Jɔn 16

1Yeso n nam dza ndow tə̀ ngəd tə wi tə nə̀, “N dza naŋŋə zey bə ghəə ghən adzəm tə̀ ghaa, sey nə̀ kə̂ ghaa nə bwu doʼlənə n bəghəm i fə̀ŋ i ghaa. 2Ghə nə dzum nuu shiə bə ghaa n ndaw tə udzəŋi tə ghə̂ a Təjuu. N ndzəmə dza bə tə̀ ghaa nə̀, nəŋə i bəghənu, nə̀ a wey kə ndee ghaa, wù tii n moʼlə kə nə̀ i sey fwaʼa fwaʼ key Zə̀ kə ləghə nə̀ tə fwaʼ. 3Ghə nə ghəə ghən ghəŋŋə n kow ghaa, n təŋkey, ghə khə way mə, khə soʼo way Bày wuŋ. 4N ghəə ghən tə̀ ghaa dza naŋa bə, sey nə̀, abə nəŋə i tii zə i bənə tə̀ ghə ni ghəŋə ghəə ghən, ghaa i moʼlə tsu nə̀ n mâ ghaa tyələ naŋa zey. N ka khə dza dzə ghəə ghən tə̀ ghaa nə nzeyyə, n təŋkey, saa â dzəŋi loʼ adzəm.”

Fwaʼ key Zay kə Zow kə i fwaʼanə

5Yeso n ndow n sə kə ni dza tə̀ ngəd tə wi tə nə̀, “N sa nya nuulə ndow ibam n səə wù wey tə â tûm bənə mə, wù ghaa umɔʼ n fəŋŋə kə ghaa ka tsəm bəb tə̀ mə nə̀, ‘Wə ndow ghee?’ 6A dza ghaa zow bə dzə ghəə ghən n dzanə fa, ghaa u zey ndow ni mow n fə̀ŋ tə ghaa. 7N kee nam dza bə kə isəŋə tə̀ ghaa nə̀, a loʼ n ndzuŋ ə ghaa n nuulə ndownə, n təŋkey, abə n ka nuu ndow, Wù wey tə tsə̀ənə ghə̂ ghə i bə way. Nə n kee nuu ndow dzənu, mə i ndow tûm bə wi tə̀ ghaa. 8Abə wù wey tə tsə̀ənə ghə̂ ghə i bənə, tə nə ghəŋə nə̀ ghə̂ a mbi a keeli nə̀ ghə ghəŋŋə ghəə a bəbə ghə, tə nə dii soʼo nghee ghə khə ni loʼ tsətsəghə n sə̂ K-a-zə̀ nsə nə̀ Zə̀ kə nə saʼanu ghə̂ ghə adzəm. 9Tə nə dii tə̀ ghə nə̀ ghəə zey ghə ghəŋə bəəbənə loʼ nə̀ ghə ka bəghəm fu dzə tə̀ mə. 10Tə nə dii soʼo tə̀ ghə nə̀ ghə n bwu khə̂mə n ghəə ghey a loʼnə tsətsəghə, n təŋkey, n sa ndow n səə Bày, sey, ghaa nə kəm koʼo tsə way mə. 11Abə n buʼ kə saʼa key, tə nə dii ndow tə ghə nə̀, Zə̀ kə nə saʼanu mbi i zən, n təŋkey, ghə n saʼ tsəghə Satan də̀ŋ kə mbi, tûm wi n bad kə ghə̂ a bəbə kə.

12N nam khə ndəmə tə aghəə ni dza tə̀ ghaa, N way ni dza nya, n təŋkey, tow u ghaa wə i way ni kwu keeli may ghəə a tii ghə. 13Abə Zay kən kə dìi bənə isəŋə bòʼ Kəzə̀ nə bənə, tə nə dìi bə ghaa nə isəŋə kuum Kəzə̀. Zay kə Zow kə nə ghɔɔmə way ghəə ghə n daʼa kə wi, tə nə teeli ghɔɔmə kə ghəə zey tə zow ghii zə, tə nə dza zey bə tə̀ ghaa ghəə zey i khə ni bə shi. 14Zay kə Zow kə nə ghəŋə nə̀ n keeli nkɔʼlə, n təŋkey, tə nə ney kɔʼɔ ghɔɔmə zuŋ tə tiilə dza bə tə̀ ghaa. 15Fə wən udzəm Bày khənə, loʼ u wuŋ wə, a wey loʼ ghə i tii zə n dza bənə tə ghaa nə̀ Zay kə Zow kə i ney kɔʼɔ ghəə ghey n dzanə, tə tiillə dza bə tə̀ ghaa.”

Yeso dza tə ngəd tə wi tə nə̀ mow i ghə zə i fədlə doʼlə bə iduʼlə

16Yeso n nam dza ndow tə̀ ngəd tə wi tə nə̀, “Fəkəmə kə sa, ghaa i kəm koʼ way mə, abə n nuu ndownə, ghab kə i ka shi, ghaa i kəm koʼ dzəŋŋə tsu mə.”

17Ngəd tə wi tə loʼ tə n bəbə n wû i ghə nə̀, “I baa dii nə̀ ngee nghee tə dzanə nə̀, ‘Fəkəmə kə sa, ghaa i kəm koʼ way mə, abə n nuu ndownə, ghab kə i ka shi, ghaa i kəm koʼ dzəŋŋə tsu mə’, nsə nə̀ ‘À loʼ n təŋkey, n ndow n səə Bày’ ə?” 18Ghə n nam bəbə kə n wû i ghə nə̀, “Tə baa dza i dìi bə nə̀ ngee ni dza tsu nə̀, ‘Fəkəmə kə sa a?’ Ghey buʼu zowkeeli soʼo way ghəə zey tə baa dzanə.”

19Yeso n koʼ keeli ndow nə̀ ghə ləghə ni bəb wi n ghəə zə, tə n daŋŋə dza ndow tə̀ ghə nə̀, “Ghaa bəbə kaabə n wû i ghaa nə̀ i dii nə̀ ngee nghee n dzanə nə̀, ‘Fəkəmə kə sa, ghaa i kəm koʼ way mə, abə n nuu ndow nə̀, ghab kə i ka shi, ghaa i kəm koʼ dzəŋŋə tsu mə?’ 20N kùm dza bə tə̀ ghaa nə̀ abə mə i nuu ndownə, ghaa nə deyyə, tsuulə nsə̂, ghə̂ a mbi a nə kee duʼlə. Ghaa nə mownu, ghab kə nə ka kee shi, mow i ghaa i nə fəd doʼo bə iduʼlə. 21Abə weyzən sòʼonə waa, tə n zow ifɔɔbə, n təŋkey, nəŋə i wi i jiə zə n shɔd. À n bə tə ji tsunə, tə n kəm way ni moʼlə fɔɔbə zey tə mə zownə idzəm, n təŋkey, duʼlə kə jiə kə waa kə fa n mbi kə n kɔʼ tsəghə. 22A wey bɔɔmə loʼ ghəə zey i shiənə nya ghi ghaa, ghaa mownu nya, a kee loʼ nə̀ mə i kəm koʼo kpiʼinu ghaa, fə̀ŋ tə ghaa tə i duʼlə n jìi zey wù loʼ nə kəm way ni ney nuu duʼlə i tii zə n wɔ ghaa. 23Abə nəŋə i tii zə i bənə, ghaa i kəm bəb way mə n ghə i loʼ zə. N kùm dza bənu tə ghaa nə̀, abə ghaa nə nɔɔ kə kee kə tə̀ Bày n zəd zuŋ, tə nə fuunu tə̀ ghaa. 24Ni bə taa bə na, ghaa ka kam bəb fə kə loʼ kə n zəd zuŋ. Bəb tsu n na nya, Bày wuŋ i fu tə̀ ghaa, tə ghaa loʼ ni duʼlə naʼ idzəm.”

Yeso təm zə̂ mbi

25Yeso n dza tə̀ ngəd tə wi tə nə̀, “N ghəə ghən dza bə nya tə̀ ghaa n ghɔɔmə i fənkəfən, nəŋə i kee bəghənu, mə i kəm ghɔɔmə way ghəə ghə tə̀ ghaa n ghɔɔmə i fənkəfən. N nəŋə i tii zə, n nə dza dzî bə aghəə tə̀ ghaa kùm Bày wuŋ n jìi zey ghaa loʼ ni zowkeeli. 26Abə nəŋə i tii zə i bənə, ghaa nə nɔɔ ndow fə kə n wɔ Bày nə igɔŋŋə n zəd zuŋ, nə a way dzə mə n nɔɔ fuu bənə tə̀ ghaa. 27I nə doʼlə sey n təŋkey, Bày wuŋ n wû u wi wə, ləghənu ghaa. Tə ləghə ghaa, bòʼ nə̀, ghaa n mə ləghə, bəghəm fuu soʼo nə̀ a loʼ wi tə tûm bənə mə. 28Mə â nuu bə n səə Bày, bə fa n mbi. N nya khə ni kəm zəghə tsu mbi n ndow dzəŋŋə n səə Bày.”

29Ambə tə ghɔɔmə tsunə sey, ngəd tə wi tə n kali ndow wi nə̀, “Wə nya ghɔɔmə dzî shiə bə aghəə, wə kəm fənnə ghɔɔmə way. 30Ghey n zowkeeli nya nə̀ wə khə aghəə adzəm. Wù loʼ kəm khə way ni bəb wɔ n ghə i loʼ zə, n təŋkey, wə n ghəŋə nə̀ ghey bəghəm fuu nə̀ a wɔ tûm bə Kəzə̀.”

31Yeso n bəb ndow tə̀ ghə nə̀, “Ghaa bəghəm fuu dzənu nya a? 32N ndzəmə dza bə tə̀ ghaa nə̀ nəŋə i tii i nya shɔdlɔ may bənu, zə n buʼ kpi. Ghaa adzəm ghaa i tyi naŋa taʼa mə n nəŋə mə, kay wù i tyi ndow kə n ndaw wi. À kee loʼ nə̀ n way dzə mə n nəŋə mə, n təŋkey, Bày wuŋ loʼ ghi mə. 33N ghəə ghən sa dza bə tə̀ ghaa nə̀ ghaa i khə buulə zə n fə̀ŋ tə ghaa, boʼnə ghaa loʼ n fə kəmɔʼ ghi mə. Ghaa nə ngii fəʼlənu fa n mbi, a kee loʼ nə̀ ghaa khə ni kuu tsu təfə̀ŋ tə a loʼ təsawgoʼ, n təŋkey, mə n təm zə̂ mbi.”

Currently Selected:

Jɔn 16: WEH

Highlight

Copy