə ghəə ghən, tə n dza ndòw tə̀ ghə nə̀, “À way dzə ghə̂ ghey ghə loʼnə utaw ghə kəŋənə wù ngàŋ, a loʼ ghə̂ ghey ghə dzaŋanə ghə kəŋənə wù ngàŋ. N ka bə dzə ni bə tɔŋɔ shi bə ghə̂ ghey ghə loʼnə tsətsəghə, n bə ni bə tɔŋɔ shi bə ghə̂ ghey ghə loʼ nə̀ ghə n ghə dzûm nuu shi boʼ bəb i ghə.”

Ghə bəb Yeso n ghəə ghə kuum dzuu i bam zə

(Mat 9.14-17; Luk 5.33-39)

18Dzûmə tə Jɔn nsə dzûmə tə ghə̂ a tə Falasi ghə â bəghə ghə n bam idzuu. Ghə̂ a loʼ ghə n bə bəb tə̀ Yeso nə̀, “a loʼ kee dzûmə tə Jɔn nsə dzûmə tə Falasi tə bamnə dzuu zə, a ghə ghə̀ a kee bam way ə?” 19Yeso n beeli ndòw ghə dza nə̀, “fə̂ a num weyzən a loʼnu ni bam idzuu nə̀ tə loʼ dzəŋi ghi ghə ə? Ngaŋ! Ghə way dzə ni bam idzuu nə̀ tə loʼ ghi ghə. 20Nəŋə i bəghənu, tə î nuulənə, tə naŋa sə tsu ghə, ghə i bam idzuu n nəŋə i tii zə. 21Wù way dzə ni ney bad kə ndzə kə fəghə kə, tə taŋi fìi kəbùʼ n ndzə tə wey tə. Abə tə ghəŋənə sey, bad kə ndzə kə fəghə key, i ballə shi bə, buʼ kə tii kə i faalə dow tsu. 22À loʼ kə ighələ tə̀ wù way ni ney kɔʼ səŋ nlə, tə kuu ndòw n suʼ i wey zə#2.22 Ghə̂ ghən a faalə tsə suʼ tə nlə tə ghə n gow tə nyam, dii tsu nə̀, səŋ ə nlə zaŋŋə buʼlə maʼa suʼ tə tii tə.. Abə tə ghəŋənə sey, nlə mey i bey buʼu maʼa kɔʼ suʼ i tii zə. Tə i nayyə maʼa suʼ i tii zə, tə guŋu soʼo nlə n tii mə. Wù fə̀dlə ney kɔʼɔ səŋ nlə, tə n kuu nyi tsu n suʼ i fəghə zə.”

Yeso loʼ Muu Tsuʼ inaʼ

(Mat 12.1-8; Luk 6.1-5)

23N tsuʼ inaʼ u Təjuu u loʼ wə, Yeso n bwey tɔɔlə ndòw n sûm wə asaŋ u loʼ wə. Nghee tə̀ dzûmə tə wi tə bəghənə n baa wi, ghə n kɔɔlə fəə bə sə asaŋ a loʼ ghə. 24Ghə̂ a tə Falasi ghə n bəb ndòw tə̀ wi nə̀, “a loʼ kee dzûmə tə tə̀ ghəŋŋənə ghə zey laŋ kə tsuʼ inaʼ kə ka bəghəm ə?

25Tə n beeli ndòw ghə dza nə̀, ghaa ka kam tɔŋɔ koʼ n màʼlə K-a-zə̀ ghəə zey Devid ghi ghə̂ a wi ghə â ghəŋənə n nəŋə zey dzəŋ a zabənə ghə ə? 26N tsuʼu mey Abiata â loʼnə fɔɔngili u nii nii wə, Devid n nyi ndòw n ndaw Kəzə̀, ney kɔʼ baa K-a-zə̀ kə bam kə, zə̂ kɔʼ ghi ghə̂ a wi ghə, nə̀ a loʼ sey laŋ kə dii nə̀ a khə kə ghə fɔɔngili ni zə̂.”

27Sey Yeso n dza ndòw tə ghə nə̀, “Zə̀ kə â ghəŋə tsuʼ inaʼ tə̀ wù, Tə â ka ghəŋə dzə wù tə̀ tsuʼ inaʼ wə. 28A wey loʼ ghə i tii zə Mə, Waa wù sɔŋtsuʼ, n loʼnə Mûkəbii kasə̀ n tsuʼ inaʼ.”

Currently Selected:

Malakus 2: WEH

Highlight

Copy