Malakus 1

Jɔn wù fuu u mmuu n Kəzə̀ mə naʼlə tûm

(Mat 3.1-12; Luk 3.1-18; Jɔn 1.19-28)

1À wən loʼ nghee tə tûm i dzuŋu zə bòʼ Yeso Klisto, Waa Kəzə̀ â kaʼnə tii. 2Wù tûm Kəzə̀ Ayzaya â tɔ̀ɔ naŋa n màʼlə K-a-zə̀ nə̀

“Koʼo, mə i tûm ndow tsəndəghə zuŋ isə,

Tə i ndow bayyə naŋa tsu jii zə tə̀ wɔ,

3Bɔŋ kə wù kə n fuŋu fənə bə n mbvən ə ntsaŋ dza nə̀,

‘Bayyə naŋa tsu na jìi tə̀ mûkəbii,

Ghaa teyyə kəŋə ndow jìi wi tsətsəghə.’”

4Sey, Jɔn wù fuu u mmuu n Kəzə̀ mə n ndòw bə n mbvən ə ntsaŋ naʼlə bə nə̀ ghə̂ a kweyyə fə̀ŋ tə ghə, ghə ney mmuu n Kəzə̀ tə̀ Zə̀ kə neyzəə ghəə a ghə a bəbə ghə. 5Ghə̂ ghə n nuu bə n mboʼo Judeya idzəm nsə n naʼ i Yerosalem bə n səə Jɔn. Ghə n dza bə bəb i ghə tə wi, tə n fuu ghə n mmuu n Kəzə̀ mə n dzuu Jodan.

6Jɔn â dzəŋə keeli təndzə̂ nə̀ ghə faalə n nyuŋ tə nyam i loʼ zə ghə tɔŋŋə nə̀ a lòʼ Kamel. Tə n khə fəkwɔɔ nə isad nə̀ ghə faalə n gow nyam. Fəzəə u wi wə n loʼ təbii nsə zow tə. 7Tə n naʼlə bə tûm tə̀ ghə̂ ghə dza nə, “Wù loʼ bəghə n baa mə tə tsəghəshinə mə. N ka kɔʼ kpii dzə ni buʼ gham tsu n zii baʼ u təgow u wi. 8N fuu ghaa n mmuu n Kəzə̀ mə nə mmuu. Tə î kee bə fuu ghaa n mmuu n Kəzə̀ mə n Zay kə Zow kə.”

Yeso ney mmuu n Kəzə̀

9N tsuʼu n tii mə, Yeso n nuu bə n naʼ i Nazaled n mboʼo Galili bə ney kɔʼ mmuu n Kəzə̀ n wɔ Jɔn n dzuu Jodan. 10Ambə tə nuu shiə kɔʼɔ bənə nə mmuu, tə n koʼ bikighow kə chi shi ndòwnə, Zay kə Zow kə n tsu bə idəŋ n kow wi n wû u kəfə̀. 11Sey, dzə i lòʼ zə n ghɔɔmə shi tsu bə n bikighow dza nə̀, “Wə lòʼ waa wuŋ u tsuʼu wə, fə̀ŋ zuŋ ngii duʼlənu ghi wɔ.”

Satan mɔm koʼo Yeso

12Zay kə Zow kə n daŋŋə ney ndow wi n mbvən ə ntsaŋ 13Tə n doʼo fu nə ntsuʼu nghəm nkaykə, Satan n mɔɔmə koʼo wi. Nyam tə mbvən tə n loʼ soʼo fu. Ngəd tə Kəzə̀ tə n laalə tə̀ wi.

Yeso zey fwaʼ kə wi

14Ambə ghə bə kwu kɔʼ Jɔn, fìi naŋa ndow wi n ndaw tsaʼ, Yeso n nuu nyi ndow n mboʼo Galili, naʼlə ndòw tûm Kəzə̀ i dzuŋu zə dza nə̀, 15“Nəŋə zə n kpii, fɔɔ u Kəzə̀ wə n shɔd. Kweyyə na fə̀ŋ tə ghaa tə, ghaa bəghəm tûm i dzuŋu zə.”

16Nghee tə̀ Yeso bwey ndownə n nguŋ ə nyi i Galili, tə n koʼ ndow Shimun nsə waazə wi Andria, ghə maʼlənə wûu u tətsəghə wə nə inyi, n təŋkey ghə â lòʼ ghə̂ a kwɔɔ a tətsəghə ghə. 17Tə n dza tə̀ ghə nə̀, “Bə na ghaa dzûmə bə mə, nghee tə ghaa loʼ ghə̂ a kwɔɔ a tətsəghə ghə, mə zoʼlə ghaa n jìi zey ghaa i ghəŋŋə nə̀ ghə̂ a dzûmə mə.”

18Ghə n bɔɔmə naŋa sə tsu wûu tə tətsəghə tə ghə fu, nuu ndow n baa wi. 19Ambə Yeso dzə bwey kəŋə ndownə, tə n bə koʼ bə Jems nsə waazə wi Jɔn, waa a Zebedi, ghə loʼnə nə kəfən, bayyə wûu tə tətsəghə tə ghə. 20Tə n daŋŋə tɔŋɔ tsu ghə. Sey, ghə n naŋa sə tsu bày ghə Zebedi fu nə kəfən ghi ghə̂ a kəfwaʼ ghə, nuu ndow n baa wi.

Yeso dzùm shi Zay kə bəbə kə n kow wù

(Luk 4.31-37)

21Yeso ghi dzûmə tə wi tey təkaykə n nuu ndòw n naʼ i Kapenum. Ambə n tsuʼ inaʼ u ghə, Yeso n ndòw n ndaw kədzəŋi ə ghə̂ ə Təjuu, kaʼ ndòw ni dii aghəə. 22Dzuu zə n ngii zum aghə̂ n jìi zey tə â diinə tii, n təŋkey tə â dii dzə way n jìi zey ghə̂ a dii a kəlaŋ ghə â diinə tii. Tə â fədlə dii n jìi zey ghɔɔmə i wi zə â ngii khənə daʼa kə.

23N nəŋə i tii zə, wù loʼ n loʼ fu n ndaw kədzəŋi ə ghə n zay kə bwu kə n kow wi. Tə n dey shi kɔʼ nə̀, 24“Wə fa bə ni bə ji ngee ghi ghey a Yeso ə Nazaled? Wə n bə ni bə ləŋi maʼa ghey ə? N khənu wù wey wə̀ loʼnə ghii wə, wə loʼ Wù Kəzə̀ u Zow wə.”

25Yeso n kii ndòw wi dza nə̀, “Zaŋŋə mbad doʼo mɔŋ, wə bə tsəghə shi n kow wi.”

26Sey, zay kə bwu key n mbvuŋə maʼa bə wù wey aghəd, nuu shi bə n kow wi n bɔŋ kə idey kə. 27Dzuu zə n ngii zum ghə̂ ghey ghə â loʼnə fu, ghə n bəbə n wû i ghə dza nə̀, “À wən loʼ kee? Dii i fəghə zə n daʼa kə tii, wù wən dəb ə tsəʼlə kəlaŋ tə̀ zay u bwu wə, wə a zownə tə̀ wi.”

28Sey, zɔŋ u wi wə n fuŋ tsəghə ndòw n mboʼo Galili idzəm.

Yeso baŋŋə ndəmə aghə̂

(Mat 8.14-17; Luk 4.38-41)

29Ambə ghə nuu tsunə n ndaw kədzəŋi ə ghə̂ a Təjuu, Yeso n nuu ndòw ghi Jems nsə Jɔn n ndaw Shimun nsə Andria. 30Nəwey Shimun n nyəŋ nə ukay n wû wə. Ghə n ney dza ndòw ghə i tii zə tə̀ Yeso. 31Sey, Yeso n ndòw n səə wi, tə n kwu tsu wi n wɔɔ, gaamə kɔʼ wi ni doʼlə naŋa kɔʼ wi idəŋ, wû u tii wə n daŋŋə zəghə tsu wi. Tə n zey ndòw ni laalə tə̀ ghə.

32N nəŋə i fənə zə, ghə̂ ghə n ney bə ghə̂ a dzaŋa ghə adzəm nsə ghə̂ ghey zay u bwu wə â loʼnə n kow ghə n səə Yeso. 33Ghə̂ ghə inaʼ a tii ghə adzəm ghə n bə zuŋŋə doʼo bə fu tii n fuʼ u ndaw u Shimun. 34Yeso n baŋŋə ndəmə aghə̂ n dzaŋa tə ghə, dzùm nuu shi soʼo ndəmə zay u bwu wə n kôw ghə̂ ghə. Tə n ka fu zay u bəbə wey n bùʼ kə nə̀ ghə ghɔɔmə shi kɔʼ təŋkey ghə â khənu wù wey tə loʼnə ghii wə.

Yeso gɔŋŋə n luʼu k-a-nyì

(Luk 4.42-44)

35Ambə n bəbələ tə, nə tsuʼ u ka kam zow, Yeso n nuu kɔʼ, zəghə tsu ndaw, nuu ndòw n luʼu k-a-nyi ni ndòw gɔŋŋə. 36Shimun nsə ghə̂ ghey ghə â loʼnə ghi wi n kaʼ wi nə u kəŋə wə. 37Ambə ghə bə koʼ tsunə wi, ghə n dza ndòw tə̀ wi nə̀, “ghə̂ adzəm a sa kəŋə kìi kaabə tsə wɔ.”

38Yeso n fəd dza ndòw tə̀ ghə nə̀, “bə na a ndòw n luʼu kə nuu kə, n naʼa tə loʼo tən tə kuʼlə loʼnə fa, tə̀ n mbɔŋ naʼa ndòw soʼo tûm Kəzə̀ fu, n təŋkey a wən loʼ ghəə zey n bənə ni bə fwaʼ fa n mbi.”

39Sey tə n bwey tsəghə kaabə ndòw mboʼo Galili idzəm, naʼlə ndòw tûm Kəzə̀ n ndaw tə udzəŋi tə ghə, dzùm shiə soʼo zay u bəbə wə n kôw ghə̂ ghə.

Yeso baŋŋə wù ukə̀m

(Mat 8.1-4; Luk 5.12-16)

40Wù ukə̀m u loʼ wə n ndòw bə, təm bə tənguʼ n tənnə Yeso, buʼ wi n wɔɔ kə nə̀ tə gaamə wi dza nə̀, “N khənu nə̀ abə wə ləghənə, wə loʼ ni ghəŋə mə nə n zow.”

41Yeso n kwɔɔlə isî n kow wi, tə n naalə shi ndòw kəwɔɔ, mɔm tsu wi dza nə̀, “n ləghənu nə̀ wə zow! Zow tsuʼ!” 42Kə̀m u wi wə n daŋŋə may tsu, tə n zow doʼo bə. 43Yeso n dza ndòw tə̀ wù tii nə̀ tə ndòw nuu nə̀ tə n tɔʼ kii naŋa ndow wi. 44Tə n dza tə̀ wi nə̀, “I kə̂ wə nə dzanə ghəə zən tə̀ wù loʼ. Teyyə ndòw wû wə, wə dii ndòw wû wə tə̀ fɔɔngili, tə̀ tə fwɔd tsu wɔ. Wə fuu ndòw maʼlə wey laŋ u Mushi wə â dzanə, ni dii tsu nə̀ ghə n wɔ sow maʼa.”

45Wù tii n nuu tsu, fəd zey ndòw ni naʼa kaabə ghəə a tii ghə luʼu tədzəm. Wù tii n naʼa kaabə ndòw ghəə a tii ghə sa, Yeso n kəm way ni bwey nyi tənaʼa n mgbaŋ, tə n muu tən kə n luʼu tey ghə̂ a way fu. Sey, ghə̂ ghə n nam nuulə bə kə luʼu tədzəm bəghə n səə wi.

Currently Selected:

Malakus 1: WEH

Highlight

Copy