Malakus 3

Yeso baŋŋə wù nə̀ kpii kə n kpu doʼo

(Mat 12.9-14; Luk 6.6-11)

1N tsuʼ fə loʼ fə, Yeso n ndòw kpiʼi n ndaw kədzəŋi ghə̂ a Təjuu. Wù loʼ n loʼ fu nə̀ wɔɔ kə wi kə n tə̀ghə doʼo. 2Ghə̂ a loʼ ghə n loʼ fu ghə kəŋənə jìi ni kwu Yeso abə tə ghəŋə bəəbə tsunə ghə i loʼ zə. Ghə n tɔʼɔ laalə wi ni koʼ nə̀ tə i baŋŋənu wù n tsuʼ inaʼ ə? 3Yeso n dza ndòw tə̀ wù wey wɔɔ kə wi kə â tə̀ghə doʼonə nə̀, “nuu kɔʼ, wə təmi shi bə n sə kə aghə̂.” 4Tə n bəb ndòw tə̀ ghə̂ ghey nə̀, “Laŋ kə saa kə dza nə̀ ngee kùm tsuʼ inaʼ ə? Ni ghəŋə ndzuŋ nkee ni ghəŋə bəb ə? Ni bəghəshi muu i wù nkee ni wey wù ə?” Ghə n zow doʼo ndòw mɔŋ ka beeli wi.

5Tə n laalə tsəghə ndòw ghə n nəghə u fəə wə, fəd khə imôw n fə̀ŋ boʼ ghə, n təŋkey, ghə â ngii taw n tow kə. Tə n dza ndòw tə̀ wù wey nə̀, “naalə shi ndòw wɔɔ kə kə̀.” Wù tii n naalə shi i ndòw, wɔɔ kə wi kə n daŋŋə taw doʼo dzəŋŋə i bə. 6Sey, Ghə̂ a tə Falasi ghey n nuu shi i ndòw, ndòw təmdzəŋi ndòw iwû ghi ghə̂ a Helɔd ghə ni kad naŋa tsu tsəm nghee ghə i weynə Yeso tii.

Nɔɔ kə aghə̂ kə dzûmə ndow Yeso n Nyi i Galili

7Yeso nsə dzûmə tə wi tə n nuu tsu fu, ndòw n nyi i Galili. Nɔɔ kə aghə̂ kə n dzûmə ndòw wi, ghə nuu bənə n mboʼo Galili. 8Ambə ghə̂ a zow tsunə ghəə ghey tə fwaʼa nə̀, nɔɔ wə aghə̂ wə n nuu bə n Judeya, n Yerosalem, n mboʼo Idumia, n nguŋə Jodan i loʼ zey nsə n naʼa tə Tayra nsə Sidɔn. 9Nghee tə nɔɔ kə aghə̂ kən zuʼu bənə n səə wi, Yeso n dza ndòw tə̀ dzûmə tə wi tə nə̀ ghə bayyə naŋa tsu nyaŋi fə kəfən tə̀ wi, sey nə̀ kə̂ ghə̂ a nə tənə zoʼlə maʼanə wi. 10Nghee tə â loʼ nə̀ tə n ngii baŋŋə ndəmə aghə̂, ghə̂ ghey ghə â dzaŋanə n nam tənə bə kə iwû n səə wi ni mɔm wi tə ghə taw. 11Nəŋə tədzəm abə zay u bəbə u koʼ tsunə wi, ghə n bwù bə aghəd, dey shi kɔʼ n dzə̀ i taw zə nə̀, “wə loʼ Waa Kəzə̀!”

12Yeso n kii naŋa ndòw zay u bəbə u tii wə nə̀ kə̂ ghə nə ghəŋənə nə̀ ghə̂ à keeli wù wey tə loʼnə ghii wə.

Yeso sày ngəd tə wi ighəm n ghii tə təbəghə

(Mat 10.1-4; Luk 6.12-16)

13Yeso n nuu tsu fu, nuu kɔʼ ndòw nə ukaʼ, tɔŋɔ bə ghə̂ ghey tə â ləghənə n səə wi, ghə n bə n səə wi. 14Tə n sày kɔʼ ghə̂ a wi ghey ighəm n ghii ghə təbəghə tə â tɔŋŋənə nə̀ à loʼ təngəd nə̀ ghə i loʼ ghi wi, sey nə̀, tə i loʼ ni tûm shi ndòw ghə nə̀ ghə ndòw naʼa tûm i dzuŋu zə. 15Ghə i khə soʼo daʼa kə ni dzùm shi zay u bəbə wə. 16À wən loʼ zəd a ngəd tə wi tey ighəm n ghii tə təbəghə tə â say kɔʼnə. Â loʼ, Shimun wən Yeso a tsə kpiʼi soʼonə zəd i wi zə nə̀ a loʼ Pita, 17Jems nsə waazə wi Jɔn, waa a Zebedi (Yeso â tsənə zəd a ghə ghə̀ nə̀ a loʼ Boanajes, tɔŋŋə Waa ghə ighow zən i mwaalə nə). 18Andria, Filip, Batolomyo, Matyo, Tɔmɔs, Jems waa Afus, Tadios, Shimun, wù wən tə a taʼa ghi ghə̂ ghən ghə ləghənə naʼ zə, 19nsə Judas Iskaliɔt wù wən tə â fiinə Yeso.

Ghə tɔŋɔ Yeso nə̀ a loʼ Də̀ŋ kə avəətsəə

(Mat 12.22-32; Luk 11.14-23; 12.10)

20Yeso n nyi ndòw n ndaw i loʼ zə, nɔɔ kə aghə̂ kə n kəm zuŋŋə bə fu, jìi n way tə̀ wi ghi dzûmə tə wi tə ni buʼ zə̂. 21Ambə ghə̂ a sad i ndaw i wi a zow tsunə ghəə ghən, ghə n ndòw ni ndòw kwu nuu wi, n təŋkey, ghə̂ ghə â dza nə̀, “tə zəghənu.” 22Ghə̂ a dii a kəlaŋ ghey ghə â nuu bənə n Yerosalem n dza nə̀, “Belzebul loʼ n kow wi, a loʼ də̀ŋ kə zay u bəbə wə kə fuunə wi n daʼa kə ni dzùm shiə zay u bwu wə n kow ghə̂ ghə.” 23Sey, Yeso n tɔŋɔ tsu ghə, ghɔɔmə ndòw tə̀ ghə n ghɔɔmə i fənkəfən dza nə̀, “Satan loʼ ngee ni dzùm shi wû u wi ə? 24Abə fɔɔ u dzawwə doʼonə, zuulə baalə n wû u wi, fɔɔ u tii u way ni təmi koʼ. 25Sad i ndaw zey i dzawwə doʼonə, zuulə baalə n wû u wi, i way ni təmi koʼ. 26Abə Satan dzawwə doʼonə n wû u wi, zuulə, fɔɔ u wi wə î way ni təmi, fɔɔ u wi wə n sey may. 27Kuum kuum, wù way dzə ni nyi ndòw n ndaw wù kədaʼa, tə boʼo nuu fə u wi nə̀ tə ka wi buʼ kwu kow naŋa dzə. Sey tə i loʼ ni kûmmə nuu ufə n ndaw wi. 28N dza bə isəŋə tə̀ ghaa nə̀ Zə̀ kə i neyzəənu ghəə a bəbə ghən ghə̂ a ghəŋŋənə adzəm nsə ghəə a tsayyə ghən ghə ghɔɔmənə bòʼ wi. 29A kee loʼ kə nə̀, Zə̀ kə i neyzəə koʼ way wù wey tə tsayyənə Zay kə Zow kə, n təŋkey, tə ghəŋə ndzoʼo bəb zey i doʼo tən nə.” 30Yeso â dza sey, n təŋkey, ghə̂ a tii ghə â dza nə̀ daʼa kə wi kə nuu bə n wɔ zay kə bəbə kə.

Waazə a Yeso ghi nay wi

(Mat 12.46-50; Luk 8.19-21)

31Sey, waazə a Yeso ghi nay wi n ndòw bə fu, təmi doʼo tsu a bii, tûm tsu wù loʼ nə̀ tə tɔŋɔ fu bə wi. 32À n loʼ nə nɔɔ kə aghə̂ kə n doʼo dzəŋ tsəghə bə Yeso. Ghə n dza ndòw tə̀ wi nə̀, “nay wə ghi waazə ghə a tey bii, ghə ləghə ni koʼ wɔ.”

33Yeso n bəb ndòw tə̀ ghə nə̀, “Nay wuŋ loʼ ndee? Waazə ghuŋ a loʼ ghə ndee?” 34Yeso n laalə tsəghə ndòw ghə̂ ghey ghə a doʼo dzəŋ tsəghə bənə wi dza nə̀, “Nay wuŋ wən ə nsə waazə ghuŋ ghə. 35Wù wey tə ghəŋŋənə ghəə ghey Zə̀ kə ləghənə, loʼ waazə ghuŋ nsə nay wuŋ.”

Currently Selected:

Malakus 3: WEH

Highlight

Copy